མཏ་ཐ་ 19

ཞི་མེད་ ཅེད་ཅེ་ རྡང་ ན་མ་ ཅོ་ཅེ་ ལབ་ཞ་།

ལབ་ཞ་ སལ་ཚར་རྡེ་ ལྟིང་ནི་, ཡི་ཤུ་ འགཱ་ལིལ་ནི་ ཡོར་འདཱན་ སྃ་སྤེ་ ཕར་ཧ་ ཡ་ཧུ་འདཱ་ ཡུལ་ཞོང་ལ་ རྐྱོད་། 2 མི་ཚོག་ མང་པོ་ ཁོང་ངེ་ ལྟིང་འགྲྃ་ནི་ ཡོྃ་ ཡང་ ཁོང་ངེ་ ཟུར་མོ་ ཡོང་ཀན་རྒུན་ ཕན་ཅུག་རྒེ་ ཛེད་།

3 ཐི་ཚོད་ལྟ་ཅེ་ལ་ པ་རུ་ཤི་པ་ ཁ་ཅིག་ ཁོང་ས་ ཡོྃ་རྡེ་ འདྲི་, “རྒྱུ་ཚན་ ཆུང་ཙེ་ ཡོད་ཁྲོ་ ཡ་ ཆོན་མོ་, པུ་ཙ་ཞིག་ལ་ ཁྲིམ་ ནང་ཞིན་ ཁོ་རང་ངེ་ ན་མ་ ཅེད་ ཆོག་རྒེ་ནོག་རྒེ་?”

4 ཡི་ཤུའི་ ལེན་སལ་, “ཁྱི་ཞི་ ཏམ་པེ་ སུང་རབ་རྦེ་ ནང་ནི་ མ་སིལ་རྦེ་ནེ་? འགོ་ཟུག་རྒེ་ཀ་ ཀོན་འཇོག་རྒེ་ འཇིག་རྟེན་ ཛེད་ ཟེར་ནེ་ པུ་ཙ་ རྡང་ པོ་མོ་ ཛེད་ཏེ་, 5 མོལ་, ‘ཏེ་རྒ་ རྒྱུ་ཚན་འབེ་ཕི་ པུ་ཙ་ ཁོ་རང་ངེ་ ཨ་རྦ་ རྡང་ ཨ་མ་ནི་ ཕྃ་རྡེ་ ཁོ་རང་ངེ་ ན་མ་ ཉམ་པོ་ ཛོམ་འདེ་ ཁོང་ ཉ་ཧ་ ཟུྃ་སྤོ་ ཅིག་ འགྱུར་རེ་ནོག་།’ 6 ཏ་ ཁོང་རྒུན་ ཉི་ མ་ནོག་ ཅིག་ ནོག་། ཏོ་རྦེ་ཕི་ ཀོན་འཇོག་རྒེ་ ཅིག་ ཛེད་ཀན་འབོ་ སུ་ཞི་ལ་ པེ་ མ་ཅུག་།”

7 ཏེ་ནི་ པ་རུ་ཤི་པ་རྒུ་ནི་ ཁོང་ལ་ འདྲི་, “ཏོ་ འིན་ནི་, ན་མ་ ཅེད་ནི་, ན་མ་ལ་ ཅེད་ཀ་ནེ་ ལག་ཁྱེར་ ཁོ་ ཏོང་ ཟེར་རྡེ་ ཅི་ཕི་ མོ་ཤེ་ ཀཱ་ སལ་རྡེ་ ནོག་?”

