རྒུན་འགྲུམ་མེ་ ཚེ་ཀ་ ལ་པ་རྒུ་ནི་ སྲུང་ངུ་།
20
ཡི་ཤུའི་ མོལ་, “རྡེ་བ་ཅན་ནེ་ རྒྱལ་སྲིད་པོ་ རྒུན་འགྲུམ་མེ་ ཚེ་རྡེ་ རྡག་པོ་ ང་ཏོག་ ང་མོ་ནི་ རྒུན་འགྲུམ་མེ་ ཚེའེ་ན་ ལེ་ཧ་ ཅོ་ཅེ་ལ་ ལ་པ་ ཙ་ལེ་ འབིང་ཀན་ ཙོག་སེ་ འིན་། 2 ལ་པ་རྒུན་ལ་ ཉི་མ་ཅིག་རྒེ་ ཉིན་ལ་ ཏང་ཅེ་ ཁ་ཆམ་འདེ་ རྒུན་འགྲུམ་མེ་ ཚེའེ་ན་ ལེ་ཧ་ ཅོ་ལ་ ལམ་ཅུག་།”3 “ཧ་ལམ་ ཆུ་ཙོད་ རྒུ་པ་ཞིག་རྒེ་ཀ་ རྡག་པོ་ ཕི་ལོག་ལ་ འབིང་འདེ་ སོང་, ཡང་ ཁྲོམ་ལ་ ལེ་ཧ་ མ་ཐོབ་ཀ་ནེ་ ཞེན་ ལ་པ་རྒུན་ ཐོང་འདེ་ 4 ཁོང་རྒུན་ལ་ ཟེར་, ‘ཁྱི་ཞ་རྒུ་ནི་ལ་ ངེ་ རྒུན་འགྲུམ་མེ་ ཚེའེ་ན་ ལེ་ཧ་ ཅོའོ་ སོང་, འོའེ་སྤ་ འིན་ཀ་ནེ་ ལ་ཆ་ ངེ་ ཏང་ངེན་།’ 5 ཏེ་ནི་ ཁོང་རྒུན་ ལེ་ཧ་ ཅོ་ལ་ སོང་། ཆུ་ཙོད་ ཅུག་ཉི་ རྡང་ སུམ་པེ་ཀ་ རྡག་པོ་ ཡང་ ཕི་ལོག་ལ་ སོང་འདེ་, ཏེ་རྒ་ ཙོག་སེ་ ཅོའེ་།”
6 “ཕི་ཏོག་ ཆུ་ཙོད་ ང་པེ་ཀ་ རྡག་པོ་ ཡང་ ཕི་ལོག་ལ་ འབིང་འདེ་ སོང་, ཏུ་རུ་ ལེ་ཧ་ མ་ཐོབ་ཀ་ནེ་ ལ་པ་རྒུན་ འདེད་ཏེ་ ཡོད་རྡེ་ ཐོང་འདེ་ ཁོང་རྒུན་ལ་ འདྲི་, ‘ཁྱི་ཞ་ ཉི་མ་ ཚེ་རེ་ ལེ་ཧ་ མ་ཅོ་ལ་ འེ་ཀ་ འདེད་ཏེ་ ཅི་ ཅོའེ་རྡེ་ འིན་?’”
