ལུ་ཀ་ 6

ཡི་ཤུ་, ངལ་ཚོའེ་ ཞག་ ཙོབོ་།

ཡི་ཤུ་ ངལ་ཚོའེ་ ཞག་ལ་ ཞིང་ རྒྱུད་ཏེ་ རྐྱོད་རྡེ་ ཡོད་ཟ་ནི་, ཁོང་ངེ་ ལོབ་ཀྲུག་རྒུ་ནི་ ཞིང་ངེ་ ཉེ་མ་ ཅེད་ཏེ་ ལག་པེ་ཀ་ ཉེ་རྡེ་ ཟོའེ་། 2 པ་རུ་ཤི་པ་ ཁ་ཅིག་རྒེ་ འདྲི་, “ཁྱི་ཞ་རྒུ་ནི་ ངལ་ཚོའེ་ ཞག་ལ་ ལེ་ཧ་ ཅོའེ་རྡེ་ ཅེ་ ཆོའེ་ཁྲིམ་ ཅག་རྒེ་ཡོད་?”

3 ཡི་ཤུའི་ ཁོང་རྒུན་ལ་ ལེན་སལ་, “འདཱ་འབིད་ ཏང་ ཁོའེ་ ཁྲོ་པ་རྒུན་ ལྟོག་རྡེ་ ཡོད་ཟ་ནི་ ཅི་ཅོའེ་ ཏམ་པེ་ སུང་རབ་རྦེ་ ནང་ནི་ ཁྱི་ཞི་ མ་ནི་ མ་སིལ་རྦེ་ནེ་? 4 འདཱ་འབིད་ ཀོན་འཇོག་རྒེ་ ཁང་པེ་ན་ ཆོད་པ་ པུལ་སེ་ཀ་ སོང་འདེ་ ཏམ་པེ་ འདོན་ཀིར་ ཁུར་རྡེ་ ཟོའེ་, ཏོ་ ཡ་ཧུ་འདཱ་པེ་ ལ་མ་ མ་ནི་ ཟ་ཆོག་རྒེ་ མེད་པེན་, ཡང་ ཁོའེ་, ཁྲོ་པ་རྒུན་ལ་ ཏྃ་།” 5 ཏེ་ནི་ ཡི་ཤུའི་ ཁོང་རྒུན་ལ་ མོལ་, “མི་རིག་རྒེ་པུ་ལ་ ངལ་ཚོའེ་ ཞག་ལ་ ཅི་ ཅོ་ ཆོག་ ཡང་ མི་ཆོག་ ཟེར་ཤེ་ ཝང་ཆ་ ཡོད་།”

6 ཞེན་ ངལ་ཚོའེ་ ཞག་ཅིག་ལ་ ཡི་ཤུ་ འདུ་ཀང་ལ་ རྐྱོད་ཏེ་ ལབ་ཞ་ སལ་, ཏུ་རུ་ ལག་པ་ ཡོའེ་སྤ་ ཧམ་འདེ་ ཀོལ་ མ་ཉེན་ཀ་ནེ་ མི་ཞིག་ ཡོད་པེན་། 7 ཡི་ཤུའི་ ཁོ་ རྒྱལ་ཅུག་ནི་ ངལ་ཚོའེ་ ཞག་ལ་ ལེ་ཧ་ ཅོ་ཅེ་རྦོ་ལ་ ཉེད་ཀལ་ཅེ་ལ་ ཆོའེ་ཁྲིམ་ལ་ ཁེ་སྤ་རྒུན་ འདང་ པ་རུ་ཤི་པ་རྒུ་ནི་ ཁོང་ལ་ རྒྱལ་ལེ་ ཅོའེ་རྡེ་ ལྟོའེན་འདེད་།