8 ཡི་ཤུའི་ ལེན་སལ་, “ཁྱི་ཞི་ ཕ་མེ་པོ་རྒུ་ནི་ ཉིང་ ཀྱོང་པོ་ ཡོད་ཅེ་རྦེ་ མོ་ཤེ་ ཁྱི་ཞ་ ན་མ་ ཅེད་ཅེ་ལ་ རྒོང་སྤ་ ཏྃ་, འིན་ན་ འགོ་ཟུག་རྒེ་ཀ་ ཏུ་ཟུག་ མེད་པེན་། 9 ངེ་ ཁྱི་ཞ་རྒུན་ལ་ ཟེ་འིན་, རང་ངེ་ ཞི་མེད་ མན་ཀན་ ཉམ་པོ་ ལུའི་འབྲེལ་ ཅོ་ཅེ་ ནེ་ལུག་ མ་ཐེ་ལ་, སུ་ཞིག་རྒེ་ ཁོ་རང་ངེ་ ན་མ་ ཅེད་ཏེ་ ཞེན་ པོ་མོ་ཞིག་ ཉམ་པོ་ ན་མ་ ཅོ་ནི་ ཁོའེ་ ལོག་ཡེམ་ ཅོའེ་རྡེ་ ནོག་།”

10 ལོབ་ཀྲུག་རྒུ་ནི་ ཡི་ཤུ་ ཟེར་, “ཀལ་ཏེ་ ན་མ་ རྡང་ མག་པེ་ན་ ཏུ་ཟུག་ ནེ་ལུག་ ཆ་ནི་ ན་མ་ མ་ཅོ་ན་ རྒྱལ་ཤེ་ རག་།”

11 ཡི་ཤུའི་ མོལ་, “ཀོན་འཇོག་རྒེ་ པག་མ་ མ་ཅོ་ལ་ འདེད་ཅེ་ ཁྱུད་ སལ་ལེ་ ཛེད་ཀན་རྒུན་ མ་ཐེ་ལ་, ཚང་མ་ལ་ ཁྱི་ཞི་ ཟེར་ཧ་ནེ་ མི་ཙེ་ པུད་ཉེན་ནེ་ མག་། 12 སྤེར་ན་ པུ་ཙ་ ཁ་ཅིག་, རྐྱེ་རྦེ་ནི་ཕ་ལ་ ཨ་རྦ་ འགྱུར་ཤེ་ ཁྱུད་ མེ་ཀན་, ཡང་ ཁ་ཅིག་ལ་ མི་རྒུ་ནི་ ཨ་རྦ་ འགྱུར་ཤེ་ ཁྱུད་པོ་ མེ་ཀན་ ཅོའེ་རྦེ་, ཡང་ ཁ་ཅིག་རྒེ་ རྡེ་བ་ཅན་ནེ་ རྒྱལ་སྲིད་ལ་ ཞབ་རྟོག་ ཞུ་ཅེ་ཕི་ ན་མ་ ཅོའོ་ མག་། སུ་ཞིག་ལ་ ཡུ་ཙོག་སེ་ མི་ཙེ་ པུད་ཉེན་ནི་ པུད་ཧེ་།”

ཡི་ཤུ་ རྡང་ ཕྲུ་རྒུ་ ཆུང་ཙེ་རྒུན་།

13 ཏེ་ནི་ མི་རྒུ་ནི་ ཕྲུ་རྒུ་ ཆུང་ཙེ་རྒུན་ ཡི་ཤུའི་ ཆག་ པོ་རེ་ ཛེད་ཏེ་ མོ་ལམ་ ཞུ་ཅེ་ལ་ ཁོང་ས་ ཁྱོྃ་། འིན་ན་ ཁོང་ངེ་ ལོབ་ཀྲུག་རྒུ་ནི་ ཁྱོང་ཀན་རྒུན་ལ་ ཡི་ཤུ་ འོབ་རྒྱལ་ ལྟན་ཅེ་ཀ་ནི་ ཁར་རྐྱག་ ཏྃ་།

14 ཡི་ཤུའི་ མོལ་, “ཕྲུ་རྒུ་ ཆུང་ཙེ་རྒུན་ རྒག་ མ་རྒག་ལ་ ང་ས་ ཡོང་ཅུག་ ཡུ་རྒུ་ནི་ཕི་ རྡེ་བ་ཅན་ནེ་ རྒྱལ་སྲིད་པོ་ འིན་།” 15 ཁོང་རྒུ་ནི་ཀ་ ཆག་ པོ་རེ་ ཛེད་ཏེ་ ཅིན་ལབ་ སལ་ལེ་ ཛེད་, ཏེ་ནི་ ཡི་ཤུ་ ཏེ་ཀ་ནི་ རྐྱོད་།

