ལུ་ཀ་ 1

ལུ་ཀེ་ འབྲི་ཛེད་ཀ་ནེ་ ནེ་ཚུལ་ ཟང་པོ་།

འི་ ཆག་འབྲི་ འབྲི་ཅེ་ ཧོར་།

ཤེ་སྤ་ ཐེའུ་ཕེ་ལུ་, ཨ་ཧོའེ་ རྐྱིལ་ལ་ སོང་ཀན་རྒུན་ རྒྱལ་རབ་ རྡུའི་རྡེ་ འབྲི་ཅེ་ མི་ མང་པེ་ ཙོན་འགྲུའི་ ཅོའེ་རྡེ་ ནོག་། 2 ཞེན་མ་ ཀའོ་ ཨ་ཧོའེ་ ཚོར་ཧ་ནེ་ ཏེ་རྒ་ ཁྲིན་འབོ་ ཁོང་རྒུ་ནི་ འབྲི་རྡེ་ ནོག་། ཏེ་རྒ་ ཚང་མེ་ འགོ་ནི་ཕ་ལ་ ལྟོའེ་, ནེ་ཚུལ་ ཟང་པོ་ ཞེན་རྒུ་ནི་ལ་ ལཔ་ཞ་ རྒྱུད་ཏེ་ ཀོན་འཇོག་ལ་ སི་ཝ་ ཅོ་ཅོའོ་ ཡོཏ་པེན་། 3 སི་ཝ་ཅེན་ནེ་ ཐེའུ་ཕེ་ལུ་, འགོ་ཟུག་ནི་ཕ་ལ་ ཅི་ཚང་མ་ ངེ་ལ་ ཞིབ་སལ་ ཅོའེ་རྡེ་ སིལ་ འདེད་ཀན་ འིན་། ཏོ་ ཁྱི་ཞ་ ཚང་མེ་ཕི་ འབྲི་ཅེ་ སམ་བ་ ཏྃ་རྦེན་། ཏེ་ཕི་ལ་ སྤེ་ཆ་ཅིག་རྒེ་ན་ ཚིར་ ནང་ཞིན་ འབྲི་རྦེན་། 4 ཁྱི་ཞ་ ཚང་མ་ ལཔ་ཀན་ སོན་ཏེ་ ཀྲང་པོ་ འིན་ཀན་འབོ་ ཁྱི་ཞ་ ཤེ་ཤེ་ཕི་ལ་ འི་ ཚང་མ་ འབྲི་ཡོད་།

ཁྲུའི་སལ་ཧན་ ཡོ་ཧཱ་ནན་ རྐྱེ་ཅེ་ ལུང་རྟན་།

5 ཧེ་རོད་, ཡ་ཧུ་འདཱ་ ཡུལ་ཞོང་ངེ་ རྒྱ་སྤོ་ འིན་ཏུའི་, ཟ་ཀར་ཡཱ་ ལ་མ་རྒུ་ནི་ རྡེ་ ཨ་འབི་ཡཱེ་ ཟེར་ཧན་འབེ་ ཐུའི་མི་ ལ་མ་ཞིག་ འིན་འབེན་། ཨ་འབི་ཡཱེ་, ལ་མ་ ཆོན་མོ་ ཨ་རོན་ནེ་ ཕར་རྒྱུད་ འིན་འབེན་, ཡང་ ཟ་ཀར་ཡཱེ་ ན་མ་ ཨེ་ལི་ས་འབེད་ཏང་ ཨ་རོན་ནི་ རྒྱུད་ནི་ འིན་འབེན་། 6 ཟ་ཀར་ཡཱ་ རྡང་ ཨེ་ལི་ས་འབེད་ ཉ་ཧ་ ཀོན་འཇོག་རྒེ་ ཧུན་འདུན་ལ་ ཀྲང་པོ་ མི་རིག་ འིན་འབེན་ ཅེ་ཟེར་ནི་, ཁོང་རྒུ་ནི་ ཙོབོ་ ཀོན་འཇོག་རྒེ་ ཀཱ་རྒྱ་ རྡང་ ཁྲིམ་ ཚང་མ་ སྲུང་ཅེ་ལ་ ནྃ་ རྒྱལ་ལེ་ ཏང་ངེ་ཡོད་པེན་། 7 འིན་ན་ ཁོང་རྒུན་ལ་ ཕྲུ་རྒུ་ མེད་པེན་ ཅེ་ཟེར་ནི་ ཨེ་ལི་ས་འབེད་ལ་ ཕྲུ་རྒུ་ རྐྱེ་ ཉེན་ཅེ་ མེད་པེན་། ཁོང་རྒུན་ རྒེ་རྡེ་ ཡོད་པེན་།

