ཡི་ཤུ་ སེད་ཅེ་ ཐཔ་ངེན་ ལྡིང་།
26
ཡི་ཤུའི་ ཏེ་ ཚང་མ་ མོལ་ ཚར་རྡེ་ ལྟིང་ནི་ ཁོང་ངེ་ ལོབ་ཀྲུག་རྒུན་ལ་ མོལ་, 2 “ཞག་ ཉི་ ལྟིང་ནི་ པེ་སག་རྒེ་ ཏུའི་ཤེན་ འིན་ཀན་འབོ་ ཁྱི་ཞ་རྒུན་ལ་ རྒྱུའི་ནོག་, ཡང་ ཏེ་ ཞག་ལ་ མི་རིག་རྒེ་པུ་ འགྲ་ཝེ་ ལག་ལ་ རྐྱང་ཤིང་ངེ་ཀ་ རྐྱང་ངེ་ལ་ ལྟེ་རྡེན་།”3 ཏེ་ནི་ ལ་མ་ འུ་རྐྱོང་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུན་, ལ་མ་ ཆོན་མོ་ ཀ་ཡ་ཕཱེ་ ཟེར་ཧ་ནེ་ ཕོ་ཀྲང་ངེ་ན་ ཛོམ་འདེ་། 4 སང་སྤེར་ན་ ཡི་ཤུ་ ཟུམ་འདེ་ སེད་ཅེ་ ཐཔ་ངེན་ ལྡིང་། 5 འིན་ན་ ཁོང་རྒུ་ནི་ ཟེར་, “པེ་སག་རྒེ་ ཏུའི་ཤེན་ནེ་ ཏུའི་ལ་ མི་ཟུམ་ ཅེ་ཟེར་ནི་ མི་ཚོག་ལ་ སྲོ་ ཡོྃ་རྡེ་ ཟི་ངིལ་ ཤོ་རེན་།”
ཡི་ཤུའི་ ཨུ་ལ་ ཏྲི་ཞིམ་ཅེན་ནེ་ མར་ ལུག་།
6 ཡི་ཤུ་ འབེད་ཐཱ་ནི་ ཀྲོང་ཁྱེར་ལ་ ཛེ་ནེད་ནི་ ཕན་ཀན་ ཤི་མོན་ནེ་ ཁང་པེ་ན་ 7 ཅོག་ཙེ་ཀ་ ཀན་འདེ་ ཡོད་ཏུའི་, ཀ་ཡོལ་ལེ་ ནོད་ ཀྲི་ཞིམ་མེ་ མར་ ཀུའི་སྤོ་ ཧང་ཀ་ནེ་ པོ་མོ་ཞིག་ ཡོྃ་ ཡང་ ཏྲི་ཞིམ་འབོ་ ཁོང་ངེ་ ཨུའི་ཀ་ ལུག་།
8 ཏོ་ ཐོང་ངེ་རྡང་ ལོབ་ཀྲུག་རྒུན་ལ་ སྲོ་ ཡོྃ་རྡེ་, ཅིག་ ཏང་ ཅིག་ལ་ ཟེར་, “ཅི་ ཏོ་ ཀོད་ལ་ ཏྃ་རྡེ་ ནོག་? 9 འི་ ཏྲི་ཞིམ་མེ་ མར་རྦོ་ རིན་ ཆོན་མོ་ཞིག་ལ་ ཙོྃ་རྡེ་ མུལ་འབོ་ ཉལ་རྦ་ཅེན་རྒུན་ལ་ ཏང་ཆོག་རྒེ་།”
10 ཡི་ཤུའི་ ཏོ་ ཁྱེན་འདེ་ ཁོང་རྒུན་ལ་ མོལ་, “ཁྱི་ཞི་ འི་ པོ་མེ་ སེམ་ལ་ ཅེ་ ནག་ ལྟན་ནེ་ཡོད་? ཁོའེ་ ངེ་ཕི་ ལེ་ཧ་ ཟང་པོ་ ཅོའེ་རྡེ་ ནོག་། 11 ཉལ་རྦ་ཅེན་རྒུན་ ཏུའི་རྒྱུན་ ཁྱི་ཞ་ ཉམ་པོ་ ལུའི་རྡེན་, འིན་ན་ ང་ ཁྱི་ཞ་ ཉམ་པོ་ ཏུའི་རྒྱུན་ མི་ལུའི་། 12 ཁོའེ་ ངེ་ ཟུྃ་སྤོ་ལ་ ཏྲི་ཞིམ་ ལུག་ཏེ་ ངེ་ ཟུྃ་སྤོ་ སྤུར་ཧང་ལ་ ཁྱེར་ཤེ་ཕི་ ཀྲལ་འགྲིག་ ཅོའེ་རྡེ་ ནོག་། 13 ངེ་ ཁྱི་ཞ་ རྡེན་འབའ་ ཟེ་འིན་, འཇིག་རྟེན་ སོན་ཏེ་ན་ ཀ་རུ་ ནེ་ཚུལ་ ཟང་པོ་ ཤེད་ན་ འི་ པོ་མོ་རྦེ་ ང་ ཅོའེ་ཧན་འབོ་ལ་ ཤེད་རྡེ་ ཁོ་ འི་ཏུ་ ཅོའེན་།”
