ན་ཅུང་ ཅུའི་ སྲུང་ངུ་།
25
ཡི་ཤུའི་ མོལ་, “རྡེ་བ་ཅན་ནེ་ རྒྱལ་སྲིད་པོ་ རྐྱོང་ཙེ་ ཁུར་རྡེ་ པག་པོ་ སུའི་རྡེ་ ཆ་ཀ་ནེ་ ན་ཅུང་ ཅུ་ ཙོག་སེ་ འིན་། 2 ཁོང་རྒུ་ནི་ན་ ཧ་འགྲང་ ང་ རྡང་ ཁྲམ་པ་ཅེན་ ང་ ཡོད་པེན་། 3 ཧ་འགྲང་ ང་ཀོའེ་ རྐྱོང་ཙེ་ ཁུར་, འིན་ན་ རྐྱོང་ཙེ་ན་ ནེན་ཅེ་ཕི་ ཐེ་རྦ་ མར་ ཁུར་རེ་ལ་ ཞེད་། 4 ཁྲམ་པ་ཅེན་རྒུ་ནི་ རྐྱོང་ཙེ་ ཉམ་པོ་ རྐྱོང་ཙེ་ན་ ནེན་ཅེ་ཕི་ ཐེ་རྦ་ མར་རེ་ ཁུར་། 5 པག་པོ་ ལེབ་རྦེ་ལ་ ཏུའི་ མང་པོ་ འགོར་རྦེ་ ཁོང་ ཚང་མ་ ངལ་རྡེ་ ཉིད་ལ་ སོང་།”6 “ཚེན་ཕེད་ཞིག་ལ་ ‘པག་པོ་ ལེབ་ཏུག་, ཐུག་རྒེ་ལ་ ཤོག་ཧེ་’ ཟེར་རྡེ་ ཧད་ ཚོར་།” 7 “ན་ཅུང་ ཚང་མ་ ལྃ་རྡེ་ འོད་རྒུན་ སལ་སྤོ་ ཅོའེ་། 8 ཧ་འགྲང་ ང་ཀོའེ་ ཁྲམ་པ་ཅེན་ ང་ཀ་ལ་ ཟེར་, ‘ང་ཞི་ འོད་པོ་ ཤི་རུག་པེ་ འཇུ་འཇུ་ ང་ཞ་ མར་ ཙི་རྦིག་ ཏོང་ཧེ་།’”
9 “ཁོང་རྒུ་ནི་ ཟེར་, ‘ཏང་ངེ་མེད་། ང་ཞི་ ཁྱི་ཞ་ ཏང་ནི་ ཨ་ཧོ་ ཚང་མ་ལ་ ཉུང་ཙེ་ ཆེན་, ཏེ་སང་ མར་ ཙོང་ཀ་ནེ་ཀ་ སོང་འདེ་ ཁྱི་ཞ་རང་ངེ་ཕི་ ཉོའེ་།’ 10 ཁོང་རྒུན་ མར་ ཉོ་ལ་ སོང་འདེ་ མེད་ཟ་ནི་ པག་པོ་ ལེཔ་། ཀྲལ་འགྲིག་ ཡོ་ཀན་ ན་ཅུང་རྒུན་ པག་པོ་ ཉམ་པོ་ པག་རྟོན་ནེ་ འགྲོན་ལ་ སོང་ ཡང་ རྒོ་ ཅུག་།”
11 “ལྟིང་ནི་ ཞེན་ ང་ཀ་ལ་ ཡོྃ་རྡེ་ པག་པོ་ལ་ ཟེར་, ‘ཀ་ལེ་, ཀ་ལེ་, ང་ཞི་ཕི་ རྒོ་ པེ་ཛེད་རྡང་’ 12 འིན་ན་ ཁོའེ་ ལེན་ཏྃ་, ‘ངེ་ རྡེན་འབའ་ ཟེ་འིན་, ང་ ཁྱི་ཞ་ ཤེ་རྡེ་མེད་།’”
13 ཡི་ཤུའི་ མོལ་, “མི་རིག་རྒེ་པུ་ ཀ་ཞག་ ཏང་ ཏུའི་ཚོད་ཀ་ ལོག་ཏེ་ ཡོང་ཅེ་འབོ་, ཁྱི་ཞ་ རྒྱུའི་མེད་པེ་ ཤང་ ཅོའེ་།”