ཁྱོག་ཏོང་ ཆུག་པོ་ཞིག་།

16 མི་ཞིག་ ཡི་ཤུ་ས་ ཡོྃ་རྡེ་ ཟེར་, “ལོབ་རྦོན་ལེ་, ཐ་མེད་པེ་ མི་ཙེ་ ཐོབ་ཅེ་ཕི་ ངེ་ ཟང་པོ་ ལེ་ཧ་ ཅི་ ཅོ་རྒོའེ་?”

17 ཁོང་ངེ་ ཁོ་ མོལ་, “ཟང་པོ་ ཅི་ འིན་ ཟེར་རྡེ་ ང་ ཅེ་ འདྲི་ཡོད་? ཀོན་འཇོག་ ཅིག་པོ་ མ་ཐེ་ལ་ སུ་ལ་ ཟང་པོ་ མན་། ཀལ་ཏེ་ ཁྱེ་རང་ལ་ ཐ་མེད་པེ་ མི་ཙེ་ རྒོའེ་ཉིན་ ཡོད་ནི་, ཏེ་ནི་ ཀོན་འཇོག་རྒེ་ ཀཱ་རྒྱ་རྒུན་ སྲུང་།”

18 ཁོའེ་ ཡི་ཤུ་ འདྲི་, “ཀའོ་རྒུན་?”

ཡི་ཤུའི་ ལེན་སལ་, “མི་ མ་སེད་, རང་ངེ་ ཞི་མེད་ མན་ཀན་ ཞེན་མ་ ཉམ་པོ་ ལུའི་འབྲེལ་ མ་ཅོ་, ཧུ་མ་ཧུ་, ཟུན་ནེ་ སྤང་པོ་ མ་ཏྃ་, 19 རང་ངེ་ ཨ་རྦ་ རྡང་ ཨ་མ་ལ་ སི་ཝ་ ཅོའེ་, ཡང་ རང་ངེ་ ཤེ་སྤ་ ཅོ་ཀན་ ཙོག་སེ་ ཁྱེ་རང་ངེ་ ཁྱིམ་ཙེ་པ་ ཤེ་སྤ་ ཅོའེ་།”

20 ཁྱོག་ཏོང་ངེ་ ཡི་ཤུ་ ཟེར་, “ཏེ་ ཚང་མ་ ངེ་ ཅོ་ཡོད་ལེ་, ཏེ་སང་ ཐེ་རྦ་ ངེ་ ཅི་ ཅོ་རྒོའེ་?”

21 ཡི་ཤུའི་ མོལ་, “ཀལ་ཏེ་ ཁྱེ་རང་ ཕུན་སུམ་ཚོག་པ་ཞིག་ འགྱུར་ཉིན་ ཡོད་ནི་, སོང་ ཡང་ ཁྱེ་རང་ངེ་ རྒྱུ་ནོར་ ཚང་མ་ ཙོྃ་རྡེ་ མུལ་འབོ་ ཉལ་རྦ་ཅེན་རྒུན་ལ་ ཏོང་, རྡེ་བ་ཅན་ནེ་ན་ ཁྱེ་རང་ལ་ པང་ཛོད་ ཐོབ་རྦེན་། ཏེ་ནི་ ཡོྃ་རྡེ་ ངེ་ རྒྱབ་ནི་ འགྲོྃ་།”