8 ཟ་ཀར་ཡཱ་ ཡོ་ཀ་ནེ་ ལཱ་མེ་ ཁག་པེ་ ཀོན་འཇོག་རྒེ་ ཁང་པེ་ན་ ཞབ་རྟོག་ ཞུ་ཅེ་ ལེ་ཧ་ འིན་ཟ་ནི་ ཟ་ཀར་ཡཱེ་ ཀོན་འཇོག་རྒེ་ ཁང་པེ་ན་ ཀོན་འཇོག་རྒེ་ ཧུ་འདུན་ལ་ ཞབ་རྟོག་ ཞུ་ཡོད་པེན་། 9 ལ་མ་རྒུ་ནི་ ལུག་སྲོལ་ ནང་ཞིན་ རྒྱེན་ ཏྃ་རྦེ་ ཀོན་འཇོག་རྒེ་ ཁང་པེ་ན་ སྤོའེ་ ཏུག་ཅེ་ལ་ ཟ་ཀར་ཡཱེ་ མིང་ འབིང་། 10 ཁོའེ་ སྤོའེ་ ཏུག་རྒེན་ ཡོད་ཟ་ནི་ མི་རྒུན་ ཕི་ལོག་ལ་ འདེད་ཏེ་ མོ་ལམ་ ཞུ་ཡོད་པེན་།

11 ཏེ་ནི་ ཟ་ཀར་ཡཱ་ ཀོན་འཇོག་རྒེ་ ཕོ་ཉ་ཞིག་ སྃ་ཤུག་ ཏང་ཀ་ནེ་ ཆོད་ཤམ་ ཡོའེ་སྤ་ ཆོག་ལ་ ཞྃ་རྡེ་ འཇལ་། 12 ཟ་ཀར་ཡཱེ་ ཕོ་ཉ་འབོ་ འཇལ་ལེ་རྡང་ ཁོ་ འདྲོ་རྡེ་ ཧོཔ་ འཇིའི་། 13 འིན་ན་ ཕོ་ཉེ་ ཁོ་ མོལ་, “ཟ་ཀར་ཡཱ་, འཇིའི་ མ་འཇིའི་། ཀོན་འཇོག་རྒེ་ ཁྱེ་རང་ངེ་ མོ་ལམ་ སན་ནེ་ ཛེད་། ཁྱེ་རང་ངེ་ ན་མ་ ཨེ་ལི་ས་འབེད་ལ་ པུ་ཙ་ཞིག་ རྐྱེན་ ཡང་ ཁྱེ་རང་ངེ་ ཁོའེ་ མིང་ལ་ ཡོ་ཧཱ་ནན་ ཏོག་། 14 ཁོའེ་ ཁྱེ་རང་ལ་ རྒ་མོ་ རྡང་ རྐྱིད་པོ་ ཁྱོང་ངེན་ ཡང་ ཁོ་ རྐྱེ་ཅེ་རྦེ་ མི་ མང་པེ་ རྒ་མོ་ ཅོའེན་, 15 ཅེ་ཟེར་ནི་ ཙོབོ་ ཀོན་འཇོག་རྒེ་ ཧུན་འདུན་ལ་ ཁོ་ མ་ ཀྲག་པོ་ འིན་། ཁོ་ རྒུན་འགྲུམ་མེ་ ཁོའེ་ རྡང་ ཆང་ མི་ཐུང་། རྐྱེ་སང་ ངུལ་ལ་ ཁོ་ ཨ་མེ་ ཅང་ཀོག་ལ་ ཡོད་ཟ་ནི་ ཏམ་པེ་ ཐུག་ཡིད་རྡེ་ ཀང་ངེན་། 16 ཁོའེ་ ཨིས་ར་ཡེལ་པ་ མང་པོ་ ཙོབོ་ ཁོང་རྒུ་ནི་ ཀོན་འཇོག་རྒེ་ཀ་ ལོག་ཏེ་ ཁྱོང་ངེན་། 17 ལུང་རྟོན་པ་ ཨེ་ལི་ཡཱ་ ཙོག་སེ་ སེམ་ཡིད་ ཏང་ ཝང་ ཉམ་པོ་ ཁོ་ ཙོབོ་ ངུལ་ལ་ སོང་འདེ་, ཨ་རྦ་ རྡང་ ཕྲུ་རྒུ་རྒུ་ནི་ན་ ཐུན་འབྲེལ་ ཆ་ཅུག་རྒེན་, ཡང་ ཁ་ལ་ མི་ཉེན་ཀན་རྒུན་ ཀོན་འཇོག་རྒེ་ ཁྲིམ་མེ་ན་ འགྲུལ་ཧན་རྒུ་ནི་ ཤེ་རབ་ཅེན་རྒུན་ འགྱུར་ཤུག་ཏེ་ ཙོབོ་ རྐྱོད་ཅེ་ ཏུའི་ཕི་ མི་རྒུན་ ཀྲལ་འགྲིག་ ཅོའེན་།”