ཀར་ཡོད་པ་ ཡུ་འདཱེ་ ཡི་ཤུ་ འགོམ་ཧོར་ ཏྃ་རྡེ་ ལྟེད་།
14 ཏེ་ནི་ ལོབ་ཀྲུག་ ཅུག་ཉི་ ནང་ནི་ ཡུ་འདཱ་ ཀར་ཡོད་པ་ ཟེར་ཧན་འབོ་ ལ་མ་ འུ་རྐྱོང་རྒུན་ས་ སོང་འདེ་ 15 འདྲི་, “ཀལ་ཏེ་ ངེ་ ཡི་ཤུ་ ཁྱི་ཞ་རྒུན་ལ་ ལྟེད་ནི་, ང་ ཅི་ ཏང་ངེན་?” ཁོང་རྒུ་ནི་ ཁོ་ མུལ་ལེ་ པེ་ནེ་ སུམ་ཅུ་ ཏྃ་། 16 ཏེ་རྒ་ ཏུའི་ནི་ཕ་ལ་ ཡུ་འདཱེ་ ཡི་ཤུ་ ལྟེད་ཅེ་ ཧབ་ ཙལ་ཤེ་ འགོ་ཟུག་།
ཡི་ཤུའི་ ལོབ་ཀྲུག་རྒུན་ ཉམ་པོ་ པེ་སག་རྒེ་ འདོན་ཏང་ འདོན་།
17 རྐྱུར་ མེ་ཀ་ནེ་ ཏི་རྒིར་ ཏུའི་ཤེན་ནེ་ འགོ་མེ་ ཞག་ལ་, ལོབ་ཀྲུག་རྒུན་ ཡི་ཤུའི་ཀ་ ཡོྃ་རྡེ་ འདྲི་, “ང་ཞི་ ཉེ་རང་ འདོན་ཅེ་ཕི་ པེ་སག་རྒེ་ འདོན་ཏང་ ཀ་རུ་ ཀྲལ་འགྲིག་ ཅོ་ལེ་?”
18 ཁོང་ངེ་ མོལ་, “ཡེ་རུ་ཤ་ལེམ་མེ་ རྒྱལ་སེ་ན་ ངེ་ ཟེར་ཧ་ནེ་ མི་ཀ་ སོང་འདེ་ ཁོ་ ཟེར་, ‘ལོབ་རྦོན་ནེ་ ཟེར་རྡུག་ ངེ་ཕི་ འདམ་མེ་ ཛེད་ཀ་ནེ་ ཏུའི་རྦོ་ ཉེ་མོ་ འདུག་། ང་རང་ངེ་ ལོབ་ཀྲུག་རྒུན་ ཉམ་པོ་ ཁྱེ་རང་ངེ་ ཁང་པེ་ན་ ང་ པེ་སག་རྒེ་ འདོན་ཏང་ ཟོའེན་།’” 19 ཏི་ནི་ ལོབ་ཀྲུག་རྒུ་ནི་ ཡི་ཤུའི་ མོལ་ཧན་ ནང་ཞིན་ པེ་སག་རྒེ་ འདོན་ཏང་ངེ་ ཀྲལ་འགྲིག་ ཅོའེ་།
20 ཕི་ཏོག་ ཆ་རྡང་ ལོབ་ཀྲུག་ ཅུག་ཉི་ ཉམ་པོ་ ཡི་ཤུ་ ཅོག་ཙེ་ཀ་ ཀན་འདེ་ 21 འདོན་ཏང་ འདོན་ནེན་ ཡོད་ཏུའི་, ཁོང་ངེ་ ལོབ་ཀྲུག་རྒུན་ལ་ མོལ་, “ངེ་ ཁྱི་ཞ་ རྡེན་འབའ་ ཟེ་འིན་ ཁྱི་ཞི་ ནང་ནི་ ཅིག་ཅིག་རྒེ་ ང་ འགྲ་ཝོ་ ལག་ལ་ ལྟེ་རྡེན་།”
