ལུ་ཀ་ 5

ཡི་ཤུའི་ ལོབ་ཀྲུག་ ཏང་པོ་།

ཞག་ཤིག་ ཡི་ཤུ་ འགེ་ནེ་ས་རེད་ ཚོའེ་ ཐ་མ་ ཞྃ་རྡེ་ ཡོད་ཏུའི་, ཀོན་འཇོག་རྒེ་ ཀའ་ ཉེན་ཅེ་ལ་ ཁོང་ལ་ མི་ཚོག་ མང་པོ་ཞིག་རྒེ་ ཧོར་རྡེ་ ནེ་ནེན་ ཁྱོང་ངེ་ཡོད་པེན་། 2 ཁོང་ངེ་ ཆུ་འགྲུལ་ ཉི་ ཚོའེ་ ཐ་མ་ པོར་རྡེ་ ཟིའི་, ཉ་པ་རྒུན་ ཏེ་ནང་ནི་ འབིང་འདེ་ ཉ་འདོལ་རྒུན་ ཁྲུ་ཡོད་པེན་། 3 ཤི་མོན་ པི་ཏྲ་རེ་ འིན་ཀ་ནེ་ ཆུ་འགྲུལ་རྦེ་ན་ རྐྱོད་ཏེ་ ཡི་ཤུའི་ ཁོ་ ཆུ་འགྲུལ་རྦོ་ ཐ་མ་ནི་ ཙི་རྦིག་ ཆུའི་ན་ ཁྱེར་ཤེ་ལ་ མོལ་ ཡང་ ཆུ་འགྲུལ་ལེ་ཀ་ ཞུ་རྡེ་ མི་ཚོག་ལ་ ལབ་ཞ་ སལ་།

4 ལབ་ཞ་ སལ་ ཚར་རེ་རྡང་ ཁོང་ངེ་ ཤི་མོན་ལ་ མོལ་, “ཆུ་ རྒོ་རོང་ ཡོད་ས་ ཆུ་འགྲུལ་ ཁྱེར་རྡེ་ ཉ་ ཟུམ་ཅེ་ལ་ ཉ་འདོལ་རྦོ་ ཕོང་།”

5 ཤི་མོན་ནེ་ ཁོང་ལ་ ཟེར་, “སྤོན་འབོ་ལེ་, ང་ཞི་ ཚེན་ སོན་ཏེ་ ཙོན་འགྲུའི་ སྲན་ཀྲེ་ ཅོའེ་རྡེ་ལ་ ཉ་ ཅིག་རྒང་ མ་ཁད་། འིན་ན་ ཉེ་རང་ངེ་ མོལ་ཤེ་ཀ་ནི་ ངེ་ ཉ་འདོལ་ ཕྃ་རྦེན་།” 6 ཡང་ ཁོང་རྒུ་ནི་ ཏུ་ཟུག་ ཅོ་རྡང་, ཉ་ མ་མང་པོ་ ཁད་ཏེ་ ཁོང་རྒུ་ནི་ ཉ་འདོལ་ ཆེད་ཀྱི་ སོང་། 7 ཞེན་ ཆུ་འགྲུལ་ལེ་ན་ ཡོ་ཀན་ ཁྲོ་པ་རྒུན་ལ་ ལག་པ་ ཡུག་ཏེ་ ཡ་ཏོ་ ཅོ་ལ་ ཤོག་ ཟེར་། ཁོང་རྒུན་ ཡོྃ་རྡེ་ ཆུ་འགྲུལ་ ཉ་ཧ་ ཆུའི་ན་ ནུབ་ཀྱི་ ཆ་ཆ་ཚུག་པ་ ཉེ་ ཧང་།

