ཡི་ཤུ་ རྒྱ་སྤེ་ ཚུལ་ལ་ རྒ་སུའི་ ཞུའི་།
21
ཡེ་རུ་ཤ་ལེམ་མེ་ རྒྱལ་སེ་ ཉེ་མོ་ལ་ ཨོ་ལི་ཝེ་ རི་ཀ་a ཡོ་ཀན་ འབེད་ཕ་འགེ་ ཀྲོང་ཁྱེར་ལ་ ལེབ་ཀྱི་ ཡོད་རྡེ་རྡང་, ཡི་ཤུའི་ ལོབ་ཀྲུག་ ཉི་ ངུལ་ལ་ ལམ་ཅུག་རྒེ་ ཛེད་ཏེ་ 2 མོལ་, “འ་ ཀྲོང་ཁྱེར་རེ་ན་ སོང་, ཏུ་རུ་ ལེབ་རྦེ་རྡང་ པུང་ངུ་ཞིག་ ཁོ་རང་ངེ་ པུང་ངུ་ ཅོ་རྦ་ ཉམ་པོ་ ཏ་རྡེ་ ཐོང་ཅེན་། ཏོ་རྒུན་ ཀྲོལ་རྡེ་ ང་ས་ ཁྱོང་། 3 ཀལ་ཏེ་ སུ་ཞིག་རྒེ་ ཅི་ ཅོ་ཡོད་ ཟེར་རྡེ་ འདྲི་ནི་, ‘ཙོབོ་ལ་ རྒོའེ་ཤེ་ འདུག་’ ཟེར་། ཏེ་རྒ་མ་རྒ་ ཁོའེ་ ཁྱི་ཞ་ ཏོ་རྒུན་ ཁྱེར་ ཤུག་རྒེ་ནོག་།”4 ལུང་རྟོན་པ་ རྒྱུད་ཏེ་ ཀོན་འཇོག་རྒེ་ མོལ་ཧན་འབོ་ འདྲན་འདྲ་ ཀྲུཔ་ཅེ་ཕི་, ཏོ་ སོང་འདེ་ ནོག་,
5 “ཡེ་རུ་ཤ་ལེམ་པ་རྒུན་ལ་b ཟེར་,
ལྟོའེ་རྡང་, ཁྱི་ཞི་ རྒྱ་སྤོ་ ཁྱི་ཞ་ས་ ཡོང་འདུག་།
ཁོང་ལ་ ཉམ་ཤུང་, པུང་ངུ་ ཅོ་རྦེ་ཀ་ ཞོན་འདེ་ ཡོང་འདུག་།”
6 ལོབ་ཀྲུག་རྒུན་ སོང་འདེ་ ཡི་ཤུའི་ ཀཱ་ སལ་ཧན་ ནང་ཞིན་ ཅོའེ་། 7 ཏེ་ནི་ ཁོང་རྒུ་ནི་ པུང་ངུ་ རྡང་ པུང་ངུ་ ཅོ་རྦ་ ཁྱོྃ་རྡེ་ ཁོ་རང་རྒུ་ནི་ ཀོའེ་ ཏོ་རྒུ་ནི་ཀ་ ལྟེད་ ཡང་ ཡི་ཤུ་ པུང་ངུ་ ཅོ་རྦེ་ཀ་ ཞོན་ནེ་ ཛེད་།
8 མི་ཚོག་རྒེ་ ནང་ནི་ མང་ཆེ་རྦེ་ རང་རང་ངེ་ ཀོའེ་ ཡི་ཤུ་ རྐྱོད་སེ་ ལམ་མེ་ཀ་ ཏིང་ ཡང་ ཞེན་རྒུ་ནི་ ལྕང་མེ་ ཡ་ལག་ ཅེད་ཏེ་ ཏིང་། 9 ཡི་ཤུའི་ འདུན་ནེ་ འགྲུལ་ཧན་ ཡང་ རྒྱབ་ནི་ ཡོང་ཀ་ནེ་ མི་ཚོག་རྒེ་ ཀུ་ཅུ་ ཏང་ངེན་ ཟེར་,
“རྒྱ་སྤོ་ འདཱ་འབིད་རྡེ་ ཕར་རྒྱུད་རྡེ་ཕི་ ཀོན་འཇོག་ལ་ རྟོད་པ་ པུལ་,
ཙོབོ་ ཀོན་འཇོག་རྒེ་ ཝང་ཆེ་ན་ རྐྱོད་ཀན་འབོ་ ཅིན་ལབ་ཅེན་།
རྡེ་བ་ཅན་ལ་ ཞུ་ཧ་ནེ་ ཀོན་འཇོག་ལ་ རྟོད་པ་ པུལ་།”
10 ཡེ་རུ་ཤ་ལེམ་མེ་ ནང་ཀུ་ལ་ ལེབ་རྦེ་རྡང་, རྒྱལ་ས་ སོན་ཏེ་ན་ ཧི་ལིང་ ཤོར་ ཡང་ མི་རྒུ་ནི་ ཅིག་ ཏང་ ཅིག་ལ་ འདྲི་, “འི་ མིའུ་ སུ་ ནོག་?”