22 ཁོང་རྒུན་ མ་སྲན་ཀྲེ་ ཚེར་རྡེ་ ཁོང་ལ་ ཅིག་རྒེ་ ལྟིང་ནི་ ཅིག་རྒེ་ འདྲི་, “ཙོབོ་ལེ་, ནེན་ཏེན་ ང་ཏེ་ མན་འགྲོ་?” 23 ཡི་ཤུའི་ ལེན་སལ་, “ང་ ཉམ་པོ་ ཏ་རྦེན་ ཅིག་རྒེ་ ནང་ནི་ ཟ་ཀན་འབེ་ ང་ འགྲ་ཝེ་ ལག་ལ་ ལྟེ་རྡེན་། 24 ཏམ་པེ་ སུང་རབ་རྦེ་ན་ འབྲི་ཛེད་ཏེ་ ཡོ་ཀན་ ནང་ཞིན་ མི་རིག་རྒེ་པུ་ ཤི་རྒོའེ་, འིན་ན་ མི་རིག་རྒེ་པུ་ འགྲ་ཝེ་ ལག་ལ་ ལྟེད་ཀ་ནེ་ མིའུ་ལ་ ཙམ་ཤིག་རྒེ་ འཇི་སྤ་ མི་ཡོང་། ཏེ་སང་ཏེ་ ཁོ་ མ་རྐྱེ་རྦེ་ནི་ ཁོའེ་ཕི་ རྒྱ་ལེ་ ཡོད་ཁྲོ་།”
25 ཏེ་ནེ་ ཡི་ཤུ་ འགྲ་ཝེ་ ལག་ལ་ ལྟེད་ཅེ་ཅེན་ནེ་ ཡུ་འདཱེ་ ཟེར་, “ལོབ་རྦོན་ལེ་ ནེན་ཏེན་ ང་ཏེ་ མན་འགྲོ་?”
ཡི་ཤུའི་ མོལ་, “འོ་ནེ་ ཁྱེ་རང་ འིན་།”
26 ཁོང་རྒུན་ འདོན་ཏང་ འདོན་ནེ་ ཡོད་ཏུའི་, ཡི་ཤུའི་ ཏི་རྒིར་ ནམ་འདེ་ ཀོན་འཇོག་ལ་ ཐུག་ཞེ་ཆེ་ ཞུའི་རྡེ་ ཅག་རྒེ་ ཛེད་ ཡང་ ལོབ་ཀྲུག་རྒུན་ལ་ ས་ལེན་ མོལ་, “འི་རྦོ་ ངེ་ ཟུྃ་སྤོ་ འིན་, ནེན་འདེ་ ཟོ་།”
27 ཏེ་ནི་ འདོན་རྐྱོ་རྦོ་ ནམ་ ཡང་ ཀོན་འཇོག་ལ་ ཐུག་ཞེ་ཆེ་ ཞུའི་རྡེ་ ཁོང་རྒུན་ལ་ ས་ལེན་ མོལ་, “ཁྱི་ཞ་ ཚང་མེ་ འི་ ནང་ནི་ ཐུང་། 28 འི་རྦོ་ ངེ་ ཁྲག་ འིན་ ཀ་རྦེ་ ཀོན་འཇོག་ ཏང་ ཁོང་ངེ་ མི་རྒུ་ནི་ པར་ལ་ ཆེཏ་ཏོན་འབོ་ ནེན་ཏེན་ ཛེ་རྡེ་ནོག་, ཡང་ མི་ མང་པེ་ རྡིག་པེ་ཕི་ སྲོག་ཆོད་རྡེ་ ཚུལ་ལ་ པོའེ་། 29 ངེ་ ཁྱི་ཞ་ ཟེ་འིན་, འི་ རྒུན་འགྲུམ་མེ་ ཁོའེ་ ཁྱི་ཞ་རྒུན་ ཉམ་པོ་ ངེ་ ཡང་ མི་ཐུང་ ནམ་ཚོག་པ་ ང་རང་ངེ་ ཡབ་རྦེ་ རྒྱལ་སྲིད་རྡེ་ན་ འི་རྦོ་ལ་ སོ་མ་ ཏོན་ཏག་ མི་སལ་།”
30 ཁོང་རྒུ་ནི་ ཀོན་འཇོག་ལ་ རྟོད་པེ་ ལུ་ པུལ་ ཚར་རེ་རྡང་, ཁོང་རྒུན་ ཨོ་ལི་ཝེ་ རི་ལ་ རྐྱོད་།
པི་ཏྲ་རེ་ ཡི་ཤུ་ མི་ཤེ་ཟུན་ ཏང་ཅེའོ་ ལུང་རྟན་ ཛེད་།
31 ཏེ་ནི་ ཡི་ཤུའི་ ལོབ་ཀྲུག་རྒུན་ལ་ མོལ་, “ཏི་རིང་ ཚེན་ལ་ ཁྱི་ཞ་ ཚང་མེ་ ང་ ཕྃ་རྡེ་ ཆེན་ ཅེ་ཟེར་ནི་ ཀོན་འཇོག་རྒེ་ མོལ་ལེ་ ཛེད་ཏེ་ འདུག་,
