མཏ་ཐ་ 28

ཡི་ཤུ་ སོན་པོ་ ལང་ངེ་ ཛེད་།

ངལ་ཚོའེ་ ཞག་རྒེ་ ལྟིང་ནི་ ཟ་ཉི་མེ་ ཞག་ལ་ ང་ཏོག་ ཉི་མ་ ཤར་ཀྱི་ལ་, མ་ཧ་འདལ་ལེན་མ་ མར་ཡམ་ འདང་ ཡང་ ཞེན་ མར་ཡམ་ཞིག་ སྤུར་ཧང་ལ་ ལྟ་ལ་ སོང་།

2 ཧུན་མེད་ལ་ སྃ་འགུལ་ མ་ ཆོན་མོ་ཞིག་ ཡོྃ་ ཅེ་ཟེར་ནི་ ཀོན་འཇོག་རྒེ་ ཕོ་ཉ་ ནམ་ཀ་ནི་ པབ་ཏེ་ སྤུར་ཧང་ངེ་ རྒོའེ་ཀ་ནི་ ཁེ་རྡོ་ རིལ་རྡེ་, ཏེ་ཀ་ ཞུའུ་། 3 ཁོང་ངེ་ ཞལ་འདོང་ ལོག་ ཙོག་སེ་ འདང་ཤེན་ ཡང་ ནམ་ཟ་ ཁ་ ཙོག་སེ་ ཀར་སྤོ་ ཡོད་པེན་། 4 ཁོང་ ཐོང་འདེ་ སྲུང་ངེན་ ཡོ་ཀན་ མག་མི་རྒུན་ མ་སྲན་ཀྲེ་ འཇིའི་རྡེ་ འདར་རེན་ ཐང་ཀེ་ཀ་ འགྱེལ་རྡེ་ ཤི་ཀན་ ཙོག་སེ་ འགྱུར་།

5 ཕོ་ཉེ་ པོ་མོ་ ཉ་ཧ་ མོལ་, “འཇིའི་ མ་འཇིའི་, ཁྱི་ཞི་ རྐྱང་ཤིང་ངེ་ཀ་ རྐྱང་ཀན་ ཡི་ཤུ་ ཙལ་ཧན་འབོ་ ང་ རྒྱུའི་ཡོད་། 6 ཁོང་ འེ་ཀ་ མེད་; ཁོང་ངེ་ མོལ་ཧན་ ནང་ཞིན་ ཁོང་ སོན་པོ་ ཞྃ་རྡེ་ འིན་། ཡོྃ་རྡེ་ ཁོང་ངེ་ སྤུར་ པོར་སེ་ མལ་ ལྟོའེ་། 7 ཏེ་ནི་ འགྱོ་སྤ་ སོང་འདེ་ ཁོང་ངེ་ ལོབ་ཀྲུག་རྒུན་ལ་ ཤོད་, ‘ཁོང་ ཤི་ཀན་རྒུ་ནི་ ཕྲོ་ནི་ སོན་པོ་ ཞྃ་རྡེ་, ཁྱི་ཞི་སང་ ངུལ་ལ་ འགཱ་ལིལ་ལེ་ ཡུལ་ཞོང་ངེ་ན་ རྐྱོད་རྡེན་། ཏུ་རུ་ ཁྱི་ཞ་རྒུན་ལ་ ཁོང་ འཇལ་ལེན་།’ ངེ་ ཤེད་ཀན་འབོ་ འི་ཏུ་ པོར་།”

8 ཏེ་ནི་ པོ་མོ་རྒུན་ འཇིའི་ནང་ ཐེད་ཏེ་ རྒ་མོ་ ཉམ་པོ་ སྤུར་ཧང་ནི་ རྒྱུག་རྒེན་ ཁོང་ངེ་ ལོབ་ཀྲུག་རྒུན་ལ་ ཤེད་རྡེ་ལ་ སོང་། 9 ཁོང་ ཉ་ཧ་ ཆེན་ ཡོད་ཟ་ནི་ ཧུན་མེད་ལ་ ཡི་ཤུ་ ཁོང་རྒུ་ནི་ འདུན་ལ་ འཇལ་རྡེ་, “འཇུ་ལེ་” མོལ་། ཁོང་རྒུན་ ཡི་ཤུའི་ འདུན་ལ་ སོང་ ཡང་ ཁོང་ངེ་ ཞབ་ལ་ ཐམ་འདེ་ ཆག་པུལ་། 10 ཡི་ཤུའི་ ཁོང་རྒུན་ལ་ མོལ་, “འཇིའི་ མ་འཇིའི་། སོང་འདེ་ ངེ་ སྤུན་རྒུན་ལ་, འགཱ་ལིལ་ལ་ སོང་ ཟེར་ ཡང་ ཁོང་རྒུ་ནི་ ང་ ཏུ་རུ་ ཐོང་ངེན་།”