18 ཏེ་ནི་ ཟ་ཀར་ཡཱེ་ ཕོ་ཉ་ལ་ ཟེར་, “ཉེ་རང་ངེ་ མོལ་ཧན་རྒུན་ ནེན་ཏེན་ ཆ་ཅེ་འབོ་ ང་ ཀ་ཟུག་རྒེ་ རྡེན་ཤེ་རྡེན་? ཅེ་ཟེར་ནི་ ང་ རྒེ་ ཡང་ ངེ་ ན་མེ་ ལོ་ལ་ ཆོན་མོ་ ནོག་།”

19 ཕོ་ཉེ་ མོལ་, “ང་ འགབ་རི་ཨེལ་, ཀོན་འཇོག་རྒེ་ ཧུ་འདུན་ལ་ ལྃ་རྡེ་ འདེད་ཀན་ ཡང་ ཁྱེ་རང་ལ་ འི་ ཁྲིན་ ཟང་པོ་རྦོ་ ཤེད་རྡེ་ལ་ ཀ་ལེ་ ཛེད་ཏེ་ འིན་། 20 འིན་ན་ ཁྱེ་རང་ངེ་ ངེ་ ཟེར་ཧན་རྒུན་ རྡེན་ མ་ཆེ་རྦེ་, ཁྱེ་རང་ངེ་ པུ་ཙ་ རྐྱེ་རྐྱེ་ཚུག་པ་ ཁྱེ་རང་ སྤེ་ར་ ཏང་ མི་ཉེན་, ཅེ་ཟེར་ནི་ ངེ་ ཟེར་ཧན་རྒུན་ འདམ་མེ་ ཛེད་ཀ་ནེ་ ཏུའི་ཀ་ འདྲན་འདྲ་ ཀྲུཔ་རྦེན་།”

21 ཏེ་རྒ་ཟ་ནི་ ཕི་ལོག་ལ་ སྲུྃ་རྡེ་ ཡོ་ཀན་རྒུ་ནི་ ཟ་ཀར་ཡཱ་ ཀོན་འཇོག་རྒེ་ ཁང་པེ་ན་ ཅི་ཕི་ མང་པོ་ འགོར་རེ་ནོག་ སམ་། 22 ཟ་ཀར་ཡཱ་ ཕི་ལོག་ལ་ འབིང་ངེ་རྡང་ སྤེ་ར་ ཏང་ མ་ཉེན་། ཁོ་ ཀོན་འཇོག་རྒེ་ ཁང་པེ་ན་ ཞལ་ཟིག་ ཐོང་ཀན་འབོ་ ཁོང་རྒུན་ལ་ ཧ་ཀོ་, ཅེ་ཟེར་ནི་ སྤེ་ར་ ཏང་ མ་ཉེན་འབེ་ ཁོའེ་ ལག་པ་ ཉམ་པོ་ ལག་ཟོ་ ཅོའེ་།

23 ལ་མེ་ ཞབ་རྟོག་ ཞུ་ཅེ་ ཏུའི་ ཚར་རེ་རྡང་, ཁོ་ ཁང་པ་ ལོག་ཏེ་ སོང་། 24 ཞག་ ཁ་ཅིག་ ལྟིང་ནི་ ཁོའེ་ ན་མ་ ཨེ་ལི་ས་འབེད་ རྐྱེ་ཅེ་མ་ འགྱུར་, ཡང་ ཁོ་ ལྡ་ ང་ཚུག་པ་ སུ་ལ་ མ་ཐུག་རྒེ་ལ་ ཁང་པ་ འདེད་། 25 ཨེ་ལི་ས་འབེད་རྡེ་ ཟེར་, “ང་ ཕྲུ་རྒུ་ མི་རྐྱེ་ཅེ་ ཁྲེལ་རྦ་འབོ་ མི་རྒུ་ནི་ འདུན་ལ་ མེ་ཀན་ ཛེད་ཏེ་ ཙོབོ་ ཀོན་འཇོག་རྒེ་ ངེ་ཀ་ ཙམ་ཤིག་རྒེ་ ཐུག་ཞེ་ ཛེད་ཏེ་ ནོག་།”

