པག་རྟོན་ནེ་ སྲུང་ངུ་།
22
ཡི་ཤུའི་ ཆོའེ་རྡེ་ འུ་རྐྱོང་རྒུན་ལ་ ཡང་ སྲུང་ངུ་ རྒྱུད་ཏེ་ ལབ་ཞ་ སལ་, 2 “རྡེ་བ་ཅན་ནེ་ རྒྱལ་སྲིད་པོ་ རྒྱ་སྤེ་ ཁོ་རང་ངེ་ པུ་ཙེ་ པག་རྟོན་ནེ་ཕི་ འདོན་ཏང་ ཀྲལ་འགྲིག་ ཅོ་ཀན་ ཙོག་སེ་ འིན་། 3 པག་རྟོན་ལ་ འབོའེ་རྡེ་ ཡོ་ཀན་རྒུན་ལ་ ཤོག་ ཟེར་རྡེ་ འབོ་ལ་ རྒྱ་སྤེ་ ཁོ་རང་ངེ་ ཡོག་པོ་རྒུན་ ལམ་ཅུག་, འིན་ན་ ཁོང་རྒུན་ ཡོང་ངེ་ལ་ མ་ཐེད་།”4 “རྒྱ་སྤེ་ ཡང་ ཞེན་ ཡོག་པོ་རྒུན་ འབོ་ལ་ ལམ་ཅུག་ཏེ་ ཟེར་, ‘པ་རྟོན་ལ་ འབོ་ཀན་རྒུན་ལ་, ངེ་ འདོན་ཏང་ ཀྲལ་འགྲིག་ ཅོའེ་ཚར་, ལང་ཀྲོ་ རྡང་ པ་ལང་ རྒྱག་སྤ་རྒུན་ སེད་ཏེ་ ཅི་ཚང་མ་ ཀྲུཔ་ ཚར་, པག་རྟོན་ནེ་ འདོན་ཏང་ལ་ ཤོག་ཧེ་’ ཟེར་། 5 འིན་ན་ ཁོང་རྒུ་ནི་ ཏོ་ལ་ ནྃ་རྟག་ མ་ཏང་ངེ་, ཁ་ཅིག་ ཞིང་ལ་ སོང་, ཁ་ཅིག་ ཚོང་ལ་ སོང་། 6 ཞེན་ ལུའི་ཧན་རྒུ་ནི་ ཡོག་པོ་རྒུན་ ཟུམ་འདེ་ ཁོང་ ཉམ་པོ་ ངན་པ་ ཅོའེ་རྡེ་ སེད་།”
7 “རྒྱ་སྤོ་ལ་ མ་ སྲོ་ མང་པོ་ ཡོྃ་, ཡང་ ཁོ་རང་ངེ་ མག་མི་ ལམ་ཅུག་, ཏེ་ མི་ སེད་རྒུན་ མེ་ཀན་ ཅོའེ་ ཡང་ ཁོང་རྒུ་ནི་ རྒྱལ་ས་ མེ་ སྲག་། 8 ཏེ་ནི་ ཁོའེ་ ཡོག་པོ་རྒུན་ལ་ ཟེར་, ‘པག་རྟོན་ནེ་ འདོན་ཏང་ ཀྲལ་འགྲིག་ ཅོའེ་ཚར་, འིན་ན་ ངེ་ འབོ་ཀན་རྒུན་ ཏེ་ན་ འདུའི་ཤེ་ འོའེ་སྤ་ མི་འདུག་། 9 སོང་འདེ་ ལམ་རྒུ་ནི་ཀ་ ཡོ་ཀན་ ཚང་མ་ པག་རྟོན་ནེ་ འགྲོན་ལ་ ཤོག་ ཟེར་རྡེ་ འབོའེ་།’ 10 རྒྱ་སྤེ་ ཡོག་པོ་རྒུན་ ལམ་རྒུན་ཀ་ སོང་འདེ་ ཏེ་རྒ་ ཡོ་ཀན་ ཟང་པོ་ རྡང་ ངན་པ་ མི་ཚང་མ་ རྡུའི་རྡེ་ ཁྱོྃ་རྦེ་, པག་རྟོན་ནེ་ ཁང་པ་ འགྲོན་པེ་ ཀང་།”