8 ཏོ་ ཐོང་ངེ་རྡང་ ཤི་མོན་པི་ཏྲར་ ཡི་ཤུའི་ འདུན་ལ་ འགྱེལ་རྡེ་ ཟེར་, “ཙོབོ་, ང་ས་ནི་ ཐག་རིང་ལ་ རྐྱོད་ ང་ རྡིག་ཅེན་ཞིག་ འིན་།” 9 ཅེ་ཟེར་ནི་ ཁོ་ རྡང་ ཁོའེ་ ཁྲོ་པ་རྒུན་ ཉ་ ཁད་ཀ་ནེ་ ཛེད་པ་རྦོ་ ཐོང་འདེ་ མ་ ཧ་ལེ་། 10 ཡང་ ཤི་མོན་ནེ་ ཚོང་པ་ ཁྲོ་པ་ ཟེ་འབེ་འདེ་ པུ་ཙ་ ཡ་ཀུབ་ ཏང་ ཡོ་ཧཱ་ནན་ལ་ ཧ་ལེ་། ཡི་ཤུའི་ ཤི་མོན་ལ་ མོལ་, “མ་འཇིའི་ཧེ་, ཏེ་ནི་ཕ་ལ་ ཁྱི་ཞི་ ཉེ་ ཚབ་ལ་ མི་རྒུན་ ཟུམ་མེན་།” 11 ཏི་ནེ་ ཁོང་རྒུ་ནི་ ཆུ་འགྲུལ་རྒུན་ ཐ་མ་ ཁྱོྃ་ ཡང་ ཅི་ཚང་མ་ ཕྃ་རྡེ་ ཡི་ཤུའི་ རྒྱབ་ནི་ འགྲྃ་།

ཡི་ཤུའི་ ཛེ་ནེད་ ཡོ་ཀན་ཞིག་ ཕན་ཅུག་རྒེ་ ཛེད་།

12 ཡི་ཤུ་ ཀྲོང་ཁྱེར་ཞིག་རྒེ་ན་ ཡོད་ཏུའི་ ཏུ་རུ་ ཟུྃ་སྤོ་ སོན་ཏེ་ ཛེ་ནེད་ ཡོ་ཀ་ནེ་ མི་ཞིག་ ཡོད་པེན་། ཁོའེ་ ཡི་ཤུ་ འཇལ་ལེ་རྡང་, ཐང་ཀེ་ཀ་ འགྱེལ་རྡེ་ འཇུ་འཇུ་ ཞུའིན་ ཟེར་, “ཙོབོ་ལེ་, ཉེ་རང་ ཐུག་ཐེད་ནི་ ང་ རྒྱལ་ཅུག་ཏེ་ སང་མ་ ཛེད་ ཉེན་ནེ་ནོག་།”

13 ཡི་ཤུའི་ ཆག་ རྐྱང་འདེ་ ཁོ་ ཐུག་ཅུག་རྒེ་ ཛེད་ཏེ་ མོལ་, “ང་ ཁྱེ་རང་ རྒྱལ་ཅུག་ཏེ་ སང་མ་ ཅོའོ་ ཐེད་རྡེ་རག་།” ཏེ་རྒ་མ་རྒ་ ཛེ་ནེད་པོ་ མེ་ཀན་ སོང་། 14 ཏེ་ནི་ ཁོང་ངེ་ ཁོ་ ཀཱ་ སལ་, “སུ་ལ་ མ་ཤེད་, འིན་ན་ སོང་འདེ་ རང་ངེ་ ཟུྃ་སྤོ་ ལ་མ་ ལྟོན་ ཡང་ ལུང་རྟོན་པ་ མོ་ཤེ་ ཀཱ་ སལ་ཧན་ ནང་ཞིན་ ཀོན་འཇོག་ལ་ ཆོད་པ་ པུལ་, ཏོ་ མི་རྒུན་ལ་ ཁྱེ་རང་ སང་མ་ ཆ་ཀ་ནེ་ སྤང་པོ་ འིན་།”

15 འིན་ན་ ཁོང་ངེ་ ཧོར་ལ་ ནེ་ཚུལ་རྦོ་ མང་ངེ་ ཕེལ་། ཏོ་རྦེ་ ཅོའེ་རྡེ་ མི་ཚོག་རྒུན་ ཁོང་ལ་ ཉེན་ཅེ་ རྡང་ ནེད་ནི་ ཕན་ཅེ་ལ་ ཁོང་ས་ ཡོྃ་། 16 འིན་ན་ ཡི་ཤུ་ ཡང་ནི་ ཡང་ མོ་ལམ་ ཞུ་ལ་ སུ་ལ་ མེད་སེ་ མལ་ཞི་ཀ་ རྐྱོད་ཏེ་ཡོད་པེན་།

