མཏ་ཐ་ 23

ཡི་ཤུའི་ ཆོའེ་རྡེ་ འུ་རྐྱོང་རྒུན་ལ་ ཉེད་ཀལ་ ཅོའོ་ ཛེད་།

ཡི་ཤུའི་ མི་ཚོག་ ཏང་ ཁོང་ངེ་ ལོབ་ཀྲུག་རྒུན་ལ་ མོལ་, 2 “ཆོའེ་ཁྲིམ་ལ་ ཁེ་སྤ་ རྡང་ པ་རུ་ཤི་པ་རྒུན་ལ་, མོ་ཤེ་ ཁྲིམ་རྒུན་ ཡ་ཧུ་འདཱ་པ་རྒུན་ལ་ ཧ་ཀོ་ཅུག་ཅེ་ ཝང་ཆ་ ཡོད་ཏེ་ ནོག་། 3 ཏོ་རྦེ་ཕི་ ཁོང་རྒུ་ནི་ ཁྱི་ཞ་ ལབ་ཀན་རྒུན་ ཁ་ཉེན་འདེ་ ཅོའེ་ཧེ་། འིན་ན་ ཁོང་རྒུ་ནི་ ཅོ་ཀན་ ཙོག་སོ་ ཁྱི་ཞ་རྒུ་ནི་ མ་ཅོ་ཧེ་ ཅེ་ཟེར་ནི་ ཁོང་རྒུ་ནི་ ལབ་ཀན་འབོ་ ཁོ་རང་རྒུ་ནི་ ལག་ལེན་ ཅོའོ་ མག་། 4 ཆོའེ་ཁྲིམ་མེ་ ཁུ་རུ་ ལྕིན་ཀྲེ་ ཞེན་མེ་ རྒྱབ་ལ་ ཀལ་ཅེ་ལ་ ཁོང་རྒུན་ ཐེད་རྡེ་ནོག་, འིན་ན་ ཡ་ཏོ་ ཅོ་ཅེ་ལ་ ཁོ་རང་རྒུ་ནི་ ཛུ་རྒུ་ལ་ རྒུལ་ལེ་ ཐེད་རྡེ་ མག་།”

5 “ཁོང་རྒུ་ནི་ ལེ་ཧ་ ཅོ་ཀན་ ཚང་མ་ མི་རྒུན་ལ་ ལྟན་ཅེ་ཕི་ ཅོ་ནོག་, སྤེར་ན་ ཁོང་རྒུ་ནི་ ཐོད་པ་ རྡང་ ལག་པེ་ཀ་ རྡམ་ཀན་ ཆོའེ་ འབྲི་ཀན་རྒུན་ ཞང་ཅེན་ འདང་ ཤན་ཏབ་རྦེ་ ཀྲུ་རྒུན་ རིང་མོ་ ཅོ་ནོག་། 6 འགྲོན་ལ་ ཀྲལ་འགོ་ ཡང་ འདུ་ཀང་ངེ་ན་ སི་ཝ་ཅེན་ནེ་ མལ་ ཙ་ལེ་ནོག་། 7 ཁྲོམ་མེ་ན་ མི་རྒུ་ནི་ཀ་ནི་ སི་ཝ་ ཐོབ་ཅེ་ རྡང་ ལོབ་རྦོན་ ཟེར་རྡེ་ འབོ་ལ་ ཐེད་རྡེ་ནོག་།”

8 “འིན་ན་ ཁྱི་ཞ་རྒུན་ལ་ ‘རབ་འབི་’ ཟེར་ མ་ཤུག་ ཅེ་ཟེར་ནི་ ཁྱི་ཞ་ ལོབ་རྦོན་ ཅིག་ཅིག་ མ་ནི་ མེད་, ཡང་ ཁྱི་ཞ་ ཚང་མ་ སྤུན་ ནོག་། 9 ཡང་ འཇིག་རྟེན་ནེ་ཀ་ སུ་ལ་ ‘ཡབ་’ མ་ཟེར་, ཅེ་ཟེར་ནི་ རྡེ་བ་ཅན་ན་ ཞུ་ཧན་འབོ་ ཁྱི་ཞ་རྒུ་ནི་ ཡབ་ ཅིག་པོ་ འིན་། 10 ཡང་ ཁྱི་ཞ་ ཚང་མ་ ‘ལོབ་རྦོན་’ ཟེར་ མ་ཤུག་ ཅེ་ཟེར་ནི་ མ་ཤི་ཀ་ ཅིག་པོ་ ཁྱི་ཞ་རྒུ་ནི་ ལོབ་སྤོན་ འིན་། 11 ཁྱི་ཞི་ ཕྲོ་ནི་ ཀྲག་ཤོག་ འགྱུར་ཉིན་ ཡོ་ཀན་འབོ་ ཞེན་རྒུ་ནི་ ཡོག་པོ་ འགྱུར་རྒོའེ་། 12 ཀྲག་པོ་ ལྟན་ཀན་རྒུན་ལ་ པབ་མོ་ ཅོའོ་ ཛེ་རྡེན་ ཡང་ ཁོ་རང་ པབ་མོ་ པོར་ཧན་རྒུན་ལ་ སི་ཝ་ སལ་ལེ་ ཛེ་རྡེན་།”