11 “འིན་ན་ རྒྱ་སྤོ་ འགྲོན་པོ་རྒུན་ལ་ ཐུག་རྒེ་ལ་ ཡོང་ངེ་རྡང་, པག་རྟོན་ནེ་ ཀོའེ་ལག་ མ་ཀོན་ཀན་འཇིག་ ཐོང་འདེ་, 12 ཁོའེ་ ཟེར་, ‘ཡ་ཏོ་ལེ་, ཁྱེ་རང་ ཟཔ་ མ་ཟབ་རྦེ་ པག་རྟོན་ལ་ ཀ་ཟུག་རྒེ་ ཡོང་རྦེན་?’ ཁོ་ ཅང་ ལེན་ཏྃ་ མ་ཉེན་། 13 ཏེ་ནི་ རྒྱ་སྤེ་ ཁོ་རང་ངེ་ ཡ་ཏོ་རྒུན་ལ་ ཟེར་, ‘འི་ མི་རྦེ་ ལག་པ་ རྡང་ ཧང་པ་རྒུན་ རྡམ་འདེ་, ཕི་ལོག་ལ་ མུན་ཀྲག་རྒེ་ན་ ཕྃ་, ཏུ་རུ་ ནག་ སྲན་ཀྲེ་ ཐོང་རྡེ་ ངུ་ཅེ་ རྡང་ སོ་ སིག་ཅེ་ ཡོང་ངེན་།’”
14 ཡི་ཤུའི་ མོལ་, “རྡེ་བ་ཅན་ནེ་ རྒྱལ་སྲིད་རྡེ་ན་ མང་པོ་ འབོ་ ཛེད་, འིན་ན་ ཉུང་ཙེ་ཞིག་ མ་ནི་ འདམ་མེ་ མ་ཛེད་།”
རོམ་པེ་ རྒྱ་སྤོ་ ཁྲལ་ ཤལ་ཅེ་།
15 ཏེ་ནི་ པ་རུ་ཤི་པ་རྒུན་ ཏེ་ཀ་ནི་ སོང་ ཡང་ ཁོང་རྒུ་ནི་ ཡི་ཤུའི་ མོལ་ཧན་ནེ་ སྤེ་ར་ རིག་ རྒྱུད་ཏེ་ ཁོང་ ཁད་ཅུག་ཅེ་ལ་ ཀྲཔ་ ཅོའེ་རྡེ་ 16 ཁོ་རང་རྒུ་ནི་ ལོབ་ཀྲུག་རྒུན་ རྒྱ་སྤོ་ ཧེ་རོད་འདེ་ ཆོག་སྤ་རྒུན་ ཉམ་པོ་ ཡི་ཤུའི་ཀ་ འི་ཟུག་ ཟེར་ཤེ་ལ་ ལམ་ཅུག་, “ལོབ་རྦོན་ལེ་, ཉེ་རང་ ཀྲང་པོ་ ཛེད་ཀན་འབོ་ ང་ཞ་ རྒྱུའི་ཡོད་, ཡང་ ཉེ་རང་ངེ་ ཀྲང་པོ་ ཉམ་པོ་ ཀོན་འཇོག་རྒེ་ ལམ་མེ་ཀ་ འགྲུལ་ཅེ་ ལབ་རྦེ་ ཛེད་རྡེ་ནོག་། ཉེ་རང་ངེ་ མི་ན་ ཡ་པེ་ ཛེ་རྡེ་ མག་ ཅེ་ཟེར་ནི་ ཉེ་རང་ངེ་ ཁོང་རྒུན་ སུ་ འིན་ཅེ་རྦེ་ཀ་ ནྃ་ ཛེ་རྡེ་ མག་། 17 མོལ་ལེ་ ཛེད་རྡང་ ཉེ་རང་ངེ་ ཐུག་སམ་ ཅི་ འིན་? རོམ་མེ་ རྒྱ་སྤོ་ལ་ ཁྲལ་ ཤལ་ཅེ་འབོ་ འོའེ་སྤ་ ནོག་རྒེ་ ཡང་ མག་?”