8 ཁོང་རྒུ་ནི་ སམ་འབོ་ ཁྱེན་འདེ་ན་ ལག་པ་ ཧམ་ཀ་ནེ་ མིའུ་ལ་ ཡི་ཤུའི་ མོལ་, “ཤོ་ ཡང་ ཚང་མེ་ འདུན་ལ་ ལོྃ་།” ཏེ་ནི་ ཁོ་ ཡོྃ་རྡེ་ ལྃ་རྡེ་ འདེད་། 9 ཏེ་ནི་ ཁོང་ངེ་ ཁོང་རྒུན་ལ་ མོལ་, “ངེ་ ཁྱི་ཞ་ འདྲི་ཡོད་, ཆོའེ་ཁྲིམ་ ནང་ཞིན་ ངལ་ཚོའེ་ ཞག་ལ་ ལེ་ཧ་ ཟང་པོ་ ཅོ་ ཆོག་རྒེ་ནོག་རྒེ་ ཡང་ ངན་པ་, སྲོག་ སེད་ རྒོའེ་རྡེ་ནོག་རྒེ་ ཡང་ སྲོག་ རྐྱོབ་?”

10 ཡི་ཤུའི་ ཨུ་ འགྱུ་རེན་ ཁོང་ རེ་རེ་ལ་ ཟིའི་, ཏེ་ནི་ ལག་པ་ ཧམ་ཀན་འབོ་ལ་ མོལ་, “ལག་པ་ རྐྱོང་” ཡང་ ཁོའེ་ ལག་པ་ རྐྱང་འབེ་ ཏོ་ སིང་ རྒྱལ་། 11 འིན་ན་ ཁོང་རྒུན་ལ་ སྲོ་ ཧོཔ་ ཡོྃ་རྡེ་ ཡི་ཤུ་ ཉམ་པོ་ ཅི་ ཅོའེན་ ཟེར་རྡེ་ ཁོ་རང་རྒུ་ནི་ན་ ཀྲཔ་ ཅོ་ཅེ་ འགོ་ཟུག་།

ཡི་ཤུའི་ ཧུ་ཚབ་ ཅུག་ཉི་རྦོ་ ཧོ་ ཛེད་།

12 ཞག་ཤིག་ ཡི་ཤུ་ མོ་ལམ་ ཞུ་ལ་ རི་ཞིག་རྒེ་ཀ་ རྐྱོད་, ཡང་ ཚེན་ སོན་ཏེ་ ཀོན་འཇོག་ལ་ མོ་ལམ་ ཞུའི་། 13 ང་ཏོག་ ཆ་རྡང་ ལོབ་ཀྲུག་རྒུན་ འབོ་ ཛེད་ ཡང་ ཁོང་རྒུ་ནི་ ཕྲོ་ནི་ ཅུག་ཉི་ འདམ་མེ་ ཛེད་ཏེ་ ཁོང་རྒུན་ ཧུ་ཚབ་ལ་ ཧོ་ ཛེད་། 14 ཧུ་ཚབ་ ཅུག་ཉི་རྡེ་ མིང་རྒུན་,

ཤི་མོན་, ཡི་ཤུའི་ ཁོའེ་ མིང་ལ་ པི་ཏྲར་ ཏག་རྒེ་ ཛེད་, ཁོའེ་ ནོ་ ཨན་འགྲིརུ་, ཡ་ཀུབ་, ཡོ་ཧཱ་ནན་, ཕི་ལིབ་, འབར་ཐོལ་མཱ་, 15 མཏ་ཐ་, ཐོ་མཱ་ རྡང་ ཨལ་ཕཱེ་འུ་ པུ་ཙ་ ཡ་ཀུབ་, ཤི་མོན་ ཁོ་ ཡུལ་འདེད་ཅེན་ ཟེར་རྡེ་ཡོད་པེན་, 16 ཡུ་འདཱ་ ཡ་ཀུབ་རྦེ་ པུ་ཙ་ རྡང་ ཡུ་འདཱ་ ཀར་ཡོད་པ་ ཀ་རྦེ་ ལྟིང་ནི་ ཡི་ཤུ་ འགྲ་ཝོའེ་ ལག་ལ་ ལྟེད་།

