ཡི་ཤུ་ པི་ལ་ཏུ་ཀ་ ཁྱེར་།
27
ང་ཏོག་ ང་མོ་ནི་, ལ་མ་ འུ་རྐྱོང་ ཚང་མ་ རྡང་ ཡ་ཧུ་འདཱ་པེ་ འུ་རྐྱོང་རྒུ་ནི་ ཡི་ཤུ་ སེད་རྒོའེ་ ཟེར་རྡེ་ ཐག་ཅེད་། 2 ཁོང་རྒུ་ནི་ ཁོང་ངེ་ ཆག་ རྡམ་འདེ་ ཀ་ལོན་ པི་ལ་ཏུ་ ལག་ལ་ ལྟེད་རྡེ་ལ་ ཁྱེར་།ཡུ་འདཱེ་ འོག་རྐྱི་ ཞུའུ་།
3 འགོམ་ཧོར་ ཏྃ་རྡེ་ འགྲ་ཝོ་རྒུ་ནི་ ལག་ལ་ ལྟེད་ཀ་ནེ་ ཡུ་འདཱེ་ ཡི་ཤུ་ སེད་ཅེ་ ཆེད་པ་ ཕོག་རྒེ་ ཐོང་འདེ་ ཁོའེ་ ཅོ་ཀན་འབོ་ཀ་ འགྱོད་པ་ ཡོྃ་རྡེ་ ཡང་ མུལ་ལེ་ པེ་ནེ་ སུམ་ཅུ་ ལ་མ་ འུ་རྐྱོང་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུན་ལ་ ལོག་ཏེ་ ཁྱེར་, 4 ཡང་ ཁོའེ་ ཟེར་, “ངེ་ རྐྱོན་མེ་ཀན་ཞིག་ལ་ འགོམ་ཧོར་ ཏྃ་རྡེ་ ཁྱི་ཞ་རྒུ་ནི་ ལག་ལ་ ལྟེད་ཏེ་ མ་ རྡིག་པ་ ཅོའེ་རྡོག་།”
ཁོང་རྒུ་ནི་ ཟེར་, “ང་ཞི་ ཅེ་ ཚེར་ཧ་ ཅོའེན་། ཏོ་ལ་ ཚེར་ཧ་ ཁྱེ་ན་ ཅོའེ་།”
5 ཏེ་ནི་ ཡུ་འདཱེ་ ཀོན་འཇོག་རྒེ་ ཁང་པེ་ན་ མུལ་ལེ་ པེ་ནེ་རྒུན་ ཕྃ་ ཡང་ ཕི་ལོག་ལ་ སོང་འདེ་ འོག་རྐྱི་ ཞུའུ་།
6 ལ་མ་ འུ་རྐྱོང་རྒུ་ནི་ མུལ་ལེ་ པེ་ནེ་རྒུན་ ཏུའི་རྡེ་ ཟེར་, “འི་ པེ་ནེ་ ཁྲག་རིན་ འིན་ཅེ་ཀ་ནི་, ཀོན་འཇོག་རྒེ་ ཁང་པེ་ པང་ཛོད་རྡེ་ པོར་ཤེ་འབོ་ ཁྲིམ་ ནང་ཞིན་ འགལ་རྡེ་ ནོག་།” 7 ཁོང་རྒུ་ནི་ ཏེ་ པེ་ནེ་འབོ་ལ་ ཟ་མ་ ཅོ་ཀ་ནེ་ ཞིང་འབོ་ ཉོའེ་རྡེ་ ཞེན་ཡུལ་ལེ་ མི་རྒུན་ ཤི་ནི་ ཧུང་ཅེ་ཕི་ མལ་ ཅོ་ཅེ་ལ་ ཐག་ཅོད་། 8 ཏེ་རྒ་ རྒྱུ་ཚན་འབེ་ཕི་ ཏག་ས་ལ་ ཏེ་ ཞིང་འབོ་ལ་ ཁྲག་རྒེ་ ཞིང་ ཟེ་རེ་ནོག་། 9 ངུལ་མེ་ ལུང་རྟོན་པ་ ཡེ་རེམ་ཡཱེ་ མོལ་ཧན་འབོ་ འདྲན་འདྲ་ ཀྲུཔ་ཏེ་ ནོག་, ཁོང་ངེ་ མོལ་,
“ཨིས་ར་ཡེལ་པ་རྒུ་ནི་ སྲོག་རིན་ ཅེད་ཀ་ནེ་
མུལ་ལེ་ པེ་ནེ་ སུམ་ཅུ་ ཁུར་རྡེ་
10 ཟ་མ་ ཅོ་ཀ་ནེ་ ཞིང་འབོ་ ཉོའེ་།
ཀ་ཟུག་ ཙོབོ་ ཀོན་འཇོག་རྒེ་ ང་ ཀཱ་ སལ་ལེ་ ཛེད་།”
པི་ལ་ཏུ་ ཡི་ཤུ་ ཏྲི་ཝ་ འདྲི་།
11 ཡི་ཤུ་ པི་ལ་ཏུ་ འདུན་ལ་ ཞྃ་རྡེ་ ཡོད་ཏུའི་ ཁོའེ་ ཁོང་ལ་ འདྲི་, “ཁྱེ་རང་ ཡ་ཧུ་འདཱ་པེ་ རྒྱ་སྤོ་ འིན་ནེ་?”