ཡི་ཤུའི་ ཟ་ཕོག་ཀན་ཞིག་ ཕན་ཅུག་རྒེ་ ཛེད་།

17 ཞག་ཤིག་ ཡི་ཤུའི་ ལབ་ཞ་ སལ་ལེ་ ཛེད་ཟ་ནི་ འགཱ་ལིལ་ རྡང་ ཡ་ཧུ་འདཱེ་ འགམ་ཡུལ་ ཚང་མ་ རྡང་ ཡེ་རུ་ཤ་ལེམ་མེ་ རྒྱལ་ས་ནི་ ཡོང་ཀ་ནེ་ པ་རུ་ཤི་པ་རྒུན་ འདང་ ཆོའེ་ཁྲིམ་ལ་ ཁེ་སྤ་རྒུན་ ཏུ་རུ་ ཐང་ཀེ་ཀ་ འདེད་ཏེ་ ཡོད་པེན་, ཡང་ ཕན་ཅུག་ཅེ་ ཙོབོ་ ཀོན་འཇོག་རྒེ་ ཤུག་ ཡི་ཤུ་ ཉམ་པོ་ ཡོད་པེན་།

18 ཏེ་ནི་ མི་ ཁ་ཅིག་རྒེ་ ཟ་ཕོག་ཀན་འཇིག་ མལ་སེ་ཀ་ ཁུར་རྡེ་ ཁྱོྃ་ ཡང་ ཁང་པེ་ན་ ཡི་ཤུ་ས་ ཁྱེར་ཤེ་ ཙོན་འགྲུའི་ ཅོའེ་། 19 མི་ཚོག་རྡེ་ ཅོའེ་རྡེ་ ཁོང་རྒུན་ལ་ ཁོ་ ནང་ཀུ་ལ་ ཁྱེར་ མ་ཉེན་། ཁོང་རྒུན་ ཁང་པེ་ ཁ་ཏོཏ་ལ་ སོང་འདེ་ ཐོག་ས་ ཀོག་ཏེ་ མལ་ས་ ཉམ་པོ་ ཁོ་ མི་ཚོག་རྒེ་ ཞུང་ལ་ ཡི་ཤུའི་ འདུན་ལ་ སྤབ་། 20 ཁོང་རྒུ་ནི་ མིའུ་ རྒྱལ་ཅུག་ཅེ་ ཏེཏ་པ་ ཅོ་ཀན་འབོ་ ཡི་ཤུའི་ ཟི་རྡེ་ ཁོང་ངེ་ ཟ་ཕོག་ཀན་འབོ་ལ་ མོལ་, “ཡ་ཏོ་, ངེ་ ཁྱེ་རང་ངེ་ རྡིག་པ་རྒུན་ལ་ ཤག་སྤ་ ཏང་ངེ་ཡོད་།”

21 ཏེ་ནི་ ཆོའེ་ཁྲིམ་ལ་ ཁེ་སྤ་ རྡང་ པ་རུ་ཤི་པ་རྒུ་ནི་ སེམ་འབེ་ན་ སམ་, “ཏེཏ་ལོག་ ཞུ་ཧ་ནེ་ འི་ མིའུ་ སུ་ ནོག་? ཀོན་འཇོག་ མ་ཐེ་ལ་ སུའི་ རྡིག་པ་ ཤག་སྤ་ སལ་ ཉེན་ནེན་?”

22 ཁོང་རྒུ་ནི་ སམ་ཀན་འབོ་ ཡི་ཤུའི་ ཁྱེན་འདེ་ འདྲི་ ཛེད་, “ཁྱི་ཞི་ ཁྱི་ཞ་རང་ངེ་ སེམ་མེ་ན་ འི་ཟུག་ ཅེ་ སམ་མེ་ཡོད་? 23 ཅི་ སམ་མེ་རག་, ‘ཁྱེ་རང་ངེ་ རྡིག་པ་ ཤག་སྤ་ ཏྃ་རྡེ་ འིན་’ ཟེར་ཤེའོ་ ལ་མོ་ ནོག་རྒེ་ ཡང་ ‘ལྃ་རྡེ་ འགྲུལ་’ ཟེར་ཤེའོ་? 24 འིན་ན་ མི་རིག་རྒེ་པུ་ལ་ འཇིག་རྟེན་ནེ་ཀ་ རྡིག་པ་ ཤག་སྤ་ ཏང་ཅེ་ ཝང་ཆ་ ཡོ་ཀན་འབོ་ ངེ་ ཁྱི་ཞ་ ལྟན་ནེན་” ཏེ་ནི་ ཡི་ཤུའི་ ཟ་ཕོག་ཀན་འབོ་ལ་ མོལ་, “ངེ་ ཁྱེ་རང་ལ་ ཟེ་འིན་, ལོྃ་, རང་ངེ་ མལ་ས་ ཁུར་རྡེ་ ཁང་པ་ སོང་།”

