ལུ་ཀ་ 7

མག་མི་རྒྱེ་ སྤོན་འབེ་ ཏེཏ་པ་།

མི་རྒུན་ལ་ ལབ་ཞ་ ཚང་མ་ སལ་ ཚར་རེ་རྡང་, ཡི་ཤུ་ ཀ་ཕར་ན་ཧུམ་མེ་ ཀྲོང་ཁྱེར་ལ་ རྐྱོད་། 2 ཏུ་རུ་ རོམ་པ་ མག་མི་རྒྱེ་ སྤོན་འབེ་, མ་ ཤེ་སྤ་ ཅོ་ཀ་ནེ་ ཡོག་པོ་ཞིག་ལ་ ཟུར་མོ་ ཧོཔ་ ཡོྃ་རྡེ་ ཤི་ཀྱི་ ཡོད་པེན་། 3 མག་མི་ སྤོན་འབོ་ལ་ ཡི་ཤུའི་ ཧོར་ལ་ ཚོར་རེ་རྡང་, རྐྱོད་ཏེ་ ཡོག་པོ་རྦོ་ ཕན་ཅུག་རྒེ་ ཛེད་ཅེ་ ཞུ་ཝ་ པུལ་ཤེ་ལ་ ཡ་ཧུ་འདཱ་པེ་ འུ་རྐྱོང་ ཁ་ཅིག་ ཡི་ཤུ་ས་ ལམ་ཅུག་། 4 ཁོང་རྒུན་ ཡི་ཤུ་ས་ ཡོྃ་ ཡང་ ཉིང་ནི་ ཞུ་ཝ་ ཧོཔ་ པུལ་རྡེ་ ཟེར་, “འི་ མིའུ་ ཉེ་རང་ངེ་ ཡ་ཏོ་ ཛེད་ཅེ་ འོའེ་སྤ་ ཡོད་ 5 ཅེ་ཟེར་ནི་ ཁོའེ་ ཨ་ཧོའེ་ མི་རྒུན་ལ་ ཤེ་སྤ་ ཅོའེ་རྡེ་ ཨ་ཧོའེ་ འདུ་ཀང་འབོ་ སིག་རྒེ་ལ་ ཡ་ཏོ་ ཅོའེ་རྡེ་ འིན་།” 6 ཏེ་ནི་ ཡི་ཤུ་ ཁོང་རྒུན་ ཉམ་པོ་ རྐྱོད་།

ཁང་པེ་ ཚམ་ལ་ ལེབ་ཏེ་ ཡོད་ཟ་ནི་, མག་མི་རྒྱེ་ སྤོན་འབེ་ ཁོ་རང་ངེ་ ཡ་ཏོ་རྒུན་ ཡི་ཤུ་ འི་ཟུག་ ཟེར་ཤེ་ལ་ ཀལ་ “ཙོབོ་ འོབ་རྒྱལ་ མ་ཛེད་, ཉེ་རང་ ངེ་ ཁང་པ་ རྐྱོད་ཅེ་ འོའེ་སྤ་ ང་ མེད་། 7 ཏེ་རྒ་ རྒྱུ་ཚན་འབེ་ཕི་ ང་ ཉེ་རང་ངེ་ འདུན་ལ་ འཇལ་ཤེ་འབོ་ལ་ འོའེ་སྤ་ མ་ཚོར་། འིན་ན་ ཉེ་རང་ངེ་ ཀཱ་ སལ་ནི་, ངེ་ ཡོག་པོ་ ཕན་ནེན་། 8 ཝང་ཆེ་ ཡོག་ལ་ ང་ལ་ འདེད་རྡེ་ཡོད་ ཡང་ ངེ་ ཝང་ཆེ་ ཡོག་ལ་ མག་མི་རྒུན་ ཡོད་། ངེ་ ཅིག་ལ་ སོང་ ཟེར་ནི་ ཆ་ནོག་ ཡང་ ཅིག་ལ་ ཤོ་ ཟེར་ནི་ ཡོང་ངེ་ནོག་, ཡང་ ངེ་ ཡོག་པོ་ལ་ འི་ ལེ་ཧ་རྦོ་ ཅོའེ་ ཟེར་ནི་ ཅོ་ནོག་།”

