རྡུད་རྡེ་ ཡི་ཤུ་ ཚོད་ལྟ་ ནེན་།
4
ཡི་ཤུ་ ཏམ་པེ་ ཐུག་ཡིད་རྡེ་ ཀང་འདེ་ ཡོར་འདཱན་ སྃ་སྤོ་ནི་ ལོག་ཏེ་ རྐྱོད་, ཡང་ ཏམ་པེ་ ཐུག་ཡིད་རྡེ་ ཁོང་ རི་ལྟོང་ངེ་ན་ ཁྱེར་རེ་ ཛེད་། 2 ཚེན་ཉིན་ ཞིབ་ཅུ་ རྡུད་རྦོ་ ཡི་ཤུ་ རྡིག་པེ་ན་ འགྱེལ་ཤུག་ཅེ་ལ་ ཙོན་འགྲུའི་ ཅོའེ་། ཏེ་ཏུའི་ སོན་ཏེ་ ཁོང་ འདོན་ཏང་ ཅང་ མ་འདོན་འབེ་ ལྟིང་འཇུག་པེ་ཀ་ ཁོང་ རིམ་།3 རྡུད་རྦོ་ ཁོང་ལ་ ཟེར་, “ཀལ་ཏེ་ ཉེ་རང་ ཀོན་འཇོག་རྒེ་ སྲེ་ འིན་ནི་ འི་ རྡོ་རྒུན་ ཏི་རྒིར་ འགྱུར་ཤེ་ལ་ ཀཱ་ སལ་?”
4 ཡི་ཤུའི་ ལེན་སལ་, “ཏམ་པེ་ སུང་རབ་རྦེ་ན་ འབྲི་ཛེད་ཏེ་ འདུག་,
‘མི་ ཏི་རྒིར་ ཅིག་པེ་ སོན་པོ་ མི་ལུའི་།’”
5 རྡུད་རྒུ་ནི་ འགོ་རྦེ་ ཁོང་ ས་ཅ་ ཐོན་པོ་ཞིག་རྒེ་ཀ་ ཁྱེར་རྡེ་ ཁོང་ལ་ འཇིག་རྟེན་ནེ་ རྒྱལ་སྲིད་ ཚང་མ་ སྲིབ་ཅིག་རྒེ་ན་ ལྟན་འདེ་, 6 ཁོའེ་ ཡི་ཤུ་ ཟེར་, “ངེ་ ཁྱེ་རང་ལ་ ཡུ་རྒུ་ནི་ སྤལ་ རྡང་ ཝང་ཆ་ ཚང་མ་ ཏང་ངེན་, ཅེ་ཟེར་ནི་ ཏོ་རྒུན་ ང་ ཏྃ་རྡེ་ འིན་འབེ་ ངེ་, ང་རང་ ཐེད་ཀན་འབོ་ལ་ ཏང་ངེན་། 7 ཀལ་ཏེ་ ཁྱེ་རང་ངེ་ ང་ ཆག་ པུལ་རྡེ་ ཅོལ་ནི་ ངེ་ ཁྱེ་རང་ལ་ ཡུ་ ཚང་མ་ ཏང་ངེན་།”
8 ཡི་ཤུའི་ ཁོ་ ལེན་སལ་, “ཏམ་པེ་ སུང་རབ་རྦེ་ན་ འབྲི་ཛེད་ཏེ་ འདུག་,
‘ཁྱི་ཞི་, ཁྱི་ཞ་རང་ངེ་ ཙོབོ་ ཀོན་འཇོག་ལ་ ཅོལ་རྒོའེ་།
ཡང་ ཁོང་ ཅིག་པོ་ལ་ ཞབ་རྟོག་ ཞུ་རྒོའེ་།’”
9 ཏེ་ནི་ རྡུད་རྒུ་ནི་ འགོ་རྦེ་ ཡི་ཤུ་ ཡེ་རུ་ཤ་ལེམ་མེ་ རྒྱལ་ས་ ཁྲིད་ཏེ་ ཁྱེར་ ཡང་ ཀོན་འཇོག་རྒེ་ ཁང་པེ་ ཁ་ཏོག་འགོ་ ཁྱེར་རྡེ་ ཟེར་, “ཀལ་ཏེ་ ཉེ་རང་ ཀོན་འཇོག་རྒེ་ སྲེ་ འིན་ནི་ འེ་ཀ་ནི་ ཡོག་ལ་ ཆོང་། 10 ཅེ་ཟེར་ནི་ སུང་རབ་རྦེ་ན་ འབྲི་ཛེད་ཏེ་ འདུག་,