13 “ཆོའེ་ཁྲིམ་ལ་ ཁེ་སྤ་ རྡང་ པ་རུ་ཤི་པ་ ངའིན་པ་རྒུན་, ཁྱི་ཞ་ ཙམ་ཤིག་ འཇི་སྤ་ མི་ཡོང་། ཁྱི་ཞི་ མི་རྒུན་ལ་ རྡེ་བ་ཅན་ནེ་ རྒྱལ་སྲིད་རྡེ་ རྒོ་ ཅུག་ཏུག་, ཁྱི་ཞ་རང་རྒུན་ ཏེ་ན་ ཆ་ མི་འདུག་ མ་ཚེད་ ཏེ་ན་ ཆ་ཅེ་ ཙོན་འགྲུའི་ ཅོ་ཀན་རྒུན་ལ་ ཆ་ཅུག་རྒེ་ མི་འདུག་།”

14 “ཆོའེ་ཁྲིམ་ལ་ ཁེ་སྤ་ རྡང་ པ་རུ་ཤི་པ་, ཁྱི་ཞ་རྒུན་ལ་ ཙམ་ཤིག་རྒེ་ འཇི་སྤ་ མི་ཡོང་། ངའིན་པ་ ཁྱི་ཞ་ ཚང་མེ་ འ་ནེ་ མ་རང་མོ་རྒུན་ལ་ འགོ་ཧོར་རྡེ་ ཁོང་ངེ་ ཁང་པ་རྒུན་ ཁྱེར་ཤེ་, ཡང་ མི་རྒུན་ལ་ ལྟན་ཅེ་ཕི་ མོ་ལམ་ རིང་མོ་ ཞུ་རུག་། ཏེ་རྒ་རྦེ་ཕི་ལ་ ཁྱི་ཞ་རྒུན་ལ་ ཆེད་པ་ སྲན་ཀྲེ་ ཕོག་རྒེན་། 15 ཁྱི་ཞ་ ཆོའེ་ཁྲིམ་ལ་ ཁེ་སྤ་ རྡང་ པ་རུ་ཤི་པ་རྒུན་ལ་ ཙམ་ཤིག་རྒེ་ འཇི་སྤ་ མི་ཡོང་། མི་ཅིག་ ལོབ་ཀྲུག་ ཅོ་ཅེ་ལ་ ཁྱི་ཞ་ ས་ཀྱེཏ་ ཏང་ ཚོ་ མང་པོ་ རྒལ་རྡེ་ ཆ་རུག་། ལོབ་ཀྲུག་ འགྱུར་ ཚར་རེ་རྡང་, ཁོང་རྒུན་ ཁྱི་ཞ་རང་ངེ་སང་ ཉི་ལྡབ་ ངན་པ་ འགྱུར་ཤུག་ཏུག་།”