ཅིན་ལབ་ ཏང་ འཇི་ནང་།

17 ཡི་ཤུ་ ཁོང་ངེ་ ལོབ་ཀྲུག་རྒུན་ ཉམ་པོ་ རི་ནི་ པབ་ཏེ་ འདེད་ས་ ཉོམ་ཤིག་ ཕལ་ཅེན་ཞིག་རྒེ་ཀ་ ཞུའུ་། ཏེ་ཀ་ ཁོང་ངེ་ ལོབ་ཀྲུག་ མང་པོ་ རྡང་ ཡ་ཧུ་འདཱ་པ་ ཡུལ་ཞོང་, ཡེ་རུ་ཤ་ལེམ་ རྒྱལ་ས་ ཡང་ རྒྱམ་ཚོའེ་ ཐ་མ་ ཡོ་ཀ་ནེ་ ཏཱ་ཡིར་ རྡང་ སི་འདཱོན་ རྒྱལ་ས་རྒུ་ནི་ ཡོང་ཀ་ནེ་ མི་ཚོག་ མང་པོ་ ཛོམ་འདེ་ ཡོད་པེན་། 18 ཁོང་རྒུན་ ཡི་ཤུ་ས་ ཁོང་ངེ་ ལབ་ཞ་ ཉེན་ཅེ་ ཡང་ ཁོ་རང་རྒུ་ནི་ ནེད་ རྒྱལ་ཅུག་རྒེ་ལ་ ཡོྃ་, ཡང་ འགོང་པོ་ ཞུ་རྡེ་ ཡོ་ཀན་རྒུན་ལ་ ཡི་ཤུའི་ ཕན་ཅུག་རྒེ་ ཛེད་། 19 མི་ཚང་མེ་ ཡི་ཤུ་ ལག་པ་ ཐུག་ཅེ་ ཙོན་འགྲུའི་ ཅོ་ཡོད་པེན་ ཅེ་ཟེར་ནི་ ཁོང་ངེ་ ནང་ནི་ ཕན་ཅུག་ཅེ་ ཤུག་ འབིང་འདེ་ ནེད་པ་ ཚང་མ་ རྒྱལ་ཅུག་རྒེ་ ཛེད་།