18 འིན་ན་ ཡི་ཤུའི་ ཁོང་རྒུ་ནི་ ཅུའི་ངན་ ཁྱེན་འདེ་ མོལ་, “ངའིན་ཅོ་ཀན་པ་རྒུན་ ཅེ་ ང་ སྤེ་རེ་ན་ ཧར་ཤེ་ ཙོན་འགྲུའི་ ཅོ་ཡོད་? 19 ཁྲལ་ལ་ ཏང་ཀ་ནེ་ པེ་ནེ་ཞིག་ ང་ ལྟོན་ནྃ་།” ཁོང་རྒུ་ནི་ ཡི་ཤུ་ རོམ་པེ་ མུལ་ལེ་ པེ་ནེ་ཞིག་ ལྟན་། 20 ཡི་ཤུའི་ ཁོང་རྒུན་ལ་ མོལ་, “འི་ པེ་ནེ་ཀ་ ཡོ་ཀ་ནེ་ པར་ རྡང་ མིང་ སུའི་ ནོག་?”
21 ཁོང་རྒུ་ནི་ ལེན་ཏྃ་, “རོམ་མེ་ རྒྱ་སྤེ་།”
ཏེ་ནི་ ཁོང་ངེ་ ཁོང་རྒུན་ལ་ མོལ་, “རྒྱ་སྤེ་ འིན་ཀན་འབོ་ རྒྱ་སྤོ་ལ་ ཏོང་ ཡང་ ཀོན་འཇོག་རྒེ་ འིན་ཀན་འབོ་ ཀོན་འཇོག་ལ་ པུལ་།”
22 ཁོང་རྒུ་ནི་ ཏོ་ ཚོར་རེ་རྡང་, ཧ་ལེ་རྡེ་ ཡི་ཤུ་ ཕྃ་རྡེ་ ཏེ་ཀ་ནི་ སོང་།
སོན་པོ་ ལང་ཤེ་ ཧོར་རེ་ ཏྲི་ཝ་།
23 ཏེ་རྒ་ ཞག་ལ་, ཤི་ཀན་རྒུན་ སོན་པོ་ ལྃ་རྡེ་ མག་ ཟེར་ཧན་ནེ་ ས་འདུ་ཀི་པ་རྒུན་ ཡི་ཤུ་ས་ ཏྲི་ཝ་ཞིག་ འདྲི་ལ་ ཡོྃ་རྡེ་ ཟེར་, 24 “ལོབ་རྦོན་ལེ་ མོ་ཤེ་ མོལ་རྡེ་ འིན་འབེན་, ‘ཀལ་ཏེ་ པུ་ཙ་ཞིག་ ཕྲུ་རྒུ་ མེད་རྡེ་ ཤི་ནི་, ཨ་ཅོ་ ཡང་ ནོའེ་ ཁོའེ་ ཕར་རྒྱུད་ ལུའི་ཤེ་ཕི་ ཤི་ཀ་ནེ་ ན་མ་ ཉམ་པོ་ པག་རྟོན་ ཅོའེ་རྡེ་ ཕྲུ་རྒུ་ རྐྱེ་ཅུག་ རྒོའེ་།’ 25 ཏོ་ ཨ་ཅོ་ནོ་ རྡུན་ ཡོད་པེན་, ཏང་པོ་རྦེ་ ན་མ་ ཅོའེ་, ཡང་ ཕྲུ་རྒུ་ མེད་པེ་ ཤི་, ཁོའེ་ ནོའེ་ ཏེ་ པོ་མོ་ལ་ ན་མ་ ཅོའེ་། 26 ཏེ་རྒ་ ཙོག་སེ་ ཉི་སྤ་ རྡང་ སུམ་པ་ རྡང་ རྡུན་པ་ཚུག་པ་ སོང་། 27 ལྟིང་འཇུག་ལ་ པོ་མོ་ལ་ ཤི་། 28 པོ་མོ་རྦེ་ ཁོང་ ཚང་མ་ ཉམ་པོ་ ན་མ་ ཅོའེ་རྦེ་, ཤི་ཀན་རྒུན་ སོན་པོ་ ལྃ་རྡེ་ ཏུའི་ལ་ ཁོ་ ཁོང་རྒུ་ནི་ ནང་ནི་ སུའི་ ན་མ་ འགྱུ་རེན་?”