‘ངེ་ ལུག་ཟི་རྦོ་ སེད་རྡེན་,
ཡང་ ལུག་ ཏུམ་འབུའི་ ལུག་རྒུན་ ཡན་འདེ་ ཆེན་།’
32 འིན་ན་ སོན་པོ་ ལང་ངེ་ ཛེད་ཏེ་ ལྟིང་ནི་ ང་ ཁྱི་ཞི་སང་ ངུལ་ལ་ འགཱ་ལིལ་ལེ་ ཡུལ་ཞོང་ལ་ ཆེན་།”
33 པི་ཏྲ་རེ་ ལེན་ཏྃ་, “ཚང་མེ་ ཉེ་རང་ ཕང་ནི་, ངེ་ ཉེ་རང་ མ་ནི་ མི་ཕང་།”
34 ཡི་ཤུའི་ མོལ་, “ངེ་ ཁྱེ་རང་ལ་ རྡེན་འབའ་ ཟེ་འིན་ འེ་རྒ་ ཚེན་ལ་ ཅ་པེ་ ཅ་ཧད་ ཏང་ངེ་སང་ ངུལ་ལ་, ཁྱེ་རང་ངེ་ ང་ ལེན་ སུམ་ མི་ཤེ་ཟུན་ ཏང་ངེན་།”
35 པི་ཏྲ་རེ་ འུ་ཙུག་ ཏྃ་རྡེ་ ཟེར་, “ང་ ཉེ་རང་ ཉམ་པོ་ ཤི་རྒོའེ་ནང་, ངེ་ ཉེ་རང་ མི་ཤེ་ཟུན་ མ་ནི་ མི་ཏང་།” ཏེ་རྒ་ ཙོག་སེ་ ཞེན་ ལོབ་ཀྲུག་ ཚང་མེ་ལ་ ཟེར་།
འགེད་ཤེ་མ་ནེ་ ཚེའེ་ན་ ཡི་ཤུའི་ མོ་ལམ་ ཞུའི་།
36 ཏེ་ནི་ ཡི་ཤུ་ ལོབ་ཀྲུག་རྒུན་ ཉམ་པོ་ འགེད་ཤེ་མ་ནེ་ ཟེར་ས་ལ་ རྐྱོད་ ཡང་ ཁོང་ངེ་ ཁོང་རྒུན་ལ་ མོལ་, “ཁྱི་ཞ་རྒུན་ འེ་ཀ་ འདོད་, ང་ འ་ཀ་ མོ་ལམ་ ཞུ་ལ་ ཆ་ཡོད་” 37 ཁོང་ངེ་ པི་ཏྲར་ ཡང་ ཟ་འབེད་འདེ་ པུ་ཙ་ ཡ་ཀུབ་ ཏང་ ཡོ་ཧཱ་ནན་ ཉ་ཧ་, ཁོ་རང་ ཉམ་པོ་ ཁྱེར་རེ་ ཛེད་, ཡི་ཤུ་ ཐུག་ཚེར་ རྐྱོད་ཏེ་ ཁོང་ ཚབ་རྦེ་ ཛེད་། 38 ཡི་ཤུའི་ ཁོང་རྒུན་ལ་ མོལ་, “ངེ་ སེམ་ལ་ ཚེར་ཧ་ ཧོཔ་ ཤི་ཅེ་ ཙོག་སེ་ རག་། ང་ ཉམ་པོ་ ཤང་ ཅོའེ་རྡེ་ འེ་ཀ་ འདོད་།”
39 ཡི་ཤུ་ ཁོང་རྒུ་ནི་སང་ ཙི་རྦིག་ ཐག་རིང་ལ་ རྐྱོད་ཏེ་, འགྱེལ་རྡེ་ ཞལ་འདོང་ ཐང་ཀེ་ཀ་ སྤབ་ཏེ་, མོ་ལམ་ ཞུའིན་ མོལ་, “ངེ་ ཡབ་ལེ་, ཞེན་ ཐབ་ཅི་ ཡོད་ནི་ འི་ རྡུ་ངལ་ལེ་ ཀོ་རེ་འབོ་ ངེ་ཀ་ནི་ ཐེན་ནེ་ ཛེད་རྡང་, འིན་ན་ ངེ་ འདོད་པ་ ནང་ཞིན་ མན་, ཉེ་རང་ངེ་ ཐུག་འདོད་ ནང་ཞིན་ ཅོའོ་ ཛེད་།”
