ལུ་ཀ་ 3

ཁྲུའི་སལ་ཧན་ ཡོ་ཧཱ་ནན་ནེ་ ཆོའེ་ཤེད་རྡེ་ ཛེད་།

རོམ་མེ་ རྒྱ་སྤོ་ ཏི་འབིར་ཡུ་ ཝང་སྲུལ་ལེ་ ལོ་ ཅོ་ང་པེ་ན་, པོན་ཏིའུ་པི་ལ་ཏུ་ ཡ་ཧུ་འདཱ་ ཡུལ་ཞོང་ངེ་ ཀ་ལོན་, ཧེ་རོད་ འགཱ་ལིལ་ལེ་ ཡུལ་ཞོང་ངེ་ ལོན་པོ་, ཁོའེ་ ཨ་ཅོ་ ཕི་ལིབ་ ཨི་ཏུ་རེ་ཡཱ་ རྡང་ ཏྲ་འགོ་ནི་ཏི་ ཡུལ་ཞོང་ངེ་ ལོན་པོ་, ལི་སན་ཡ་ ཨ་འབི་ལེ་ནེ་ ཡུལ་ཞོང་ངེ་ ལོན་པོ་ 2 ཡང་ ཨན་ནཱ་ རྡང་ ཀ་ཡ་ཕཱ་ ལ་མ་ ཆོན་མེ་ ཀོ་སེ་ཀ་ ཡོད་རྡེ་ ཏུའི་ རི་ལྟོང་ངེ་ན་ ཀོན་འཇོག་རྒེ་ ཀའ་ ཟ་ཀར་ཡཱེ་ པུ་ཙ་ ཡོ་ཧཱ་ནན་ལ་ ཀ་ལེ་ ཛེད་། 3 ཡོར་འདཱན་ སྃ་སྤེ་ ཉེ་ཁོར་རེ་ ཡུལ་ ཚང་མ་ལ་ ཡོ་ཧཱ་ནན་ རྐྱོད་ཏེ་ ཤག་སྤ་ ཐོབ་ཅེ་ཕི་ རྡིག་པ་ ཕྃ་རྡེ་ སེམ་འགྱུར་རྡེ་ ཁྲུའི་ནེན་ཅེ་ལ་ ཆོའེ་ཤེད་། 4 ལུང་རྟོན་པ་ ཡེ་ཤ་ཡཱེ་ སྤེ་ཆེ་ན་ ཡོ་ཧཱ་ནན་ནེ་ ཧོར་ལ་ འབྲི་ཛེད་ཏེ་ ནོག་,

“རི་ལྟོང་ངེ་ན་ ཧད་ ཆོན་མོ་ཞིག་རྒེ་ མོལ་ལེན་,

‘ཙོབོ་ ཕེཔ་ཅེ་ལ་ ཀྲལ་འགྲིག་ ཅོའེ་ཧེ་,

ཡང་ ཁོང་ངེ་ ཕེབ་ལམ་འབོ་ ཀྲང་པོ་ ཅོའེ་ཧེ་།

5 ལུང་པ་ ཚང་མ་ ཧང་ངེ་ ཛེ་རྡེན་,

ཡང་ རི་ ཆོན་མོ་ རྡང་ ཆུང་ཙེ་རྒུན་ མ་མོ་ ཛེད་རྡེན་།

ལམ་ ཀྱག་ཀྱོག་རྒུན་ སྲོང་,

ཡང་ རྒང་ཧོམ་རྒུན་ ཉོམ་འདེ་ ཏིང་ཏིང་ ཅོའེ་ཧེ་།

6 ཡང་ མི་ཚང་མེ་ ཀོན་འཇོག་རྒེ་ ཐར་ལམ་འབོ་ འཇལ་ལེན་།’”

