ཧ་ལེ་ཤེ་ ལྟའ་ ལྟན་ཅེ་ལ་ ཟེར་།
16
པ་རུ་ཤི་པ་རྒུན་ འདང་ ས་འདུ་ཀི་པ་རྒུན་ ཡོྃ་རྡེ་ ཡི་ཤུ་ ཐི་ཚོད་ལྟོའེ་རྡེ་ ཁོང་ལ་ ཀོན་འཇོག་རྒེ་ ཝང་ཆ་ སལ་ཧན་འབོ་ ནེན་ཏེན་ ཅོ་ཅེ་ལ་ ནམ་ཀ་ནི་ ལྟའ་ཞིག་ ལྟོན་ ཟེར་།2 ཁོང་ངེ་ ལེན་སལ་, “ཕི་ཏོག་ ནམ་ མར་སྤོ་ ཡོད་རྡེ་ ཐོང་ནི་ ཁྱི་ཞི་ ཐོ་རེ་ ནམ་ལ་ རྒྱ་ལེ་ ཡོང་ངེ་ནོག་ ཟེར་རྡུག་, 3 ཡང་ ང་ཏོག་ སྲིན་ནག་ ཀང་འདེ་ ནམ་ཚུབ་ཏེ་ ཐོང་ནི་, ཏི་རིང་ ལུང་ཀྲག་ ཏང་ ཆར་སྤ་ ཏྃ་ནོག་ ཟེར་རྡུག་། ཁྱི་ཞ་རྒུ་ནི་ ནམ་ཀེ་ན་ སོང་ཀ་ནེ་ ནམ་ལེ་ ལྟའ་རྒུན་ ཤེད་ཉེན་འདུག་, འིན་ན་ ཁྱི་ཞ་རྒུ་ནི་ འི་ཏུའི་རྡེ་ ལྟའ་རྒུན་ ཅེ་ ཤེད་ཉེན་ནེ་ མེ་རག་? 4 ངན་པ་ མི་རབ་ ལོག་ཡེམ་ འདང་ ཀོན་འཇོག་ལ་ རྡེན་ཆེ་ཤེ་ མེ་ཀན་རྒུ་ནི་ ནམ་ཀ་ནི་ ལྟའ་ ལྟོན་ ཟེར་རེ་ནོག་། འིན་ན་ ལུང་རྟོན་པ་ ཡོ་ནཱེ་ ལྟའ་རྦོ་ མ་ནི་ ཡང་ ལྟའ་ཞིག་ མི་ལྟན་།” ཏེ་ནི་ ཁོང་ ཁོ་རང་ངེ་ ལོབ་ཀྲུག་རྒུན་ ཉམ་པོ་ ཏེ་ཀ་ནི་ རྐྱོད་།
ཟུའི་མེ་ ལབ་ཞ་རྒུ་ནི་ཀ་ནི་ ཤང་ ཧུལ་།
5 ཚོའེ་ ཕར་ཧ་ལ་ ལེབ་རྦེ་རྡང་ ལོབ་ཀྲུག་རྒུན་ལ་ ཏི་རྒིར་ ཁུར་རེ་ལ་ ཞེད་ཀན་འབོ་ འི་ཏུ་ ཡོྃ་། 6 ཡི་ཤུའི་ ཁོང་རྒུན་ལ་ མོལ་, “པ་རུ་ཤི་པ་ རྡང་ ས་འདུ་ཀི་པེ་ རྐྱུར་མེ་ཀ་ནི་ ཤང་ ཅོའེ་།”
7 ཁོང་རྒུ་ནི་ ཅིག་ ཏང་ ཅིག་ལ་ ཟེར་, “ཨ་ཧོའེ་ ཏི་རྒིར་ ཁུར་རྡེ་ མེད་པེ་ ཁོང་ངེ་ ཏོ་ མོལ་རྡེ་ ནོག་རྒེ་?” 8 ཡི་ཤུའི་ ཏོ་ ཁྱེན་འདེ་ འདྲི་ ཛེད་, “ཁྱི་ཞ་ ཏེཏ་པ་ ཉུང་ཙེ་རྒུན་, ཏི་རྒིར་ མེ་ཀ་ནེ་ ཧོར་ལ་ ཁྱི་ཞ་རྒུ་ནི་ ཅེ་ སྤེ་ར་ ཏང་ངེ་ཡོད་? 9 ཏ་རུང་ང་ ཁྱི་ཞ་རྒུན་ལ་ ཧ་མ་ཀོ་རྡེ་? འི་ཏུ་ མེ་རག་རྒེ་ ཏི་རྒིར་ ང་ནི་ མི་ ལྟོང་ང་ འགྲྃ་ཤུག་ཏེ་ ལུའི་ཧན་ནེ་ ཏི་རྒིར་ ཁྱི་ཞི་ རྡུའི་རྦེ་ ཙེ་སྤོ་ ཙམ་ ཀང་, 10 ཡང་ ཏི་རྒིར་ རྡུན་ནེ་ མི་ ལྟོང་ཞི་ འགྲྃ་ཤུག་ཏེ་ ལུའི་ཧན་ནེ་ ཏི་རྒིར་ ཁྱི་ཞི་ རྡུའི་རྦེ་ ཙེ་སྤོ་ ཙམ་ ཀང་? 11 ངེ་ ཏི་རྒིར་ ཧོར་ལ་ སྤེ་ར་ ཏྃ་རྡེ་ མན་ཀན་འབོ་ ཁྱི་ཞི་ ཅེ་ ཧ་ཀོ་ མེ་རག་? འིན་ན་ པ་རུ་ཤི་པ་ རྡང་ ས་འདུ་ཀི་པེ་ རྐྱུར་རེ་ཀ་ནི་ ཤང་ ཅོའེ་།”