9 ཡི་ཤུའི་ ཏོ་ སན་ནེ་རྡང་, ཧ་ལེ་རྡེ་ ཁོང་ལ་ འགྲྃ་རྡེ་ ཡོང་ཀ་ནེ་ མི་ཚོག་ ཆོག་ལ་ འགྱུར་རྡེ་ མོལ་, “ངེ་ ཁྱི་ཞ་ ཟེ་འིན་, ཨིས་ར་ཡེལ་ལེ་ན་ ང་ ཡུ་ཙོག་སེ་ ཏེཏ་པ་ཅན་འཇིག་ མ་ནི་ མ་ཐོབ་།” 10 ཏེ་ནི་ ལམ་ཅུག་ཀ་ནེ་ མི་རྒུན་ ཁང་པ་ ལོག་ཏེ་ ལེབ་རྦེ་རྡང་, ཡོག་པོ་ལ་ ཟུར་མོ་ རྒྱལ་རྡེ་ ཐོང་།

ཡི་ཤུའི་ མ་རང་མོ་ཞིག་རྒེ་ པུ་ཙ་ སོན་པོ་ ལང་ངེ་ ཛེད་།

11 ལྟིང་མ་ཞག་ལ་ ཡི་ཤུ་ ནཱ་ཡིན་ ཀྲོང་ཁྱེར་ལ་ རྐྱོད་, ཡང་ ཁོང་ངེ་ ལོབ་ཀྲུག་ ཏང་ མི་ཚོག་ མང་པོ་ཞིག་ ཁོང་ ཉམ་པོ་ སོང་། 12 ཀྲོང་ཁྱེར་རེ་ རྒྱེ་རྒོའེ་ ཉེ་མོ་ ལེབ་རྦེ་རྡང་ འ་ནེ་ མ་རང་མོ་ཞིག་རྒེ་ པུ་ཙ་ ཅིག་ཅིག་པོ་ ཤི་ཀ་ནེ་ རོ་ ཕི་ལོག་ལ་ ཕིང་འདེ་ ཁྱོང་ངེ་ཡོད་པེན་ ཡང་ ཏོ་ ཀྲོང་ཁྱེར་རེ་ མི་ཚོག་ མང་པོ་ ཁོ་ ཉམ་པོ་ ཡོད་པེན་། 13 ཙོབོ་ ཡི་ཤུའི་ པོ་མོ་ལ་ ཟི་རྡེ་རྡང་, ཉིང་ཞེ་ རྐྱེ་རྡེ་ ཁོ་ མོལ་, “ངུ་ མ་ངུ་།” 14 ཏེ་ནི་ རོ་རྒམ་མེ་ འདུན་ལ་ རྐྱོད་རྡེ་ ཆག་སེ་ ཛེད་, སྤུར་ ཁུར་ཧན་རྒུན་ འགྲུལ་ མ་འགྲུལ་ལེ་ འདེད་། ཁོང་ངེ་ མོལ་, “ཁྱོག་ཏོང་ ཁྱེ་རང་ལ་ ངེ་ ཟེ་འིན་, ལོྃ་།” 15 ཤི་ཀན་འབོ་ ལྃ་རྡེ་ སྤེ་ར་ ཏང་ཅེ་ འགོ་ཟུག་ ཡང་ ཡི་ཤུའི་ ཁོ་ ཁོ་རང་ངེ་ ཨ་མ་ ལྟེད་རྡེ་ ཛེད་།

16 མི་ཚང་མ་ འཇིའི་རྡེ་རྡང་ ཀོན་འཇོག་ལ་ སི་ཝ་ རྡང་ རྟོད་པ་ པུ་ལེན་ ཟེར་, “ལུང་རྟོན་པ་ ཀྲག་པོ་ཞིག་ ཨ་ཧོའེ་ ཕྲོ་ རྐྱོད་ཏེ་ ནོག་། ཀོན་འཇོག་ ཨ་ཧོའེ་ མི་རྒུན་ལ་ ཡ་ཏོ་ ཛེད་རྡེ་ལ་ རྐྱོད་ཏེ་ ནོག་།” 17 ཏེ་ ནེ་ཚུལ་རྦོ་ ཡ་ཧུ་འདཱེ་ ཡུལ་ཞོང་ སོན་ཏེ་ རྡང་ ཉེ་ཁོར་རེ་ ཡུལ་ ཚང་མེ་ན་ ཕེལ་།