ཡོག་པོ་ སུམ་མེ་ སྲུང་ངུ་།
14 ཡི་ཤུའི་ མོལ་, “རྡེ་བ་ཅན་ནེ་ རྒྱལ་སྲིད་པོ་ པེ་ལ་ ཆ་སང་ ངུལ་ལ་ མི་ཞིག་རྒེ་ ཁོ་རང་ངེ་ ཡོག་པོ་རྒུན་ འབོའེ་རྡེ་ ནོར་ ལྟེད་ཀན་ ཙོག་སེ་ འིན་། 15 ཁོའེ་ ཡོག་པོ་ རེ་རེ་ལ་ ཁྱུད་ ནང་ཞིན་ མུལ་ལེ་ པེ་ནེ་ ཧང་ཀ་ནེ་ རྒྱིའུ་, ཏང་པོ་ལ་ ང་, ཉི་སྤ་ལ་ ཉི་, ཡང་ སུམ་པ་ལ་ ཅིག་ ཏྃ་རྡེ་ ཁོ་རང་ པེ་ལ་ སོང་།”
16 “མུལ་ལེ་ པེ་ནེ་ རྒྱིའུ་ ང་ ཐོབ་ཀན་འབེ་ ཏེ་རྒ་མ་རྒ་ སོང་འདེ་, པེ་ནེ་འབོ་ ལེ་ཧེ་ན་ ཏྃ་རྦེ་ ཐེ་རྦ་ རྒྱིའུ་ ང་ འཇོར་། 17 ཏེ་རྒ་ ཙོག་སེ་ རྒྱིའུ་ ཉི་ ཐོབ་ཀན་འབོ་ལ་ ཐེ་རྦ་ རྒྱིའུ་ ཉི་ འཇོར་། 18 འིན་ན་ རྒྱིའུ་ ཅིག་ ཐོབ་ཀན་འབེ་ ས་ཀྱེཏ་ ཏྲུའི་རྡེ་ སྤོན་འབེ་ པེ་ནེ་ ཏྃ་ཧན་འབོ་ རྦེ་རྡེ་ པོར་།”
19 “ཏུའི་ མང་པེ་ ལྟིང་ནི་ སྤོན་འབོ་ ལོག་ཏེ་ ཡོྃ་ ཡང་ ཡོག་པོ་ སུམ་ཀེ་ཀ་ནི་ སི་སྲུག་ ནེན་། 20 རྒྱིའུ་ ང་ ཧང་འདེ་ མུལ་ ཐོབ་ཀན་འབེ་ ཡང་ ཐེ་རྦ་ རྒྱིའུ་ ང་ ཁྱོྃ་རྡེ་ ཟེར་, ‘སྤོན་འབོ་ལེ་ ཉེ་རང་ངེ་ ང་ རྒྱིའུ་ ང་ སལ་, ཟི་རྡང་ ང་ ཐེ་རྦ་ ང་ འཇོར་།’”
21 “སྤོན་འབེ་ ཟེར་, ‘རྒྱ་ལེ་ ཅོའེ་, ཡོག་པོ་ ཟང་པོ་ རྡང་ ལོ་ཁྱེལ་ཅེན་, ཁྱེ་རང་ ཉུང་ཙེ་ཞིག་རྒེ་ན་ ལོ་ཁྱེལ་ཅེན་ ལུའི་རྦེ་, ངེ་ ཁྱེ་རང་ལ་ ནོར་ མང་པེ་ཀ་ ཝང་ཆ་ ཏང་ངེན་, ཤོག་ ང་ ཉམ་པོ་ རྒ་མོ་ ཅོའེ་།’”
22 “རྒྱིའུ་ ཉི་ ཧང་འདེ་ མུལ་ ཐོབ་ཀན་འབེ་ ཟེར་, ‘སྤོན་འབོ་ལེ་ ཉེ་རང་ངེ་ ང་ རྒྱིའུ་ ཉི་ སལ་, ཟི་རྡང་ ང་ ཐེ་རྦ་ རྒྱིའུ་ ཉི་ ཡང་ འཇོར་།’”