25 ཏེ་རྒ་མ་རྒ་ ཁོང་རྒུ་ནི་ འདུན་ལ་ ཁོ་ ལྃ་རྡེ་ ཁོ་རང་ ཉལ་ཧ་ནེ་ མལ་ས་རྦོ་ ཁུར་རྡེ་ ཀོན་འཇོག་ལ་ རྟོད་པ་ པུ་ལེན་ ཁང་པ་ སོང་། 26 མི་ཚང་མ་ ཧ་ལེ་རྡེ་ ཀོན་འཇོག་ལ་ རྟོད་པ་ པུལ་, ཡང་ སི་ཝ་ རྡང་ འཇིའི་རྡེ་ན་ ཟེར་, “ཏི་རིང་ ཨ་ཧོ་རྒུ་ནི་ ཧ་ལེ་ཤེ་ ཆག་ལེ་ ཐོང་།”

ཡི་ཤུའི་ ཁྲལ་ནེན་ཀན་ ལི་ཝི་ འབོ་ ཛེད་།

27 ཏེ་ ལྟིང་ནི་ ཡི་ཤུ་ ཕི་ལོག་ལ་ རྐྱོད་ ཡང་ ལི་ཝི་ ཟེར་ཧན་འབོ་ ཁྲལ་ནེན་སེ་ མལ་ལེ་ཀ་ འདེད་ཏེ་ ཡོད་རྡེ་ ཟིའི་ ཡང་ ཁོང་ངེ་ ཁོ་ མོལ་, “ངེ་ ལྟིང་འགྲྃ་ནི་ འགྲོྃ་།” 28 ཁོ་ ལྃ་ ཡང་ ཅི་ཚང་མ་ ཕྃ་རྡེ་ ཡི་ཤུའི་ ལྟིང་འགྲྃ་ནི་ འགྲྃ་།

29 ཏེ་ནི་ ལི་ཝི་ ཡི་ཤུའི་ཕི་ ཁོ་རང་ངེ་ ཁང་པ་ འགྲོན་ ཆོན་མོ་ཞིག་ ཏྃ་། ཁྲལ་ནེན་ཀན་ འདང་ ཞེན་, མི་ཚོག་ མང་པོ་ཞིག་རྒེ་ ཁོང་རྒུན་ ཉམ་པོ་ ཁར་ཞི་ ཟ་ཡོད་པེན་། 30 འིན་ན་ པ་རུ་ཤི་པ་རྒུན་ འདང་ ཏེ་རྒ་ རྡེ་ ཆོའེ་ཁྲིམ་ལ་ ཁེ་སྤ་རྒུ་ནི་ ཡི་ཤུའི་ ལོབ་ཀྲུག་རྒུན་ལ་ ཟེར་རྒྱུ་ ཏྃ་རྡེ་ ཟེར་, “ཁྱི་ཞི་ ཁྲལ་ནེན་ཀན་ འདང་ རྡིག་ཅེན་ མི་རྒུན་ ཉམ་པོ་ ཅེ་ ཟ་ཡོད་ ཡང་ ཐུང་ངེ་ཡོད་?”