ཡི་ཤུ་ རྡང་ ཁྲུའི་སལ་ཧན་ ཡོ་ཧཱ་ནན་།

18 ཡོ་ཧཱ་ནན་ནེ་ ལོབ་ཀྲུག་རྒུ་ནི་ ཁོང་ལ་ ཡི་ཤུའི་ ཛེད་ཀན་ ཚང་མ་ ཤེད་པེ་, ལོབ་ཀྲུག་ ཉི་ འབོའེ་རྡེ་, 19 ཙོབོ་ ཡི་ཤུ་ས་ འི་ ཏྲི་ཝ་རྦོ་ འདྲི་ལ་ ལམ་ཅུག་, “ལུང་རྟོན་པ་རྒུ་ནི་ རྐྱོད་རྡེན་ མོལ་ཧན་ མ་ཤི་ཀ་ ཉེ་རང་ ཞུ་རྡེ་ འིན་ནེ་ ཡ་ ང་ཞ་ ཡང་འཇིག་ལ་ སྲུང་?”

20 ཁོང་རྒུན་ ཡི་ཤུ་ས་ ལེབ་རྦེ་རྡང་ ཟེར་, “ཁྲུའི་སལ་ཧན་ ཡོ་ཧཱ་ནན་ནེ་ ང་ཞ་ འི་རྦོ་ འདྲི་ལ་ ཀལ་, ‘ལུང་རྟོན་པ་རྒུ་ནི་ རྐྱོད་རྡེན་ མོལ་ཧན་ མ་ཤི་ཀ་ ཉེ་རང་ ཞུ་རྡེ་ འིན་ནེ་ ཡ་ ང་ཞ་ ཡང་འཇིག་ལ་ སྲུང་?’”

21 ཏེ་རྒ་ ཏུའི་ལ་ ཡི་ཤུའི་ ནེད་ ཡོ་ཀན་, ཟུར་མོ་ ཡོ་ཀན་ མང་པོ་ ཕན་ཅུག་, འགོང་པོ་ ཞུ་ཧན་ མང་པོ་ ཕིང་ངེ་ ཛེད་ ཡང་ ཞ་ར་ མང་པོ་ལ་ མིག་ནི་ ཐོང་ཅུག་རྒེ་ ཛེད་། 22 ཡི་ཤུའི་ ཁྲིན་ ཁྱོང་ཀན་རྒུན་ལ་ ལེན་སལ་, “ལོག་ཏེ་ སོང་ ཡང་ ཁྱི་ཞི་ ཐོང་ཀན་ འདང་ ཚོར་ཧན་རྒུན་ ཡོ་ཧཱ་ནན་ལ་ ཤོད་། ཞ་ར་རྒུན་ལ་ ཐོང་, ཞ་འོ་རྒུན་ འགྲུལ་, ཛེ་ནེད་ཅེན་རྒུན་ རྒྱལ་རྡེ་ སང་མ་ སོང་, མ་ཚོར་ཧན་རྒུ་ནི་ ཚོར་, ཤི་ཀན་རྒུན་ སོན་པོ་ ལྃ་, ཡང་ ཉལ་རྦ་ཅེན་རྒུན་ལ་ ནེ་ཚུལ་ ཟང་པོ་ ཤེད་། 23 ཁོ་ ཤོད་, ངེ་ ཅོ་ཀན་རྒུ་ནི་ ཅོའེ་རྡེ་ ང་ མ་ཕང་ཀན་རྒུན་ལ་ ཅིན་ལབ་ སལ་ལེ་ ཛེ་རྡེན་།”

24 ཡོ་ཧཱ་ནན་ནེ་ ཁྲིན་ ཁྱོང་ཀན་རྒུན་ ལོག་ཏེ་ སོང་ ཚར་རེ་རྡང་, ཡི་ཤུའི་ མི་ཚོག་ལ་ ཡོ་ཧཱ་ནན་ནེ་ ཧོར་ལ་ མོལ་ཅེ་ འགོ་ཟུག་, “ཁྱི་ཞ་ རི་ལྟོང་ངེ་ན་ ཀ་ཟུག་ མི་ཞིག་ལ་ ལྟ་ལ་ སོང་འབེན་? ཆུའི་ ཐ་མེ་ ལྗང་པ་ ལུང་སྤེ་ རྒུལ་ལེ་ ཙོག་སེ་, ལབ་ཞེ་ན་ ཏུའི་རྒྱུན་ འགྱུར་ཞ་ ཁྱོང་ཀན་ ཞིག་རྒེ་? 25 ཀལ་ཏེ་ མ་ནི་ ཁྱི་ཞ་རྒུན་ ཅི་ ལྟ་ལ་ སོང་འབེན་? མི་ ཀོའེ་ལག་ འཇམ་པོ་ རྡང་ རིན་ཅེན་ ཀོན་ཀན་ཞིག་ ཁྱི་ཞ་རྒུ་ནི་ ཐོང་ངེ་? མ་ཐོང་། ཀོའེ་ རིན་ཅེན་ ཀོན་ཀན་ འདང་ རིན་ཅེན་ ཅ་ལག་ ཀོལ་ལེན་ མི་ཙེ་ པུད་ཀན་རྒུན་ རྒྱ་སྤེ་ ཁར་ལ་ འདེད་རྡེ་ནོག་། 26 ཁྱི་ཞ་ ལུང་རྟོན་པ་ཞིག་ལ་ ལྟ་ལ་ སོང་འབེན་ནེ་? འོ་ནེ་, ཁོ་ ལུང་རྟོན་པ་སང་ ཀྲ་རྒེ་ཞིག་ འིན་། 27 ཏམ་པེ་ སུང་རབ་རྦེ་ན་ ཁོའེ་ ཧོར་ལ་ ཀོན་འཇོག་རྒེ་ མོལ་ལེ་ ཛེད་ཏེ་ འདུག་,