11 ཡི་ཤུ་ ཉམ་པོ་ ཡོ་ཀ་ནེ་ མི་ཚོག་རྒེ་ ལེན་ཏྃ་, “ཁོང་ནི་ ལུང་རྟོན་པ་ ཡི་ཤུ་ འགཱ་ལིལ་ལེ་ ཡུལ་ཞོང་ ན་ཙ་རེད་ནི་ ནོག་།”
ཚོང་པ་རྒུན་ ཀོན་འཇོག་རྒེ་ ཁང་པ་ནི་ ཕིང་ངེ་ ཛེད་།
12 ཡི་ཤུ་, ཀོན་འཇོག་རྒེ་ ཁང་པ་ལ་ རྐྱོད་ཏེ་ སྲོག་ཆོད་ལ་ པུལ་ཅེ་ སེམ་ཅེན་ ཙོང་ཀན་ འདང་ ཉོ་ཀན་རྒུན་ ཕིང་ངེ་ ཛེད་། ཕུར་རྒོན་ ཙོང་ཀ་ནེ་ ཀུར་སི་ རྡང་ པེ་ནེ་ རྡེབ་ཀ་ནེ་ ཅོག་ཙེ་རྒུན་ འགོ་ལོག་ལ་ ཏང་ངེ་ ཛེད་། 13 ཡི་ཤུའི་ ཁོང་རྒུན་ལ་ མོལ་, “ཏམ་པེ་ སུང་རབ་རྦེ་ན་ ཀོན་འཇོག་རྒེ་ མོལ་ལེ་ ཛེད་ཏེ་ འདུག་, ‘ངེ་ ཁང་པ་ མོ་ལམ་ ཞུ་ཅེ་ ཁང་པ་ ཟེ་རེན་’, འིན་ན་ ཁྱི་ཞ་རྒུ་ནི་ ཏོ་ ཅག་པ་རྒུ་ནི་ འབའ་ཝོ་ ཅོའེ་རྡེ་ འདུག་།”
14 ཀོན་འཇོག་རྒེ་ ཁང་པེ་ན་ ཡི་ཤུ་ས་ ཞ་ར་ རྡང་ ཞ་འོ་རྒུན་ ཡོྃ་རྦེ་ ཁོང་ངེ་ ཁོང་རྒུན་ ཕན་ཅུག་རྒེ་ ཛེད་། 15 འིན་ན་ ལ་མ་ འུ་རྐྱོང་རྒུན་ འདང་ ཆོའེ་ཁྲིམ་ལ་ ཁེ་སྤ་རྒུ་ནི་ ཡི་ཤུའི་ ཧ་ལེ་ ཛེད་པེ་ ཛེད་ཀན་ ཡང་ ཕྲུ་རྒུ་རྒུ་ནི་ ཀོན་འཇོག་རྒེ་ ཁང་པེ་ན་, “རྒྱ་སྤོ་ འདཱ་འབིད་རྡེ་ ཕར་རྒྱུད་རྡེ་ཕི་ ཀོན་འཇོག་ལ་ རྟོད་པ་ པུལ་” ཟེ་རེན་ ཀུ་ཅུ་ ཏང་ངེ་ ཐོང་འབེ་, ཁོང་རྒུན་ལ་ མ་མང་པོ་ སྲོ་ ཡོྃ་།
16 ཁོང་རྒུ་ནི་ ཡི་ཤུ་ འདྲི་, “ཁྱེ་རང་ལ་ ཚོར་རེ་, འི་ ཕྲུ་རྒུ་རྒུ་ནི་ ཅི་ ཟེ་རེ་རག་?”