23 “སྤོན་འབེ་ ཟེར་, ‘མ་ རྒྱ་ལེ་ སོང་, ཡོག་པོ་ ཟང་པོ་ རྡང་ ལོ་ཁྱེལ་ཅེན་, ཁྱེ་རང་ངེ་ ཉུང་ཙེ་ཞིག་རྒེ་ན་ ཀྲང་པོ་ ཅོའེ་རྦེ་, ངེ་ ཁྱེ་རང་ལ་ ནོར་ མང་པེ་ཀ་ ཝང་ཆ་ ཏང་ངེན་, ཤོག་ ང་ ཉམ་པོ་ རྒ་མོ་ ཅོའེ་།’”
24 “ཏེ་ནི་ རྒྱིའུ་ ཅིག་ ཧང་འདེ་ མུལ་ ཐོབ་ཀན་འབེ་ ཟེར་, ‘སྤོན་འབོ་ལེ་, ཉེ་རང་ ཉིང་ཞེ་ མེ་ཀན་, ཁོ་རང་ངེ་ མ་ཏབ་ཀ་ནེ་ ས་ཀྱེད་རྡེ་ཀ་ནི་ ངེ་ཀན་ འདང་ ས་ངོན་ མ་ཏབ་ཀ་ནེ་ ས་ཀྱེད་རྡེ་ཀ་ནི་ རྡུ་ཀན་ འིན་ཀན་འབོ་ ང་ རྒྱུའི་ཡོད་ཅེ་ཀ་ནི་ 25 ང་ ཉེ་རང་ལ་ འཇིའི་རྡེ་, ཉེ་རང་ངེ་ མུལ་ལེ་ པེ་ནེ་ རྒྱིའུ་ ས་ཀྱེཏ་རྡེ་ ཡོག་ལ་ རྦེ་རྡེ་ པོར་རྦེན་, ཉེ་རང་ངེ་ པེ་ནེ་འབོ་ ལོག་ཏེ་ ནམ་།’”
26 “སྤོན་འབེ་ ཟེར་, ‘ཡོག་པོ་ ངན་པ་, ལེ་མི་ལམ་, ང་ ང་རང་ངེ་ མ་ཏབ་ཀ་ནེ་ ས་ཀྱེད་རྡེ་ཀ་ནི་ ངེ་ཀན་ འདང་ ངེ་ ས་ངོན་ མ་ཏབ་ཀ་ནེ་ ས་ཀྱེད་རྡེ་ཀ་ནི་ རྡུ་ཀན་ འིན་ཀན་འབོ་ ཁྱེ་རང་ལ་ རྒྱུའི་ཡོད་ཏེ་ལ་, 27 ཁྱེ་རང་ངེ་ ངེ་ པེ་ནེའོ་ མུལ་ཛོད་ཁང་ངེ་ན་ ཅི་ཕི་ མ་ཏྃ་རྦེན་? ཀལ་ཏེ་ ཏང་རྦེན་ནི་, ང་ ཡོྃ་རྡེ་ ཁྱེཔ་སྃ་ ཉམ་པོ་ ང་རང་ པེ་ནེ་ ནེན་འདེ་ ཡོད་ཁྲོ་།’”
28 “སྤོན་འབེ་ ཟེར་, ‘ཁོའེ་ཀ་ནི་ རྒྱིའུ་ ཧང་ཀ་ནེ་ པེ་ནེ་རྦོ་ ནེན་འདེ་ རྒྱིའུ་ ཅུ་ ཡོ་ཀན་འབོ་ལ་ ཏོང་། 29 ཏང་ཀན་འབོ་ རྒྱ་ལེ་ ཅོའེ་རྡེ་ ཀོལ་ཧན་རྒུན་ལ་ མང་ངེ་ ཏང་ཅེ་ མ་ཚེད་ ཁོང་ངེ་ ནང་ནི་ ལུད་ཏེ་ ཆེན་, འིན་ན་ མ་ཀོལ་ཧན་རྒུ་ནི་ཀ་ནི་ ཉུང་ཙེ་ ཡོ་ཀན་འབོ་ལ་ ཁྱེར་རེན་། 30 འི་ ཕན་མི་ཐོག་རྡེ་ ཡོག་པོ་ ཕི་ལོག་ལ་ མུན་ཀྲག་རྒེ་ན་ ཕོང་, ཏུ་རུ་ ནག་ སྲན་ཀྲེ་ ཐོང་རྡེ་ ངུ་ཅེ་ རྡང་ སོ་ སིག་ཅེ་ ཡོང་ངེན་།’”