7 ཡོ་ཧཱ་ནན་ནེ་ ཁྲུའི་ནེ་ལ་ ཡོང་ཀ་ནེ་ མི་ཚོག་ལ་ མོལ་, “ཁྱི་ཞ་ ཏུག་རུལ་ལེ་ ཕར་རྒྱུད་རྒུན་, ཡོང་ཅེ་ཅེན་ནེ་ ཀོན་འཇོག་རྒེ་ ཆེད་པ་ནི་ ཤོར་ ཟེར་རྡེ་ ཁྱི་ཞ་ སྤང་ སུའི་ པུད་? 8 རྡིག་པ་ ཅོ་ཅེ་ ཕྃ་རྡེ་ ཀོན་འཇོག་རྒེ་ ལམ་མེ་ཀ་ འགྲུལ་ཧན་ནེ་ འབྲེ་རྦུ་ མིན་ཅུག་། ཡང་ རང་འདང་རང་ངེ་ མ་ཟེར་, ‘ང་ཞ་ ཨབ་ར་ཧམ་མེ་ ཕར་རྒྱུད་ འིན་ཅེ་ཀ་ནི་ ཐ་རེན་།’ ངེ་ ཁྱི་ཞ་རྒུན་ལ་ ཟེ་འིན་, ཀོན་འཇོག་རྒེ་ འི་ རྡོ་རྒུ་ནི་ ནང་ནི་ ཨབ་ར་ཧམ་མེ་ཕི་ ཕར་རྒྱུད་ ཛེད་ཉེན་ནེན་། 9 ཤང་ ཅོའེ་ཧེ་, ལྟ་རི་ ལྕང་མ་རྒུ་ནི་ པ་ཀྲག་རྒེ་ ཚམ་ལ་ རྒྱབ་ཆོག་ཆོག་ འདུག་, འབྲེ་རྦུ་ ཟང་པོ་ མ་མིན་ཀ་ནེ་ ལྕང་མ་ ཚང་མ་ ཅེད་ཏེ་ མེ་ན་ ཕང་ངེན་།”

10 མི་ཚོག་རྒུ་ནི་ ཡོ་ཧཱ་ནན་ལ་ འདྲི་, “ཏ་ ང་ཞ་རྒུ་ནི་ ཅི་ ཅོ་རྒོའེ་?”

11 ཡོ་ཧཱ་ནན་ནེ་ ཁོང་རྒུན་ལ་ མོལ་, “ཀོའེ་ ཉི་ ཡོ་ཀན་རྒུ་ནི་ ཅིག་པོ་ མེ་ཀན་རྒུན་ལ་ ཏོང་ ཡང་ ཁར་ཞི་ ཡོ་ཀན་རྒུ་ནི་ མེ་ཀན་རྒུན་ལ་ རྒོའེ་རྡེ་ ཏོང་།”

12 ཁྲལ་ནེན་ཀན་རྒུན་ལ་ ཁྲུའི་ནེ་ལ་ ཡོྃ་རྡེ་ འདྲི་, “ལོབ་རྦོན་ལེ་ ང་ཞ་རྒུ་ནི་ ཅི་ ཅོ་རྒོའེ་?”

13 ཁོང་ངེ་ ཁོང་རྒུན་ལ་ མོལ་, “ལེན་རྒོ་ཤེ་སང་ ཐལ་རྡེ་ ཁྲལ་ མ་ནེན་།”

14 ཏེ་ནི་ མག་མི་ ཁ་ཅིག་རྒེ་ ཡོ་ཧཱ་ནན་ལ་ འདྲི་, “ང་ཞ་རྒུ་ནི་ ཅི་ ཅོ་རྒོའེ་?”

ཁོང་ངེ་ ཁོང་རྒུན་ལ་ མོལ་, “འཇི་ནང་ ལྟན་འདེ་ ཡང་ ཟུན་ནེ་ ཉེད་ཀལ་ ཀལ་རྡེ་ སུ་ཞིག་རྒེ་ཀ་ནི་ མུལ་ མ་ནེན་། རང་ལ་ ཕོག་ ཐོབ་ཀན་འབེ་ཀ་ ཚིམ་འདེ་ འདོད་།”