ཡི་ཤུའི་ ལེན་སལ་, “ཚོར་། ཏམ་པེ་ སུང་རབ་རྦེ་ན་ ‘ཀོན་འཇོག་རྒེ་ ཁོ་རང་ལ་ རྟོད་པ་ ཏང་ཅེ་ལ་ འོམ་ཐུང་ འདང་ ཞེན་ ཕྲུ་རྒུ་རྒུན་ ཀྲལ་འགྲིག་ ཛེད་’ འབྲི་ཛེད་ཀན་འབོ་ ཁྱི་ཞི་ མ་སིལ་རྦེ་ནེ་?” 17 ཏེ་ ལྟིང་ནི་ ཡི་ཤུ་ འབེད་ཐཱ་ནི་ ཀྲོང་ཁྱེར་ལ་ རྐྱོད་ ཡང་ ཚེན་ལ་ ཏུ་རུ་ ཞུའུ་།
སྤིག་རྒེ་ ཁ་ཟོའེ་རྡེ་ ལྕང་མ་ ཧམ་།
18 ང་ཏོག་ ང་མོ་ རྒྱལ་ས་ ལོག་ཏེ་ རྐྱོད་རྡེན་ ཡོད་ཟ་ནི་ ལམ་ལ་ ཡི་ཤུ་ ལྟོ་རྡེ་ ཛེད་། 19 ལམ་མེ་ ཐ་མ་ ཁོང་ངེ་ སྤིག་རྒེ་ ཁ་ཟོའེ་ ལྕང་མ་ཞིག་ ཟི་, ཁོང་ ཏེ་ ལྕང་མ་ས་ རྐྱོད་ འིན་ན་ ཏེ་རྒ་ ལོ་མ་ མ་ནི་ ཁ་ཟོའེ་ མེ་ཀན་འབོ་ ཟི་རྦེ་ ཁོང་ངེ་ ལྕང་མ་ལ་ མོལ་, “ཁྱེ་རང་ལ་ ཡང་ ཁ་ཟོའེ་ མ་ནི་ མི་མིན་།” ཏེ་རྒ་མ་རྒ་ ལྕང་མ་འབོ་ ཧམ་།
20 སྤིག་རྒེ་ ཁ་ཟོའེ་རྡེ་ ལྕང་མ་ ཧམ་མེ་ལ་ ཐོང་འདེ་ ལོབ་ཀྲུག་རྒུན་ ཧ་ལེ་ ཡང་ ཡི་ཤུ་ འདྲི་, “འི་ཟམ་ འགྱོ་སྤ་ སྤིག་རྒེ་ ལྕང་མ་འབོ་ ཀ་ཟུག་རྒེ་ ཧམ་འདེ་ ནོག་?”
21 ཡི་ཤུའི་ མོལ་, “ངེ་ ཁྱི་ཞ་ རྡེན་འབའ་ ཟེ་འིན་, ཀལ་ཏེ་ ཐེ་ཚོམ་ མེད་པེ་ ཀོན་འཇོག་ལ་ ཏེཏ་པ་ ཅོ་ནི་, ཁྱི་ཞི་, ངེ་ སྤིག་རྒེ་ ལྕང་མ་ལ་ ཅོ་ཀན་འབོ་ མ་ཚེད་ འི་ རི་རྦོ་ལ་, ‘སོང་, ཁྱེ་རང་ རྒྱམ་ཚོའེ་ན་ ཕོང་’ ཟེར་ནི་ ཏོ་ ཅོའོ་ ཛེ་རྡེན་། 22 ཀལ་ཏེ་ ཏེཏ་པ་ ཅོའེ་རྡེ་ ཁྱི་ཞི་ མོ་ལམ་མེ་ན་ ཅི་ཞིག་ ཞུ་ནྃ་ ཁྱི་ཞ་རྒུན་ལ་ ཐོབ་རྦེན་།”
ཡི་ཤུ་ལ་ ཝང་ཆེ་ ཧོར་ལ་ ཏྲི་ཝ་ འདྲི་།
23 ཡི་ཤུའི་ ཀོན་འཇོག་རྒེ་ ཁང་པེ་ན་ རྐྱོད་ ཡང་ ལབ་ཞ་ ས་ལེན་ ཡོད་ཏུའི་ ལ་མ་ འུ་རྐྱོང་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུན་ ཡོྃ་རྡེ་ འདྲི་, “ཀ་ ཝང་ཆ་ ཉམ་པོ་ ཁྱེ་རང་ངེ་ ཡུ་རྒུན་ ཅོའེན་ ཡང་ ཁྱེ་རང་ལ་ འི་ ཝང་ཆ་ སུའི་ ཏྃ་?”