20 ཏེ་ནི་ ཡི་ཤུའི་ ལོབ་ཀྲུག་རྒུན་ལ་ ཟི་རྡེ་ མོལ་,

“ཉལ་རྦ་ཅེན་ ཁྱི་ཞ་ ཅིན་ལབ་ཅེན་ འིན་,

ཅེ་ཟེར་ནི་ ཁྱི་ཞ་ ཀོན་འཇོག་རྒེ་ རྒྱལ་སྲིད་ ནོར་ཧལ་ལ་ ཐོབ་རྦེན་།

21 ཏག་ས་ ལྟོ་ཧན་རྒུན་ ཁྱི་ཞ་ ཅིན་ལབ་ཅེན་ འིན་

ཅེ་ཟེར་ནི་ ཁྱི་ཞ་རྒུན་ ཚིམ་ཅུག་རྒེ་ ཛེ་རྡེན་།

ཏག་ས་ ངུ་ཀན་རྒུན་ ཁྱི་ཞ་ ཅིན་ལབ་ཅེན་ འིན་

ཅེ་ཟེར་ནི་ ཁྱི་ཞ་རྒུན་ རྒོད་རྡེན་།

22 མི་རིག་རྒེ་པུ་ལ་ ཏེཏ་པ་ ཅོ་ཅེ་རྦེ་

མི་རྒུ་ནི་ སོག་པོ་ ཅོའེ་རྡེ་,

ཁྲེལ་ ཅུག་ཏེ་ ཕྲོ་ མ་སྲེ་ལ་ ངན་པ་ ཐེ་ཀན་རྒུན་

ཁྱི་ཞ་ ཅིན་ལབ་ཅེན་ འིན་།

23 ཏུ་ཟུག་ ཆ་རྡང་ ཐེད་པོ་ ཅོའེ་རྡེ་ ཆོང་, ཅེ་ཟེར་ནི་ རྡེ་བ་ཅན་ནེ་ན་ ཁྱི་ཞ་ སོལ་རེ་ ཀྲག་པོ་ ཡོད་། ཏེ་རྒ་ ཙོག་སེ་ ངན་པ་ ཁོང་ངེ་ ཕ་མེ་པོ་རྒུ་ནི་ལ་ ཀོན་འཇོག་རྒེ་ ལུང་རྟོན་པ་རྒུན་ ཉམ་པོ་ ཅོའེ་རྦེན་,

24 འིན་ན་ ཁྱི་ཞ་ ཆུག་པོ་རྒུན་ལ་ ཙམ་ཤིག་རྒེ་ འཇི་སྤ་ མི་ཡོང་

ཁྱི་ཞ་རྒུན་ལ་ རྐྱིད་པོ་ ཐོབ་ཚར་རྡེ་ འིན་།

25 ཏག་ས་ ཀྲོཏ་པ་ འགྲྃ་ཧན་རྒུན་ ཁྱི་ཞ་ ཙམ་ཤིག་རྒེ་ འཇི་སྤ་ མི་ཡོང་

ཁྱི་ཞ་ ལྟོག་རི་ སྲན་ཀྲེ་ ཐོང་ངེན་།

ཏག་ས་ རྒོད་ཀན་རྒུན་ ཁྱི་ཞ་ ཙམ་ཤིག་རྒེ་ འཇི་སྤ་ མི་ཡོང་

ཁྱི་ཞ་རྒུན་ལ་ རྡུག་པོ་ རྡང་ ངུ་ཅེ་ ཡོང་ངེན་།

26 མི་ཚང་མེ་ རྟོད་པ་ ཏང་ཀན་ ཁྱི་ཞ་ ཙམ་ཤིག་རྒེ་ འཇི་སྤ་ མི་ཡོང་

ཁོང་རྒུ་ནི་ ཕ་མེ་པོ་རྒུ་ནི་ལ་ ཟུའི་མེ་ ལུང་རྟོན་པ་རྒུན་ལ་

རྟོད་པ་ ཏྃ་རྡེ་ འིན་འབེན་།”

འགྲ་ཝོ་རྒུན་ལ་ ཡ་ཤ་ ཅོ་ཅེ་།

27 “འིན་ན་ ངེ་ ཁྱི་ཞ་ ཉེན་ཀན་རྒུན་ལ་ ཟེ་འིན་, འགྲ་ཝོ་རྒུན་ལ་ ཤེ་སྤ་ ཡང་ ཁྱི་ཞ་ སོག་པོ་ ཅོ་ཀན་རྒུན་ལ་ ཟང་པོ་ ཅོའེ་, 28 ཁྱི་ཞ་ ངན་ ཏབ་ཀན་རྒུན་ལ་ ཅིན་ལབ་ ཏོང་ ཡང་ ཁྱི་ཞ་ ངན་པ་ ཅོ་ཀན་རྒུ་ནི་ཕི་ མོ་ལམ་ ཏོབ་། 29 ཀལ་ཏེ་ སུ་ཞིག་རྒེ་ ཁྱི་ཞི་ འགྲམ་པ་ ཡོའེ་སྤེ་ཀ་ འགྲམ་ལྕག་ ཏང་ནི་, འགྲམ་པ་ ཡོའེ་མ་ལ་ འགྲམ་ལྕག་ ནེན་ནེ་ལ་ ལྟོན་། ཀལ་ཏེ་ སུ་ཞིག་རྒེ་ ཁྱི་ཞི་ ཀོའེ་རྦོ་ ཀོག་ཏེ་ ཁྱེར་ནི་ ཁོ་ ཀུར་རྟ་ལ་ ཁྱེར་ཤེ་ནི་ རྒག་ མ་རྒག་། 30 ཏོང་ ཟེར་ཧན་ ཚང་མ་ ཏོང་, ཡང་ མི་འོའེ་སྤ་ ཅོའེ་རྡེ་ ཁྱི་ཞི་ ནོར་ ཁྱེར་ཧན་འབོ་ལ་ ལོག་ཏེ་ ཁྱོང་ མ་ཟེར་། 31 ཞེན་མེ་ ཁྱི་ཞ་ ཅོ་རྒོའེ་ སམ་ཀན་ ཙོག་སེ་ ཁྱི་ཞ་རྒུ་ནི་ལ་ ཞེན་མ་རྒུན་ལ་ ཅོའེ་།”