‘ཁྱེ་རང་ རྐྱོབ་ཅེ་ལ་ ཀོན་འཇོག་རྒེ་ ཕོ་ཉ་རྒུན་ལ་ ཀཱ་ ས་ལེན་,
11 ཁྱེ་རང་ངེ་ ཧང་པ་འབོ་ རྡོ་རྡེ་ཀ་ ཕོག་ མི་ཅུག་ཅེ་ཕི་
ཕོ་ཉ་རྒུ་ནི་ ལག་པ་ རྐྱང་འདེ་ ཁྱེ་རང་ ཟུམ་མེ་ ཛེ་རྡེན་།’”
12 ཡི་ཤུའི་ ཁོ་ ལེན་སལ་, “ཏམ་པེ་ སུང་རབ་རྦེ་ན་ ཡུ་ལ་ མོལ་འདུག་, ‘ཙོབོ་ ཁྱི་ཞ་རང་ངེ་ ཀོན་འཇོག་ལ་ ཚོད་ མ་ལྟ་།’” 13 རྡུད་རྦོ་ ཡི་ཤུ་ ཚོད་ལྟོའེ་ ཚར་རེ་རྡང་ ཁོ་ ཡང་ ཧབ་ ཐོབ་ཐོབ་ཚུག་པ་ ཁོང་ ཕྃ་རྡེ་ སོང་།
ན་ཙ་རེད་པ་རྒུ་ནི་ ཡི་ཤུ་ སི་ཝ་ མ་ཅོའེ་།
14 ཏེ་ནི་ ཡི་ཤུ་ ཏམ་པེ་ ཐུག་ཡིད་རྡེ་ ཤུག་ ཀང་འདེ་, འགཱ་ལིལ་ལེ་ ཡུལ་ཞོང་ལ་ ལོག་ཏེ་ རྐྱོད་ ཡང་ ཁོང་ངེ་ ཧོར་ལ་ ནེ་ཚུལ་ ཡུལ་ཞོང་ སོན་ཏེ་ན་ ཕེལ་། 15 ཁོང་ངེ་ ཡ་ཧུ་འདཱ་པེ་ འདུ་ཀང་རྒུ་ནི་ན་ ལབ་ཞ་ སལ་ཅེ་ འགོ་ཟུག་ ཛེད་ ཡང་ ཚང་མེ་ ཁོང་ལ་ རྟོད་པ་ པུལ་།
16 ཡི་ཤུ་ ན་ཙ་རེད་རྡེ་ ཀྲོང་ཁྱེར་ལ་ རྐྱོད་ ཀ་རུ་ ལྡན་འདེ་ འིན་འབེན་ ཡང་ ཁོ་རང་ངེ་ ལོཔ་ ནང་ཞིན་ ངལ་ཚོའེ་ ཞག་ལ་ འདུ་ཀང་ངེ་ན་ རྐྱོད་, ཡང་ ཏམ་པེ་ སུང་རབ་རྦེ་ ནང་ནི་ སིལ་ལེ་ ཛེད་ཅེ་ལ་ ཞྃ་། 17 ཡེ་ཤ་ཡཱེ་ ལུང་རྟོན་པེ་ འབྲི་ཧན་ནེ་ སྤེ་ཆ་ ཁོང་ངེ་ ལག་ལ་ ཏྃ་ ཡང་ སྤེ་ཆ་ པེ་རྡེ་ ཙ་ལེ་ ཛེད་ཀན་འབོ་ ཐོབ་, ཏོ་,
18-19 “ཙོབོ་ ཀོན་འཇོག་རྒེ་ ཐུག་ཡིད་ ངེ་ཀ་ ལུའི་,
ཅེ་ཟེར་ནི་ ཁོང་ངེ་ ང་ ཉམ་ཤུང་རྒུན་ལ་
ནེ་ཚུལ་ ཟང་པོ་ ཤེད་ཅེ་ལ་ ཧོ་ ཛེད་།
ཙོན་པ་རྒུན་ལ་ ཐར་པ་ ཐོབ་ཅེ་, ཞ་ར་རྒུན་ལ་ ཐོང་ཅེ་,
རྡུག་ངལ་ལེ་ན་ ཡོ་ཀན་རྒུན་ པུད་ཅེ་
ཡང་ ཙོབོ་ ཀོན་འཇོག་རྒེ་ ཁོ་རང་ངེ་ མི་རྒུ་ནི་ཀ་
ཐུག་ཞེ་ ཛེད་ཅེ་ ཏུའི་ ལེབ་ཀན་འབོ་ ཁྱབ་ཀྲག་ ཅོ་ཅེ་ལ་