40 ཏེ་ནི་ ཡི་ཤུ་ ལོག་ཏེ་ རྐྱོད་ ཡང་ ཁོང་ ཚང་ཀ་ ཉིད་ལ་ སོང་འདེ་ ཟིའི་། ཁོང་ངེ་ པི་ཏྲར་ལ་ མོལ་, “ཆུ་ཙོད་ ཅིག་ལ་ ང་ ཉམ་པོ་ ཉིད་ མ་ཏང་ལ་ འདེད་མ་ཉེན་ནེ་? 41 ཁྱི་ཞ་ རྡིག་པེ་ན་ མི་འགྱེལ་ཤི་ཕི་ ཉིད་ མ་ཏང་ལ་ མོ་ལམ་ ཞུའི་། སེམ་ཡིད་རྡེ་ འདོད་པ་ རྡིག་པེ་ན་ མི་འགྱེལ་ཤེ་ ཡོད་ན་ ཟུྃ་སྤོ་ རྒུད་པོ་ ཡོད་ཏེ་ ནོག་།”
42 ལེན་ ཉི་སྤ་ ཁོང་ ཙི་རྦིག་ ཐག་རིང་ལ་ རྐྱོད་ཏེ་ མོ་ལམ་ ཞུ་ ཛེད་, “ངེ་ ཡབ་ལེ་, ཀལ་ཏེ་ འི་ རྡུ་ངལ་ལེ་ ཀོ་རེ་འབོ་ ངེ་ ཐུྃ་རྡེ་ མ་ནི་ ཐེན་ ཉེན་ཅེ་ མེད་ན་, ཉེ་རང་ངེ་ ཐུག་འདོད་ ནང་ཞིན་ ཀྲུཔ་ཤིག་།” 43 ཁོང་ ལོག་ཏེ་ རྐྱོད་རྒྱ་ལ་, ཡང་ ལོབ་ཀྲུག་ སུམ་ཀ་ ཉིད་ལ་ སོང་འདེ་ ཟིའི་ ཅེ་ཟེར་ནི་ ཁོང་རྒུན་ ཧོཔ་ ངལ་རྡེ་ ཡོད་པེན་།
44 ལོབ་ཀྲུག་རྒུན་ ཡང་ པོར་རྡེ་ ཁོང་ ཙ་རྦིག་ ཐག་རིང་ལ་ རྐྱོད་ཏེ་ ལེན་ སུམ་པ་ ངུལ་མ་ ཙོག་སེ་ མོ་ལམ་ ཞུ་ ཛེད་། 45 ཏེ་ནི་ ཁོང་ ལོབ་ཀྲུག་རྒུན་ས་ ལོག་ཏེ་ རྐྱོད་ཏེ་ མོལ་, “ཏ་རུང་ང་ ཁྱི་ཞ་ ངལ་ཚོའེ་རྡེ་ ཉིད་ ཏང་འི་ནེ་? ལྟོའེ་, མི་རིག་རྒེ་པུ་ལ་ འགོམ་ཧོར་ ཏྃ་རྡེ་ རྡིག་ཅེན་རྒུ་ནི་ ལག་ལ་ ལྟེད་ཅེ་ ཏུའི་ཚོད་པོ་ ལེཔ་ ཚར་། 46 ལོྃ་, ཨ་ཧོ་རྒུན་ ཆེན་། ལྟོའེ་རྡང་, ང་ འགྲ་ཝེ་ ལག་ལ་ ལྟེད་ཀན་འབོ་ ཡོང་ངེ་ལ་།”
ཡི་ཤུ་ ཟུམ་།
47 ཡི་ཤུའི་ ཞལ་ཏ་ ས་ལེན་ ཡོད་ཟ་ནི་ ལོབ་ཀྲུག་ ཅུག་ཉི་རྦེ་ ནང་ནི་ ཡུ་འདཱ་ ཏེ་ཀ་ ལེཔ་, ཁོ་ ཉམ་པོ་ ལ་མ་ འུ་རྐྱོང་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུ་ནི་ ཀལ་ཧ་ནེ་ མི་ མང་པོ་ ར་ཡི་ རྡང་ པེར་ཧ་ ཁུར་རྡེ་ ཡོྃ་། 48 འགྲ་ཝོ་རྒུ་ནི་ ལག་ལ་ ལྟེད་ཀན་འབེ་ ཁོང་རྒུན་ལ་ ཡི་ཤུ་ ཟུམ་མེ་ལ་ ལྟའ་ཞིག་ ཏང་ངེན་ “ངེ་ འོ་ ཏང་ཀ་ནེ་ མིའུ་ ཁྱི་ཞི་ ཟུམ་།” ཟེར་། 49 ཏེ་རྒ་མ་རྒ་ ཡུ་འདཱ་ ཡི་ཤུ་ས་ ཡོྃ་རྡེ་, “ལོབ་རྦོན་ལེ་, འཇུ་ལེ་” ཟེར་རྡེ་ འོ་ ཏྃ་།