‘ལྟོའེ་, ཁྱེ་རང་ངེ་སང་ ངུལ་ལ་ ངེ་ ང་རང་ངེ་ ཁྲིན་ཁྱེར་ཧན་འབོ་ ཀ་ལེན་།

ཁོའེ་ ཁྱེ་རང་ངེ་ཕི་ ལམ་ ཀྲལ་འགྲིག་ ཅོའེན་།’

28 ངེ་ ཁྱི་ཞ་ ཟེ་འིན་, ཏག་ས་ཚུག་པ་ རྐྱེ་ཧན་ མི་རྒུ་ནི་ ནང་ནི་ ཡོ་ཧཱ་ནན་ནེ་སང་ ཀྲ་རྒེ་ཞིག་ སུ་ལ་ མེ་ཀག་, འིན་ན་ རྡེ་བ་ཅན་ནེ་ རྒྱལ་སྲིད་རྡེ་ན་ ཆུང་ཤོག་རྦོ་ ཡོ་ཧཱ་ནན་ནེ་སང་ ཀྲ་རྒེ་ འིན་།”

29 ཁྲལ་ནེན་ཀན་རྒུན་ལ་ ཐེའེ་རྡེ་ ཡི་ཤུའི་ མོལ་ཧན་རྒུན་ ཚོར་ཧན་ ཚང་མེ་, ཀོན་འཇོག་རྒེ་ ཀའ་ འདེན་བ་ ནོག་ ཟེར་ ཅེ་ཟེར་ནི་ ཁོང་རྒུ་ནི་ ཡོ་ཧཱ་ནན་ནེ་ སལ་ཧ་ནེ་ ཁྲུའི་ ནེན་འདེ་ འིན་འབེན་། 30 འིན་ན་ པ་རུ་ཤི་པ་རྒུན་ འདང་ ཆོའེ་ཁྲིམ་ལ་ ཁེ་སྤ་རྒུ་ནི་ ཡོ་ཧཱ་ནན་ནེ་ ཁྲུའི་ མ་ནེན་ནེ་ལ་ ཁོ་རང་རྒུ་ནི་ཕི་ ཀོན་འཇོག་རྒེ་ ཐབ་པོ་ ཕྃ་།

31 ཡི་ཤུའི་ མོལ་, “ངེ་ འི་ མི་རབ་པོ་ སུ་ ཉམ་པོ་ རྡུར་? ཁོང་རྒུན་ སུ་ ཙོག་སེ་ ནོག་? 32 ཁྲོམ་མེ་ན་ འདེད་ཀ་ནེ་ ཕྲུ་རྒུ་རྒུན་ ཙོག་སེ་ ཀའོ་རྒུ་ནི་ ཅིག་ ཏང་ ཅིག་ལ་ འབོའེན་ ཟེར་རྡུག་,

‘ང་ཞི་ ལིང་ངུ་ ཕུའི་རྡེ་ལ་ ཁྱི་ཞ་ མ་སེ་།

ང་ཞི་ ཤེད་པ་ ཏང་ཟ་ནི་ ཁྱི་ཞ་ མ་ངུའི་།’”