29 ཡི་ཤུའི་ མོལ་, “ཁྱི་ཞི་ ནོར་ཁྲུལ་རྦོ་ ཁྱི་ཞ་རྒུན་ལ་ ཀོན་འཇོག་རྒེ་ ཤུག་ ཡང་ ཏམ་པེ་ སུང་རབ་པོ་ ཧ་མ་ཀོ་ ནོག་། 30 ཀོན་འཇོག་རྒེ་ ཤི་ཀན་རྒུན་ སོན་པོ་ ལང་ངེ་ ཛེད་ཟ་ནི་, ཁོང་རྒུ་ནི་ ན་མ་ མི་ཅོ་ ཡང་ པག་མ་ མི་ཏང་, ཁོང་རྒུན་ རྡེ་བ་ཅན་ནེ་ ཕོ་ཉ་ ཙོག་སེ་ འགྱུ་རེན་།”
31 “འིན་ན་ ཤི་ཀན་རྒུན་ སོན་པོ་ ལང་ངེ་ ཛེད་ཅེ་ ཧོར་ལ་ ཏམ་པེ་ སུང་རབ་རྦེ་ན་ ཀོན་འཇོག་རྒེ་ མོལ་ཧན་འབོ་ ཁྱི་ཞི་ མ་སིལ་རྦེ་ནེ་? 32 ཏེ་རྦོ་, ‘ང་ནི་ ཨབ་ར་ཧམ་མེ་ ཀོན་འཇོག་, ཨི་སཱག་རྒེ་ ཀོན་འཇོག་ ཏང་ ཡ་ཀུབ་རྦེ་ ཀོན་འཇོག་ འིན་།’ ཁོང་ནི་ ཤི་ཀན་རྒུ་ནི་ ཀོན་འཇོག་ མན་འབེ་, སོན་པོ་རྒུ་ནི་ ཀོན་འཇོག་ ནོག་།”
33 ཏོ་རྒུན་ ཚོར་རེ་རྡང་ མི་ཚོག་ ཁོང་ངེ་ ལབ་ཞ་རྒུ་ནི་ཀ་ ཧ་ལེ་།
ཀཱ་རྒྱ་ ཚང་མེ་སང་ ཁག་ཅེན་།
34 ས་འདུ་ཀི་པ་རྒུ་ནི་ ཡི་ཤུའི་ མོལ་ཧན་འབོ་ལ་ ལེན་ཏྃ་ མ་ཉེན་པེ་ པ་རུ་ཤི་པ་རྒུན་ ཛོམ་། 35 ཁོང་རྒུ་ནི་ ནང་ནི་ ཆོའེ་ཁྲིམ་ལ་ ཁེ་སྤ་ཞིག་རྒེ་ ཡི་ཤུ་ ཚོད་ལྟ་ཅེ་ལ་ འི་ ཏྲི་ཝ་འབོ་ འདྲི་, 36 “ལོབ་རྦོན་ལེ་, ཀཱ་ཁྲིམ་མེ་ ནང་ནི་ ཀ་ ཀཱ་རྒྱ་འབོ་ ཚང་མེ་སང་ ཁག་ཅེན་ ནོག་?”