50 ཡི་ཤུའི་ ཁོ་ མོལ་, “ཡ་ཏོ་, ཁྱེ་རང་ ཅོ་ལ་ ཡོང་ཀན་འབོ་ ཅོའེ་།” ཏེ་ནི་ ཁོང་རྒུན་ ཡོྃ་རྡེ་ ཡི་ཤུ་ ཟུམ་ ཡང་ ལྕ་རྟག་ ཉམ་པོ་ ཏག་། 51 ཧུན་མེད་ལ་ ལོབ་ཀྲུག་ ཅིག་རྒེ་ ཁོ་རང་ངེ་ ར་ཡི་ ཕིང་འདེ་ ལ་མ་ ཆོན་མེ་ ཡོག་པོ་ལ་ རྒྱབ་ཏེ་ ཁོའེ་ ནམ་ཅོག་པོ་ ཅེད་ཏྃ་།
52 ཡི་ཤུའི་ ཁོ་ མོལ་, “ར་ཡི་ ཤུབ་རྦེ་ན་ རྒྱོང་ ཅེ་ཟེར་ནི་ ར་ཡི་ ཀོལ་ཧན་ ཚང་མ་ ར་ཡི་ཀ་ནི་ ཤིན་། 53 ཁྱེ་རང་ངེ་ ཅི་ སམ་, ཀལ་ཏེ་ ངེ་ ང་རང་ངེ་ ཡབ་ལ་ ཞུ་ནི་ ཏེ་རྒ་མ་རྒ་ ཕོ་ཉེ་ མག་མི་ ཀྲང་ མེད་ཅི་ ང་ རྐྱོབ་རྦེ་ལ་ ཀ་ལེ་ མི་ཛེད་རྡེ་? 54 འིན་ན་ ཀལ་རྡེ་ ཏོ་ ངེ་ ཅོ་ནི་, ཏེ་ནི་ ཏམ་པེ་ སུང་རབ་རྦེ་ན་ ཡུ་རྒུན་ ངེ་ཀ་ ཆ་རྒོའེ་ མོལ་ཧན་འབོ་ ཀ་ཟུག་རྒེ་ འདྲན་འདྲ་ ཀྲུཔ་རྦེན་།”
55 ཏེ་ནེ་ ཡི་ཤུའི་ ཁོང་ ཟུམ་ཀན་རྒུན་ལ་ མོལ་, “ར་ཡི་ རྡང་ པེར་ཧ་ ཁུར་རྡེ་ ང་ ཟུམ་མེ་ལ་ ཡོྃ་རྡེ་ ཅེ་ ང་ ཅག་པ་ ནོག་རྒེ་? ཀོན་འཇོག་རྒེ་ ཁང་པེ་ན་ ཞག་ཏང་ ངེ་ ལབ་ཞ་ ཏང་ཟ་ནི་ ཁྱི་ཞི་ ང་ ཅེ་ མ་ཟུམ་འབེན་? 56 འིན་ན་ ཏམ་པེ་ སུང་རབ་རྦེ་ན་ ལུང་རྟོན་པེ་ འབྲི་ཀན་རྒུན་ ཀྲུཔ་ཅེ་ཕི་ ཡུ་ ཚང་མ་ ཆ་རྒོའེ་།” ཏེ་ནི་ ཁོང་ ཕྃ་རྡེ་ ལོབ་ཀྲུག་ ཚང་མ་ ཤོར་།
ཡི་ཤུ་ ཡ་ཧུ་འདཱ་པ་ ཚོག་འདུའི་ འདུན་ལ་ ཁྱེར་།
57 ཡི་ཤུ་ ཟུམ་ཀན་རྒུ་ནི་, ཁོང་ ལ་མ་ ཆོན་མོ་ ཀ་ཡ་ཕཱེ་ཀ་ ཁྱེར་, ཀ་རུ་ ཆོའེ་ཁྲིམ་ལ་ ཁེ་སྤ་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུན་ ཛོམ་འདེ་ ཡོད་པེན་། 58 འིན་ན་ པི་ཏྲར་ ལ་མ་ ཆོན་མེ་ ཕོ་ཀྲང་ངེ་ ཀྱང་ཧོར་ཚུག་པ་ ཐག་རིང་ཞིག་ནི་ ཁོང་ངེ་ རྒྱབ་ནི་ སོང་ ཡང་ ནང་ཀུ་ལ་ སོང་འདེ་ ཡི་ཤུ་ ཅི་ ཅོ་རུག་ ལྟ་ལ་ སྲུང་ཀན་རྒུན་ ཉམ་པོ་ ཐང་ཀེ་ཀ་ འདེད་།