16 “ལམ་ལྟན་པ་ ཞ་ར་ ཁྱི་ཞ་ ཙམ་ཤིག་རྒེ་ འཇི་སྤ་ མི་ཡོང་། ཁྱི་ཞ་རྒུ་ནི་ ཟེར་རྡུག་, ཀོན་འཇོག་རྒེ་ ཁང་པེ་ ནའ་ རྐྱལ་ཧན་རྒུན་ལ་ ཅང་ མི་ལྟོ་, འིན་ན་ ཀོན་འཇོག་རྒེ་ ཁང་པེ་ན་ ཡོ་ཀ་ནེ་ སེར་རེ་ ནའ་ རྐྱལ་ཧན་རྒུན་ལ་ ཏེ་ ནའ་ རྐྱལ་ཧན་འབོ་ ཅོ་རྒོའེ་རྡེན་། 17 ཞ་ར་, ཧ་འགྲང་རྒུན་ སེར་རྦོ་ ཀྲ་རྒེ་ ནོག་རྒེ་ ཡ་ ཀོན་འཇོག་རྒེ་ ཁང་པ་ ཀ་རྦེ་ ཏེ་ སེར་རྦོ་ ཏམ་པ་ ཅོ་ཡོད་? 18 ཁྱི་ཞ་རྒུ་ནི་ ཟེར་རྡུག་, ཆོད་ཁྲི་ ནའ་ རྐྱལ་ཧན་རྒུན་ལ་ ཅང་ མི་ལྟོ་, འིན་ན་ ཆོད་ཤམ་ཀ་ ཡོ་ཀ་ནེ་ ཆོད་པེ་ ནའ་ རྐྱལ་ཧན་རྒུན་ལ་ ཏེ་ ནའ་ རྐྱལ་ཧན་འབོ་ ཅོ་རྒོའེ་རྡེན་། 19 ཞ་ར་རྒུན་, ཆོད་པ་ ཀྲ་རྒེ་ ནོག་རྒེ་ ཡ་ ཆོད་ཁྲི་ ཀ་རྦེ་ ཆོད་པ་འབོ་ ཏམ་པ་ ཅོ་ཡོད་? 20 ཏེ་ནི་ ཆོད་ཁྲི་ ནའ་ རྐྱལ་ཧན་རྒུ་ནི་ ཆོད་ཤམ་ འདང་ ཆོད་ཤམ་ཀ་ ཡོ་ཀན་ ཚང་མེ་ ནའ་ རྐྱལ་རྡེ་ ནོག་། 21 ཡང་ ཀོན་འཇོག་རྒེ་ ཁང་པེ་ ནའ་ རྐྱལ་ཧན་རྒུ་ནི་ ཀོན་འཇོག་རྒེ་ ཁང་པ་ འདང་ ཀོན་འཇོག་རྒེ་ ཁང་པེ་ན་ མལ་ ཛེད་ཀན་འབེ་ ནའ་ རྐྱལ་རྡེ་ ནོག་། 22 ཡང་ རྡེ་བ་ཅན་ནེ་ ནའ་ རྐྱལ་ཧན་རྒུ་ནི་ ཀོན་འཇོག་རྒེ་ ཞུ་ཁྲིའི་ རྡང་ ཏེ་ཀ་ ཞུ་རྡེ་ ཡོ་ཀ་ནེ་ ཀོན་འཇོག་རྒེ་ ནའ་ རྐྱལ་རྡེ་ ནོག་།”

23 “ཆོའེ་ཁྲིམ་ལ་ ཁེ་སྤ་ རྡང་ པ་རུ་ཤི་པ་ ངའིན་པ་རྒུན་, ཁྱི་ཞ་ ཙམ་ཞིག་རྒེ་ འཇི་སྤ་ མི་ཡོང་། ཁྱི་ཞ་རྒུ་ནི་ མན་སེ་ ཚེའེ་ཀ་ནི་ ཡོང་རྒོ་ ཆུང་ཤོག་རྡེ་ ནང་ནི་ལ་ ཁག་ཅུ་རྦོ་ པུལ་འདུག་པེ་, འིན་ན་ མོ་ཤེ་ མ་ ཁག་ཅེན་ ཀཱ་ཁྲིམ་རྒུན་ལ་ ནང་མེད་ ཅོ་རུག་ སྤེར་ན་ འོའེ་སྤེ་ ཁྲིམ་ཅེད་, ཉིང་ཞེ་ རྡང་ ལོ་ཁྱེལ་ཅེན་ མི་ཙེ་ པུད་ཅེ་། ཁྱི་ཞི་ ཏེ་ ཀཱ་ཁྲིམ་རྒུན་ལ་ ནྃ་ ཅོ་ཅེ་ མ་ཚེད་ ཡོང་རྒོའེ་ ཁག་ཅུ་རྦོ་ ཀོན་འཇོག་ལ་ པུལ་རྒོའེ་། 24 ཆོའེ་རྡེ་ ལམ་ལྟན་ཀན་ ཞ་ར་རྒུན་, ཁྱི་ཞི་ ཆུ་ ཐུང་ངེ་སང་ ངུལ་ལ་ ཏེ་ནང་ནི་ ཀྲིཔ་ ཅོ་ཀ་ནེ་ འབུ་ཙིག་ ཆུང་ཙེ་རྦོ་ ཕིང་འདུག་ འིན་ན་ ང་རྦོང་འབོ་ མིག་ཏང་འདུག་།”