ཡི་ཤུའི་ ལེན་སལ་, “འིན་, ཉེ་རང་ངེ་ ཟེར་ཧན་འབོ་ འིན་།”
12 ལ་མ་ འུ་རྐྱོང་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུ་ནི་ ཁོང་ལ་ ཉེད་ཀལ་ཟ་ནི་ ཁོང་ངེ་ ཅང་ ལེན་སལ་ལེ་ མ་ཛེད་། 13 ཏེ་ནི་ པི་ལ་ཏུ་ ཁོང་ལ་ འདྲི་, “ཁོང་རྒུ་ནི་ ཉེད་ མང་པོ་ ཀལ་ཧན་འབོ་ ཁྱེ་རང་ལ་ ཚོར་རེ་ མེ་རག་རྒེ་?” 14 ཁོང་ངེ་ ཉེད་ཀལ་ཧན་ ཅིག་ལ་ ལེན་ མ་སལ་རྦེ་, ཀ་ལོན་ མ་སྲན་ཀྲེ་ ཧ་ལེ་།
15 ལུག་སྲོལ་ ནང་ཞིན་ པེ་སག་རྒེ་ ཏུའི་ཤེན་ནེ་ ཏུའི་ལ་, ཀ་ལོན་ནེ་ མི་ཚོག་རྒེ་ འདམ་ཀ་ནེ་ ཙོན་པ་ ཅིག་ པུད་རྡེ་ཡོད་པེན་། 16 ཏེ་ཏུའི་ལ་ ལེ་ངན་ ཅོའེ་རྡེ་ མིང་ཅེན་ འགྱུར་ཧན་ འབཱ་ར་འབཱ་ ཙོན་པ་ཞིག་ ཡོད་པེན་། 17 མི་ཚོག་ ཛོམ་མེ་རྡང་, པི་ལ་ཏུ་ ཁོང་རྒུན་ལ་ འདྲི་, “འབཱ་ར་འབཱ་ ཡང་ ཡི་ཤུ་ ཀ་འབོ་ལ་ འདམ་མེ་ ཛེད་ཀ་ནེ་ མ་ཤི་ཀ་ ཟེ་རེན་, ཁོང་ ཉ་ཧེ་ ནང་ནི་ པུད་རྡེ་ལ་ ཁྱི་ཞི་ ཀ་འབོ་ འདམ་མེ་ཡོད་?” 18 ལ་མ་ འུ་རྐྱོང་རྒུན་ ཡི་ཤུའི་ཀ་ ཕྲ་རྡོག་ ཅོའེ་འདེ་, ཁོང་ ཁོའེ་ ལག་ལ་ ལྟེད་ཀན་འབོ་ པི་ལ་ཏུ་ལ་ རྒྱུའི་སོང་།
19 པི་ལ་ཏུ་ ཁྲིམ་སྤོན་ནེ་ ཁྲིའི་ཀ་ འདེད་ཏེ་ ཡོད་ཟ་ནི་, ཁོའེ་ ན་མེ་ འི་ ཁྲིན་འབོ་ ཀལ་, “ཏེ་ མི་ རྐྱོན་མེ་ཀན་པོ་ལ་ ཁྲིམ་ཅེད་ཅེ་ན་ འདྲེའེ་ མ་འདྲེའེ་ ཅེ་ཟེར་ནི་ འདང་ ཚེན་ལ་ ཁོའེ་ ཧོར་ལ་ ཉི་ལམ་ ཐོང་ཅེ་རྦེ་ ང་ རྡུ་ངལ་ ཆོན་མོ་ ཐོང་།”
20 འིན་ན་ ལ་མ་ འུ་རྐྱོང་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུ་ནི་ འབཱ་ར་འབཱ་ པུད་ཅེ་ རྡང་ ཡི་ཤུ་ སེད་ཅུག་ཅེ་ཕི་ མི་ཚོག་ལ་ ཀ་ལོན་ལ་ ཞུ་ཝ་ པུལ་ཅུག་ཅེ་ཕི་ ལྕེ་ ཀོལ་རྡེ་ ཁ་ཆམ་ ཅུག་། 21 ཀ་ལོན་ནེ་ ཡང་ མི་ཚོག་ལ་ འདྲི་, “ཁོང་ ཉ་ཧེ་ ནང་ནི་ ངེ་ ཁྱི་ཞི་ཕི་ སུ་ པུད་?”