7 “ཁོང་རྒུ་ནི་ ལེན་ཏྃ་, ‘ང་ཞ་ ལེ་ཧ་ ཅོ་ལ་ སུའི་ལ་ མ་ཁྱེར་།’”
“རྒུན་འགྲུམ་མེ་ ཚེ་རྡེ་ རྡག་པེ་ ཟེར་, ‘ཁྱི་ཞ་རྒུན་ལ་ སོང་འདེ་ ངེ་ རྒུན་འགྲུམ་མེ་ ཚེའེ་ན་ ལེ་ཧ་ ཅོའེ་།’”
8 “ཕི་ཏོག་ རྒུན་འགྲུམ་མེ་ ཚེ་རྡེ་ རྡག་པེ་ ཆག་ཛོད་ལ་ ཟེར་, ‘ལ་པ་རྒུན་ལ་ འབོའེ་རྡེ་ ལྟིང་འཇུག་ལ་ ཁྱོང་ཀན་རྒུ་ནི་ འགོ་ཟུག་ཏེ་ འགོ་མ་ ཁྱོང་ཀན་རྒུན་ཚུག་པ་ ཉིན་ལ་ ཏོང་།’ 9 ཆུ་ཙོད་ ང་པེ་ཀ་ ལེ་ཧ་ ཅོ་ལ་ ཁྱོང་ཀན་རྒུན་ལ་ ཉི་མ་ཅིག་རྒེ་ ཉིན་ལ་ ཐོབ་ཅེ་ཀ་ནི་ 10 འགོ་ཟུག་རྒེ་ཀ་ ལེ་ཧ་ ཅོའོ་ ཁྱོང་ཀན་རྒུན་ ཉིན་ལ་ ནེན་ལ་ ལེབ་རྦེ་རྡང་ ཞེན་རྒུ་ནི་སང་ མང་ངེ་ ཐོབ་རྦེ་ནོག་ སམ་། འིན་ན་ ཁོང་རྒུན་ལ་ ཉི་མ་ཅིག་རྒེ་ ཉིན་ལ་ མ་ནི་ མ་ཐོབ་། 11 ཉིན་ལ་ ཐོབ་རྦེ་རྡང་ ཁོང་རྒུ་ནི་ ཟེར་རྒྱུ་ ཏྃ་རྡེ་ རྡག་པོ་ལ་ ཟེར་། 12 ‘ཆུ་ཙོད་ ཅིག་ མ་ནི་ ལེ་ཧ་ མ་ཅོ་ཀན་རྒུན་ལ་ ཉེ་རང་ངེ་ ང་ཞ་, ཉི་མེ་ ཚེད་རྡེ་ན་ ནག་ ཐོང་ངེན་ ཉི་མ་ ཚེ་རེ་ ལེ་ཧ་ ཅོ་ཀན་རྒུན་ ཙོག་སེ་ ཉིན་ལ་ ཏྃ་།’”
13 “འིན་ན་ རྡག་པེ་ ལེན་ཏྃ་རྡེ་ ཁོང་ ཅིག་ལ་ ཟེར་, ‘ཛ་འོ་ལེ་, ངེ་ ཁྱེ་རང་ ཉམ་པོ་ མི་འོའེ་སྤ་ མ་ཅོའེ་རྦེན་། ཁྱེ་རང་ངེ་ ཉིན་ལ་ལ་, ལེ་ཧ་ ཅོ་ཅེ་ ཁ་ཅེད་ མ་ཅོའེ་རྦེན་ནེ་? 14 རང་ངེ་ མུལ་ ཁུར་རྡེ་ སོང་། ལྟིང་འཇུག་རྒེ་ ལེ་མི་རྒུན་ལ་ ཁྱེ་རང་ འདྲན་འདྲ་ ཉིན་ལ་ ཏང་ཅེ་ ང་རང་ངེ་ འདོད་པ་ འིན་འབེན་། 15 ངེ་ ང་རང་ངེ་ པེ་ནེ་ལ་ ཅི་ ཅོ་ནྃ་ ང་རང་ མི་ཐེད་རྡེ་? ཡང་ ངེ་ ཉིང་ པེ་རྡེ་ ཏང་ཅེ་ཀ་ནི་ ཕྲ་རྡོག་ ཡོང་ངེ་ རག་རྒེ་?’”