ཡི་ཤུ་ ལྟམ་ཅེ་ ལུང་རྟན་།

26 ཨེ་ལི་ས་འབེད་ རྐྱེ་ཅེ་མ་ འགྱུར་རྡེ་ ལྡ་ ཀྲུག་པེ་ན་ ཀོན་འཇོག་རྒེ་ ཕོ་ཉ་ འགབ་རི་ཨེལ་ འགཱ་ལིལ་ལེ་ ཡུལ་ཞོང་ངེ་ ཀྲོང་ཁྱེར་ ན་ཙ་རེད་ལ་, 27 མར་ཡམ་ ཟེར་ཧ་ནེ་ སང་མ་ ན་ཅུང་ཞིག་ས་ ཀ་ལེ་ ཛེད་། ཁོ་ རྒྱ་སྤོ་ འདཱ་འབིད་རྡེ་ ཕར་རྒྱུད་ ཡོ་སེབ་ ཟེར་ཧན་འབོ་ལ་ ན་མ་ ཏྲི་རྡེ་ འིན་འབེན་། 28 ཕོ་ཉ་ མར་ཡམ་ས་ རྐྱོད་ཏེ་ མོལ་, “འཇུ་ལེ་, ཅིན་ལབ་ཅེན་ནེ་ པོ་མོ་, ཙོབོ་ ཀོན་འཇོག་རྒེ་ ཁྱེ་རང་ ཉམ་པོ་ ཡོད་།”

29 མར་ཡམ་མེ་ ཕོ་ཉེ་ མོལ་ཧན་རྒུན་ ཚོར་རེ་རྡང་, ཁོའེ་ སེམ་ ཐེ་ཚོམ་ སོང་འདེ་ འི་ མོལ་ཧན་རྒུ་ནི་ ཏོན་ ཅི་ འིན་ཧེ་ སམ་། 30 འིན་ན་ ཕོ་ཉེ་ མོལ་, “མར་ཡམ་, འཇིའི་ མ་འཇིའི་, ཀོན་འཇོག་རྒེ་ ཁྱེ་རང་ལ་ ཐུག་ཞེ་ ཛེད་ཏེ་ ནོག་། 31 རྐྱེ་ཅེ་མ་ འགྱུར་རྡེ་ ཁྱེ་རང་ལ་ སྲེ་ཞིག་ ལྟམ་མེན་ ཡང་ ཁྱེ་རང་ངེ་ ཁོང་ངེ་ ཚན་ལ་ ཡི་ཤུ་ ཏོག་། 32 ཁོང་ནི་ མ་ ཀྲག་པོ་ ཞུ་རྡེ་ ཁོང་ལ་ ཀུན་ཝང་ ཀོན་འཇོག་རྒེ་ སྲེ་ ཞུའིན་། ཙོབོ་ ཀོན་འཇོག་རྒེ་ ཁོང་ལ་, ཁོ་རང་ངེ་ ཕ་མེ་པོ་ རྒྱ་སྤོ་ འདཱ་འབིད་རྡེ་ ཞུ་ཁྲིའི་ ས་ལེན་། 33 ཁོང་ངེ་ ཨིས་ར་ཡེལ་ལེ་ མིར་རྒྱུད་རྡེ་ཀ་ ཏུའི་རྒྱུན་ ཝང་སྲུལ་ལེ་ ཛེད་རྡེན་། ཁོང་ངེ་ རྒྱལ་སྲིད་རྡེ་ ཐ་མ་ མ་ནི་ མི་ཡོང་།”