37 ཡི་ཤུའི་ མོལ་, “ཙོབོ་ ཁྱི་ཞི་ ཀོན་འཇོག་ལ་ ཉིང་ སོན་ཏེ་, སེམ་ སོན་ཏེ་ ཡང་ སམ་བ་ སོན་ཏེ་ནི་ ཤེ་སྤ་ ཅོའེ་། 38 ཏོ་རྦོ་ ཀཱ་རྒྱ་ མ་ ཁག་ཅེན་ འདང་ ཀྲག་ཤོག་རྦོ་ འིན་། 39 ཏེ་རྒ་ ཙོག་སེ་ ཀཱ་རྒྱ་ ཁག་ཅེན་ ཉི་སྤ་འབོ་, ‘རང་ངེ་ ཤེ་སྤ་ ཅོ་ཀན་ ཙོག་སེ་ ཁྱེ་རང་ངེ་ ཁྱིམ་ཙེ་པ་ ཤེ་སྤ་ ཅོའེ་།’ 40 མོ་ཤེ་ ཀཱ་ཁྲིམ་ འདང་ ལུང་རྟོན་པ་རྒུ་ནི་ སྤེ་ཆེ་ན་ འབྲི་ཀན་རྒུན་ ཏེ་ ཀཱ་རྒྱ་ ཉ་ཧེ་ན་ ཚང་འདེ་ ནོག་།”
མ་ཤི་ཀ་ སུའི་ ཕར་རྒྱུད་ འིན་།
41 པ་རུ་ཤི་པ་རྒུན་ ཛོམ་འདེ་ ཡོད་ཏུའི་, ཡི་ཤུའི་ ཁོང་རྒུན་ལ་ འདྲི་ ཛེད་, 42 “ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀེ་ ཧོར་ལ་ ཁྱི་ཞི་ ཅི་ ས་མེ་རག་? ཁོ་ སུའི་ ཕར་རྒྱུད་ ནོག་?”
ཁོང་རྒུ་ནི་ ལེན་ཏྃ་, “རྒྱ་སྤོ་ འདཱ་འབིད་རྡེ་ ཕར་རྒྱུད་ ནོག་།”
43 ཡི་ཤུའི་ ཁོང་རྒུན་ལ་ མོལ་, “འདཱ་འབིད་རྡེ་ མ་ཤི་ཀ་, ཏམ་པེ་ ཐུག་ཡིད་ རྒྱུད་ཏེ་ ཙོབོ་ ཅི་ཕི་ ཟེར་རྡེ་ནོག་? འདཱ་འབིད་རྡེ་ ཟེར་,
44 ‘ཀོན་འཇོག་རྒེ་ ངེ་ ཙོབོ་ལ་ མོལ་།
ངེ་ ཁྱེ་རང་ངེ་ འགྲ་ཝོ་ ཚང་མ་,
ཁྱེ་རང་ངེ་ ཧང་པེ་ ཡོག་ལ་ པོར་པོར་ཚུག་པ་,
ཁྱེ་རང་ ངེ་ ལག་པ་ ཡོའེ་སྤེ་ ཁྲིའི་ཀ་ འདོད་།’
45 ཀལ་ཏེ་ འདཱ་འབིད་རྡེ་ མ་ཤི་ཀ་, ‘ཙོབོ་’ ཟེར་རེ་ཡོད་ནི་, ཏེ་ནི་ ཀ་ཟུག་རྒེ་ མ་ཤི་ཀ་ ཁོའེ་ ཕར་རྒྱུད་ ནོག་?”
46 སུ་ཞི་ལ་ ལེན་ཏྃ་ མ་ཉེན་, མ་ཚེད་ ཏེ་ ཞག་ནི་ཕ་ལ་ སུ་ཞི་ལ་ ཁོང་ལ་ ཏྲི་ཝ་ འདྲི་ཅེ་ ཧམ་བ་ མ་ཅོའེ་།