སྤུར་ཧང་ སྲུང་ཀན་རྒུ་ནི་ ནེ་ཚུལ་ ཤེད་།

11 པོ་མོ་ ཉ་ཧ་ ཆེན་ ཡོད་ཟ་ནི་, མག་མི་ སྲུང་ཀན་ ཁ་ཅིག་ ཡེ་རུ་ཤ་ལེམ་མེ་ རྒྱལ་ས་ ཡོྃ་རྡེ་ སོང་ཀན་ ཚང་མ་ ལ་མ་ འུ་རྐྱོང་རྒུན་ལ་ ཤེད་། 12 ལ་མ་ འུ་རྐྱོང་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུན་ ཛོམ་འདེ་ མག་མི་རྒུན་ལ་ མུལ་ མང་པོ་ ཏྃ་རྡེ་ ཟུན་ ཏང་ཅུག་ཅེ་ ཐབ་ལྡིང་། 13 ཁོང་རྒུ་ནི་ མག་མི་རྒུན་ལ་ ཟེར་, “ཁྱི་ཞི་, ‘ཚན་ལ་ ང་ཞ་ ཉིད་ལ་ སོང་འདེ་ ཡོད་ཟ་ནི་ ཁོའེ་ ལོབ་ཀྲུག་རྒུན་ ཡོྃ་རྡེ་ རོ་ ཧུའི་རྡེ་ ཁྱེར་རྡོག་’ ཟེར་རྒོའེ་། 14 ཀལ་ཏེ་ ཏོ་ ཀ་ལོན་ནེ་ ཚོར་ནི་, ང་ཞི་ རྐྱོབ་ཏེ་ ཁྱི་ཞ་ ཆེད་པ་ ཕོག་ མི་ཅུག་།” 15 ཏེ་ནི་ མག་མི་རྒུ་ནི་ མུལ་ ནེན་འདེ་ ཁོང་རྒུ་ནི་ ཟེར་ཧན་ ནང་ཞིན་ ཅོའེ་ཅེ་ཀ་ནེ་, ཡ་ཧུ་འདཱ་པེ་ ཕྲོ་ ཏི་རིང་ཚུག་པ་ ཏེ་ སྤེ་ར་འབོ་ ཕེལ་ལེན་ ནོག་།

ཡི་ཤུའི་ ལྟིང་འཇུག་རྒེ་ ལབ་ཞ་ སལ་།

16 ཏེ་ནི་ འགཱ་ལིལ་ལེ་ན་ ཡི་ཤུའི་ སོང་ མོལ་ཧ་ནེ་ རི་ཀ་ ལོབ་ཀྲུག་ ཅུ་ཤིག་པོ་ སོང་། 17 ཁོང་རྒུ་ནི་ ཡི་ཤུ་ འཇལ་ལེ་རྡང་ ཆག་པུལ་, འིན་ན་ ཁ་ཅིག་རྒེ་ ཁོང་ ཡི་ཤུ་ འིན་ནེ་ཧེ་ སམ་འདེ་ ཐེ་ཚོམ་ ཅོའེ་།

18 ཡི་ཤུ་ ཁོང་རྒུན་ས་ རྐྱོད་ཏེ་ མོལ་, “རྡེ་བ་ཅན་ འདང་ འཇིག་རྟེན་ནེ་ན་ ཡོ་ཀན་ ཚང་མེ་ཀ་ ཝང་ཆ་ སོན་ཏེ་ ང་ སལ་ལེ་ ཛེད་ཏེ་ འིན་། 19 ཏོ་རྦེ་ཕི་ རྒྱལ་ཁབ་ ཚང་མེ་ན་ སོང་འདེ་ མི་རྒུན་ ངེ་ ལོབ་ཀྲུག་ འགྱུར་ཤུག་ཅེ་ལ་ ཙོན་འགྲུའི་ ཅོའེ་རྡེ་ ཁོང་རྒུན་ལ་ ཡབ་, སྲེ་ རྡང་ ཏམ་པེ་ ཐུག་ཡིད་རྡེ་ ཚན་ནེ་ཀ་ ཁྲུའི་ ཏོང་། 20 ཡང་ ངེ་ ཁྱི་ཞ་ ཏང་ཀ་ནེ་ ཀཱ་ ཚང་མ་ ཁ་ཉེན་ཅེ་ལ་ ཁོང་རྒུན་ལ་ ལབ་ཞ་ ཏོང་, ཡང་ ང་ ཏུའི་ ལྟིང་འཇུག་ ཙུག་པ་ལ་ ཁྱི་ཞ་ ཉམ་པོ་ ཏུའི་རྒྱུན་ འདེད་ཅེ་ འི་ཏུ་ པོར་༎”