མཏ་ཐ་ 17

ཡི་ཤུའི་ ཟི་ཞིད་ འཇལ་།

ཞག་ ཀྲུག་རྒེ་ ལྟིང་ནི་, ཡི་ཤུའི་ པི་ཏྲར་, ཡ་ཀུབ་ ཏང་ ཁོའེ་ ནོ་ ཡོ་ཧཱ་ནན་ ཁྲིད་ཏེ་ སུ་ལ་ མེད་སེ་ རི་ ཐོན་པོ་ཞིག་རྒེ་ཀ་ རྐྱོད་། 2 ཏུ་རུ་ ཁོང་རྒུ་ནི་ འདུན་ལ་ ཡི་ཤུའི་ ཧུ་ཟུག་ སོན་ཏེ་ འགྱུར་རྡེ་, ཁོང་ངེ་ ཞལ་འདོང་ ཉི་མེ་ ཟེར་ ཙོག་སེ་ ཡང་ ཁོང་ངེ་ ནམ་ཟ་ ཀར་སྤོ་ འདང་ཤེན་ འགྱུར་། 3 ཧུན་མེད་ལ་ ཁོང་རྒུ་ནི་ ལུང་རྟོན་པ་ མོ་ཤེ་ རྡང་ ཨེ་ལི་ཡཱེ་ ཡི་ཤུ་ ཉམ་པོ་ ཞལ་ཏ་ ས་ལེན་ འཇལ་།

4 པི་ཏྲ་རེ་ ཡི་ཤུ་ ཟེར་, “ཙོབོ་ལེ་, ང་ཞ་ འེ་ཀ་ ཡོད་ཅེའོ་ མ་ རྒྱ་ལེ་ སོང་། ཀལ་ཏེ་ ཉེ་རང་ ཐུག་ཐེད་ནི་ ངེ་ ཀུར་ སུམ་ སྤུ་རྒེན་, ཉེ་རང་ངེ་ཕི་ ཅིག་, མོ་ཤེ་ཕི་ ཅིག་, ཡང་ ཨེ་ལི་ཡཱེ་ཕི་ ཅིག་།”

5 ཁོའེ་ ཏོ་རྒུན་ ཟེ་རེན་ ཡོད་ཟ་ནི་, སྲིན་ འདང་ཤེན་ཞིག་རྒེ་ ཁོང་རྒུན་ ཀབ་ ཡང་ སྲིན་ནེ་ ནང་ནི་ སུང་ཧད་ཅིག་རྒེ་ མོལ་, “འི་རྦོ་ ངེ་ ཤེ་སྤ་ པུ་ཙ་ འིན་, ཁོ་ ཉམ་པོ་ ང་ ཧོཔ་ ཐེད་པོ་ འིན་, ཁོའེ་ ཟེར་ཧན་རྒུན་ལ་ ཉོན་།” 6 ཏོ་ ཚོར་རེ་རྡང་ ལོབ་ཀྲུག་རྒུན་ ཧོཔ་ འཇིའི་རྡེ་ ཁྱེ་རྦུ་ འགྱེལ་།

7 འིན་ན་ ཡི་ཤུ་ རྐྱོད་ཏེ་ ཁོང་རྒུན་ལ་ ཆག་ཐུག་རྒེ་ ཛེད་ཏེ་ མོལ་, “ལོྃ་ཧེ་ འཇིའི་ མ་འཇིའི་།” 8 ཁོང་རྒུ་ནི་ འགོ་ ཏག་ཏེ་ ལྟ་རྡང་ ཡི་ཤུ་ ཅིག་པོ་ མ་ནི་ མ་ཐོང་།

9 རི་ནི་ པབ་ཏེ་ རྐྱོད་རྡེན་ ཡོད་ཟ་ནི་, ཡི་ཤུའི་ ཁོང་རྒུན་ལ་ ཀཱ་ སལ་, “མི་རིག་རྒེ་པུ་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཏེ་ མ་ནི་, ཁྱི་ཞ་ ཐོང་ཀན་འབོ་ སུ་ལ་ མ་ཤེད་།”

10 ལོབ་ཀྲུག་རྒུ་ནི་ ཁོང་ལ་ འདྲི་, “ཏེ་ནི་ ཆོའེ་ཁྲིམ་ལ་ ཁེ་སྤ་རྒུ་ནི་ མ་ཤི་ཀ་ རྐྱོད་རྡེ་སང་ ངུལ་ལ་ ལུང་རྟོན་པ་ ཨེ་ལི་ཡཱ་ རྐྱོད་རྒོའེ་ ཅེ་ ཟེར་རྡེ་ནོག་?”