32 “ཀལ་ཏེ་ ཁྱི་ཞ་ ཤེ་སྤ་ ཅོ་ཀན་རྒུན་ལ་ ཁྱི་ཞི་ ཤེ་སྤ་ ཅོ་ནི་, ཁྱི་ཞ་ ཅི་ ཕན་ཏོག་ ཐོབ་རྦེན་། རྡིག་ཅེན་རྒུ་ནི་ལ་ ཁོང་ལ་ ཤེ་སྤ་ ཅོ་ཀན་རྒུན་ལ་ ཤེ་སྤ་ ཅོ་ནོག་། 33 ཡང་ ཀལ་ཏེ་ ཁྱི་ཞི་ ཁྱི་ཞ་ ཟང་པོ་ ཅོ་ཀན་རྒུན་ལ་ ཟང་པོ་ ཅོ་ནི་ ཁྱི་ཞ་ ཅི་ ཕན་ཏོག་ ཐོབ་རྦེན་? མི་ རྡིག་ཅེན་རྒུ་ནི་ལ་ ཏུ་ཟུག་ ཅོ་ནོག་། 34 ཡང་ ཀལ་ཏེ་ ཁྱི་ཞི་ ལོག་ཏེ་ ཐོབ་ཅེ་ རེ་ཝ་ ཡོ་ཀན་རྒུན་ལ་ རྐྱི་རྡེ་ ཏང་ནི་, ཁྱི་ཞ་ ཅི་ ཕན་ཏོག་ ཐོབ་རྦེན་? མི་ རྡིག་ཅེན་རྒུ་ནི་ལ་ རྡིག་ཅེན་རྒུན་ལ་ རྐྱི་རྡེ་ སོན་ཏེ་ ལོག་ཏེ་ ཐོབ་ཅེ་ རེ་ཝ་ པོ་རེ་ནོག་།”

35 “འིན་ན་ ཁྱི་ཞི་ འགྲ་ཝོ་རྒུན་ལ་ ཤེ་སྤ་ རྡང་ ཟང་པོ་ ཅོའེ་ ཡང་ ལོག་ཏེ་ ཐོབ་ཅེ་ སམ་བ་ མ་ཏང་ངེ་ ཁོང་རྒུན་ལ་ རྐྱིའི་། ཏེ་ནི་ ཁྱི་ཞ་ སོལ་རེ་ ཆོན་མོ་ ཐོབ་རྦེན་ ཡང་ ཁྱི་ཞ་རྒུན་ ཀུན་ཝང་ ཀོན་འཇོག་རྒེ་ ཕྲུ་རྒུ་རྒུན་ འགྱུ་རེན་ ཅེ་ཟེར་ནི་ ཁོང་ངེ་, ཀ་ཀྲིན་ མི་ཀྲན་ཀན་ འདང་ མི་ངན་པ་ ཚང་མ་ལ་ ཐུག་ཞེ་ ཟིའི་རྡེ་ནོག་། 36 ཁྱི་ཞི་ རྡེ་བ་ཅན་ནེ་ ཡབ་ ཉིང་ཞེ་ཅེན་ ཞུ་ཧན་ ཙོག་སེ་ ཁྱི་ཞ་ལ་ ཉིང་ཞེ་ཅེན་ འགྱུར་།”