16 “ཏེ་རྒ་རྦེ་ཕི་ ཏག་ས་ འགོ་ ཡོང་ཀན་རྒུན་ ལྟིང་འཇུག་ལ་ ལུའི་རྡེན་ ཡང་ ཏག་ས་ ལྟིང་འཇུག་རྒེ་ཀ་ ཡོ་ཀན་རྒུན་ འགོ་ ལེ་རྦེན་།”
ཡི་ཤུའི་ ཁོ་རང་ ཀྲོང་ཤེ་ ཧོར་ ཤེད་རྡེ་ ཛེད་།
17 ཡི་ཤུ་ ལྟག་ལ་ ཡེ་རུ་ཤ་ལེམ་ལ་ རྐྱོད་རྡེན་ ཡོད་ཏུའི་ ལོབ་ཀྲུག་ ཅུག་ཉི་ སོ་སོ་ ཁྱེར་རྡེ་ མོལ་། 18 “ཉོན་ནྃ་, ཨ་ཧོ་རྒུན་ ལྟག་ལ་ ཡེ་རུ་ཤ་ལེམ་ལ་ ཆ་ཅེ་ ནོག་, མི་རིག་རྒེ་པུ་ ལ་མ་ འུ་རྐྱོང་ འདང་ ཆོའེ་ཁྲིམ་ལ་ ཁེ་སྤ་རྒུ་ནི་ ལག་ལ་ ལྟེ་རྡེན་, ཡང་ ཁོང་རྒུ་ནི་ ཁོ་ ཤི་ཅེ་ ཆེད་པ་ ཅེད་ཏེ་། 19 ཡ་ཧུ་འདཱ་པ་ མན་ཀན་རྒུ་ནི་ ལག་ལ་ ལྟེ་རྡེན་། ཏེ་ནི་ ཁོང་རྒུ་ནི་ ཁོ་ ཁྲེལ་རྦ་ ལྟན་འདེ་, རྟལ་ལྕག་ རྒྱབ་ཏེ་ རྐྱང་ཤིང་ངེ་ཀ་ རྐྱང་འདེ་ སེད་རྡེན་, ཡང་ ཞག་ སུམ་པེ་ ཞག་ལ་ སོན་པོ་ ལྃ་ཤུག་རྒེ་ ཛེ་རྡེན་།”
ཞེན་མ་རྒུན་ལ་ ཞབ་རྟོག་ ཞུ་ཅེ་།
20 ཏེ་ནི་ ཟེ་འབེ་འདེ་ ན་མ་, ཡ་ཀུབ་ ཏང་ ཡོ་ཧཱ་ནན་ནེ་ ཨ་མ་, ཁོང་རྒུན་ ཉམ་པོ་ ཡི་ཤུའི་ ཧུ་འདུན་ལ་ ཡོྃ་ ཡང་ པིག་ཛུམ་ རྒྱབ་ཏེ་ ཁོའེ་ཀ་ ཀ་ཀྲིན་ ཛེད་ཅེ་ལ་ ཟེར་།
21 ཡི་ཤུའི་ ཁོ་ མོལ་, “ཉེ་རང་ལ་ ཅི་ རྒོའེ་?”
ཁོའེ་ ཟེར་, “ཉེ་རང་ངེ་ རྒྱལ་སྲིད་རྡེ་ན་ ངེ་ པུ་ཙ་ ཉ་ཧ་ ཉེ་རང་ངེ་ ཆག་ ཡོའེ་སྤ་ རྡང་ ཡོའེ་མེ་ སི་ཝ་ཅེན་ ཀོ་སེ་ཀ་ འདེད་ཅུག་རྒེ་ ཛོད་ལེ་།”
22 ཡི་ཤུའི་ ཁོང་རྒུན་ལ་ ལེན་སལ་, “ཁྱི་ཞི་ ཞུ་ཝ་ པུལ་ཧན་འབོ་ ཁྱི་ཞ་ ཧ་མ་ཀོ་ ནོག་, ང་ ཐུང་ཅེ་ཅེན་ནེ་ རྡུ་ངལ་ལེ་ ཀོ་རེ་འབོ་ ཁྱི་ཞི་ ཐུང་ཉེན་ཅེ་ རག་རྒེ་?”