34 མར་ཡམ་མེ་ ཕོ་ཉ་ལ་ ཟེར་, “ང་ པུ་ཙ་ ཉམ་པོ་ འབྲེལ་ མ་ཆ་ཀ་ནེ་ ན་ཆུང་ཞིག་ འིན་འབེ་ ཏོ་ ཀ་ཟུག་རྒེ་ ཀྲུཔ་ ཉེན་ནེན་?” 35 ཕོ་ཉེ་ ལེན་སལ་, “ཏམ་པེ་ ཐུག་ཡིད་ ཁྱེ་རང་ངེ་ཀ་ པབ་ཏེ་ ཀུན་ཝང་ ཀོན་འཇོག་རྒེ་ ཤེད་རྡེ་ ཀྲིབ་ཉག་ ཙོག་སེ་ ཁྱེ་རང་ ཀབ་རྦེ་ ཛེ་རྡེན་། ཏོ་རྦེ་ཕི་ལ་ ཁྱེ་རང་ལ་ ལྟམ་ཀ་ནེ་ ཏམ་པེ་ ཕྲུ་རྒུ་རྦོ་ལ་ ཀོན་འཇོག་རྒེ་ སྲེ་ ཞུའིན་། 36 རྒེ་རྡེ་ ཡོ་ཀན་ ཁྱེ་རང་ངེ་ ཉེན་ ཨེ་ལི་ས་འབེད་པོ་ ཕྲུ་རྒུ་ རྐྱེ་ཅེ་ ཡོད་། ཁོ་ ཕྲུ་རྒུ་ རྐྱེ་མ་ཉེན་ཀན་ཟ་ནི་ ཁོ་ རྐྱེ་ཅེ་མ་ འགྱུར་རྡེ་ ལྡ་ ཀྲུག་པ་ འིན་། 37 ཅེ་ཟེར་ནི་ ཀོན་འཇོག་ལ་ ཛེད་ མི་ཉེན་ཤི་ ཅང་ མེ་ཀག་།”

38 ཏེ་ནི་ མར་ཡམ་མེ་ ཟེར་, “ང་ ཙོབོ་ ཞབ་རྟོག་མ་ འིན་། ཉེ་རང་ངེ་ མོལ་ཧན་ ནང་ཞིན་ ཀྲུཔ་ཤིག་།” ཏེ་ནི་ ཁོ་ ཕྃ་རྡེ་ ཏེ་ཀ་ནི་ ཕོ་ཉ་ རྐྱོད་།

མར་ཡམ་ འདང་ ཨེ་ལི་ས་འབེད་ ཐུག་།

39 ཏེ་རྒ་ ལྟིང་ནི་ མར་ཡམ་མེ་ ཀྲལ་འགྲིག་ ཅོའེ་རྡེ་, ཡུ་འདཱེ་ རི་ ཡུལ་ལེ་ན་ ཀྲོང་ཁྱེར་ཞིག་ལ་ འགྱོ་སྤ་ སོང་, 40 ཏུ་རུ་ ཟ་ཀར་ཡཱ་ རྡང་ ཨེ་ལི་ས་འབེད་རྡེ་ ཁང་པ་ ལེབ་ཏེ་ ཁོའེ་ ཨེ་ལི་ས་འབེད་ལ་ “འཇུ་” ཟེར་། 41 ཨེ་ལི་ས་འབེད་ལ་ མར་ཡམ་མེ་ འཇུ་ ཟེ་རེ་ ཚོར་རེ་རྡང་, ཁོང་ ཅང་ཀོག་ན་ ཡོ་ཀ་ནེ་ ཕྲུ་རྒུ་རྦོ་ ཆོྃ་ ཡང་ ཨེ་ལི་ས་འབེད་ ཏམ་པེ་ ཐུག་ཡིད་རྡེ་ ཀང་།

42 ཨེ་ལི་ས་འབེད་རྡེ་ མར་ཡམ་ལ་ ཤེད་ཏང་ ཟེར་, “པོ་མོ་རྒུ་ནི་ ནང་ནི་ ཀོན་འཇོག་རྒེ་ ཉེ་རང་ལ་ ཅིན་ལབ་ སལ་ལེ་ ཛེད་། ཉེ་རང་ལ་ རྐྱེ་ཅེ་ཅེན་ནེ་ སྲེའོ་ལ་ ཅིན་ལབ་ཅེན་ འིན་། 43 ང་ས་ ངེ་ ཙོབོ་རྡེ་ ཨ་མ་ རྐྱོད་ཏེ་ ཙམ་ཞིག་རྒེ་ སི་ཝ་ སལ་ལེ་ ཛེད་ཏེ་ ནོག་། 44 ཉེ་རང་ངེ་ འཇུ་ མོལ་ལེ་ ཚོར་རེ་རྡང་ ངེ་ ཅང་ཀོག་ ཡོ་ཀ་ནེ་ ཕྲུ་རྒུ་རྦོ་ ཐེད་ཏེ་ ཆོྃ་། 45 ཉེ་རང་ ཅིན་ལབ་ཅེན་ ནོག་ ཅེ་ཟེར་ནི་ ཙོབོ་ ཀོན་འཇོག་རྒེ་ མོལ་ཧན་འབོ་ འདྲན་འདྲ་ ཀྲུཔ་ཅུག་རྒེ་ ཛེད་ཅེ་འབོ་ལ་ ཉེ་རང་ངེ་ རྡེན་ཆེ་ཤེ་ ཅོའེ་།”