ཞེན་མེ་ ཉེད་ཀལ་ ཕིང་ཅེ་།

37 “ཁྱི་ཞི་ ཞེན་མ་ལ་ ཉེད་ཀལ་ མ་ཅོ་ ཏེ་ནི་ ཁྱི་ཞ་ལ་ ཉེད་ཀལ་ མི་ཛེད་། ཞེན་མ་ ཉ་ཝེ་ན་ ལེབ་ཅེ་ འོའེ་སྤ་ འདུག་ མ་ཟེར་, ཏེ་ནི་ ཁྱི་ཞ་ལ་ ཉ་ཝེ་ ཆེད་པ་ མི་ཕོག་། ཤག་སྤ་ ཏོང་ ཏེ་ནི་ ཁྱི་ཞ་ལ་ ཤག་སྤ་ སལ་ལེ་ ཛེ་རྡེན་། 38 ཞེན་མ་ ཏོང་, ཏེ་ནི་ ཁྱི་ཞ་ལ་ སལ་ལེ་ ཛེ་རྡེན་, ཏོ་ ཏབ་ཅེ་ ནོད་རྡེ་ན་ ནེན་འདེ་ ཧང་འདེ་ ལུད་རྡེན་ ཀོན་འཇོག་རྒེ་ སེམ་ཀྲང་འདེ་ ཁྱི་ཞི་ ཐོའེ་ན་ ས་ལེན་། ཁྱི་ཞི་ ཀོལ་ཧ་ནེ་ ཚེད་པོ་ ཁྱི་ཞ་རྒུ་ནི་ཕི་ལ་ ཀོལ་ལེ་ ཛེ་རྡེན་།”

39 ཁོང་རྒུན་ལ་ སྲུང་ངུ་ རྒྱུད་ཏེ་ ཡི་ཤུའི་ མོལ་, “ཞ་ར་ཞིག་རྒེ་ ཞ་ར་ལ་ ལམ་ལྟན་ ཉེན་ནེན་ནེ་? ཉ་ཧ་ རྒོ་རོང་ངེ་ན་ མི་ཀྲུལ་ལེ་? 40 ལོབ་ཀྲུག་ ལོབ་རྦོན་ནེ་སང་ ཆེ་ མག་, འིན་ན་ ལོབ་རྦོན་ནེ་ ལོབ་ཞོང་ ཐར་ཁྱེལ་ ཐོབ་ཏེ་ ལྟིང་ནི་ ལོབ་ཀྲུག་ལ་ ཁོ་ ཙོག་སེ་ འགྱུ་རེན་།”

41 “ཁྱི་ཞི་ རང་ངེ་ མིག་ནི་ ཡོ་ཀ་ནེ་ ལྡུང་མ་ལ་ ནྃ་རྟག་ ཅོའོ་ མེད་ནི་ ཏེ་ནི་ སྤུན་ནེ་ མིག་རྒེ་ན་ ཡོ་ཀ་ནེ་ ཤིང་ཕེའོ་ལ་ ཅེ་ ལྟ་ཡོད་? 42 ཁྱེ་རང་ངེ་ སྤུན་ལ་, ‘ངེ་ ཁྱེ་རང་ངེ་ མིག་རྒེ་ ནང་ནི་ ཤིང་ཕེའོ་ ཕིང་ངེན་’ ཟེར་ཤེ་ ཧམ་པ་ ཀ་ཟུག་ལ་ ཅོ་ཡོད་, ནམ་ ཁྱེ་རང་ རང་ངེ་ མིག་རྒེ་ན་ ཡོ་ཀ་ནེ་ ལྡུང་མའོ་ ཁྱེ་རང་ལ་ ཐོང་ངེ་ མི་འདུག་། ཁྱི་ཞ་ ངའིན་པ་རྒུན་, ངུལ་ལ་ རང་ངེ་ མིག་རྒེ་ ལྡུང་མའོ་ ཕིང་, ཏེ་ནི་ སྤུན་ནེ་ མིག་རྒེ་ ནང་ནི་ ཤིང་ཕེའོ་ ཕིང་ངེ་ལ་ ཁྱི་ཞ་ སལ་སྤོ་ ཅོའེ་རྡེ་ ཐོང་ཉེན་ནེན་།”