11 ཡི་ཤུའི་ ལེན་སལ་, “ནེན་ཏེན་ལ་, ཅི་ཚང་མ་ ཀྲལ་འགྲིག་ ཅོ་ཅེ་ལ་ ཨེ་ལི་ཡཱ་ ངུལ་ལ་ ཡོང་རྒོའེ་། 12 ངེ་ ཁྱི་ཞ་ ཟེ་འིན་, ཨེ་ལི་ཡཱ་ ཡོྃ་ ཚར་རྡེ་ འིན་, འིན་ན་ ཁོང་རྒུ་ནི་ ཁོ་ ངོ་ མ་ཤེ་ ཡང་ ཁོ་ ཉམ་པོ་ ཅོའེན་ སམ་ཀན་ ཚང་མ་ ཅོའེ་། ཏེ་རྒ་ ཙོག་སེ་ མི་རིག་རྒེ་པུ་ལ་ ཁོང་རྒུ་ནི་ ལག་ནི་ རྡུ་ངལ་ ཉོང་རྒོའེ་།” 13 ཏེ་ནི་ ཡི་ཤུའི་ ཁྲུའི་སལ་ཧན་ ཡོ་ཧཱ་ནན་ནེ་ ཧོར་ལ་ མོལ་རྡེ་ འིན་ཀན་འབོ་ ལོབ་ཀྲུག་རྒུན་ལ་ ཧ་ཀོ་།

ཡི་ཤུའི་ རྡུད་ ཞུ་ཧ་ནེ་ ཕྲུ་རྒུ་ཞིག་ ཕན་ཅུག་རྒེ་ ཛེད་།

14 ཁོང་རྒུན་ རི་ནི་ པབ་ཏེ་ མི་ཚོག་ས་ རྐྱོད་རྒྱ་ལ་, མི་ཞིག་ ཡི་ཤུའི་ འདུན་ལ་ ཡོྃ་རྡེ་ པིག་ཛུམ་ རྒྱབ་ཏེ་ 15 ཞུའི་, “ཙོབོ་ལེ་, ངེ་ པུ་ཙེ་ཀ་ ཉིང་ཞེ་ ཛེད་རྡང་ འཇུ་འཇུ་། ཁོ་ འགྱེལ་རྡེ་ ཟུྃ་སྤོ་ སོན་ཏེ་ འདར་རེན་ ནག་ སྲན་ཀྲེ་ ཐོང་འདུག་། ལེན་ མང་པོ་ ཁོ་ མེ་ ཡང་ ཆུའི་ན་ འགྱེལ་། 16 ཉེ་རང་ངེ་ ལོབ་ཀྲུག་རྒུན་ས་ ཁྱོྃ་རྦེན་ འིན་ན་ ཁོང་རྒུ་ནི་ ཁོ་ ཕན་ཅུག་ མ་ཉེན་།”

17 ཡི་ཤུའི་ མོལ་, “ཏེཏ་པ་ མེ་ཀན་ འདང་ མི་རབ་ ངན་པ་, ནམ་ཚུག་པ་ ང་ ཁྱི་ཞ་རྒུན་ ཉམ་པོ་ འདེན་? ནམ་ཚུག་པ་ ཁྱེ་རང་རྒུན་ལ་ སྲེན་རྒོའེ་? པུ་ཙ་འབོ་ འེ་ཀ་ ང་ས་ ཁྱོང་།” 18 ཡི་ཤུའི་ རྡུད་པོ་ལ་ ཀབ་རྐྱོན་ ཛེད་པེ་ ཁོ་ ཕྲུ་རྒུའི་ ནང་ནི་ འབིང་འདེ་ སོང་ ཡང་ ཏེ་རྒ་མ་རྒ་ ཕྲུ་རྒུ་རྦོ་ རྒྱལ་།

19 ཏེ་ནི་ ལོབ་ཀྲུག་རྒུན་ ཡི་ཤུ་ས་ ཡོྃ་རྡེ་ སུ་ལ་ ཚོར་ མ་ཤུག་རྒེ་ འདྲི་, “ང་ཞ་རྒུན་ལ་ རྡུད་པོ་ ཅེ་ ཕིང་ མ་ཉེན་ནེ་ ནོག་?”