མི་ཚོག་རྒེ་ ལེན་ཏྃ་, “འབཱ་ར་འབཱ་ པུད་རྡེ་ ཛེད་།”
22 པི་ལ་ཏུའི་ འདྲི་, “ཏེ་ནི་ འདམ་མེ་ ཛེད་ཀ་ནེ་ མ་ཤི་ཀ་, ཡི་ཤུ་ ངེ་ ཅི་ ཅོ་?”
མི་ཚོག་རྒེ་ ལེན་ཏྃ་, “ཁོ་ རྐྱང་ཤིང་ལ་ རྐྱོང་།”
23 པི་ལ་ཏུའི་ འདྲི་, “ཅི་ཕི་, ཁོའེ་ ལེ་ངན་ ཅི་ཅོའེ་?” འིན་ན་ མི་ཚོག་རྒེ་ ཀུ་ཅུ་ ཧོཔ་ ཏང་ངེན་ ཟེར་, “རྐྱང་ཤིང་ལ་ རྐྱོང་།”
24 པི་ལ་ཏུ་ མི་ཚོག་རྒེ་ན་ འགྱུར་ཞ་ ཁྱོང་ མི་ཉེན་ནོག་ སམ་ མ་ཚེད་ ཁོང་རྒུན་ལ་ སྲོ་ ཡོྃ་རྡེ་ ཧི་ལིང་ ཕིང་ཅེ་ འགོ་ཟུག་པེ་ ཁོའེ་ མི་ཚོག་རྒེ་ འདུན་ལ་ ཆུ་ ཁྱོྃ་རྡེ་ ཁོ་རང་ངེ་ ལག་པ་ ཁྲུའི་ ཡང་ ཟེར་, “འི་ མིའུ་ སེད་ཅེ་ན་ ང་ རྐྱོན་མེད་ འིན་, ཡུ་རྦེ་ཕི་ ཁྱི་ཞ་ རྐྱོན་ཅེན་ ནོག་།”
25 མི་ཚོག་རྒེ་ ཟེར་, “ཁོ་ སེད་ཅེ་ ཉེད་ཀལ་རྦོ་ ང་ཞ་ རྡང་ ང་ཞི་ ཕྲུ་རྒུ་རྒུན་ལ་ ཕོག་ཤིག་།”
26 ཏེ་ནི་ ཁོང་རྒུ་ནི་ཕི་ པི་ལ་ཏུ་ འབཱ་ར་འབཱ་ ཙོན་ཁང་ནི་ པུད་ཅུག་ ཡང་ ཡི་ཤུ་ རྟལ་ལྕག་ རྒྱབ་ཏེ་ རྐྱང་ཤིང་ངེ་ཀ་ རྐྱང་ཅེ་ལ་ མག་མི་རྒུན་ལ་ ལྟེད་།
མག་མི་རྒུ་ནི་ ཡི་ཤུ་ ཁྲེལ་རྒོད་ ཏྃ་།
27 ཏེ་ནི་ ཀ་ལོན་ནེ་ མག་མི་རྒུ་ནི་, ཀ་ལོན་ནེ་ ཁར་རེ་ མག་མི་ ཛོམ་སེ་ མལ་ལེ་ཀ་ ཡི་ཤུ་ ཁྱེར་རྡེ་ མག་ཚོག་ སོན་ཏེ་ ཁོང་ལ་ ཁོར་རྡེ་ འདེད་། 28 ཁོང་རྒུ་ནི་ ཁོང་ངེ་ ནམ་ཟ་ པུད་ཏེ་, རྒྱ་སྤོ་ ཀོན་ཀན་ ཙོག་སེ་ ནམ་ཟ་ མར་སྤོ་ཞིག་ ཧོན་, 29 ཡང་ ཚེར་མེ་ ཐོར་ཤོག་ ལེ་རྡེ་ ཁོང་ངེ་ ཨུ་ལ་ ཧོན་། ཁོང་ངེ་ ཆག་ ཡོའེ་སྤེ་ན་ པེར་ཧ་ཞིག་ ཀལ་ ཡང་ ཁོང་ངེ་ འདུན་ལ་ པིག་ཛུམ་ རྒྱབ་ཏེ་ ཁོང་ལ་ ཁྲེལ་རྒོད་ ཏང་ངེན་ ཟེར་, “ཡ་ཧུ་འདཱ་པེ་ རྒྱ་སྤོ་ལ་ ཧུ་ཚེ་རྟེན་ཅིག་།” 30 ཐུ་ རྒྱབ་, པེར་ཧ་རྦོ་ ཁུར་རྡེ་ ཁོང་ངེ་ ཨུ་ལ་ ལེན་ མང་པོ་ རྒྱབ་། 31 ཁྲེལ་རྒོད་ ཏྃ་རྡེ་ ལྟིང་ནི་ ཁོང་རྒུ་ནི་ ནམ་ཟ་ མར་སྤོ་ པུད་ཏེ་, ཡི་ཤུ་ ཁོ་རང་ངེ་ ནམ་ཟའོ་ ཧོན་། ཏེ་ནི་ ཁོང་ རྐྱང་ཤིང་ངེ་ཀ་ རྐྱང་ཅེ་ལ་ ཁྱེར་།
ཡི་ཤུ་ རྐྱང་ཤིང་ཀ་ རྐྱང་།
32 ཁོང་རྒུ་ནི་ ཡི་ཤུ་ ཡེ་རུ་ཤ་ལེམ་མེ་ རྒྱལ་ས་ནི་ ཕིང་འདེ་ ཁྲིད་ཏེ་ ཁྱེར་ཟ་ནི་ ཀི་རིན་པ་ ཤི་མོན་ ཐུག་, ཡང་ མག་མི་རྒུ་ནི་ ཁོ་ ཝང་ ཏྃ་རྡེ་ ཡི་ཤུའི་ རྐྱང་ཤིང་ ཁུར་ཤུག་། 33 ཁོང་རྒུན་ འགོལ་འགོ་ཐཱ་ ཀ་རྦེ་ ཏོན་ཏག་པོ་ འགོའེ་ རུའི་སྤེ་ ས་ཀྱེཏ་ ཟེར་ཧ་ནེ་ མལ་ལེ་ཀ་ ལེཔ་། 34 ཏུ་རུ་ ཁོང་རྒུ་ནི་ ཡི་ཤུ་ འགལ་a སྲེ་ཀ་ནེ་ རྒུན་འགྲུམ་མེ་ ཁོའེ་ ཁན་ཀྲེ་ འདོན་ཅེ་ལ་ པུལ་, འིན་ན་ ཁོང་ངེ་ ཏོ་ ཉང་འདེ་ འདོན་ནེ་ མ་ཛེད་།
35 ཡི་ཤུ་ རྐྱང་ཤིང་ངེ་ཀ་ རྐྱང་ ཚར་རེ་རྡང་, ཁོང་ངེ་ ནམ་ཟ་ རྒོའེ་རྡེ་ སུ་ལ་ ཐོབ་ཏུག་ ལྟ་ཅེ་ལ་ རྒྱེན་ ཏྃ་། 36 ཡང་ མག་མི་རྒུན་ ཐང་ཀེ་ཀ་ འདེད་ཏེ་ ཡི་ཤུ་ སྲུྃ་། 37 ཁོང་ངེ་ ཨུའི་ ལྟག་ལ་ ཉེད་ཀལ་ ཀལ་ཧན་ནེ་ ལྟའ་རྦེ་ཀ་ “འི་རྦོ་ ཡི་ཤུ་ ཡ་ཧུ་འདཱ་པེ་ རྒྱ་སྤོ་ འིན་” འབྲི་རྡེ་ ཡོད་པེན་། 38 ཅག་པ་ ཉི་ ཁོང་ ཉམ་པོ་ རྐྱང་ཤིང་ངེ་ཀ་ རྐྱང་, ཅིག་པོ་ ཁོང་ངེ་ ཡོའེ་སྤ་ ཡང་ ཅིག་པོ་ ཡོའེ་མེ་ཀ་ རྐྱང་།