15 མི་རྒུན་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ རྐྱོད་ཅེ་ལ་ སྲུྃ་རྡེ་ ཡོད་ཅེ་ཀ་ནི་ ཁོང་རྒུ་ནི་ ཡོ་ཧཱ་ནན་ ཁོ་རང་ མ་ཤི་ཀ་ འིན་ མན་ནེ་ཧེ་ སམ་མེ་ཡོད་པེན་། 16 ཡོ་ཧཱ་ནན་ནེ་ མི་རྒུན་ལ་ མོལ་, “ངེ་ ཁྱི་ཞ་ ཆུའི་ཁྲུའི་ ཏང་ངེ་ཡོད་། འིན་ན་ ངེ་ ལྟིང་ནི་ རྐྱོད་ཅེ་ཅེན་འབོ་, ངེ་སང་ མང་ངེ་ ཝང་ཅེན་, ཡང་ ངེ་ ཞབ་ཤི་ ཙོག་སེ་ ཁོང་ངེ་ ཞཔ་ལམ་ རོ་རྦུད་ ཀྲོལ་ཤེ་ འོའེ་སྤ་ མེད་། ཁོང་ངེ་ ཏམ་པེ་ ཐུག་ཡིད་ ཏང་ མེ་ ཁྲུའི་ས་ལེན་། 17 ཞིང་འབད་པེ་ འུལ་ཏག་ལ་ ཟར་ ཉམ་པོ་, ཀྲོ་ རྡང་ ཕུག་མ་ པེ་རྡེ་ ཀྲོ་ ཁོ་རང་ངེ་ པང་ངེ་ན་ ཡང་ ཕུག་མ་ མེ་ན་ སྲག་རྒེ་ ཙོག་སེ་ ཁོང་ངེ་ལ་ ཁོ་རང་ངེ་ མི་རྒུན་ འདང་ མི་ ངན་པ་རྒུན་ སོ་སོ་ པེ་ ཛེ་རྡེན་།” 18 ཡོ་ཧཱ་ནན་ནེ་ མི་རྒུན་ལ་ ཏོ་ཙོག་སེ་ མང་པོ་ སྤང་ པུད་རྡེན་འདང་ ནེ་ཚུལ་ ཟང་པོ་ ཤེད་།

19 འིན་ན་ ཡོ་ཧཱ་ནན་ནེ་ ཀ་ལོན་ ཧེ་རོད་ལ་, ཨ་ཅོའེ་ ན་མ་ ཧེ་རོ་འདི་ ཉམ་པོ་ ན་མ་ ཅོ་ཅེ་ རྡང་ ཞེན་ ལེ་ཧ་ ངན་པ་ ཅོ་ཀན་ ཚང་མེ་ཕི་ ཉེད་ཀལ་ ཅོའོ་ ཛེད་། 20 ཏོ་ མ་ཚེད་ ཧེ་རོད་འདེ་ ཡོ་ཧཱ་ནན་ ཙོན་ལ་ ཧར་ཤེ་རྦོ་ལ་ རྡིག་པ་ ཅོའེ་།

ཡི་ཤུ་ ཁྲུའི་སལ་ཧན་ འདང་ ཁོང་ངེ་ ཕ་མེ་པོ་རྒུན་།

21 མི་ཚང་མེ་ ཁྲུའི་ནེན་ཟ་ནི་ ཡི་ཤུའི་ལ་ ཁྲུའི་ནེན་ནེ་ ཛེད་། ཁོང་ངེ་ མོ་ལམ་ ཞུ་ ཛེད་ཟ་ནི་ ནམ་ཀ་ པེ་རྡེ་ 22 ཏམ་པེ་ ཐུག་ཡིད་ ཕུར་རྒོན་ ཙོག་སེ་ ཁོང་ངེ་ཀ་ པབ་། ཡང་ ནམ་ཀ་ནི་ སུང་ཧད་ཞི་རྒེ་ མོལ་, “ཁྱེ་རང་ ངེ་ པུ་ཙ་ ཤེ་སྤའོ་ འིན་, ཁྱེ་རང་ ཉམ་པོ་ ང་ ཧོཔ་ ཐེད་པོ་ འིན་།”

23 ཡི་ཤུའི་ ཀོན་འཇོག་རྒེ་ ཞབ་རྟོག་ ཛེད་ཅེ་ འགོ་ཟུག་ཟ་ནི་ ཁོང་ངེ་ རྒོང་ལོ་ སུམ་ཅུ་ ཟམ་ ཆ་ཡོད་པེན་། མི་རྒུ་ནི་ ཡི་ཤུ་ ཡོ་སེབ་རྦེ་ པུ་ཙ་ ནོག་ སམ་མེ་ཡོད་པེན་།