59 ལ་མ་ ཆོན་མོ་ རྡང་ ཡ་ཧུ་འདཱ་པེ་ ཚོག་འདུའི་ ཐུའི་མི་ ཚང་མེ་ ཡི་ཤུ་ སེད་ཉེན་ཅེ་ ཟུན་མ་ སྤང་པོ་ ཙལ་། 60 མི་ མང་པེ་ ཟུན་མ་ སྤང་པོ་ ཏང་ནི་ ཁོང་ སེད་ཉེན་ཅེ་ སྤང་པོ་ཞིག་ མ་ཐོབ་། ལྟིང་འཇུག་ལ་ མི་ ཉི་ ཡོྃ་རྡེ་ 61 ཟེར་, “འི་ མི་རྦེ་ ཟེར་རེ་རག་པེ་, ‘ངེ་ ཀོན་འཇོག་རྒེ་ ཁང་པ་ ཞིག་ཏེ་, ཞག་ སུམ་མེ་ན་ ཡང་ སིག་ཉེན་ཅེ་རག་།’”
62 ཏེ་ནི་ ལ་མ་ ཆོན་མོ་ ལྃ་རྡེ་ ཡི་ཤུ་ ཟེར་, “ཁྱེ་རང་ངེ་ རྒྱཔ་འགལ་ལ་ སྤང་པོ་ ཏང་ཀན་རྒུན་ལ་ ལེན་ཏྃ་ངེ་ མེད་རྡེ་? རང་ རྐྱོབ་ཅེ་ཕི་ ཁྱེ་རང་ལ་ ཟེར་ཤེ་ མེད་རྡེ་?” 63 འིན་ན་ ཡི་ཤུ་ ཅེཔ་ཁ་རོག་ཏེ་ ཞུའུ་། ཏེ་ནི་ ལ་མ་ ཆོན་མེ་ ཟེར་, “ངེ་ ཁྱེ་རང་ལ་ ཀོན་འཇོག་ སོན་པེ་ ནའ་ ཀ་ལེ་ཡོད་, ང་ཞ་ ཤོད་རྡང་ ཁྱེ་རང་ འདམ་མེ་ ཛེད་ཀ་ནེ་ མ་ཤི་ཀ་, ཀོན་འཇོག་རྒེ་ སྲེ་ འིན་ནེ་?”
64 ཡི་ཤུའི་ མོལ་, “འོ་ནེ་ ཉེ་རང་ངེ་ ཟེར་ཧན་འབོ་ འིན་, འིན་ན་ ངེ་ ཁྱི་ཞ་ ཟེ་འིན་, མ་འོང་པེ་ ཏུའི་ན་ མི་རིག་རྒེ་པུ་ ཀུན་ཝང་a ཀོན་འཇོག་རྒེ་ ཆག་ ཡོའེ་སྤེ་ ཁྲིའི་ཀ་ འདེད་ཏེ་, ཡང་ ནམ་ཀེ་ སྲིན་ནེ་ཀ་ ཞོན་འདེ་ ཡོང་ངེ་ ཁྱི་ཞི་ ཐོང་ངེན་།”
65 ཏེ་ནི་ ལ་མ་ ཆོན་མོ་ ཁོ་རང་ངེ་ ཀོའེ་ལག་པོ་ ཤག་ ཡང་ ཟེར་, “ཁོའེ་ ཀོན་འཇོག་ལ་ ཏེཏ་ལོག་ ཅོའེ་རྡེ་ ནོག་། ཨ་ཧོ་ལ་ འི་སང་ མང་ངེ་ སྤང་པོ་ ཅེ་ རྒོའེ་རྡེན་? ཁོའེ་ ཏེཏ་ལོག་ ཅོ་ཀན་འབོ་ ལེམ་ ཁྱི་ཞི་ ཚོར་རྡེ་ ནོག་། 66 ཁྱི་ཞི་ ཅི་ ཐག་ཅོད་རྡེ་ཡོད་?” ཁོང་རྒུ་ནི་ ལེན་ཏྃ་, “ཁོ་ སེད་རྒོ་ཤེ་ འོའེ་སྤ་ ནོག་།”
67 ཏེ་ནི་ ཁོང་རྒུ་ནི་ ཁོང་ངེ་ ཞལ་འདོང་ངེ་ཀ་ ཐུ་ རྒྱབ་ཏེ་ མུལ་ཀྲུག་ ཅོའེ་རྡེ་ རྡུྃ་ ཡང་ ཞེན་རྒུ་ནི་ ཁོང་ལ་ འགྲམ་ལྕག་ ཏྃ་། 68 ཧབ་རྒོད་ ཏང་ངེན་ ཟེར་, “འདམ་མེ་ ཛེད་ཀ་ནེ་ མ་ཤི་ཀ་ ང་ཞ་ ལུང་རྟན་ སལ་, ཁྱེ་རང་ལ་ རྡུང་ཀན་འབོ་ སུ་ ནོག་?”