24 ཡི་ཤུའི་ ཁོང་རྒུན་ལ་ མོལ་, “ངེ་ལ་ ཁྱི་ཞ་རྒུན་ལ་ ཏྲི་ཝ་ཞིག་ འདྲི་འིན་, ཀལ་ཏེ་ ཁྱི་ཞི་ ལེན་ཏྃ་ནི་, ཏེ་ནི་ ངེ་ལ་ ཀ་ ཝང་ཆ་ རྒྱུད་ཏེ་ ཡུ་རྒུན་ ཅོའེན་ ཁྱི་ཞ་ ཤེད་རྡེན་།” 25 “ཡོ་ཧཱ་ནན་ལ་ ཁྲུའི་སལ་ཅེ་ ཝང་ཆ་ ཀོན་འཇོག་རྒེ་ ཆོག་ནི་ ཐོབ་ཏེ་ ནོག་རྒེ་ ཡང་ མི་ ཆོག་ནི་?”
ཁོང་རྒུ་ནི་ ཁོ་རང་རྒུ་ནི་ ཕྲོ་ སྤེ་ར་ ཏྃ་རྡེ་ ཟེར་, “ཀལ་ཏེ་ ‘ཀོན་འཇོག་རྒེ་ ཆོག་ནི་ ནོག་’ ཟེར་ནི་ ཁོའེ་ ཨ་ཧོ་ལ་, ‘ཁྱི་ཞི་ ཁོའེ་ཀ་ ཏེཏ་པ་ ཅེ་ མ་ཅོའེ་རྦེན་’ ཟེ་རེན་། 26 འིན་ན་ ཀལ་ཏེ་ མི་ ཆོག་ནི་ ནོག་ ཟེར་ནི་, མི་ཚོག་ལ་ སྲོ་ ཡོང་ངེན་, ཅེ་ཟེར་ནི་ ཁོང་རྒུ་ནི་ ཡོ་ཧཱ་ནན་ལ་ ལུང་རྟོན་པ་ སི་རྒེ་ཡོད་པེན་།” 27 ཏོ་རྦེ་ཕི་ ཁོང་རྒུ་ནི་ ཡི་ཤུ་ ལེན་ཏྃ་, “ང་ཞ་ རྒྱུའི་མེད་།”
ཏེ་ནི་ ཡི་ཤུའི་ ཁོང་རྒུན་ལ་ མོལ་, “ངེ་ལ་ མི་ཤེད་, སུའི་ ཝང་ཆེ་ན་ ངེ་ ཡུ་རྒུན་ ཅོ་ཡོད་།”
པུ་ཙ་ ཉི་རྡེ་ ཧོར་ལ་ སྲུང་ངུ་།
28 ཡི་ཤུའི་ མོལ་, “ཁྱི་ཞི་ ཅི་ ས་མེ་རག་? མི་ཞིག་ལ་ པུ་ཙ་ ཉི་ ཡོད་པེན་། ཁོ་ པུ་ཙ་ ཆོན་མོ་ས་ སོང་འདེ་ ཟེར་, ‘པུ་ཙ་, ཁྱེ་རང་ ཏི་རིང་ རྒུན་འགྲུམ་མེ་ ཚེའེ་ན་ ལེ་ཧ་ ཅོ་ལ་ སོང་།’ 29 ཁོའེ་ ཟེར་, ‘ང་ ཆ་མེད་’ འིན་ན་ ལྟིང་ནི་ སེམ་འབོ་ འགྱུར་རྡེ་ ལེ་ཧ་ ཅོ་ལ་ སོང་། 30 ཏེ་ནི་ ཨ་རྦ་ པུ་ཙ་ ཆུང་ཙེ་ས་ སོང་འདེ་ ཏེ་རྒ་ ཙོག་སེ་ ཟེར་རྦེ་ ཁོའེ་, ‘འོ་ ཨ་རྦ་ལེ་ ང་ ཆེན་’ ཟེར་ འིན་ན་ མ་སོང་།”
31 “ཁོང་ ཉ་ཧེ་ ནང་ནི་ ཨ་རྦེ་ ཁ་ལ་ སུའི་ ཉེན་?”