ཡོ་སེབ་ནི་ ཧེ་ལི་ པུ་ཙ་ འིན་འབེན་།

24 ཧེ་ལི་ནི་ མཏ་ཐད་རྡེ་ པུ་ཙ་,

མཏ་ཐད་ནི་ ལེ་ཝི་ པུ་ཙ་,

ལེ་ཝི་ནི་ མེལ་ཀི་ པུ་ཙ་,

མེལ་ཀི་ནི་ ཡན་ན་ཡི་ པུ་ཙ་,

ཡན་ན་ཡི་ནི་ ཡོ་སེབ་རྦེ་ པུ་ཙ་ འིན་འབེན་།

25 ཡོ་སེབ་ནི་ མཏ་ཏ་ཐི་ཡཱེ་ པུ་ཙ་,

མཏ་ཏ་ཐི་ཡཱ་ནི་ ཨ་མོའེ་ པུ་ཙ་,

ཨ་མོ་ནི་ ན་ཧུམ་མེ་ པུ་ཙ་,

ན་ཧུམ་ནི་ ཨེ་ས་ལི་ པུ་ཙ་,

ཨེ་ས་ལི་ནི་ ནག་འགཱ་ཡི་ པུ་ཙ་,

26 ནག་འགཱ་ཡི་ནི་ མཱ་ཀད་རྡེ་ པུ་ཙ་,

མཱ་ཀད་ནི་ མཏ་ཏ་ཐི་ཡཱེ་ པུ་ཙ་,

མཏ་ཏ་ཐི་ཡཱ་ནི་ སེ་མེ་འིན་ནེ་ པུ་ཙ་,

སེ་མེ་འིན་ནི་ ཡོ་སེག་རྒེ་ པུ་ཙ་,

ཡོ་སེག་ནི་ ཡུ་འདཱེ་ པུ་ཙ་ འིན་འབེན་།

27 ཡུ་འདཱེ་ནི་ ཡོ་འན་ནེན་ནེ་ པུ་ཙ་,

ཡོ་འན་ནེན་ནི་ རེ་སཱེ་ པུ་ཙ་,

རེ་སཱ་ནི་ ཟེ་རུ་འབཱ་འབེལ་ལེ་ པུ་ཙ་,

ཟེ་རུ་འབཱ་འབེལ་ནི་ ཤ་ལ་ཏི་ཡེལ་ལེ་ པུ་ཙ་,

ཤ་ལ་ཏི་ཡེལ་ནི་ ནེ་རི་ པུ་ཙ་ འིན་འབེན་།

28 ནེ་རི་ནི་ མེལ་ཀི་ པུ་ཙ་,

མེལ་ཀི་ནི་ ཨད་རྡེ་ པུ་ཙ་,

ཨད་རྡེ་ནི་ ཀོ་སམ་མེ་ པུ་ཙ་,

ཀོ་སམ་ནི་ ཨེལ་མ་འདཱམ་མེ་ པུ་ཙ་,

ཨེལ་མ་འདཱམ་ནི་ ཨེར་རེ་ པུ་ཙ་ འིན་འབེན་།

29 ཨེར་ནི་ ཡོ་ཤུ་ཨེ་ པུ་ཙ་,

ཡོ་ཤུ་ཨ་ནི་ ཨེ་ལི་ཡེ་ཟེ་རེ་ པུ་ཙ་,

ཨེ་ལི་ཡེ་ཟེར་ནི་ ཡོ་རེམ་མེ་ པུ་ཙ་,

ཡོ་རེམ་ནི་ མཏ་ཐད་རྡེ་ པུ་ཙ་,

མཏ་ཐད་ནི་ ལི་ཝི་ པུ་ཙ་ འིན་འབེན་,

30 ལི་ཝི་ནི་ ཤི་མི་ཡོན་ནེ་ པུ་ཙ་,

ཤི་མི་ཡོན་ནི་ ཡུ་འདཱེ་ པུ་ཙ་,

ཡུ་འདཱ་ནི་ ཡོ་སེབ་རྦེ་ པུ་ཙ་,

ཡོ་སེབ་ནི་ ཡོ་ནམ་མེ་ པུ་ཙ་,

ཡོ་ནམ་ནི་ ཨེ་ལི་ཡ་ཀིམ་མེ་ པུ་ཙ་ འིན་འབེན་།

31 ཨེ་ལི་ཡ་ཀིམ་ནི་ མེ་ལེ་ཡེ་ པུ་ཙ་,

མེ་ལེ་ཡ་ནི་ མེན་ན་ནེ་ པུ་ཙ་,

