ཡི་ཤུ་ མ་ཤི་ཀ་ ལྟམ་།
2
ཏེ་ཏུའི་ལ་ རོམ་མེ་ རྒྱ་སྤོ་ ཨ་འགུ་ཏུ་ རོམ་ རྒྱལ་སྲིད་རྡེ་ ཡོག་ལ་ ཡོ་ཀ་ནེ་ ཡུལ་ ཚང་མེ་ མི་ཀྲྃ་ སི་ཅེ་ལ་ ཀཱ་ ཏྃ་། 2 ཀྱི་རི་ནི་ཡུ་ སི་རི་ཡཱ་ ཡུལ་ཞོང་ངེ་ ཀ་ལོན་ ཡོད་ ཏུའི་ལ་, འི་ མི་ཀྲྃ་ སི་ཅེ་འབོ་ ཏང་པོ་རང་ འིན་འབེན་ 3 ཡང་ མི་ཚང་མ་ མིང་ འབྲི་ཅེ་ལ་ རང་རང་ངེ་ རང་ཡུལ་ལ་ སོང་། 4 ཡོ་སེབ་ རྒྱ་སྤོ་ འདཱ་འབིད་རྡེ་ ཕར་རྒྱུད་ནི་ འིན་འབེ་, ཁོ་ འགཱ་ལིལ་ལེ་ ཡུལ་ཞོང་ངེ་ ན་ཙ་རེད་ ཀྲོང་ཁྱེར་ནི་, ཡ་ཧུ་འདཱ་ ཡུལ་ཞོང་ངེ་ འདཱ་འབིད་རྡེ་ ཀྲོང་ཁྱེར་ འབེད་ལེ་ཧེམ་ལ་ སོང་། 5 ཡོ་སེབ་རྦེ་ ན་མ་ལ་ ཏྲི་རྡེ་ འིན་ཀ་ནེ་ མར་ཡམ་, ཀ་འབོ་ལ་ ཕྲུ་རྒུ་ རྐྱེ་ཅེ་ ཡོད་པེན་, ཁོ་ ཉམ་པོ་ མིང་ཅུག་རྒེ་ལ་ ཁྱེར་།6 ཏུ་རུ་ ཡོད་ཏུའི་, ཕྲུ་རྒུ་ རྐྱེ་ཅེ་ ཏུའི་རྦོ་ ལེཔ་། 7 ཡང་ མར་ཡམ་ལ་ འགོ་མ་ ཕྲུ་རྒུ་, པུ་ཙ་ཞིག་ ལྟམ་། ཁོའེ་ ཕྲུ་རྒུ་ རེ་ན་ ཏུམ་འདེ་ ཀྲཔ་རྐྱུ་ན་ པོར་, ཅེ་ཟེར་ནི་ ཁོང་རྒུན་ལ་ འབྲང་ས་ འདེད་སེ་ ནང་ མ་ཐོབ་རྦེ་ འིན་འབེན་།
ལུག་ཟི་རྒུན་ འདང་ རྡེ་བ་ཅན་ནེ་ ཕོ་ཉ་རྒུན་།
8 ཏེ་ ཚེན་ལ་, ཉེ་ཁོར་རེ་ སྤང་ཐང་ཞིག་རྒེ་ཀ་ ལུག་ཟི་རྒུན་ འདེད་ཏེ་ ཁོ་རང་ངེ་ ལུག་རྒུན་ སྲུང་ངེ་ཡོད་པེན་། 9 ཀོན་འཇོག་རྒེ་ ཕོ་ཉ་ཞིག་ ཁོང་རྒུ་ནི་ འཇལ་, ཡང་ ཙོབོ་ ཀོན་འཇོག་རྒེ་ ཟི་ཞིད་རྡེ་ ཁོང་རྒུན་ ཡོད་སེ་ ཉེ་ཁོར་རེ་ན་ འོད་ཅེན་ འགྱུར་རྦེ་, ཁོང་རྒུན་ ཧོཔ་ འཇིའི་། 10 འིན་ན་ ཕོ་ཉེ་ ཁོང་རྒུན་ལ་ མོལ་, “མ་འཇིའི་ཧེ་, ངེ་ མི་ཚང་མ་ལ་ མ་ རྒ་མོ་ ཁྱོང་ཅེ་ཅེན་ནེ་ ནེ་ཚུལ་ ཟང་པོ་ ཤེད་རྡེ་ཡོད་། 11 ཏི་རིང་ ཁྱི་ཞི་ ཕ་མེ་པེ་ རྒྱ་སྤོ་ འདཱ་འབིད་རྡེ་ ཀྲོང་ཁྱེར་རེ་ན་ རྐྱབ་འགོན་འབོ་ ཁྲུྃ་རྡེ་ འིན་། ཁོང་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀེ་, ཙོབོ་རྦོ་ འིན་། 12 ཡང་ ཏོ་རྦེ་ ལྟའ་རྦོ་ ཁྱི་ཞ་རྒུན་ལ་ ཕྲུ་རྒུ་ཞིག་ རེ་ན་ ཏུམ་འདེ་, ཀྲཔ་རྐྱུ་ན་ ཉལ་རྡེ་ ཐོ་ངེན་།”
13 ཧུན་མེད་ལ་ རྡེ་བ་ཅན་ནེ་ ཕོ་ཉེ་ ཚོག་ ཆོན་མོ་ཞིག་ འབིང་འདེ་, ཏེ་ ཕོ་ཉ་ ཉམ་པོ་ ཀོན་འཇོག་ལ་ རྟོད་པ་ པུ་ལེན་ མོལ་,
14 “ཀོན་འཇོག་ ཉམ་པོ་ རྡེ་བ་ཅན་ནེ་ ཐོ་ཤོག་ལ་ ཞུ་རྡེ་ ཡོ་ཀན་རྒུ་ནི་
ཁོང་ལ་ རྟོད་པ་ པུལ་,
ཡང་ ཀོན་འཇོག་ ཐུག་ཐེད་རྡེ་ ཛེད་ཀ་ནེ་
འཇིག་རྟེན་པ་རྒུ་ནི་ཀ་ ཞིའི་རྡེ་ སོང་།”
15 ཁོང་རྒུན་ ཕྃ་རྡེ་ ཕོ་ཉ་རྒུན་ རྡེ་བ་ཅན་ལ་ ལོག་ཏེ་ རྐྱོད་རྡེ་རྡང་, ལུག་ཟི་རྒུ་ནི་ ཅིག་ ཏང་ ཅིག་ལ་ ཟེར་, “ཏ་ ཙོབོ་ ཀོན་འཇོག་རྒེ་ ཨ་ཧོ་ མོལ་ཧན་ སོང་ཀན་རྒུན་ ལྟ་ལ་ ཨ་ཧོ་ འབེད་ལེ་ཧེམ་ལ་ ཆེན་།”
16 ཏེ་ནི་ ཁོང་རྒུན་ འགྱོ་སྤ་ སོང་འདེ་, མར་ཡམ་, ཡོ་སེབ་ ཏང་ ཀྲཔ་རྐྱུ་ན་ ཉལ་ཧན་ ཕྲུ་རྒུ་རྦོ་ འཇལ་། 17 ཕྲུ་རྒུ་ འཇལ་རྡེ་ ལྟིང་ནི་ ལུག་ཟི་རྒུ་ནི་ ཕྲུ་རྒུའི་ ཧོར་ལ་ མོལ་ཧ་ནེ་ ནེ་ཚུལ་རྦོ་ ཚང་མ་ལ་ ཤེད་། 18 ལུག་ཟི་རྒུ་ནི་ ཤེད་ཀན་རྒུན་ ཚོར་ཧ་ནེ་ མི་ ཚང་མ་ ཧ་ལེ་། 19 འིན་ན་ མར་ཡམ་མེ་ སོང་ཀན་ ཚང་མ་ ཉིང་ངེ་ན་ ཁུར་རྡེ་ ཡང་ ཏོ་ ཚང་མེ་ ཧོར་ལ་ སམ་བ་ ཏང་ངེན་ འདེད་། 20 ལུག་ཟི་རྒུ་ནི་ ཚོར་ཧན་ འདང་ ཐོང་ཀན་ ཚང་མེ་ཕི་ ཀོན་འཇོག་ལ་ རྟོད་པ་ པུ་ལེན་ ལོག་ཏེ་ སོང་, ཅེ་ཟེར་ནི་ ཏོ་རྒུན་ ཕོ་ཉེ་ མོལ་ཧན་ ནང་ཞིན་ འདྲན་འདྲ་ ཡོད་པེན་། 21 ཞག་ རྒྱེད་པེ་ ཞག་ལ་, ནམ་ ཕྲུ་རྒུ་ལ་ འགོཔ་ཅེཏ་ ཅོ་ཅེ་ ཏུའི་ འིན་འབེན་, ཕྲུ་རྒུའི་ ཚན་ལ་ ཡི་ཤུ་ ཏག་, ཀ་ཟུག་ ཕྲུ་རྒུ་ མར་ཡམ་མེ་ ཅང་ཀོག་ན་ ཆག་རྡེ་སང་ ངུལ་ལ་ ཕོ་ཉེ་, ཏེ་ མིང་འབོ་ ཏག་རྒེ་ ཛེད་ཅེ་ལ་ མོལ་རྡེ་ འིན་འབེན་།
ཡི་ཤུ་ ཀོན་འཇོག་རྒེ་ ཁང་པ་ལ་ ཁྱེར་རེ་ ཛེད་།
22 ལུང་རྟོན་པ་ མོ་ཤེ་ ཀཱ་ཁྲིམ་ ནང་ཞིན་ ཕྲུ་རྒུ་ རྐྱེ་རྡེ་ ལྟིང་ནི་ ཨ་མ་ སང་མ་ ཆ་ཅེ་ ཏུའི་ ཚང་ངེ་རྡང་, ཡོ་སེབ་ ཏང་ མར་ཡམ་མེ་ ཕྲུ་རྒུ་རྦོ་ ཙོབོ་ ཀོན་འཇོག་རྒེ་ འིན་ཀན་ ལྟན་ཅེ་ཕི་ ཡེ་རུ་ཤ་ལེམ་མེ་ ཀོན་འཇོག་རྒེ་ ཁང་པ་ལ་ ཁྱེར་། 23 ཙོབོ་ ཀོན་འཇོག་རྒེ་ ཀཱ་ཁྲིམ་མེ་ན་ འབྲི་རྡེ་ འདུག་, “པུ་ཙ་ འགོ་རྦུ་ ཚང་མ་ ཙོབོ་ ཀོན་འཇོག་རྒེ་ ལྟེད་ཀན་འབོ་ ལྟན་རྒོའེ་།” 24 ཏེ་ནི་ ཙོབོ་ ཀོན་འཇོག་རྒེ་ ཀཱ་ཁྲིམ་མེ་ ནང་ཞིན་, “ཕུར་རྒོན་ ཡང་ ཕུར་རྒོན་ནེ་ ཕྲུ་རྒུ་ ཉི་” ཁོང་རྒུ་ནི་ སྲོག་ཆོད་ལ་ པུལ་། 25 ཏེ་རྒ་ ཏུའི་ལ་ ཡེ་རུ་ཤ་ལེམ་མེ་ན་ ཤི་མི་ཡོན་ རྒྱལ་ལེ་ རྡང་ ཀྲང་པོ་ མི་ཞིག་, ཁོ་ ཨིས་ར་ཡེལ་པ་རྒུན་ལ་ ཐར་པ་ ཁྱོང་ཀ་ནེ་ འདམ་མེ་ ཛེད་ཀན་ནེ་ མ་ཤི་ཀ་ རྐྱོད་ཅེ་ལ་ སྲུྃ་རྡེ་ ཡོད་པེན་། ཡང་ ཏམ་པེ་ ཐུག་ཡིད་ ཁོ་ ཉམ་པོ་ ཡོད་པེན་། 26 ཏམ་པེ་ ཐུག་ཡིད་རྡེ་ ཁོ་ ནམ་ཚུག་པ་ ཁོའེ་ ཙོབོ་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ མི་འཇལ་ ཏེ་ཏེ་ཚུག་པ་ ཁོ་ མི་ཤི་ མོལ་རྡེ་ ངོན་ཅུག་རྒེ་ ཛེད་། 27 ཏམ་པེ་ ཐུག་ཡིད་རྡེ་ ཤི་མི་ཡོན་ ཀོན་འཇོག་རྒེ་ ཁང་པ་ལ་ ཁྱེར་རེ་ ཛེད་། ཀཱ་ཁྲིམ་མེ་ ལུག་སྲོལ་ ནང་ཞིན་ ཕྲུ་རྒུ་ ཅོ་རྒོ་ཤེ་རྦོ་ ཅོ་ལ་ ཕ་མ་ ཉ་ཧེ་ ཡི་ཤུ་ ཀོན་འཇོག་རྒེ་ ཁང་པ་ལ་ ཁྱོང་ངེ་རྡང་, 28 ཤི་མི་ཡོན་ནེ་ ཕྲུ་རྒུ་ ལག་པེ་ན་ ཁུར་རྡེ་ ཀོན་འཇོག་ལ་ རྟོད་པ་ པུ་ལེན་ ཟེར་,
29 “ཙོབོ་, ཉེ་རང་ངེ་ ཞལ་ཆེཏ་ ཛེད་ཀན་འབོ་ ཀྲུཔ་ཅེ་ཀ་ནི་,
ཉེ་རང་ངེ་ ཞབ་རྟོག་པ་ ཞིའི་རྡེ་ ཉམ་པོ་ ཤི་ཅེ་ལ་ རྒོང་སྤ་ སལ་།
30 ངེ་ མིག་ནི་ ཉེ་རང་ངེ་ ཐར་པ་འབོ་ འཇལ་
31 ཀའོ་ མི་ ཚང་མེ་ཕི་ ཉེ་རང་ངེ་ ཀྲལ་འགྲིག་ ཛེད་ཏེ་ འིན་།
32 ཁོང་ནི་ ཡ་ཧུ་འདཱ་པ་ མན་ཀན་རྒུན་ལ་ ཀོན་འཇོག་ ངོན་ཅུག་ཀ་ནེ་ འོད་ འིན་,
ཡང་ ཉེ་རང་ངེ་ མི་ ཨིས་ར་ཡེལ་པ་རྒུ་ནི་ སྤལ་རྦོ་ འིན་།”
33 ཁོང་ངེ་ ཧོར་ལ་ མོལ་ཧན་རྒུན་ ཚོར་རྡེ་ ཕྲུ་རྒུའི་ ཨ་རྦ་ རྡང་ ཨ་མ་ ཧ་ལེ་། 34 ཏེ་ནི་ ཤི་མི་ཡོན་ནེ་ ཁོང་རྒུན་ལ་ ཅིན་ལབ་ སལ་རྡེ་, ཨ་མ་ མར་ཡམ་ལ་ མོལ་, “ཀོན་འཇོག་རྒེ་ ཐབ་ལྡིང་ ནང་ཞིན་ འི་ ཕྲུ་རྒུ་རྦོ་ རྒྱུད་ཏེ་ ཨིས་ར་ཡེལ་པ་ མང་པོ་ཞིག་ འགྱེལ་ཤེ་ ཡང་ མང་པོ་ཞིག་ལ་ ཐར་པ་ ཐོབ་རྦེན་། ཁོང་ ལྟའ་ཞིག་ ཙོག་སེ་ ཞུ་རྡེ་ མི་རྒུན་ ཀོན་འཇོག་ས་ ཁྲི་རྡེན་, འིན་ནང་ མང་པོ་ཞིག་ ཁོང་ལ་ རྒྱཔ་འགལ་ ཅོའེན་། 35 ཏོ་རྦེ་ ཅོའེ་རྡེ་ མི་ མང་པེ་ ཉིང་ངེ་ ཐིལ་ནི་ སམ་ཚུལ་རྒུན་ ངོན་ཅུག་རྒེ་ ཛེ་རྡེན་ ཡང་ ཁྱེ་རང་ངེ་ སེམ་ལ་ ར་ཡི་ ཙུག་ཀན་ ཙོག་སེ་ ཚེར་ཧ་ ཡོང་ངེན་།”
36 ཨ་ཤེར་རེ་ མི་རིག་ནི་ འིན་ཀ་ནེ་ ཕ་ནུ་ཡེལ་ལེ་ པོ་མོ་ ཨན་ན་, མ་ རྒད་མོ་ ལུང་རྟོན་མ་ཞིག་ ཡོད་པེན་། ན་མ་ ཅོའེ་རྡེ་ ལོ་ རྡུན་ནེ་ ལྟིང་ནི་ ཁོའེ་ མག་པ་ ཤི་། 37 འ་ནེ་ མ་རང་མོ་ འགྱུར་རྡེ་ ལྟིང་ནི་ ཁོའེ་ ཡང་ ན་མ་ མ་ཅོའེ་། ཁོ་ ཀོན་འཇོག་རྒེ་ ཁང་པ་ནི་ མ་ནི་ མ་འབིང་ལ་, ཚེན་ འདང་ ཉི་མ་ ཀོན་འཇོག་ལ་ ཅོལ་ལེན་, ཉུང་ནེ་ལ་ འདེད་ཏེ་ མོ་ལམ་ ཞུའིན་ ཡོད་པེན་། ཏ་ ཁོ་ ལོ་ རྒྱེད་ཅུ་ཀྱེབ་ཞི་ ཆ་ཡོད་པེན་, 38 ཤི་མི་ཡོན་ནེ་ ཡོ་སེབ་ ཏང་ མར་ཡམ་ལ་ སྤེ་ར་ ཏང་ས་ ཁོ་ ཡོྃ་རྡེ་ ཀོན་འཇོག་ལ་ ཐུག་ཞེ་ཆེ་ ཞུའི་, ཁོའེ་ ཡེ་རུ་ཤ་ལེམ་པ་རྒུན་ལ་ ཐར་པ་ ཐོབ་ཅེ་ལ་ སྲུྃ་རྡེ་ ཡོ་ཀན་ ཚང་མ་ ཕྲུ་རྒུ་རྦེ་ ཧོར་ལ་ ཤེད་།
39 ཙོབོ་ ཀཱ་ཁྲིམ་ རྒོའེ་ཤེ་ ནང་ཞིན་ ཅོའེ་ ཚར་རེ་རྡང་ ཡོ་སེབ་ ཏང་ མར་ཡམ་ འགཱ་ལིལ་ལེ་ ཡུལ་ཞོང་, ཁོ་རང་རྒུ་ནི་ ཀྲོང་ཁྱེར་ ན་ཙ་རེད་ལ་ ལོག་ཏེ་ རྐྱོད་། 40 ཡང་ ཕྲུ་རྒུ་ ལྡན་འདེ་ ཤེད་ཅེན་ འགྱུར་། ཁོང་ ཤེ་རབ་རྦེ་ ཀང་འདེ་ ཀོན་འཇོག་རྒེ་ ཐུག་ཞེ་ ཁོང་ངེ་ཀ་ ཡོད་པེན་།
ཁྱོག་ཏོང་ ཡི་ཤུ་ ཀོན་འཇོག་རྒེ་ ཁང་པ་ལ་ རྐྱོད་།