33 “ཏེ་རྒ་ ཙོག་སེ་ ཡོ་ཧཱ་ནན་ ཁྲུའི་སལ་ཧན་ ཡོྃ་རྡེ་ ཁར་ཞི་ མ་ཟོའེ་ ཡང་ རྒུན་འགྲུམ་མེ་ ཁོའེ་ མ་ཐུྃ་རྦེ་ ཁྱི་ཞི་ ‘ཁོའེ་ན་ རྡུད་ ཞུ་རྡེ་ནོག་’ ཟེར་། 34 མི་རིག་རྒེ་པུ་ ཟ་ཀན་ ཐུང་ཀན་ ཡོང་རྡེ་, ཁྱི་ཞི་ ཁོ་ མ་ ཟ་ཀན་ ཐུང་ཀན་ ཡང་ ཁྲལ་ནེན་ཀན་ འདང་ རྡིག་ཅེན་རྒུ་ནི་ ཡ་ཏོ་ ནོག་ ཟེར་། 35 འིན་ན་ ང་ཞ་ ཀོན་འཇོག་རྒེ་ ཤེ་རབ་རྦེ་ ལམ་མེ་ཀ་ འགྲུལ་ཧན་འབོ་ ཤེ་རབ་ཅེན་རྒུ་ནི་ ཤེ་རྡེ་ནོག་།”

ཡི་ཤུའི་ རྡིག་ཅེན་ པོ་མོ་ཞིག་ལ་ ཤག་སྤ་ སལ་།

36 ཏེ་ནི་ པ་རུ་ཤི་པ་ཞིག་རྒེ་ ཡི་ཤུ་ ཁོའེ་ ཁང་པ་ འདོན་ཏང་ལ་ འབོའེ་རྦེ་, ཡི་ཤུ་ ཁོའེ་ ཁང་པ་ རྐྱོད་ཏེ་ འདོན་ཏང་ འདོན་ནེ་ལ་ ཅོག་ཙེ་ འདུན་ལ་ ཞུའུ་། 37 ཏེ་ ཀྲོང་ཁྱེར་རེ་ན་ རྡིག་ཅེན་ པོ་མོ་ཞིག་ལ་ ཡི་ཤུ་ པ་རུ་ཤི་པེ་ ཁང་པ་ འདོན་ཏང་ འདོན་ནེ་ ཞུ་རྡེ་ ཡོ་ཀན་འབོ་ ཚོར་རེ་རྡང་, ཁོ་ ཀ་ཡོལ་ལེ་ ནོད་ ཏྲི་ཞིམ་མེ་ མར་ རིན་ཅེན་ ཧང་ཀན་ ཁུར་རྡེ་ ཡོྃ་། 38 ཡི་ཤུའི་ རྒྱབ་ལ་ ཁོང་ངེ་ ཞབ་རྦེ་ འདུན་ལ་ པིག་ཛུམ་ རྒྱབ་ཏེ་ ངུའིན་འདང་ ཆི་མག་ ཉམ་པོ་ ཁོང་ངེ་ ཞབ་ ལོན་པ་ ཅོའེ་རྡེ་ ཁོ་རང་ངེ་ སྲ་ ཉམ་པོ་ ཕིན་, འོ་ ཏང་ངེན་, ཁོའེ་ ཏྲི་ཞིམ་ཅེན་ནེ་ མར་ ལུག་།

39 ཡི་ཤུ་ འདོན་ཏང་ལ་ འབོ་ཀ་ནེ་ པ་རུ་ཤི་པེ་ ཏོ་རྒུན་ ཐོང་འདེ་, “ཀལ་ཏེ་ ཁོང་ ལུང་རྟོན་པ་ཞིག་ འིན་ནི་, ཁོང་ལ་ ལག་པ་ སེན་ ཡོ་ཀ་ནེ་ པོ་མོ་ རྡིག་ཅེན་ཞིག་ འིན་ཀན་ ཤེ་རྒོའེ་།” སམ་།

40 ཁོའེ་ སམ་མེན་ ཡོ་ཀན་འབོ་ལ་ ཡི་ཤུའི་ ལེན་སལ་, “ཤི་མོན་ ངེ་ ཁྱེ་རང་ལ་ ཅིག་ ཟེ་རེན་།” ཁོའེ་ ཟེར་, “ལོབ་རྦོན་ལེ་ མོལ་ལེ་ ཛེད་།”