25 “ཆོའེ་ཁྲིམ་ལ་ ཁེ་སྤ་ རྡང་ པ་རུ་ཤི་པ་ ངའིན་པ་རྒུན་, ཁྱི་ཞ་ ཙམ་ཤིག་རྒེ་ འཇི་སྤ་ མི་ཡོང་། ཀོ་རེ་ རྡང་ ཐ་ལི་ ཕི་ཏ་འབོ་ ལག་མོ་ ཅོ་རུག་, འིན་ན་ ཁྱི་ཞི་ ནང་ཀུ་རྦོ་ ཞེ་རྡང་ འདང་ རང་འདོད་རྡེ་ ཀང་འདེ་ འདུག་། 26 པ་རུ་ཤི་པ་ ཞ་ར་རྒུན་, འགོ་མ་ ཀོ་རེ་ རྡང་ ཐ་ལི་ ནང་ཀུ་རྦོ་ ལག་མོ་ ཅོ་རྡང་, ཏེ་ནི་ ཕི་ཏ་རྦོ་ལ་ ལག་མོ་ ཆེན་།”

27 “ཆོའེ་ཁྲིམ་ལ་ ཁེ་སྤ་ རྡང་ པ་རུ་ཤི་པ་ ངའིན་པ་རྒུན་, ཁྱི་ཞ་ ཙམ་ཤིག་རྒེ་ འཇི་སྤ་ མི་ཡོང་། ཁྱི་ཞ་རྒུན་ ཀར་སི་ ཏང་ཀ་ནེ་ རོམ་ཀང་ ཙོག་སེ་ ནོག་, ཀའོ་ ཕི་ཏ་ནི་ རྡེ་མོ་ ཐོང་ནང་ ནང་ཀུ་རྦོ་ རོའེ་ རུའི་སྤ་ རྡང་ ཀྲིཔ་པེ་ན་ ཚང་མ་ ཀང་འདེ་ ཡོད་ཏེ་ ནོག་། 28 ཏེ་རྒ་ ཙོག་སེ་ ཁྱི་ཞ་ ཕི་ཏ་ནི་ མི་རྒུན་ལ་ ཀྲང་པོ་ ཐོང་ན་ ཁྱི་ཞི་ ནང་ཀུ་རྦོ་ ངའིན་ འདང་ ངན་པ་རྒུ་ནི་ ཀང་འདེ་ ཡོད་ཏེ་ ནོག་།”

29 “ཆོའེ་ཁྲིམ་ལ་ ཁེ་སྤ་ རྡང་ པ་རུ་ཤི་པ་ ངའིན་པ་རྒུན་, ཁྱི་ཞ་ ཙམ་ཤིག་རྒེ་ འཇི་སྤ་ མི་ཡོང་། ཁྱི་ཞི་ ལུང་རྟོན་པ་རྒུན་ལ་ སྤུར་ཧང་ སིག་ཏུག་, ཡང་ མི་ ཀྲང་པོ་རྒུ་ནི་ སྤུར་ཧང་ལ་ ཟིག་པོ་ ཅོ་རུག་། 30 ཡང་ ཁྱི་ཞི་ ཟེར་རྡུག་, ཀལ་ཏེ་ ང་ཞ་ ང་ཞི་ ཕ་མེ་པོ་རྒུ་ནི་ ཏུའི་ལ་ ཡོད་པེ་ནི་, ལུང་རྟོན་པ་རྒུན་ སེད་ཅེ་ན་ ང་ཞ་ འདྲེའེ་རྡེ་ མེད་ཁྲོ་།”

31 “ཁྱི་ཞི་ ཟེར་ཧན་འབེ་ ཁྱི་ཞ་ ལུང་རྟོན་པ་རྒུན་ སེད་ཀ་ནེ་ ཕར་རྒྱུད་ འིན་ཀན་འབེ་ སྤང་པོ་ ཏང་ངེ་ནོག་། 32 ཏ་ སོང་འདེ་ ཁྱི་ཞི་ ཕ་མེ་པོ་རྒུ་ནི་ འགོ་ཟུག་ ཅོ་ཀ་ནེ་ ལེ་ངན་འབོ་ ཀྲུཔ་ཅུག་། 33 རུལ་རྒུན་, ཁྱི་ཞ་ ཏུག་རུལ་ལེ་ རྒྱུད་རྒུན་, ཉ་ཝེ་ ཆེད་པ་ནི་ ཀ་ཟུག་རྒེ་ ཁྱི་ཞ་ ཐར་ཉེན་ནེན་?”