མེན་ན་ནི་ མཏ་ཏ་ཐཱེ་ པུ་ཙ་,

མཏ་ཏ་ཐཱ་ནི་ ན་ཐན་ནེ་ པུ་ཙ་,

ན་ཐན་ནི་ འདཱ་འབིད་རྡེ་ པུ་ཙ་ འིན་འབེན་།

32 འདཱ་འབིད་ནི་ ཡི་ཤེ་ པུ་ཙ་,

ཡི་ཤེ་ནི་ ཨོ་འབེད་རྡེ་ པུ་ཙ་,

ཨོ་འབེད་ནི་ འབོ་ཨཟ་ཟེ་ པུ་ཙ་,

འབོ་ཨཟ་ནི་ སལ་མོན་ནི་ པུ་ཙ་,

སལ་མོན་ནི་ ན་ཧ་ཤོན་ནེ་ པུ་ཙ་ འིན་འབེན་།

33 ན་ཧ་ཤོན་ནི་ ཨམ་མི་ན་འདབ་རྦེ་ པུ་ཙ་,

ཨམ་མི་ན་འདབ་ནི་ ཨད་མིན་ནེ་ པུ་ཙ་,

ཨད་མིན་ནི་ ཨར་ནི་ པུ་ཙ་,

ཨར་ནི་ནི་ ཧེ་རོན་ནེ་ པུ་ཙ་,

ཧེ་རོན་ནི་ ཕེ་རེ་ པུ་ཙ་,

ཕེ་རེ་ནི་ ཡུ་འདཱེ་ པུ་ཙ་ འིན་འབེན་།

34 ཡ་ཧུ་འདཱ་ནི་ ཡ་ཀུབ་རྦེ་ པུ་ཙ་,

ཡ་ཀུབ་ནི་ ཨི་སཱག་རྒེ་ པུ་ཙ་,

ཨི་སཱག་ནི་ ཨབ་ར་ཧམ་མེ་ པུ་ཙ་,

ཨབ་ར་ཧམ་ནི་ ཏི་རཧ་ཧེ་ པུ་ཙ་,

ཏི་རཧ་ནི་ ན་ཧོར་རེ་ པུ་ཙ་ འིན་འབེན་།

35 ན་ཧོར་ནི་ སེ་རུག་རྒེ་ པུ་ཙ་,

སེ་རུག་ནི་ རེ་འུའི་ པུ་ཙ་,

རེ་འུ་ནི་ ཕེ་ལེག་རྒེ་ པུ་ཙ་,

པེ་ལེག་ནི་ ཨེ་འབེར་རེ་ པུ་ཙ་,

ཨེ་འབེར་ནི་ ཤེ་ལག་རྒེ་ པུ་ཙ་ འིན་འབེན་།

36 ཤེ་ལག་ནི་ ཀེ་ནེན་ནེ་ པུ་ཙ་,

ཀེ་ནེན་ནི་ ཨར་པག་ཤཱད་རྡེ་ པུ་ཙ་,

ཨར་པག་ཤཱད་ནི་ ཤེམ་མེ་ པུ་ཙ་,

ཤེམ་ནི་ ནོ་ཨཱེ་ པུ་ཙ་,

ནོ་ཨཱ་ནི་ ལ་མེག་རྒེ་ པུ་ཙ་ འིན་འབེན་།

37 ལ་མེག་ནི་ མ་ཐུ་ཤེ་ལག་རྒེ་ པུ་ཙ་,

མ་ཐུ་ཤེ་ལག་ནི་ ཨེ་ནོག་རྒེ་ པུ་ཙ་,

ཨེ་ནོག་ནི་ ཡེ་རེད་རྡེ་ པུ་ཙ་,

ཡེ་རེད་ནི་ མ་ཧ་ལ་ལེལ་ལེ་ པུ་ཙ་,

མ་ཧ་ལ་ལེལ་ནི་ ཀེ་ནེན་ནེ་ པུ་ཙ་ འིན་འབེན་,

38 ཀེ་ནེན་ནི་ ཨེ་ནོའེ་ པུ་ཙ་,

ཨེ་ནོ་ནི་ སེད་རྡེ་ པུ་ཙ་,

སེད་ནི་ ཨ་འདཱམ་མེ་ པུ་ཙ་,

ཡང་ ཨ་འདཱམ་ནི་ ཀོན་འཇོག་རྒེ་ ཛེད་ཀ་ནེ་ མིའུ་ འིན་འབེན་།