ཁོང་ངེ་ ང་ ཀ་ལེ་ ཛེད་།”
20 ཁོང་ངེ་ སྤེ་ཆ་ སིལ་ ཚར་རེ་རྡང་, སྲིལ་རྡེ་ འདུ་ཀང་ངེ་ ཡ་ཏོ་ ཅོ་ཀན་འབོ་ལ་ སལ་རྡེ་ ཐང་ཀེ་ཀ་ ཞུའུ་། འདུ་ཀང་ངེ་ན་ ཛོམ་འདེ་ ཡོ་ཀན་ ཚང་མེ་ ཁོང་ལ་ ལྟོའེ་རྡེ་ འདེད་། 21 ཁོང་ངེ་ ཁོང་རྒུན་ལ་ མོལ་, “ཏམ་པེ་ སུང་རབ་རྦེ་ ནང་ནི་ ཏག་ས་ ཁྱི་ཞ་ ཚོར་ཧན་རྒུན་, ཏི་རིང་ འདྲན་འདྲ་ ཀྲུཔ་ཏེ་ ནོག་།”
22 ཚང་མེ་ ཁོང་ལ་ རྟོད་པ་ ཏྃ་ ཡང་ ཁོང་ངེ་ ཁེ་སྤ་ རྡང་ ལག་མོ་ ཞལ་ཏ་རྒུན་ ཚོར་རྡེ་ ཚང་མ་ ཧ་ལེ་ ཡང་ ཟེར་, “ཁོ་ ཡོ་སེབ་རྦེ་ པུ་ཙ་ མ་ནོག་རྒེ་?”
23 ཡི་ཤུའི་ ཁོང་རྒུན་ལ་ མོལ་, “ནེན་ཏེན་ལེ་ ཁྱི་ཞི་ འི་ ཏམ་སྤེ་རྦོ་ ང་ ཟེ་རེན་, ‘ཨམ་ཅི་ རང་ ཕན་ཅུག་རྒང་, ཀ་ཕར་ན་ཧུམ་མེ་ ཀྲོང་ཁྱེར་རེ་ན་ ཅོ་ཀ་ནེ་ ལེ་ཧ་ ང་ཞི་ ཚོར་ཧན་རྒུན་ ཙོག་སེ་ རང་ངེ་ ཡུལ་ལེ་ན་ ཅོའེ་རྡང་།’ 24 ངེ་ ཁྱི་ཞ་ རྡེན་འབའ་ ཟེ་འིན་, ལུང་རྟོན་པ་ཞིག་ལ་ ཁོ་རང་ངེ་ ཀྲོང་ཁྱེར་ནི་ སི་ཝ་ མི་ཐོབ་།”
25 “ངུལ་མེ་ ལུང་རྟོན་པ་ ཨེ་ལི་ཡཱེ་ ཏུའི་ལ་ ལོ་ སུམ་འདང་ཕེད་ ཆར་སྤ་ མ་པབ་རྦེ་ ཡུལ་ སོན་ཏེ་ན་ ལོར་ཧོན་ ཀྲག་པོ་ སོང་ངེ་ ཏུའི་ལ་ ཨིས་ར་ཡེལ་ལེ་ ཡུལ་ལེ་ན་ འ་ནེ་ མ་རང་མོ་ མང་པོ་ ཡོ་ཀན་འབོ་ ནེན་ཏེན་ ནོག་། 26 འིན་ན་ ཀོན་འཇོག་རྒེ་ ལུང་རྟོན་པ་ ཨེ་ལི་ཡཱ་ ཁོང་ སུ་ཞིག་རྒེ་ལ་ ཀ་ལེ་ མ་ཛེད་རྡེ་, ཡ་ཧུ་འདཱ་པ་ མན་ཀན་ སི་འདཱོན་ ཡུལ་ཞོང་ངེ་ ཟ་རེ་པད་ ཡུལ་ལེ་ན་ འདེད་ཀ་ནེ་ འ་ནེ་མ་རང་མོ་རྦེ་ཀ་ ཀ་ལེ་ ཛེད་། 27 ཡང་ ལུང་རྟོན་པ་ ཨེ་ལི་ཤེ་ ཏུའི་ལ་ ཨིས་ར་ཡེལ་ལེ་ན་ ཛེ་ནེད་ཅེན་ནེ་ མི་ མང་པོ་ ཡོ་ཀ་ནེ་ ཕྲོ་ནི་ ཅིག་རྒང་ ཕན་ཅུག་རྒེ་ མ་ཛེད་རྡེ་ སི་རི་ཡཱ་པ་ ནཱ་མན་ ཅིག་པོ་ ཕན་ཅུག་རྒེ་ ཛེད་ཏེ་ སང་མ་ ཛེད་།”