31 ཡི་ཤུའི་ ཁོང་རྒུན་ལ་ ལེན་སལ་, “ཟུར་མོ་ ཡོང་ཀན་ཞིག་ལ་ མ་ནི་ ཁམ་ཟང་ མི་ཞིག་ལ་ ཨམ་ཅི་ རྒོའེ་རྡེ་ མག་། 32 ངེ་ ཁྱི་ཞ་ ཀྲང་པོ་ འིན་ སམ་ཀན་རྒུན་ལ་ མན་, རྡིག་ཅེན་རྒུན་ལ་ སེམ་འགྱུར་ཤེ་ལ་ འབོ་ ཡོྃ་རྦེན་།”

ཉུང་ནེ་ལ་ འདེད་ཅེ་ ཧོར་།

33 ཏེ་ནི་ ཁོང་རྒུ་ནི་ ཡི་ཤུ་ ཟེར་, “ཡོ་ཧཱ་ནན་ནེ་ ལོབ་ཀྲུག་རྒུན་ འདང་ པ་རུ་ཤི་པེ་ ལོབ་ཀྲུག་རྒུན་ ལེན་ མང་པོ་ ཉུང་ནེ་ སྲུྃ་རྡེ་ མོ་ལམ་ ཞུ་རུག་, འིན་ན་ ཉེ་རང་ངེ་ ལོབ་ཀྲུག་རྒུན་ ཏུའི་རྒྱུན་ ཟོའེན་ ཐུང་ངེན་ ཅེ་ འདེད་རྡེ་ནོག་?”

34 ཡི་ཤུའི་ ལེན་སལ་, “པག་རྟོན་ནེ་ན་ མག་པ་ ཉམ་པོ་ ཡོད་ཟ་ནི་ ཁོའེ་ འགྲོན་པོ་རྒུ་ནི་ ཉུང་ནེ་ལ་ འདེད་རྡེན་ནེ་? མི་འདེད་། 35 འིན་ན་ ཏུའི་རྦོ་ ལེབ་རྦེན་ ནམ་ མག་པེ་ འགྲོན་པོ་རྒུན་ས་ནི་ པེ་རྡེ་ ཁྱེར་རེན་, ཏེ་ནི་ ཁོང་རྒུ་ནི་ རྡུག་པོ་ ཅོའེ་རྡེ་ ཉུང་ནེ་ལ་ འདེད་རྡེན་།”

36 ཡི་ཤུའི་ འི་ སྲུང་ངུ་ ཤེད་རྡེ་ ཛེད་, “སུ་ཞིག་རྒེ་ ཀོའེ་ལག་ སོ་མ་ ཅེད་ཏེ་ ཉིང་པེ་ཀ་ ལེན་བ་ ཏབ་རྦེ་ མག་, ཀལ་ཏེ་ ཏབ་ནི་ ཀོའེ་ལག་ སོ་མ་རྦོ་ ཆེད་རྡེན་ ཡང་ ལམ་བ་ སོ་མ་རྦོ་ ཉིང་པེ་ཀ་ མི་ཐུན་།”

37 “ཏེ་རྒ་ ཙོག་སེ་ རྒུན་འགྲུམ་མེ་ ཁོའེ་ སོ་མ་ པག་སྤེ་ རྐྱ་སྤ་ ཉིང་པེ་ན་ མི་ལུག་། ཀལ་ཏེ་ ལུག་ནི་ རྒུན་འགྲུམ་མེ་ ཁོའེ་རྦོ་ལ་ རྐྱུར་ ལྃ་རྡེ་ པག་སྤེ་ རྐྱ་སྤ་ རྦོའེ་རྡེ་ ཆེད་རྡེན་, རྒུན་འགྲུམ་མེ་ ཁོའེ་ རྦོའེ་རྡེ་ རྐྱ་སྤ་ འདོད་མེད་ ཆེན་། 38 རྒུན་འགྲུམ་མེ་ ཁོའེ་ སོ་མ་ རྐྱ་སྤ་ སོ་མེ་ན་ པོར་རྒོའེ་། 39 ཡང་ རྒུན་འགྲུམ་མེ་ ཁོའེ་ ཉིང་པ་ ཐུང་རྡེ་ ལྟིང་ནི་ སུ་ཞིག་ལ་ སོ་མ་ ཐུྃ་ཉིན་ འགྲོ་ མག་། རྒུན་འགྲུམ་མེ་ ཁོའེ་ ཉིང་པ་ ཀྲོཏ་ཅེན་ རག་” ཟེར་རེན་།