41 “པུ་ལོན་ ཏང་ཀན་ཞིག་རྒེ་ མི་ ཉི་ལ་ མུལ་ པུ་ལོན་ལ་ ཏྃ་, ཅིག་པོ་ལ་ ཞག་ ངཔ་རྒྱེ་ ལ་ཆ་ ཟམ་ཤིག་ ཡང་ ཅིག་པོ་ལ་ ཞག་ ངཔ་ཅུའི་ ལ་ཆ་ ཟམ་ཤིག་། 42 ཁོང་ ཉ་ཧ་ལ་ པུ་ལོན་ ལོག་ཏེ་ ཤལ་ མ་ཉེན་ཤེ་ཀ་ནི་ པུ་ལོན་ ཏང་ཀན་འབེ་ ཁོང་རྒུ་ནི་ པུ་ལོན་འབོ་ པུད་ཏྃ་། ཏ་ ཁོང་རྒུ་ནི་ ནང་ནི་ སུའི་ པུ་ལོན་ ཏང་ཀན་འབོ་ལ་ མང་ངེ་ ཤེ་སྤ་ ཅོའེན་?”

43 ཤི་མོན་ནེ་ ཟེར་, “ངེ་ ས་མེ་རག་ པུ་ལོན་ མང་ངེ་ པུད་ཀན་འབེ་།” ཡི་ཤུའི་ མོལ་, “ཁྱེ་རང་ངེ་ ཀྲང་པོ་ ཟེར་།”

44 ཏེ་ནི་ པོ་མོ་ ཆོག་ལ་ ཟི་རྡེ་ ཡི་ཤུའི་ ཤི་མོན་ལ་ མོལ་, “འི་ པོ་མོ་ ཐོང་ངེ་? ང་ ཁྱེ་རང་ངེ་ ཁང་པ་ ཡོྃ་རྡེ་ལ་ ཁྱེ་རང་ངེ་ ངེ་ ཧང་པ་ ཁྲུ་ལ་ ཆུ་ མ་ཏྃ་, འིན་ན་ འི་ པོ་མོ་ ངེ་ ཧང་པ་ ཁོ་རང་ངེ་ ཆི་མག་ ཉམ་པོ་ ཁྲུའི་རྡེ་ སྲ་ ཉམ་པོ་ ཕི་། 45 ཁྱེ་རང་ངེ་ ང་ འོ་ མ་ཏྃ་ འིན་ན་ འི་ པོ་མོ་རྦེ་ ང་ འི་ན་ ཡོྃ་རྦེ་ནི་ཕ་ལ་ ངེ་ ཧང་པ་ལ་ འོ་ ཏང་ངེན་ འདེད་། 46 ཁྱེ་རང་ངེ་ ངེ་ འགོ་ལ་ མར་ མ་ཧུའི་ འིན་ན་ འི་ པོ་མེ་ ཏྲི་ཞིམ་འབོ་ ངེ་ ཧང་པེ་ཀ་ ལུག་།”

47 “ངེ་ ཁྱེ་རང་ལ་ ཟེ་འིན་, འི་ པོ་མེ་ རྡིག་པ་ ཅོ་ཀན་ མང་པོ་ལ་ ཤག་སྤ་ ཏྃ་རྦེ་, ཁོའེ་ ཤེ་སྤ་ མང་པོ་ ཅོའེ་། འིན་ན་ རྡིག་པ་ ཉུང་ཙེ་ ཅོ་ཀ་ནེ་ རྡིག་པ་ ཤག་སྤ་ ཏང་ཀན་འབེ་ ཤེ་སྤ་ ཉུང་ཙེ་ ཅོའེ་།”

48 ཏེ་ནི་ ཡི་ཤུའི་ པོ་མོ་ལ་ མོལ་, “ཁྱེ་རང་ངེ་ རྡིག་པ་རྒུན་ལ་ ཤག་སྤ་ ཏྃ་རྡེ་ འིན་།”

49 ཞེན་ འགྲོན་པོ་རྒུ་ནི་ ཁོ་རང་ ཅིག་ ཏང་ ཅིག་ལ་ ཟེར་, “རྡིག་པ་ ཤག་སྤ་ ཏང་ཅེ་ ཧམ་བ་ ཅོ་ཀ་ནེ་ འི་ མིའུ་ སུ་ ནོག་?”

50 ཡི་ཤུའི་ པོ་མོ་ལ་ མོལ་, “ཁྱེ་རང་ངེ་ ཏེཏ་པེ་ ཁྱེ་རང་ རྐྱོབ་ཏེ་ འིན་། ཏ་ སོང་ ཀོན་འཇོག་རྒེ་ ཞིའི་རྡེ་ ཁྱེ་རང་ ཉམ་པོ་ ལུའི་རྡེན་།”