28 ཏོ་ ཚོར་རྡེ་ འདུ་ཀང་ངེ་ན་ ཡོ་ཀན་ ཚང་མ་ལ་ སྲོ་ ཧོཔ་ ཡོྃ་། 29 ཁོང་རྒུན་ ལྃ་རྡེ་ ཡི་ཤུ་ ཀྲོང་ཁྱེར་ནི་ ཕིང་འདེ་ ཀྲོང་ཁྱེར་རྦེ་ ཚུག་རྡེ་ ཡོ་ཀ་ནེ་ རི་ ཟུར་ནི་ ཕང་ཅེ་ལ་ ཁོང་ ཁྱེར་། 30 འིན་ན་ ཁོང་ ཁོང་རྒུ་ནི་ ཕྲོ་ནི་ འབིང་འདེ་ རྐྱོད་།
ཡི་ཤུའི་ རྡུད་པོ་ ཕིང་ངེ་ ཛེད་།
31 ཏེ་ནི་ ཡི་ཤུ་ འགཱ་ལིལ་ལེ་ ཡུལ་ཞོང་ངེ་ ཀ་ཕར་ན་ཧུམ་ ཀྲོང་ཁྱེར་ལ་ རྐྱོད་ ཡང་ ངལ་ཚོའེ་ ཞག་ལ་ མི་མང་ལ་ ལབ་ཞ་ སལ་ཅེ་ འགོ་ཟུག་། 32 ཁོང་རྒུན་ ཡི་ཤུའི་ ལབ་ཞ་རྒུ་ནི་ཀ་ ཧ་ལེ་, ཅེ་ཟེར་ནི་ ཁོང་ངེ་ ཝང་ཆ་ ཉམ་པོ་ མོལ་ལེ་ ཛེ་རྡེ་ཡོད་པེན་།
33 འདུ་ཀང་ངེ་ན་ རྡུད་ ཞུ་ཧ་ནེ་ མི་ཞིག་ ཡོད་པེན་། ཁོའེ་ ཀུ་ཅུ་ སྲན་ཀྲེ་ ཏང་ངེན་ ཟེར་, 34 “ན་ཙ་རེད་པ་ ཡི་ཤུ་, ཉེ་རང་ལ་ ང་ཞ་རྒུ་ནི་ཀ་ནི་ ཅི་ རྒོའེ་? ཉེ་རང་ ང་ཞ་རྒུན་ མེ་ཀན་ ཅོ་ལ་ རྐྱོད་ཏེ་ འིན་ནེ་? ཉེ་རང་ སུ་ ཞུ་རྡེ་ འིན་ཀན་འབོ་ ང་ རྒྱུའི་ཡོད་། ཉེ་རང་ ཀོན་འཇོག་རྒེ་ ཏམ་པའོ་ ཞུ་རྡེ་ནོག་།”
35 ཡི་ཤུའི་ ཁོ་ ཀབ་རྐྱོན་ ཛེད་ཏེ་ མོལ་, “ཅེཔ་ཁ་རོ་, ཁོའེ་ཀ་ནི་ འབིང་འདེ་ སོང་།” ཏེ་རྒ་མ་རྒ་ རྡུད་པེ་ མི་རྒུ་ནི་ འདུན་ལ་ ཏེ་ མིའུ་ ཐང་ཀ་ རྒྱེལ་རྡེ་ ནོད་པ་ མ་རྐྱལ་ལེ་ ཁོའེ་ ནང་ནི་ འབིང་འདེ་ སོང་།
36 མི་ཚང་མ་ ཧ་ལེ་རྡེ་ ཅིག་ ཏང་ ཅིག་ལ་ ཟེར་, “འི་ མི་རྦེ་ ཙམ་འཇིག་རྒེ་ ཁྱུད་ ཏང་ ཝང་ཆ་ ཉམ་པོ་ ཟེར་རྡུག་, ཁོའེ་ ཀཱ་ ཏང་ཀན་འབོ་ལ་ རྡུད་རྒུ་ནི་ལ་ ཁོ་ ཉེན་འདེ་ འབིང་འདེ་ ཡོང་འདུག་།” 37 ཡང་ ཁོང་ངེ་ ཧོར་ལ་ ནེ་ཚུལ་རྦོ་ ཡུལ་ཞོང་ སོན་ཏེ་ ཕེལ་།