41 ཡི་ཤུའི་ ཕ་མ་ ལོ་རྡང་ པེ་སག་རྒེ་ ཏུའི་ཤེན་ སི་རྒེ་ ཡེ་རུ་ཤ་ལེམ་ལ་ རྐྱོད་རྡེ་ཡོད་པེན་། 42 ཡི་ཤུ་ རྒོང་ལོ་ ཅུག་ཉི་ ཆ་ཟ་ནི་ ལུག་སྲོལ་ ནང་ཞིན་ ཁོང་རྒུན་ ཡེ་རུ་ཤ་ལེམ་མེ་ རྒྱལ་ས་ ཏུའི་ཤེན་ སི་རྒེ་ རྐྱོད་། 43 ཏུའི་ཤེན་ སི་ ཚར་རྡེ་ ཁོང་རྒུན་ རང་ཡུལ་ལ་ ལོག་ཏེ་ ཆ་ཟ་ནི་ པུ་ཙ་ ཡི་ཤུ་ ཕ་མ་ ཉམ་པོ་ མ་ཆ་ ཡེ་རུ་ཤ་ལེམ་ལ་ ཞུའུ་, འིན་ན་ ཁོང་ངེ་ ཕ་མ་ལ་ ཏོ་ རྒྱུའི་ མ་སོང་། 44 ཁོང་རྒུ་ནི་ ཡི་ཤུ་ ཁྲོ་པ་རྒུན་ ཉམ་པོ་ ཡོད་ཁྲོ་ སམ་འདེ་ ཞག་ཅིག་རྒེ་ ལམ་ འགྲུལ་རྡེ་ ལྟིང་ནི་ ཉེན་ འདང་ ཡ་ཏོ་རྒུ་ནི་ ཕྲོ་ ཕྲུ་རྒུ་ ཙལ་ཤེ་ འགོ་ཟུག་།
45 མ་ཐོབ་པེ་སང་ནི་ ཡེ་རུ་ཤ་ལེམ་ལ་ ལོག་ཏེ་ ཁོང་ ཙ་ལེ་ སོང་། 46 ཞག་ སུམ་པེ་ ཞག་ལ་ ཁོང་ ཀོན་འཇོག་རྒེ་ ཁང་པེ་ན་ ཆོའེ་ཤེད་ཀ་ནེ་ རྒྱར་རྒེན་རྒུ་ནི་ ཕྲོ་ ཞུ་རྡེ་ ཁོང་རྒུན་ལ་ ཉེ་ནེན་ ཏྲི་ཝ་ འདྲིན་ ཐོང་། 47 ཁོང་ངེ་ མོལ་ལེ་ ཚོར་ཧན་ ཚང་མ་ ཁོང་ངེ་ རིག་པ་ རྡང་ ཁེ་སྤ་ ལེན་ སལ་ཧན་འབེ་ཀ་ ཧ་ལེ་།
48 ཁོང་རྒུན་ ཉམ་པོ་ ཡི་ཤུ་ ཐོང་ངེ་རྡང་ ཕ་མ་ ཧ་ལེ་ ཡང་ ཨ་མེ་ ཁོང་ལ་ ཟེར་, “པུ་ཙ་, ཁྱེ་རང་ངེ་ ང་ཞ་ འི་ཟུག་ ཅེ་ ཅོའེ་རྦེན་? ཁྱེ་རང་ངེ་ ཨ་རྦ་ རྡང་ ངེ་ ཚེར་ཧ་ ཉམ་པོ་ ཁྱེ་རང་ ཙལ་རྦེན་།”
49 ཡི་ཤུའི་ ཁོང་རྒུན་ལ་ མོལ་, “ཁྱི་ཞི་ ཅི་ཕི་ ང་ ཙལ་རྦེན་? ངེ་ ཡབ་རྦེ་ ཁང་པེ་ན་ ང་ འདེད་རྒོ་ཤེའོ་ རྒྱུའི་མེད་རྡེ་?” 50 འིན་ན་ ཁོང་ངེ་ མོལ་ཧན་འབོ་ ཕ་མ་ལ་ ཧ་མ་ཀོ་།