22 ཏོ་ ཚོར་རེ་རྡང་, ཁོ་ ཚེར་ཧ་ ཡོྃ་རྡེ་ སོང་ ཅེ་ཟེར་ནི་ ཁོ་ མ་ཆུག་པོ་ ཡོད་པེན་།

23 ཏེ་ནི་ ཡི་ཤུའི་ ལོབ་ཀྲུག་རྒུན་ལ་ མོལ་, “ངེ་ རྡེན་འབའ་ ཟེ་འིན་, མི་ ཆུག་པོ་ རྡེ་བ་ཅན་ནེ་ རྒྱལ་སྲིད་རྡེ་ན་ ལེབ་ཅེ་ མ་ ཀག་སྤོ་ ནོག་། 24 ཡང་ ངེ་ ཁྱི་ཞ་ ཟེ་འིན་ མི་ ཆུག་པོ་ ཀོན་འཇོག་རྒེ་ རྒྱལ་སྲིད་རྡེ་ན་ ལེབ་ཅེ་སང་ ཁབ་རྦེ་ མིག་ནི་ ང་རྦོང་ ཕིང་ཅེ་འབོ་ ལ་མོ་ ཆེན་།”

25 ཏོ་ ཚོར་རེ་རྡང་ ལོབ་ཀྲུག་རྒུན་ མ་ ཧ་ལེ་རྡེ་ འདྲི་, “ཏེ་ནི་ སུ་ ཐར་པ་ ཐོབ་རྦེན་?”

26 ཡི་ཤུའི་ ཁོང་རྒུན་ལ་ ཟི་རྡེ་ མོལ་, “ཡུ་ མི་ ཅོ་ མ་ནི་ མི་ཉེན་, འིན་ན་ ཀོན་འཇོག་ལ་ ཅི་ཚང་མ་ ཛེད་ ཉེན་ནེ་ནོག་།”

27 པི་ཏྲ་རེ་ ཡི་ཤུ་ ཟེར་, “ང་ཞི་ ཅི་ཚང་མ་ ཕྃ་རྡེ་, ཉེ་རང་ལ་ འགྲྃ་རྦེན་། ང་ཞ་ སོལ་རེ་ ཅི་ ཐོབ་རྦེན་?”

28 ཡི་ཤུའི་ ཁོང་རྒུན་ལ་ མོལ་, “ངེ་ ཁྱི་ཞ་ རྡེན་འབའ་ ཟེ་འིན་, ཀོན་འཇོག་རྒེ་ ཅི་ཚང་མ་ ཡང་ སོ་མ་ ཅོའོ་ ཛེད་ཅེ་ ཡང་ མི་རིག་རྒེ་པུ་ ཟི་ཞིད་ཅེན་ནེ་ ཁྲིའི་ཀ་ འདེད་ཟ་ནི་ ངེ་ ལྟིང་འགྲྃ་ནི་ འགྲྃ་རྡེན་ ཁྱི་ཞ་རྒུན་ལ་ ཨིས་ར་ཡེལ་ལེ་ མི་རིག་ ཅུག་ཉི་ཀ་ ཝང་སྲུལ་ཅེ་ལ་ ཁྲིའི་ ཅུག་ཉི་ཀ་ འདེད་རྡེན་། 29 ངེ་ ཏོན་ལ་ ཁང་པ་ རྡང་ ཨ་ཅོ་ནོ་ ཡང་ ཨ་ཅེ་ ནོ་མོ་ ཡང་ ཨ་རྦ་ རྡང་ ཨ་མ་ ཡང་ ཕྲུ་རྒུ་ ཡང་ ཞིང་ ཕང་ཀན་ ཚང་མ་ལ་ ཏོ་རྒུ་ནི་ རྒྱ་ལྟབ་ མ་ཚེད་ ཐ་མེད་པེ་ མི་ཙེ་ ཐོབ་རྦེན་། 30 འིན་ན་ ཏག་ས་ འགོ་ལ་ ཡོ་ཀན་ མང་པོ་ ལྟིང་འཇུག་ལ་ ལུའི་རྡེན་ ཡང་ ཏག་ས་ ལྟིང་འཇུག་རྒེ་ཀ་ ཡོ་ཀན་ མང་པོ་ འགོ་ལ་ ལེབ་རྦེན་།”