12 ཏེ་ནི་ ཁོང་རྒུན་ལ་ ཏི་རྒིར་ ཅོ་ཅེ་ལ་ ཀོལ་ཧ་ནེ་ རྐྱུར་རེ་ ཧོར་ མན་ཀན་, པ་རུ་ཤི་པ་ རྡང་ ས་འདུ་ཀི་པེ་ ལབ་ཞ་རྒུ་ནི་ ཤང་ ཅོ་ཅེ་ལ་ ཞུའི་ཧན་འབོ་ ཧ་ཀོ་།
པི་ཏྲ་རེ་ ཡི་ཤུ་ སུ་ འིན་ཀན་འབོ་ ཤེད་།
13 ཡི་ཤུ་ ཀཱེ་ས་རི་ཡ་ ཕི་ལི་པི་ ཡུལ་ཞོང་ལ་ ལེབ་རྦེ་རྡང་, ཁོང་ངེ་ ཁོ་རང་ངེ་ ལོབ་ཀྲུག་རྒུན་ལ་ འདྲི་ ཛེད་, “མི་རྒུ་ནི་ མི་རིག་རྒེ་པུ་ སུ་ ནོག་ ཟེར་རྡུག་?”
14 ཁོང་རྒུ་ནི་ ལེན་ཏྃ་, “ཁ་ཅིག་རྒེ་ ཁྲུའི་སལ་ཧན་ ཡོ་ཧཱ་ནན་, ཁ་ཅིག་རྒེ་ ལུང་རྟོན་པ་ ཨེ་ལི་ཡཱ་ ཡང་ ཞེན་མ་རྒུ་ནི་ ལུང་རྟོན་པ་ ཡེ་རེམ་ཡཱ་ ཡང་ ལུང་རྟོན་པ་རྒུ་ནི་ ཕྲོ་ནི་ ཅིག་ཅིག་ ཞུ་རྡེ་ནོག་ ཟེར་རྡུག་།”
15 “འིན་ན་ ཁྱི་ཞི་ ཅི་ ས་མེ་རག་?” ཡི་ཤུའི་ འདྲི་ ཛེད་, “ང་ སུ་ ནོག་?”
16 ཤི་མོན་ པི་ཏྲ་རེ་ ལེན་ཏྃ་, “ཉེ་རང་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་, སོན་པོ་ ཀོན་འཇོག་རྒེ་ སྲེ་ ནོག་།”
17 ཡི་ཤུའི་ མོལ་, “ཡོ་ནཱེ་ པུ་ཙ་ ཤི་མོན་ ཁྱེ་རང་ ཅིན་ལབ་ཅེན་ ནོག་། ཏོ་ ཁྱེ་རང་ལ་ མི་ ཆོག་ནི་ མག་ ངེ་ རྡེ་བ་ཅན་ནེ་ ཡབ་རྦེ་ ངོན་ཅུག་རྒེ་ ཛེད་ཏེ་ འིན་། 18 ངེ་ ཁྱེ་རང་ལ་ ཟེ་འིན་, ཁྱེ་རང་ པི་ཏྲར་a ཡིན་ནོག་, ཡང་ འི་ ཀྲག་རྒེ་ཀ་ ངེ་ ང་རང་ངེ་ ཆོའེ་ཚོག་ སིག་རྒེན་། རྡུད་རྡེ་ ཝང་ངེ་ ངེ་ ཆོའེ་ཚོག་ལ་ ཕམ་ཀལ་ མ་ནི་ མི་ཉེན་།b 19 རྡེ་བ་ཅན་ནེ་ རྒྱལ་སྲིད་རྡེ་ ཀུ་ལིག་རྒུན་ ངེ་ ཁྱེ་རང་ལ་ ཏང་ངེན་། འཇིག་རྟེན་ནེ་ཀ་ ཁྱེ་རང་ངེ་ རྒོང་སྤ་ མ་ཏང་ཀན་འབོ་ལ་ རྡེ་བ་ཅན་ནེ་ ཀོན་འཇོག་རྒེ་ལ་ རྒོང་སྤ་ སལ་ལེ་ མི་ཛེད་, ཡང་ འཇིག་རྟེན་ནེ་ཀ་ ཁྱེ་རང་ངེ་ རྒོང་སྤ་ ཏང་ཀན་འབོ་ལ་ རྡེ་བ་ཅན་ནེ་ ཀོན་འཇོག་རྒེ་ལ་ རྒོང་སྤ་ སལ་ལེ་ ཛེ་རྡེན་།”