ཁོང་རྒུ་ནི་ ཟེར་, “ཉེན་ཅེ་རག་ལེ་།”
23 ཡི་ཤུའི་ ཁོང་རྒུན་ལ་ མོལ་, “ཁྱི་ཞ་རྒུ་ནི་ ནེན་ཏེན་ལ་ ངེ་ རྡུ་ངལ་ལེ་ ཀོ་རེ་ ནང་ནི་ ཐུང་ངེན་, འིན་ན་ ངེ་ ཡོའེ་སྤ་ རྡང་ ཡོའེ་མེ་ཀ་ འདེད་ཅུག་ཅེ་ ཝང་ཆ་ ང་ མེད་། ངེ་ ཡབ་རྦེ་ ཏེ་ མལ་རྒུན་ ཁོང་ངེ་ འདམ་མེ་ ཛེད་ཀན་རྒུ་ནི་ཕི་ ཀྲལ་འགྲིག་ ཛེད་ཏེ་ འིན་།”
24 ཏོ་ ཚོར་རེ་རྡང་, ཞེན་ ལོབ་ཀྲུག་ ཅུ་ལ་ ཁོང་ ཉ་ཧེ་ཀ་ སྲོ་ ཡོྃ་། 25 ཡི་ཤུའི་ ཁོང་ ཚང་མ་ལ་ འབོ་ ཛེད་ཏེ་ མོལ་, “ཁྱི་ཞ་ རྒྱུའི་མེད་རྡེ་? ཡ་ཧུ་འདཱ་པ་ མན་ཀན་ ཝང་སྲུལ་པ་རྒུ་ནི་ ཁོ་རང་ངེ་ ཡུལ་མི་རྒུ་ནི་ཀ་ ཉིང་ཞེ་ མེད་རྡེ་ ཝང་སྲུལ་ལེ་ནོག་, ཡང་ ཁོང་རྒུ་ནི་ ལོན་པོ་རྒུ་ནི་ལ་ མི་རྒུན་ལ་ ཧོཔ་ ནག་ ལྟན་ནེན་ ཝང་སྲུལ་ལེ་ནོག་། 26 ཁྱི་ཞི་ན་ ཏོ་ཙོག་སེ་ ཡོང་ མི་རྒོའེ་། ཁྱི་ཞི་ ཕྲོ་ནི་ ཀྲག་པོ་ འགྱུར་ཉིན་ ཡོ་ཀན་འབོ་ ཞེན་མ་རྒུ་ནི་ ཡོག་པོ་ འགྱུར་རྒོའེ་། 27 ཡང་ ཁྱི་ཞི་ ཕྲོ་ནི་ འགོ་ ལེཔ་ཉིན་ ཡོ་ཀན་འབོ་ ཞེན་རྒུ་ནི་ ཚེ་ཡོག་ འགྱུར་རྒོའེ་། 28 ཀ་ཟུག་ མི་རིག་རྒེ་པུ་ ཞབ་རྟོག་ ཞུ་ཅུག་ཅེ་ལ་ མན་རྦེན་ ཞབ་རྟོག་ ཞུ་ལ་ ཡོྃ་རྦེན་, ཡང་ མི་ མང་པེ་ སྲོག་རིན་ ཤལ་ཅེ་ལ་ ཁོ་རང་ངེ་ སྲོག་ ཏང་ངེན་།”
ཡི་ཤུའི་ ཞ་ར་ ཉི་ལ་ ཐོང་ཅུག་རྒེ་ ཛེད་།
29 ཡེ་རི་ཀོ་ ཀྲོང་ཁྱེར་ནི་ ཡི་ཤུ་ རྡང་ ཁོང་ངེ་ ལོབ་ཀྲུག་རྒུན་ འབིང་འདེ་ རྐྱོད་ཟ་ནི་, མི་ཚོག་ མང་པོ་ཞིག་ ཁོང་ངེ་ ལྟིང་འགྲྃ་ནི་ ཡོྃ་། 30 ལམ་མེ་ ཐ་མེ་ཀ་ ཡོ་ཀ་ནེ་ ཞ་ར་ ཉི་ ཡི་ཤུ་ ཏེ་ཀ་ནི་ རྐྱོད་ཏུག་ ཟེར་རྡེ་ ཚོར་རེ་རྡང་ ཀུ་ཅུ་ ཏང་ངེན་ ཟེར་, “ཙོབོ་, རྒྱ་སྤོ་ འདཱ་འབིད་རྡེ་ ཕར་རྒྱུད་, ང་ཞི་ཀ་ ཉིང་ཞེ་ ཛེད་།”
31 མི་ཚོག་ ཞ་ར་ ཉ་ཧ་ ཁར་རྐྱག་ ཏྃ་རྡེ་ ཅེཔ་ཁ་རོག་ ཟེར་།
འིན་ན་ ཁོང་རྒུ་ནི་ མང་ངེ་ ཀུ་ཅུ་ ཏྃ་རྡེ་ ཟེར་, “ཙོབོ་, རྒྱ་སྤོ་ འདཱ་འབིད་རྡེ་ ཕར་རྒྱུད་, ང་ཞི་ཀ་ ཉིང་ཞེ་ ཛེད་རྡང་།”
32 ཡི་ཤུ་ སྲུང་ངེ་ ཛེད་ ཡང་ ཁོང་རྒུན་ལ་ འབོའེ་རྡེ་ འདྲི་ ཛེད་, “ངེ་ ཁྱི་ཞི་ཕི་ ཅི་ ཅོ་?”