ལྕང་མ་ རྡང་ ཏོ་རྦེ་ འབྲེ་རྦུ་།

43 “ལྕང་མ་ ཟང་པོ་ཞིག་ལ་ འབྲེ་རྦུ་ ངན་པ་ མི་མིན་ ཡང་ ལྕང་མ་ ངན་པ་ཞིག་ལ་ འབྲེ་རྦུ་ ཟང་པོ་ མི་མིན་། 44 ལྕང་མེ་ རིག་རྦོ་ ཏོ་རྦེ་ འབྲེ་རྦུའི་ཀ་ནི་ ཤེ་རྡེ་ནོག་། ཚེར་མ་ངེ་ཀ་ནི་ སྤིག་རྒེ་ ཁ་ཟོའེ་ ཡང་ ཚེར་མང་ངེ་ཀ་ནི་ རྒུན་འགྲུམ་མེ་ ཁ་ཟོའེ་ མི་ཏུ་། 45 མི་ ཟང་པེ་ སེམ་ ཟང་པེ་ པང་ཛོད་ནི་ འབྲེ་རྦུ་ ཟང་པོ་ མིན་ནེ་ནོག་, ཡང་ མི་ ངན་པེ་ སེམ་ ངན་པེ་ པང་ཛོད་ནི་ འབྲེ་རྦུ་ ངན་པ་ མིན་ནེ་ནོག་། ཉིང་ ཀང་འདེ་ ལུད་ཀན་འབོ་ ཁ་ནི་ འབིང་ངེ་ནོག་།”

མག་རྡེན་ན་ ཉི་།

46 “ཁྱི་ཞི་ ང་ ཙོབོ་ལེ་ ཙོབོ་ལེ་ ཅེ་ ཟེ་ཡིན་, ནམ་ ཁྱི་ཞི་ ངེ་ ཟེར་ཧན་རྒུན་ ཅོའོ་ མི་འདུག་? 47 ངེ་ཀ་ ཡོྃ་རྡེ་ ངེ་ སྤེ་ར་རྒུན་ ཉེན་འདེ་ ཏེ་རྒ་ ལག་ལེན་ ཅོ་ཀན་འབོ་ ཀ་ཟུག་ མི་ཞིག་ འིན་ ངེ་ ཁྱི་ཞ་ ལྟན་ནེན་། 48 ཁོ་, ཁང་པ་ སིག་ཅེ་ལ་ རྒོ་རོང་ ཏྲུའི་རྡེ་ ཀྲག་རྒེ་ཀ་ མག་རྡེན་ ཏང་ཀ་ནེ་ མི་ ཙོག་སེ་ འིན་། ཆུ་ལོག་ ཡོྃ་རྡེ་ ཁང་པ་ སྲན་ཀྲེ་ ཕོག་ཏེ་ ཞིག་ མ་ཞིག་ ཅེ་ཟེར་ནི་ ཏོ་ རྟེམ་པོ་ སིག་ཏེ་ ཡོད་པེན་། 49 ངེ་ ཟེར་ཧན་རྒུན་ ཚོར་རྡེ་ ལག་ལེན་ མ་ཅོ་ཀན་འབོ, མག་རྡེན་ མ་ཏྃ་ལ་ ཁང་པ་ ཐང་ཀེ་ཀ་ སིག་ཀན་ ཙོག་སེ་ འིན་། ཆུ་ལོག་རྒེ་ ཆུ་ ཕོག་རྒེ་རྡང་ ཁང་པ་འབོ་ ཞིག་ཏེ་ ལྡུ་མེ་ མེ་ཀན་ ཆེན་།”