20 ཁོང་ངེ་ ལེན་སལ་, “ཅེ་ཟེར་ནི་ ཁྱི་ཞ་ ཀོན་འཇོག་རྒེ་ན་ ཏེཏ་པ་ མྃ་རྡེ་ ཉུང་ཙེ་ ཡོད་ཏེ་ ནོག་། ངེ་ ཁྱི་ཞ་ རྡེན་འབའ་ ཟེ་འིན་, ཀལ་ཏེ་ ཁྱི་ཞ་ ཉུང་ཧར་རེ་ ས་ངོན་ ཆུང་ཙེ་ ཟམ་ཤིག་རྒེ་ ཏེཏ་པ་ ཡོད་ནི་ འི་ རི་རྦོ་ འེ་ཀ་ནི་ འ་ཀ་ སོང་ ཟེར་ནི་ ཆེན་, ཡང་ ཁྱི་ཞ་རྒུན་ལ་ ཅོ་ མི་ཉེན་ཤིག་ ཅང་ མི་ཡོང་།”

ཡི་ཤུའི་ ཁོ་རང་ ཀྲོང་ཤེ་ ཧོར་ལ་ ཡང་ མོལ་།

21 འིན་ན་ ཡུ་ཙོག་སེ་ རྡུད་རྒུན་ མོ་ལམ་ འདང་ ཉུང་ནེ་ལ་ འདེད་ཅེ་ རྒྱུད་ཏེ་ མ་ནི་ ཕིང་ ཉེན་ནེ་ མག་། 22 ལོབ་ཀྲུག་ ཅུག་ཉི་རྦོ་ འགཱ་ལིལ་ལེ་ ཡུལ་ཞོང་ངེ་ན་ ཛོམ་འདེ་ ཡོད་ཏུའི་, ཁོང་རྒུན་ལ་ ཡི་ཤུའི་ མོལ་, “མི་རིག་རྒེ་པུ་ འགོམ་ཧོར་ ཏྃ་རྡེ་ འགྲ་ཝོ་རྒུ་ནི་ ལག་ལ་ ལྟེ་རྡེན་། 23 ཁོང་རྒུ་ནི་ ཁོ་ སེད་རྡེན་ ཡང་ ཞག་ སུམ་པེ་ ཞག་ལ་ སོན་པོ་ ལྃ་ཤུག་རྒེ་ ཛེ་རྡེན་།” ལོབ་ཀྲུག་རྒུ་ནི་ སེམ་ ཚེར་ཧེ་ ཀང་།

ཀོན་འཇོག་རྒེ་ ཁང་པེ་ཕི་ ཁྲལ་ ཤལ་ཤེ་།

24 ཡི་ཤུ་ རྡང་ ཁོང་ངེ་ ལོབ་ཀྲུག་རྒུན་ ཀ་ཕར་ན་ཧུམ་མེ་ ཀྲོང་ཁྱེར་ལ་ ལེབ་རྦེ་རྡང་, ཀོན་འཇོག་རྒེ་ ཁང་པེ་ ཁྲལ་ རྡུ་ཀན་འབོ་ པི་ཏྲར་ས་ ཡོྃ་རྡེ་ འདྲི་, “ཁྱེ་རང་ངེ་ ལོབ་རྦོན་ནེ་ ཀོན་འཇོག་རྒེ་ ཁང་པེ་ཕི་ ཁྲལ་ ཤལ་ལེ་ མ་ནོག་རྒེ་?”

25 པི་ཏྲ་རེ་ ཟེར་, “ཤལ་ལེ་ ཛེ་རྡེ་ནོག་།” པི་ཏྲར་ ནང་ལ་ ཡོང་ངེ་རྡང་ ཁོའེ་ ཟེར་རེ་སང་ ངུལ་ལ་ ཡི་ཤུའི་ འདྲི་ ཛེད་, “ཤི་མོན་, ཅི་ ས་མེ་རག་? འཇིག་རྟེན་ནེ་ རྒྱ་སྤོ་རྒུ་ནི་ ཁྲལ་ སུའི་ཀ་ནི་ ནེན་འདུག་, ཁོ་རང་ངེ་ ཕྲུ་རྒུ་ཀ་ནི་ ནེན་འདུག་རྒེ་ ཡ་ ཞེན་མེ་ ཀ་ནེ་?”

26 པི་ཏྲ་རེ་ ལེན་ཏྃ་, “ཞེན་མ་རྒུ་ནི་ཀ་ནི་།” ཡི་ཤུའི་ མོལ་, “ཏེ་ནི་ ཕྲུ་རྒུ་རྒུ་ནི་ ཁྲལ་ ཤལ་ མི་རྒོའེ་། 27 འིན་ན་ ཁོང་རྒུན་ལ་ ཨ་ཧོའེ་ཀ་ སྲོ་ མི་ཡོང་ཅེ་ཕི་ ཚོ་ སོང་འདེ་ ཉ་ཀུག་ ཏོང་, ཡང་ ཉ་ འགོ་མ་ ཟུམ་ཀན་འབེ་ ཁ་ པེ་, ཏེ་ན་ ཁྱེ་རང་ལ་ མུལ་ལེ་ པེ་ནེ་ཞིག་ ཐོབ་རྦེན་། ཏོ་ ཁྱེར་རྡེ་ ཨ་ཧོ་ ཉ་ཧེ་ ཁྲལ་ ཁོང་རྒུན་ལ་ ཤོལ་།”