ཁོང་རྒུ་ནི་ ཟེར་, “པུ་ཙ་ ཆོན་མེ་།”
ཡི་ཤུའི་ མོལ་, “ངེ་ ཁྱི་ཞ་ རྡེན་འབའ་ ཟེ་འིན་, ཁྲལ་ནེན་ཀན་རྒུན་ འདང་ འཇང་ཙོ་མ་རྒུན་ ཁྱི་ཞི་སང་ ངུལ་ལ་ རྡེ་བ་ཅན་ནེ་ རྒྱལ་སྲིད་རྡེ་ན་ ལེབ་རྦེན་ ནོག་། 32 ཀྲང་པོ་ མི་ཙེ་ པུད་ཅེ་ ལམ་ ལྟན་ནེ་ལ་ ཡོ་ཧཱ་ནན་ ཁྱི་ཞ་ས་ ཡོྃ་རྡེ་ལ་, ཁྱི་ཞ་རྒུ་ནི་ ཏེཏ་པ་ མ་ཅོའེ་, འིན་ན་ ཁྲལ་ནེན་ཀན་རྒུན་ འདང་ འཇང་ཙོ་མ་རྒུ་ནི་ ཏེཏ་པ་ ཅོའེ་། ཁྱི་ཞི་ ཏོ་རྒུན་ ཐོང་འདེ་ལ་ ཁོའེ་ ཁྲིན་འབེ་ན་ ཏེཏ་པ་ ཅོའེ་རྡེ་ རྡིག་པ་ ཕྃ་རྡེ་ སེམ་ མ་འགྱུར་།”
རྒུན་འགྲུམ་མེ་ ཚེའེ་ ཤེ་ལ་ ཏང་ཀ་ནེ་ སྲུང་ངུ་།
33 ཡི་ཤུའི་ མོལ་, “ཡང་ སྲུང་ངུ་ ཉོན་, ཞིང་ངེ་ རྡག་པེ་ ཁོ་རང་ངེ་ ཞིང་ལ་ རྒུན་འགྲུམ་ ལྕང་མ་ ཙུག་ཏེ་ ཀྱང་ཧོར་ ཏྃ་། རྒུན་འགྲུམ་ ཙིར་ཤེ་ཕི མལ་ ཏྲུའི་, ཡང་ རྒུན་འགྲུམ་མེ་ ཚེ་ལ་ ལྟ་ཅེ་ཕི་ པིའུ་ སི་། ཏེ་ནི་ རྒུན་འགྲུམ་མེ་ ཚེ་རྦོ་ ཞེན་ ཚེ་འབད་ཀན་རྒུན་ལ་ ཤེ་ལ་ ཏྃ་རྡེ་ ཁོ་རང་ ཞེན་ཡུལ་ཞིག་ལ་ འདེ་ལ་ སོང་། 34 ལྟོན་ཏོག་རྒེ་ ཏུའི་རྦོ་ ཉེ་མོ་ ལེབ་རྦེ་རྡང་, རྡག་པེ་ ཤིང་ཏོག་རྒེ་ ཧ་ལ་ ནེན་ནེ་ལ་ ཁོ་རང་ངེ་ ཡོག་པོ་རྒུན་ ཤེ་ལ་ ཏང་ཀན་རྒུ་ནི་ཀ་ ལམ་ཅུག་། 35 ཚེ་འབད་པ་རྒུ་ནི་ ཡོག་པོ་རྒུན་ ཟུམ་འདེ་, ཅིག་ལ་ རྡུྃ་, ཅིག་ སེད་, ཡང་ ཅིག་ལ་ རྡོ་ རྒྱབ་། 36 ཏེ་ནི་ རྡག་པེ་ ངུལ་ལེ་སང་ མང་ངེ་ ཡོག་པོ་ ལམ་ཅུག་, འིན་ན་ ཁོང་རྒུ་ནི་ ཁོང་རྒུན་ལ་ ཏེ་རྒ་ ཙོག་སེ་ ངན་པ་ ཅོའེ་།”
37 “ལྟིང་འཇུག་པེ་ཀ་ ཁོའེ་ ཁོ་རང་ངེ་ པུ་ཙ་ ལམ་ཅུག་ཏེ་, ‘ཁོང་རྒུ་ནི་ ནེན་ཏེན་ལ་ ངེ་ པུ་ཙ་ སི་ཝ་ ཅོ་ནོག་’ སམ་།”