39 ཏེ་ མལ་ རྒྱུད་ཏེ་ འགྲུལ་ཧན་རྒུ་ནི་ འགོ་ ཡུག་ཏེ་ ཁྲེལ་རྒོད་ ཏང་ངེན་ ཟེར་, 40 “ཀོན་འཇོག་རྒེ་ ཁང་པ་ ཞིག་ཏེ་ ཞག་ སུམ་མེ་ན་ སིག་རྒེན་ ཟེར་ཧན་ ཁྱོད་, ཀལ་ཏེ་ ཀོན་འཇོག་རྒེ་ སྲེ་ འིན་ནི་ རྐྱང་ཤིང་ངེ་ཀ་ནི་ ཡོག་ལ་ པབ་ཏེ་ རང་ རྐྱོབ་རྦང་།”
41 ཏེ་རྒ་ ཙོག་སེ་ ལ་མ་ འུ་རྐྱོང་རྒུན་, ཆོའེ་ཁྲིམ་ལ་ ཁེ་སྤ་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུ་ནི་ ཁོང་ལ་ ཁྲེལ་རྒོད་ ཏང་ངེན་ ཟེར་, 42 “ཁོའེ་ ཞེན་མ་རྒུན་ རྐྱོབ་, འིན་ན་ ཁོ་རང་ རྐྱོབ་ཉེན་ནེ་ མི་འདུག་། ཨིས་ར་ཡེལ་ལེ་ རྒྱ་སྤོ་ རྐྱང་ཤིང་ངེ་ཀ་ནི་ ཏག་ས་ པབ་ཏེ་ ཡོང་ནི་, ང་ཞི་ ཏེཏ་པ་ ཅོའེན་། 43 ཁོའེ་ ཀོན་འཇོག་ལ་ རྡེན་ཆེ་ཤེ་ ཅོའེ་རྡེ་ ཁོའེ་ ཟེར་རེ་ཡོད་པེན་, ‘ང་ ཀོན་འཇོག་རྒེ་ སྲེ་ འིན་’, ཏ་ ལྟོན་ ཀོན་འཇོག་རྒེ་ ཁོ་ རྐྱོབ་རྦེ་ཛེད་ ཏུག་རྒེ་?” 44 ཏེ་རྒ་ ཙོག་སེ་ ཁོང་ ཉམ་པོ་ རྐྱང་ཤིང་ངེ་ཀ་ རྐྱང་ཀན་ ཅག་པ་རྒུ་ནི་ལ་ ཁོང་ལ་ ཚིག་ ཏྃ་།
ཡི་ཤུ་ ཀྲོྃ་།
45 ཉི་མེ་ཀུང་ནི་ ཆུ་ཙོད་ སུམ་ཚུག་པ་ ཡུལ་ སོན་ཏེ་ མུན་ཀྲག་ སོང་། 46 ཆུ་ཙོད་ སུམ་པེ་ཀ་ ཡི་ཤུའི་ ཨིབ་རི་པེ་ ཧད་རྡེ་ན་ ཀུ་ཅུ་ སྲན་ཀྲེ་ ས་ལེན་ མོལ་, “ཨེ་ལོའི་ ཨེ་ལོའི་ ལེ་མ་ ས་འབག་ཐ་ནི་” ཀ་རྦེ་ ཏོན་ཏག་པོ་, “ངེ་ ཀོན་འཇོག་, ངེ་ ཀོན་འཇོག་, ཉེ་རང་ངེ་ ང་ ཅེ་ ཕང་ངེ་ ཛེ་རྡེ་ འིན་?”