ཡི་ཤུའི་ ནེད་པ་རྒུན་ ཕན་ཅུག་རྒེ་ ཛེད་།
38 ཡི་ཤུ་ འདུ་ཀང་ནི་ འབིང་འདེ་ ཤི་མོན་ པི་ཏྲ་རེ་ ཁང་པ་ རྐྱོད་། ཤི་མོན་ནེ་ ན་མེ་ ཨ་མ་ ཚེད་ སྲན་ཀྲེ་ ཡོྃ་རྡེ་ ཡོད་པེན་ ཡང་ ཁོང་རྒུ་ནི་ ཡི་ཤུ་ ཁོ་ ཡ་ཏོ་ ཛེད་ཅེ་ལ་ ཞུའི་རྦེ་ 39 ཁོང་ ཁོའེ་ མལ་སེ་ འདུན་ལ་ ཞྃ་རྡེ་ ཚེད་པོ་ལ་ ཀབ་རྐྱོན་ཞིག་ སལ་ ཚེད་པོ་ མེ་ཀན་ སོང་, ཏེ་རྒ་མ་རྒ་ ཁོ་ ལྃ་རྡེ་ ཁོང་རྒུན་ལ་ ཞབ་རྟོག་ ཞུའི་།
40 ཉི་མ་ རྐྱོད་རྡེ་རྡང་, མི་རྒུ་ནི་ ཟུར་མོ་ ན་ཚོག་ ཡོ་ཀན་ ཚང་མ་ ཡི་ཤུ་ས་ ཁྱོྃ་, ཡང་ ཁོང་ངེ་ རེ་རེ་ཀ་ ཆག་ པོ་རེ་ ཛེད་ཏེ་, ཁོང་རྒུན་ རྒྱལ་ཅུག་རྒེ་ ཛེད་། 41 ཁོང་ མང་པེ་ ནང་ནི་ རྡུད་རྒུན་ འབིང་འདེ་ ཡོང་ཟ་ནི་ ཀུ་ཅུ་ ཏང་ངེན་ ཟེར་, “ཉེ་རང་ ཀོན་འཇོག་རྒེ་ སྲེ་ ནོག་།” འིན་ན་ ཡི་ཤུའི་ ཏོ་རྒུན་ལ་ ཀབ་རྐྱོན་ སལ་འདེ་ སྤེ་ར་ ཟེར་ མ་ཤུག་ ཅེ་ཟེར་ནི་ ཏོ་རྒུན་ལ་ ཁོང་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ འིན་ཀན་འབོ་ ཤེ་རྡེ་ཡོད་པེན་། 42 ནམ་ ཟ་ར་ཟི་རེ་ ལང་ངེ་རྡང་ ཡི་ཤུ་ ཡང་སུ་ལ་ མེད་སེ་ མལ་ཞིག་ལ་ རྐྱོད་། མི་ཚོག་རྡེ་ ཁོང་ ཙ་ལེ་ཡོད་པེན་ ཡང་ ཁོང་ ཐོབ་རྦེ་རྡང་ ཁོང་རྒུ་ནི་ ཡེ་ཤུ་ལ་ འཇུ་འཇུ་ ཞུའིན་ ཁོང་རྒུན་ པོར་རྡེ་ མི་རྐྱོད་ཅེ་ལ་ ཟེར་། 43 ཁོང་ངེ་ ཁོང་རྒུན་ལ་ མོལ་, “ང་ ཞེན་ ཀྲོང་ཁྱེར་རྒུ་ནི་ ནང་ལ་ ཀོན་འཇོག་རྒེ་ རྒྱལ་སྲིད་རྡེ་ ནེ་ཚུལ་ ཟང་པོ་ ཤེད་རྒོའེ་། ཏེ་རྒ་ རྒྱུ་ཚན་འབེ་ཕི་ ཀོན་འཇོག་རྒེ་ ང་ ཀ་ལེ་ ཛེད་ཏེ་ འིན་།” 44 ཏེ་ནི་ ཁོང་ངེ་ ཡ་ཧུ་འདཱེ་ ཡུལ་ཞོང་ སོན་ཏེ་ན་ རྐྱོད་ཏེ་ འདུ་ཀང་རྒུ་ནི་ན་ ལབ་ཞ་ སལ་ལེ་ཡོད་པེན་།