ལྟིང་འཇུག་རྒེ་ ཁྲིམ་ཅེད་།
31 ཡི་ཤུའི་ མོལ་, “མི་རིག་རྒེ་པུ་ ཟི་ཞིད་རྡེ་ན་ ཕོ་ཉ་ ཚང་མ་ ཉམ་པོ་ ཡོང་ངེ་ ཏུའི་, ཁོ་ རྒྱ་སྤེ་ ཚུལ་ལ་ ཁོ་རང་ངེ་ ཟི་ཞིད་རྡེ་ ཁྲིའི་ཀ་ འདེད་རྡེན་། 32 རྒྱལ་ཁབ་ ཚང་མེ་ མི་རྒུན་ ཁོའེ་ འདུན་ལ་ རྡུའིན་, ལུག་ཟི་ ར་མེ་ ཕྲོ་ནི་ ལུག་རྒུན་ པེ་ ཙོག་སེ་ ཁོའེ་ མི་རྒུན་ སོ་སོ་ པེན་། 33 ཁོའེ་ ཡོའེ་སྤ་ ཆོག་ལ་ ལུག་ ཏང་ ཡོའེ་མ་ ཆོག་ལ་ ར་མ་རྒུན་ པོ་རེན་།”
34 “ཏི་ནི་ རྒྱ་སྤེ་ ཡོའེ་སྤ་ ཡོ་ཀན་རྒུན་ལ་ ཟེ་རེན་ ངེ་ ཡབ་རྦེ་ ཅིན་ལབ་ སལ་ཧན་རྒུན་, ཁྱི་ཞི་ ནོར་ཧལ་ རྡེ་བ་ཅན་ནེ་ རྒྱལ་སྲིད་པོ་ ནེན་ནེ་ལ་ ཤོག་, ཀ་འབོ་ ཁྱི་ཞི་ཕི་ འཇིག་རྟེན་ ཛེད་པེ་ནི་ཕ་ལ་ ཀྲལ་འགྲིག་ ཛེད་ཏེ་ འིན་། 35 ང་ ལྟོ་ཟ་ནི་ ཁྱི་ཞི་ ཁར་ཞི་ ཏྃ་ ཡང་ ང་ ཧོམ་ཟ་ནི་ ཁྱི་ཞི་ ཐུང་ཅེ་ ཏྃ་, ངོ་མ་ཤེ་ན་ ང་ ཁྱི་ཞི་ ཁང་པེ་ན་ རྒ་སུའི་ ཞུའི་། 36 ང་ ལྕུའི་རུ་ལ་ ཡོད་ཟ་ནི་ ཀོའེ་ལག་ ཧོན་, ང་ ཟུར་མོ་ ཡོང་ཟ་ནི་ ལྟ་ཏོག་ ཅོའེ་, ཡང་ ང་ ཙོན་ཁང་ལ་ ཡོད་ཟ་ནི་ ཐུག་རྒེ་ལ་ ཡོྃ་།”
37 “ཏེ་ནི་ ཏེ་ མི་ ཀྲང་པོ་རྒུ་ནི་ ཟེ་རེན་, ‘ཙོབོ་ལེ་, ནམ་ ཉེ་རང་ ལྟོག་རི་ ཐོང་འདེ་ ང་ཞི་ ཁར་ཞི་ ཏྃ་ ཡང་ ཧོམ་མེ་ ཐོང་འདེ་ ཐུང་ཅེ་ ཏྃ་? 38 ནམ་ ཉེ་རང་ ང་ཞི་ ཐོང་འདེ་ ངོ་མ་ཤེ་ན་ ཁང་པེ་ན་ རྒ་སུའི་ ཞུའི་, ཡང་ ལྕུ་རུ་ལ་ ཐོང་འདེ་ ཀོའེ་ལག་ ཧོན་? 39 ཟུར་མོ་ ཡོང་ ཙོན་ཁང་ལ་ ཡོད་རྡེ་ ཐོང་འདེ་ ནམ་ ཐུག་རྒེ་ལ་ ཡོྃ་?’”