མར་ཡམ་མེ་ རྟོད་ལུ་།

46 ཡང་ མར་ཡམ་མེ་ ཟེར་,

“ངེ་ སེམ་མེ་ ཐིལ་ནི་ ཙོབོ་ ཀོན་འཇོག་ལ་ རྟོད་པ་ པུལ་ལེ་ཡོད་།

47 ཡང་ ངེ་ སེམ་ཡིད་རྡེ་ རྒ་མོ་ ཅོ་ཡོད་

ཅེ་ཞུ་ནི་ ཁོང་ ང་ རྐྱོབ་རྦེ་ ཛེད་ཀ་ནེ་ ཀོན་འཇོག་ འིན་།

48 ཁོང་ངེ་ ཁོ་རང་ངེ་ ཉམ་ཤུང་ ཞབ་རྟོག་པ་ ཐུག་ཞེ་ ལྟན་འདེ་ ནྃ་ ཛེད་།

ཏི་ནི་ཕ་ལ་ མི་རབ་ ཚང་མེ་ ང་ ཅིན་ལབ་ཅེན་ ཟེ་རེན་།

49 ཅེ་ཟེར་ནི་ ངེ་ཕི་ ཀུན་ཝང་ ཀོན་འཇོག་རྒེ་ ཆག་ལེ་ རྒང་ཤེན་ ཛེད་།

ཁོང་ངེ་ ཚན་ ཏམ་པ་ འིན་།

50 ཁོང་ལ་ འཇིའི་རྡེ་ འགྲུལ་ཧན་རྒུན་ ཉམ་པོ་,

ཁོང་ངེ་ ཉིང་ཞེ་ མི་རབ་ནི་ མི་རབ་ ལུའི་རྡེན་།

51 ཁོང་ངེ་ ཁོ་རང་ངེ་ ཤུག་ཤེན་ནེ་ ཆག་ རྐྱང་ངེ་ ཛེད་ཏེ་

ཕོ་སོ་ཅེན་རྒུན་ ཡན་ཅུག་རྒེ་ ཛེད་།

52 ཁོང་ངེ་ ཝང་སྲུལ་པ་རྒུན་ ཁྲིའི་ཀ་ནི་ སྤ་རྦེ་ ཛེད་།

འིན་ན་ ཉམ་ཤུང་རྒུན་ ཏག་རྒེ་ ཛེད་།

53 ཁོང་ངེ་ ལྟོག་ཧན་རྒུན་ ཚིམ་ཅུག་རྒེ་ ཛེད་།

འིན་ན་ ཆུག་པོ་རྒུན་ ལྟོང་པ་ ལོག་ཏེ་ སལ་།

54 ཁོང་ངེ་ ཉིང་ཞེ་ ཛེད་ཅེ་འབོ་ ཞེད་ མ་ཞེད་རྡེ་

ཁོ་རང་ངེ་ ཡོག་པོ་ ཨིས་ར་ཡེལ་པ་རྒུན་ལ་ ཡ་ཏོ་ ཛེད་།

55 ཅེ་ཟེར་ནི་ ཁོང་ངེ་ ཨབ་ར་ཧམ་ འདང་ ཁོའེ་ ཕར་རྒྱུད་,

ཨ་ཧོའེ་ ཕ་མེ་པོ་རྒུན་ལ་ ཏེ་ ཐ་མེད་པེ་ ཞལ་ཆེཏ་པོ་ ཛེད་།”

56 མར་ཡམ་ ཨེ་ལི་ས་འབེད་ ཉམ་པོ་ ལྡ་ སུམ་ ཧ་ལམ་ འདེད་ཏེ་ ལྟིང་ནི་ ཁོ་རང་ངེ་ ཁང་པ་ ན་ཙ་རེད་ལ་ ལོག་ཏེ་ སོང་།

ཁྲུའི་སལ་ཧན་ ཡོ་ཧཱ་ནན་ ལྟམ་།

57 ཨེ་ལི་ས་འབེད་ལ་ ཕྲུ་རྒུ་ རྐྱེ་ཅེ་ ཏུའི་ ལེབ་རྦེ་རྡང་ ཁོ་ པུ་ཙ་ཞིག་ རྐྱེ་། 58 ཉེན་འགྲུམ་ འདང་ ཁྱིམ་ཙེ་པ་རྒུ་ནི་ ཨེ་ལི་ས་འབེད་ལ་ ཙོབོ་ ཀོན་འཇོག་རྒེ་ ཉིང་ཞེ་ ཆོན་མོ་ ཛེད་ཀན་འབོ་ ཚོར་རྡེ་, ཁོང་རྒུ་ནི་ ཁོ་ ཉམ་པོ་ རྒ་མོ་ ཅོའེ་།