47 ཏེ་རྒ་ ཡོ་ཀན་རྒུ་ནི་ ནང་ནི་ ཁ་ཅིག་རྒེ་ ཏོ་ ཚོར་རེ་རྡང་ ཟེར་, “ཁོའེ་ ལུང་རྟོན་པ་ ཨེ་ལི་ཡཱ་ འབོ་རུག་།” 48 ཏེ་རྒ་མ་རྒ་ ཁོང་རྒུ་ནི་ ཕྲོ་ནི་ ཅིག་ རྒྱུག་རྒེན་འདང་ རེ་རྦལ་ཞིག་ རྒུན་འགྲུམ་མེ་ ཁོའེ་ རྐྱུར་མོ་ན་ ཅུག་ ཡང་ པེར་ཧེ་ཀ་ རྐྱོན་འདེ་ ཡི་ཤུ་ འདོན་ཅེ་ལ་ ཏྃ་། 49 ཞེན་རྒུ་ནི་ ཟེར་, “འདེད་ཅུག་རྒང་། ལུང་རྟོན་པ་ ཨེ་ལི་ཡཱ་ ཁོ་ རྐྱོབ་རྦེ་ལ་ རྐྱོད་ཏུག་རྒེ་ ལྟོའེན་འབེ་།”
50 ཡི་ཤུའི་ ཡང་ ཧད་ ཆོན་མོ་ ཉམ་པོ་ ཀུ་ཅུ་ སལ་རྡེ་ རང་ངེ་ ཧུ་སྲོག་པོ་ སལ་། 51 ཏེ་རྒ་ཟ་ནི་ ཀོན་འཇོག་རྒེ་ ཁང་པེ་ ཡོ་ལ་ ལྟག་ནི་ ཡོག་ཚུག་པ་ ཆེད་ཏེ་ པོ་ཉི་ སོང་, ས་ཀྱེཏ་ཀ་ སྃ་འགུལ་ རྡང་ ཡང་ ཕོ་ལོང་རྒུན་ལ་ ཆག་། 52 རོམ་ཀང་རྒུན་ པེ་རྡེ་ ཤི་ཀ་ནེ་ མི་ ཏམ་པ་ མང་པོ་ སོན་པོ་ ལྃ་རྡེ་ ཛེད་། 53 ཡི་ཤུ་ སོན་པོ་ ལང་ ཛེད་ཏེ་ ལྟིང་ནི་ རོམ་ཀང་ནི་ འབིང་འདེ་ ཡོང་ཀན་རྒུན་ ཏམ་པེ་ ཡེ་རུ་ཤ་ལེམ་མེ་ རྒྱལ་ས་ སོང་ ཡང་ མི་ མང་པོ་ཞིག་ལ་ ཐོང་།
54 ཡི་ཤུ་ སྲུྃ་རྡེ་ ཡོ་ཀན་ མག་མི་རྒྱེ་ སྤོན་འབོ་ རྡང་ ཞེན་ མག་མི་རྒུ་ནི་, སྃ་འགུལ་ རྡང་ ཆ་ཀན་ ཚང་མ་ ཐོང་འདེ་ ཧོཔ་ འཇིའི་ ཡང་ ཟེར་, “འི་ མི་ ཀོན་འཇོག་རྒེ་ སྲེ་ འིན་ཀན་འབོ་ ནེན་ཏེན་ ནོག་།”
55 ཐག་རིང་ཞིག་ནེ་ པོ་མོ་ མང་པེ་ ཡི་ཤུ་ ཀྲོྃ་ཤེའོ་ ལྟོའེན་ ཡོད་པེན་, ཁོང་རྒུ་ནི་ ཡི་ཤུའི་ རྒོའེ་ཤེ་ཅན་རྒུན་ རི་རྡེ་ ཞབ་ཤི་ ཞུའིན་ ཁོང་ ཉམ་པོ་ འགཱ་ལིལ་ནི་ པར་ལ་ ཡོྃ་རྡེ་ འིན་འབེན་། 56 ཁོང་རྒུ་ནི་ ཕྲོ་ མ་ཧ་འདལ་ལེན་མ་ མར་ཡམ་, ཡོ་སེབ་ ཏང་ ཁོའེ་ ནོ་ ཡ་ཀུབ་རྦེ་ ཨ་མ་ མར་ཡམ་ འདང་ ཟེ་འབེ་འདེ་ པུ་ཙ་རྒུ་ནི་ ཨ་མ་ ཡོད་པེན་།