34 “ཏོ་རྦེ་ཕི་ ཁྱི་ཞི་ཀ་ ངེ་ ལུང་རྟོན་པ་རྒུན་, ཤེ་རབ་ཅེན་རྒུན་ འདང་ ལོབ་རྦོན་རྒུན་ ཀ་ལེན་། ཡང་ ཁོང་རྒུན་ ཀྲོང་ཁྱེར་ནི་ ཀྲོང་ཁྱེར་ལ་ ཙ་ལེ་ སོང་འདེ་ ཁྱི་ཞ་ ཁ་ཅིག་ རྐྱང་ཤིང་ལ་ རྐྱང་འདེ་ སེད་རྡེན་, ཁ་ཅིག་ལ་ འདུ་ཀང་ངེ་ན་ རྟལ་ལྕག་ རྒྱབ་རྦེན་། 35 ཏོ་ ཅོའེ་རྡེ་ འཇིག་རྟེན་ ཚུག་རྦེ་ནི་ཕ་ལ་ མི་ ཀྲང་པོ་ ཚང་མེ་ སྲོག་ ནེན་ཀ་ནེ་ ཉེད་ཀལ་རྦོ་ ཁྱི་ཞ་རྒུ་ནི་ཀ་ ཕོག་རྒེན་, ཨ་འབེལ་ མི་ ཀྲང་པོ་ སེད་ཀན་ནེ་ ཏྃ་རྡེ་ ཀོན་འཇོག་རྒེ་ ཁང་པ་ འདང་ ཆོད་ཁྲི་ པར་ལ་ སེད་ཀ་ནེ་ འབཱ་རག་ཡཱེ་ པུ་ཙ་ ཟ་ཀར་ཡཱེ་ཚུག་པ་། 36 ངེ་ རྡེན་འབའ་ ཟེ་འིན་, ཏོ་ སོང་ཀན་ ཚང་མེ་ ཆེད་པ་འབོ་ འི་ མི་རབ་རྦེ་ཀ་ ཕོག་རྒེན་།”

ཡི་ཤུའི་ ཡེ་རུ་ཤ་ལེམ་པ་རྒུ་ནི་ཀ་ ཐུག་ཚེར་ ཛེད་།

37 ཡི་ཤུའི་ མོལ་, “ཡེ་རུ་ཤ་ལེམ་པ་, ཡེ་རུ་ཤ་ལེམ་པ་, ལུང་རྟོན་པ་རྒུན་ སེད་ཀན་ ཡང་ ཁྱི་ཞི་ཀ་ ལམ་ཅུག་རྒེ་ ཛེད་ཀན་རྒུན་ལ་ རྡོ་ རྒྱབ་ཏེ་ སེད་ཀན་རྒུན་, ཅ་མེ་ རང་ངེ་ ཅབ་རུག་རྒུན་ རྐྱོབ་ཅེ་ལ་ ཤོག་པེ་ ཡོག་ལ་ རྡུ་ ཙོག་སེ་, ངེ་ལ་ ཁྱི་ཞ་ ལེན་ མང་པོ་ རྡུ་ཅེ་ འདོད་པ་ ཅོའེ་རྦེན་, འིན་ན་ ཁྱི་ཞི་ ང་ ཅོ་ མ་ཅུག་། 38 ཏ་ ལྟོའེ་, ལུའི་རྡེ་ ཡོ་ཀན་འབོ་ འབིང་འདེ་ རྐྱོད་པེ་ ཁྱི་ཞི་ ཀོན་འཇོག་རྒེ་ ཁང་པ་ ལྟོང་པ་ ནོག་། 39 ངེ་ ཁྱི་ཞ་ རྡེན་འབའ་ ཟེ་འིན་, ཁྱི་ཞ་ ང་ ཡང་ མི་ཐོང་, ནམ་ཚུག་པ་ ཁྱི་ཞི་ ‘ཙོབོ་ ཀོན་འཇོག་རྒེ་ ཝང་ཆེ་ན་ རྐྱོད་ཀན་འབོ་ ཅིན་ལབ་ཅེན་ འིན་’ མི་ཟེར་།”