59 ཞག་ རྒྱེད་པེ་ ཞག་ལ་ ཁོང་རྒུན་ ཕྲུ་རྒུ་ལ་ འགོཔ་ཅེཏ་ ཅོ་ཅེ་ལ་ ཛོམ་འདེ་, ཨ་རྦེ་ མིང་ ཙོག་སེ་ ཕྲུ་རྒུ་ལ་ ཟ་ཀར་ཡཱ་ མིང་ ཏག་ཅེ་ ཅོའེ་། 60 འིན་ན་ ཁོའེ་ ཨ་མེ་ ཟེར་, “མན་ ཁོའེ་ མིང་ལ་ ཡོ་ཧཱ་ནན་ ཏག་རྒོའེ་།”

61 ཁོང་རྒུ་ནི་ ཁོ་ ཟེར་, “ཁྱི་ཞི་ རྒྱུད་རྡེ་ ནང་ནི་ འི་ མིང་འབོ་ སུ་ལ་ མེད་།” 62 ཏེ་ནི་ ཁོང་རྒུ་ནི་ ལག་པ་ ཉམ་པོ་ ལག་ཟོ་ ཅོའེན་ ཁོའེ་ ཨ་རྦ་ ཁོའེ་ མིང་ ཅི་ ཏག་ཉིན་རག་ ཟེར་རྡེ་ འདྲི་། 63 ཟ་ཀར་ཡཱེ་ ལག་ཟོ་ ཅོའེན་ ལག་ཤིང་ཞིག་ ཏོང་ ཟེར་ ཡང་ ཁོའེ་ ཏེ་ཀ་, “ཁོའེ་ མིང་ལ་ ཡོ་ཧཱ་ནན་ ཏོག་” འབྲི་རྦེ་ ཁོང་ ཚང་མ་ ཧ་ལེ་། 64 ཏེ་རྒ་མ་རྒ་ ཁོ་ ཡང་ སྤེ་ར་ ཏང་ཉེན་ ཡང་ ཁོའེ་ ཀོན་འཇོག་ལ་ རྟོད་པ་ པུལ་།

65 ཏོ་རྒུན་ ཚོར་རྡེ་ ཁྱིམ་ཙེ་པ་རྒུན་ ཀོན་འཇོག་རྒེ་ འཇིའི་ནང་ ཀང་, ཡང་ ཡ་ཧུ་འདཱེ་ རི་ ཡུལ་ སོན་ཏེ་ན་ ཏེ་ སོང་ཀན་རྒུ་ནི་ ནེ་ཚུལ་འབོ་ ཕེལ་། 66 ཏེ་ ནེ་ཚུལ་རྦོ་ ཚོར་ཧན་ ཚང་མེ་ ཙོ་རྦེ་ ཁོའེ་ཀ་ ཆག་ པོར་རྡེ་ ཅིན་ལབ་ སལ་ཧན་འབོ་ ཧ་ཀོ་རྡེ་ ཁོ་རང་ ཅིག་ ཏང་ ཅིག་ལ་ འདྲི་ “ལྡན་འདེ་ འི་ ཕྲུ་རྒུ་རྦོ་ ཅི་ཞིག་ འགྱུར་རེན་ཧེ་?”