20 ཏེ་ནི་ ཁོ་རང་ངེ་ ལོབ་ཀྲུག་རྒུན་ལ་ ཁོང་ མ་ཤི་ཀ་ འིན་ཀན་འབོ་ སུ་ལ་ མ་ཤེད་ མོལ་རྡེ་ ཀཱ་ སལ་།
ཡི་ཤུའི་ ཁོ་རང་ ཀྲོྃ་ཤེ་ ཧོར་ལ་ ལུང་རྟན་ ཛེད་།
21 ཏི་ནི་ཕ་ལ་ ཡི་ཤུའི་ ཁོ་རང་ངེ་ ལོབ་ཀྲུག་རྒུན་ལ་, ཁོང་ ཡེ་རུ་ཤ་ལེམ་ལ་ སོང་འདེ་ ཡ་ཧུ་འདཱ་པེ་ འུ་རྐྱོང་རྒུན་, ལ་མ་ འུ་རྐྱོང་རྒུན་ འདང་ ཆོའེ་ཁྲིམ་ལ་ ཁེ་སྤ་རྒུ་ནི་ རྡུ་ངལ་ མང་པོ་ ལྟན་འདེ་ སེད་ཅེ་ ཡང་ ཞག་ སུམ་པེ་ ཞག་ལ་ སོན་པོ་ ལྃ་ཤེ་ ཧོར་རྒུན་ ཧ་ཀོ་ཅུག་ཅེ་ འགོ་ཟུག་ ཛེད་།
22 པི་ཏྲ་རེ་ ཁོང་ སོ་སོ་ ཁྱེར་རྡེ་ ཁར་རྐྱག ཏྃ་ ཡང་ ཟེར་, “ཙོབོ་ལེ་, ཏུ་ཟུག་ ཀོན་འཇོག་རྒེ་ ཆ་ཅུག་རྒེ་ མི་ཛེད་། ཉེ་རང་ལ་ འི་ཟུག་ མ་ནི་ ཆ་ མ་རྒོའེ་།”
23 ཡི་ཤུའི་ པི་ཏྲར་ ཆོག་ལ་ ཟི་རྡེ་ མོལ་, “རྡུད་, ང་ས་ནི་ ཐག་རིང་ལ་ སོང་། ཁྱེ་རང་ངེ་ ང་ རྒག་ཅེ་ ཅོ་ནོག་། ཁྱེ་རང་ངེ་ སམ་ཚུལ་ ཀོན་འཇོག་རྒེ་ ཆོག་ནི་ མ་ནོག་, མི་ ཆོག་ནི་ ནོག་།”
24 ཏེ་ནི་ ཡི་ཤུའི་ ཁོ་རང་ངེ་ ལོབ་ཀྲུག་རྒུན་ལ་ མོལ་, “ངེ་ ལྟིང་འགྲྃ་ནི་ ཡོང་ལ་ ཐེད་ཀན་རྒུན་, རང་འདོད་ ཕྃ་རྡེ་ རང་ངེ་ རྡུ་ངལ་ལེ་ རྐྱང་ཤིང་ ཁུར་རྡེ་ ང་ འགྲྃ་རྒོའེ་། 25 རང་སྲོག་ རྐྱོབ་ཉིན་ ཡོ་ཀན་རྒུ་ནི་ རྡེན་འབེ་ མི་ཙེ་ རྐྱལ་ལེན་, འིན་ན་ ངེ་ཕི་ ཁོ་རང་ངེ་ སྲོག་ རྐྱལ་ཧན་རྒུན་ལ་ རྡེན་འབེ་ མི་ཙེ་རྦོ་ ཐོབ་རྦེན་། 26 མི་ཞིག་ལ་ འཇིག་རྟེན་ སོན་ཏེ་ ཐོབ་ཏེ་ལ་ རང་ངེ་ ཐ་མེད་པེ་ མི་ཙེ་ རྐྱལ་ནི་ ཅི་ ཕན་ཏོག་, ཡང་ ཏོ་རྦེ་ ཚབ་ལ་ མི་ཞིག་རྒེ་ ཅི་ ཏང་ཉེན་ནེན་? 27 མི་རིག་རྒེ་པུ་ རྡེ་བ་ཅན་ནེ་ ཡབ་རྦེ་ ཟི་ཞིད་རྡེ་ན་ ཁོང་ངེ་ ཕོ་ཉ་ ཉམ་པོ་ ཡོྃ་རྡེ་, མི་ རེ་རེ་ལ་ རང་རང་ངེ་ ལེ་ཧ་ ནང་ཞིན་ སོལ་རེ་ ཏང་ངེན་། 28 ངེ་ ཁྱི་ཞ་ རྡེན་འབའ་ ཟེ་འིན་, འེ་ཀ་ ཡོ་ཀན་ ཁ་ཅིག་རྒེ་ མི་རིག་རྒེ་པུ་ ཁོ་རང་ངེ་ རྒྱལ་སྲིད་རྡེ་ན་ རྐྱོད་ཅེ་རྦོ་ ཐོང་འདེ་ མ་ནི་ མི་ཤི་།”