པི་ཏྲ་རེ་ ཡི་ཤུ་ མི་ཤེ་ཟུན་ ཏྃ་།
69 པི་ཏྲར་ ཕི་ལོག་ལ་ ཕོ་ཀྲང་ངེ་ ཀྱང་རེ་ན་ འདེད་ཏེ་ ཡོད་ཟ་ནི་, ཡོག་མོ་ཞིག་ ཁོ་ས་ ཡོྃ་རྡེ་ ཟེར་, “འགཱ་ལིལ་པེ་ ཡི་ཤུ་ ཉམ་པོ་ ཁྱེ་རང་ལ་ མེད་པེ་ནེ་?”
70 འིན་ན་ ཁོའེ་ ཁོང་ ཚང་མེ་ འདུན་ལ་ ཟུན་ ཏྃ་རྡེ་ ཟེར་, “ཁྱེ་རང་ངེ་ ཅི་ ཟེར་རྡེ་ འིན་ ང་ ཧ་ཀོ་ མེ་རག་།”
71 ཏེ་ནི་ ཁོ་ རྒྱེ་རྒོའེ་ཀ་ སོང་, ཏུ་རུ་ ཞེན་ ཡོག་མོ་ཞིག་རྒེ་ ཁོ་ ཐོང་འདེ་ ཉེ་ཁོར་ལ་ ཡོ་ཀན་རྒུན་ལ་ ཟེར་, “འི་ མིའུ་ ན་ཙ་རེད་པ་ ཡི་ཤུ་ ཉམ་པོ་ ཡོད་པེན་།”
72 ཁོའེ་ ཡང་ མི་ཤེ་ཟུན་ ཏང་ངེན་ ནའ་ རྐྱལ་རྡེ་ ཟེར་, “ཏེ་ མིའུ་ ངེ་ ཤེ་རྡེ་མེད་།”
73 ཙི་རྦི་ཤིག་རྒེ་ ལྟིང་ནི་ ཏེ་རྒ་ ལྃ་རྡེ་ ཡོ་ཀན་རྒུན་ པི་ཏྲར་ས་ སོང་འདེ་ ཟེར་, “ནེན་ཏེན་ ཁྱེ་རང་ ཁོའེ་ ཁྲོ་པ་རྒུ་ནི་ ནང་ནི་ ཅིག་ ནོག་ ཅེ་ཟེར་ནི་ ཁྱེ་རང་ངེ་ སྤེ་ར་ ཏང་ཚུལ་རྦོ་ འགཱ་ལིལ་པ་ ཙོག་སེ་ རག་།”
74 པི་ཏྲ་རེ་ ཁོ་ལ་ ངན་ ཏབ་རྡེ་, ནའ་ རྐྱལ་རྡེ་ ཟེར་, “ངེ་ ཏེ་ མིའུ་ ཤེ་རྡེ་མེད་།” ཏེ་རྒ་མ་རྒ་ ཅ་པེ་ ཅ་ཧད་ ཏྃ་།
75 ཏེ་ནི་ པི་ཏྲར་ལ་ ཡི་ཤུའི་, “ཅ་པེ་ ཅ་ཧད་ ཏང་ངེ་སང་ ངུལ་ལ་, ཁྱེ་རང་ངེ་ ང་ ལེན་ སུམ་ མི་ཤེ་ཟུན་ ཏང་ངེན་” མོལ་ཧན་འབོ་ འི་ཏུ་ ཡོྃ་, ཡང་ ཁོ་ ཕི་ལོག་ལ་ སོང་འདེ་ མ་སྲན་ཀྲེ་ ངུའི་།