ཡི་ཤུའི་ སྤུར་ སྤུར་ཧང་ངེ་ན་ པོ་རེ་ ཛེད་།
57 ནམ་ཅུ་རུ་ཀྱི་ ཡོད་ཟ་ནི་ ཡོ་སེབ་ ཟེར་ཧན་ ཨ་རི་མ་ཐཱ་པ་ མི་ ཆུག་པོ་ཞིག་ ཏུ་རུ་ ཡོྃ་, ཁོ་ལ་ ཡི་ཤུའི་ ལོབ་ཀྲུག་ ཅིག་ འིན་འབེན་། 58 ཁོ་ པི་ལ་ཏུའི་ཀ་ སོང་འདེ་, ཁོ་ ཡི་ཤུའི་ སྤུར་ སལ་ ཟེར་རྡེ་ ཞུ་ཝ་ པུལ་, ཏེ་ནི་ པི་ལ་ཏུ་ ཏོ་ ཁོ་ ཏོང་ ཟེར་རྡེ་ ཀཱ་ ཏྃ་། 59 ཡོ་སེབ་རྦེ་ ཡི་ཤུའི་ སྤུར་ ཁྱེར་རྡེ་ རེ་ ལག་མོ་ ཀུའི་སྤེ་ན་ ཏུམ་འདེ་ 60 ཀྲག་རྒེ་ན་ ཁོ་རང་ངེ་ཕི་ ཧོའེ་རྡེ་ ཡོ་ཀ་ནེ་ སོ་མ་ སྤུར་ཧང་འབེ་ན་ ཡི་ཤུའི་ སྤུར་ པོར་ ཡང་ སྤུར་ཧང་ངེ་ ཁེ་ཀ་ རྡོ་ ཆོན་མོ་ཞིག་ རིལ་རྡེ་ ཁོ་ སོང་། 61 མ་ཧ་འདལ་ལེན་མ་ མར་ཡམ་ འདང་ ཞེན་ མར་ཡམ་རྒུན་ སྤུར་ཧང་ངེ་ འ་ངོ་ ཆོག་ལ་ འདེད་ཏེ་ ཡོད་པེན་།
མག་མི་རྒུ་ནི་ ཡི་ཤུའི་ སྤུར་ཧང་ སྲུྃ་།
62 ཐོ་རེ་ཚུག་པ་ ངལ་ཚོའེ་ ཞག་ལ་, ལ་མ་ འུ་རྐྱོང་རྒུན་ འདང་ པ་རུ་ཤི་པ་རྒུན་ པི་ལ་ཏུ་ས་ སོང་། 63 ཁོང་རྒུ་ནི་ ཟེར་, “སྤོན་འབོ་ལེ་, ཏེ་ འགོ་ཧོར་ཧན་འབེ་ སོན་པོ་ ཡོད་ཏུའི་ ཁོའེ་, ‘ཞག་ སུམ་མེ་ ལྟིང་ནི་ ང་ སོན་པོ་ ལང་ངེན་’ ཟེར་ཧན་འབོ་ ང་ཞ་ འི་ཏུ་རག་། 64 ཏོ་རྦེ་ཕི་ ཞག་ སུམ་ཚུག་པ་ ཁོའེ་ སྤུར་ཧང་ལ་ སྲུང་ཀན་ རིག་ པོ་རེ་ ཛེད་, ཏེ་མ་ནི་ ཁོའེ་ ལོབ་ཀྲུག་རྒུན་ ཡོྃ་རྡེ་ རོ་ ཧུའི་རྡེ་ ཁྱེར་རྡེ་ མི་རྒུན་ལ་ ཁོ་ ཤི་ཀན་རྒུ་ནི་ ཕྲོ་ནི་ ལྃ་ ཟེར་སྲིད་ཅེ་ ནོག་། ཏེ་ནི་ ཨ་ཧོ་རྒུ་ནི་ཕི་ ལྟིང་འཇུག་རྒེ་ འགོམ་ཧོར་རྦོ་ ངུལ་མེ་སང་ མང་ངེ་ ཐུ་ ཡོང་ངེན་།”