ཟ་ཀར་ཡཱེ་ ལུང་རྟན་།

67 ཏེ་ནི་ ཨ་རྦ་ ཟ་ཀར་ཡཱ་ ཏམ་པེ་ ཐུག་ཡིད་རྡེ་ ཀང་འདེ་ ལུང་རྟན་ ཤེད་

68 “ཨིས་ར་ཡེལ་ལེ་ ཙོབོ་ ཀོན་འཇོག་ལ་ རྟོད་པ་ པུལ་

ཅེ་ཞུ་ནི་ ཁོང་ རྐྱོད་ཏེ་ ཁོ་རང་ངེ་ མི་རྒུན་ ཐར་ཤུག་རྒེ་ ཛེད་།

69-70 ངུལ་མེ་ ལུང་རྟོན་པ་ ཏམ་པ་རྒུན་ རྒྱུད་ཏེ་

ཀོན་འཇོག་རྒེ་ མོལ་ཧན་ ནང་ཞིན་, ཨ་ཧོའེ་ཕི་

ཁོང་ངེ་ ཞབ་རྟོག་པ་ རྒྱ་སྤོ་ འདཱ་འབིད་རྡེ་ ཕར་རྒྱུད་ནི་

ཤུག་ཤེན་ རྐྱབ་འགོན་ཞིག་ ཀ་ལེ་ ཛེད་,

71 ཏ་ འགྲ་ཝོ་ རྡང་ སོག་པོ་ ཅོ་ཀན་ ཚང་མ་ནི་ ཨ་ཧོ་རྒུན་ རྐྱོབ་རྦེ་ ཛེ་རྡེན་།

72 ཀོན་འཇོག་རྒེ་ ཨ་ཧོའེ་ ཕ་མེ་པོ་རྒུན་ལ་ ཏམ་པ་ ཆེཏ་ཏོན་ ཛེད་ཀན་འབོ་

འི་ཏུ་ པོ་རེ་ ཛེད་ཏེ་ ཁོང་རྒུ་ནི་ཀ་ ཉིང་ཞེ་ ཛེད་།

73 ཁོང་ངེ་ ཨ་ཧོའེ་ ཕ་མེ་པོ་ ཨབ་ར་ཧམ་ ཉམ་པོ་

ནའ་ ཁུར་རེ་ ཛེད་ཏེ་ ཏེ་ ཆེཏ་ཏོན་འབོ་ ཛེད་།

74-75 ཨ་ཧོ་རྒུན་ ཨ་ཧོ་རྒུ་ནི་ འགྲ་ཝེ་ ལག་ནི་ ཐར་ཤུག་རྒེ་ ཛེད་

ཏ་ ཨ་ཧོ་རྒུ་ནི་ མི་ཙེ་ སོན་ཏེ་ འཇི་ནང་ མེད་པེ་

ཏམ་པ་ རྡང་ ཀྲང་པེ་ན་ ཀོན་འཇོག་ལ་ ཞབ་རྟོག་ ཞུ་ཉེན་ནེན་།

76 ངེ་ པུ་ཙ་, ཁྱེ་རང་ལ་ ཀུན་ཝང་ ཀོན་འཇོག་རྒེ་ ལུང་རྟོན་པ་ ཟེ་རེན་།

ཁྱེ་རང་ ཙོབོ་ ཀོན་འཇོག་རྒེ་སང་ ངུལ་ལ་ སོང་འདེ་,

ཁོང་ རྐྱོད་ཅེ་ལ་ ཀྲལ་འགྲིག་ ཅོའེན་།

77 མི་རྒུ་ནི་ རྡིག་པ་རྒུན་ལ་ ཤག་སྤ་ ཛེད་ཅེ་འབོ་ རྒྱུད་ཏེ་

ཁྱེ་རང་ངེ་ ཙོ་རྦེ་ མི་རྒུན་ལ་ ཐར་པ་ ཐོབ་ཅེ་ ལམ་འབོ་ ལྟ་ནེན་།

78 ཀོན་འཇོག་རྒེ་ ཤེ་སྤ་ ཀང་ཀ་ནེ་ ཉིང་ཞེ་ རྒྱུད་ཏེ་

ཁོང་ངེ་ མ་ཤི་ཀ་ ང་མོའེ་ འོད་ འདང་ཤེན་འབོ་

ཨ་ཧོ་རྒུ་ནི་ཀ་ ཤར་ ཤུག་རྒེ་ ཛེ་རྡེན་།

79 ཡང་ སེམ་ཡིད་རྡེ་ མུན་ཀྲག་ ཏང་ ཤི་ཅེ་ འཇི་ནང་ངེ་ན་

ཡོ་ཀན་རྒུན་ལ་ འོད་ ཤར་ ཤུག་རྒེ་ ཛེད་ཏེ་

ཨ་ཧོ་རྒུན་ ཞིའི་རྡེ་ ལམ་མེ་ཀ་ ཁྱོང་ངེ་ ཛེ་རྡེན་།”

80 ཏེ་ནེ་ ཡོ་ཧཱ་ནན་ ལྡན་འདེ་ ཐུག་ཡིད་རྡེ་ན་ ཤེད་ཅེན་ སོང་། ཨིས་ར་ཡེལ་པ་རྒུན་ལ་ ཆོའེ་ཤེད་ཅེ་ འགོ་ཟུག་ ཅོ་ཅོ་ཚུག་པ་ ཁོང་ རི་ལྟོང་ངེ་ན་ ཞུའུ་།