40 “ཏེ་ནི་ རྒྱ་སྤེ་ ཟེར་, ‘ངེ་ ཁྱི་ཞ་ རྡེན་འབའ་ ཟེ་འིན་ ཁྱི་ཞི་ ངེ་ སྤུན་ འུ་ཐུག་ ཆུང་ཤོ་ ཅིག་ལ་ ཅོའེ་ཧན་རྒུན་ ང་ ཅོའེ་རྡེ་ འིན་།’”
41 “ཏེ་ནི་ ཡོའེ་མ་ ཆོག་ལ་ ཡོ་ཀན་རྒུན་ལ་ ཟེ་འིན་, ‘ངན་ ཕོག་ཀན་, ཁྱི་ཞ་རྒུན་ ང་ནི་ ཐག་རིང་ལ་ མ་ནི་ མི་ཤི་ཅེ་ མེ་ན་ སོང་ ཀ་འབོ་ རྡུད་ འདང་ ཁོའེ་ ཕོ་ཉ་ ངན་པ་རྒུ་ནི་ཕི་ ཅོའོ་ ཛེད་ཏེ་ འིན་། 42 ང་ ལྟོ་ཟ་ནི་ ཁྱི་ཞི་ ཟ་ཅེ་ལ་ ཅང་ མ་ཏྃ་, ང་ ཧོམ་ཟ་ནི་ ཐུང་ཅེ་ལ་ ཅང་ མ་ཏྃ་། 43 ཁྱི་ཞི་ ང་ ངོ་མ་ཤེ་ཟ་ནི་ ཁང་པེ་ན་ རྒ་སུའི་ མ་ཞུའི་, ལྕུ་རུ་ ཡོད་ཟ་ནི་ ཀོའེ་ལག་ མ་ཧོན་, ཟུར་མོ་ ཡང་ ཙོན་ཁང་ལ་ ཡོད་ཟ་ནི་ ང་ ལྟ་ཏོག་ མ་ཅོའེ་།’”
44 “ཁོང་རྒུ་ནི་ ལེན་ཏྃ་, ‘ཙོབོ་ལེ་, ནམ་ ང་ཞ་ ཉེ་རང་ ལྟོག་རི་ལ་, ཧོམ་རི་ལ་, ངོ་མ་ཤེ་, ཡང་ ལྕུ་རུ་ལ་, ཡང་ ཟུར་མོ་ རྡང་ ཙོན་ཁང་ལ་ ཡོད་རྡེ་ ཐོང་འདེ་ ཉེ་རང་ལ་ ཡ་ཏོ་ མ་ཅོའེ་?’”
45 “ཏེ་ནི་ རྒྱ་སྤེ་ ཟེར་, ‘ངེ་ ཁྱི་ཞ་ རྡེན་འབའ་ ཟེ་འིན་, ངེ་ སྤུན་ འུ་ཐུག་ ཆུང་ཤོ་ ཅིག་ལ་ ཡ་ཏོ་ མ་ཅོའེ་རྦེ་, ང་ལ་ མ་ཅོ་འིན་།’”
46 “ཁོང་རྒུན་ ཐ་མེད་པེ་ ཆེད་པེ་ན་ ཁྱེར་རེན་ འིན་ན་ མི་ ཀྲང་པོ་རྒུན་ ཐ་མེད་པེ་ མི་ཙེ་ན་ ཆེན་།”