38 “འིན་ན་ ཚེ་འབད་པ་རྒུ་ནི་ པུ་ཙ་ ཐོང་ངེ་རྡང་, ཁོང་རྒུ་ནི་ ཅིག་ ཏང་ ཅིག་ལ་ ཟེར་, ‘འི་ ཞིང་ངེ་ ནོར་ཧལ་ལ་ ཐོབ་ཅེ་ཅེན་འབོ་ ཡོང་ངེན་ འདུག་, ཤོག་ཧེ་, ཁོ་ སེད་ཏེ་ ཨ་ཧོའེ་ ཁོའེ་ ནོར་ཧལ་རྦོ་ ཀོག་རྒེན་།’ 39 ཏོ་རྦེ་ཕི་ ཁོང་རྒུ་ནི་ ཁོ་ ཟུམ་འདེ་ རྒུན་འགྲུམ་མེ་ ཚེ་ནི་ ཕི་ལོག་ལ་ ཕིང་འདེ་ སེད་།”
40 ཡི་ཤུའི་ ཡ་ཧུ་འདཱ་པེ་ སྤོན་འབོ་རྒུན་ལ་ འདྲི་ ཛེད་, “ཏ་ རྒུན་འགྲུམ་མེ་ ཚེ་རྡེ་ རྡག་པོ་ ཡོང་ངེ་རྡང་, ཁོའེ་ ཚེ་འབད་པ་རྒུན་ལ་ ཅི་ ཅོའེན་?”
41 ཁོང་རྒུ་ནི་ ལེན་ཏྃ་, “ཁོའེ་ ཏེ་ མི་ངན་རྒུན་ལ་ ནག་ སྲན་ཀྲེ་ ལྟན་འདེ་ སེད་རྡེན་ ཡང་ རྒུན་འགྲུམ་མེ་ ཚེ་རྦོ་ ཁོ་ རྟོན་ཏོག་རྒེ་ ཧ་ལ་ ཏང་ཀ་ནེ་ ཡང་ ཚེ་འབད་པ་ ཞི་ལ་ ཤེ་ལ་ ཏང་ངེན་།”
42 ཡི་ཤུའི་ ཁོང་རྒུན་ལ་ མོལ་, “ཏམ་པེ་ སུང་རབ་རྦེ་ན་ འབྲི་རྡེ་ ཡོ་ཀན་འབོ་ ཁྱི་ཞི་ མ་སིལ་རྦེ་ནེ་?
‘ཀ་ རྡོ་རྦོ་ ཁང་པ་ སིག་ཀན་རྒུ་ནི་ ཕན་མི་ཐོག་ ཐེའེ་,
ཏེ་རྒ་ རྡོ་རྦོ་ ཁང་པེ་ ཀྲུར་རྡོ་ འགྱུར་
ཀ་འབོ་ ཚང་མེ་སང་ ཁག་ཅེན་ རྡོ་རྦོ་ ནོག་,
འི་རྦོ་ ཙོབོ་རྡེ་ ཅོའོ་ ཛེད་ཏེ་ ནོག་,
ཏོ་ ཐོང་འདེ་ ཨ་ཧོ་ མ་ ཧ་ལེ་རྡེན་།’”
43 “ཏོ་རྦེ་ཕི་ ངེ་ ཁྱེ་རང་རྒུན་ལ་ ཟེ་འིན་, ཏ་ རྡེ་བ་ཅན་ནེ་ རྒྱལ་སྲིད་རྡེ་ན་ ལེབ་ཅེ་ ཧབ་ ཁྱི་ཞ་རྒུ་ནི་ཀ་ནི་ ཁྱེར་རེ་ ཛེ་རྡེན་ ཡང་ རྡེ་བ་ཅན་ནེ་ རྒྱལ་སྲིད་རྡེ་ འབྲེ་རྦུ་ ཟང་པོ་ རྐྱེ་ཀན་ མི་རྒུན་ལ་ སལ་ལེ་ ཛེ་རྡེན་། 44 ཏེ་ རྡོ་རྦེ་ཀ་ རྒག་ཕུག་ཀན་རྒུན་ ལྟུམ་བ་ལྟུམ་པེ་ན་ ཆག་རྒེན་, འིན་ན་ ཏེ་ རྡོ་རྦོ་ ཁོང་རྒུ་ནི་ཀ་ ཀྲུལ་ནི་, ཁོང་རྒུན་ མེ་ཀན་ ཆེན་།”