ཡོ་ཧཱ་ནན་ ཀྲོང་ཧ་ནེ་ ཧོར་།
14
ཏེ་རྒ་ ཏུའི་ལ་ ཀ་ལོན་ ཧེ་རོད་ལ་ ཡི་ཤུའི་ ཆག་ལེ་རྒུ་ནི་ ཧོར་ལ་ ཚོར་རྡེ་ 2 ཁོའེ་, ཁོ་ ཁ་རྡ་ ཏང་ཀན་རྒུན་ལ་ ཟེར་, “འི་ མིའུ་ ཁྲུའི་སལ་ཧན་ ཡོ་ཧཱ་ནན་ ནོག་, ཁོང་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཅེ་ཀ་ནི་ ཁོང་ངེ་ ཛེད་པ་ ལྟན་ཅེ་ ཁྱུད་ ཡོད་ཏེ་ ནོག་།”3 ཧེ་རོད་འདེ་ ཡོ་ཧཱ་ནན་ ཟུམ་འདེ་ ལྕ་རྟག་ལ་ ཀྱི་རྡེ་ ཙོན་ཁང་ལ་ ཧར་ཤུག་ཏེ་ འིན་འབེན་། ཁོའེ་ ཏོ་ ཁོ་རང་ངེ་ ཨ་ཅོ་ ཕི་ལིབ་རྦེ་ ན་མ་ ཧེ་རོ་འདི་ཕི་ ཅོའེ་, 4 ཅེ་ཟེར་ནི་ ཡོ་ཧཱ་ནན་ནེ་ ཧེ་རོད་ལ་ མོལ་ལེ་ཡོད་པེན་, “ཁྱེ་རང་ངེ་ ཨ་ཅོའེ་ ན་མ་ ཉམ་པོ་ ན་མ་ ཅོ་ཅེའོ་ ཀོན་འཇོག་རྒེ་ ཁྲིམ་མེ་ རྒྱཔ་འགལ་ ནོག་།” 5 ཧེ་རོད་ལ་ ཡོ་ཧཱ་ནན་ སེད་ཉིན་ ཡོད་པེན་, འིན་ན་ མི་ཚོག་ལ་ འཇིའི་རྡེ་ཡོད་པེན་ ཅེ་ཟེར་ནི་ ཁོང་རྒུ་ནི་ ཡོ་ཧཱ་ནན་ལ་ ལུང་རྟོན་པ་ སི་རྒེ་ཡོད་པེན་།
6 འིན་ན་ ཧེ་རོད་འདེ་ རྐྱེ་ཞག་རྒེ་ ཞག་ལ་, འགྲོན་པོ་རྒུ་ནི་ འདུན་ལ་ ཧེ་རོ་འདི་ པོ་མེ་ སེ་ ཏྃ་རྡེ་ ཧེ་རོད་ སྲན་ཀྲེ་ ཐེད་ཅུག་པེ་, 7 ཁོའེ་ པོ་མོ་ལ་ ཅི་ རྒོའེ་ནང་ ཏང་ངེན་ ཟེར་རྡེ་ ནའ་ ཁུར་། 8 པོ་མེ་ ཨ་མེ་ ཟེར་ཧན་ ནང་ཞིན་, “ང་ ཁྲུའི་སལ་ཧན་ ཡོ་ཧཱ་ནན་ནེ་ འགོ་ ཐ་ལི་ཞིག་རྒེ་ཀ་ སལ་” ཟེར་། 9 རྒྱ་སྤོ་ ཚེར་ འིན་ན་ འགྲོན་པོ་རྒུ་ནི་ འདུན་ལ་ ནའ་ ཁུར་ཧན་འབེ་ ཅོའེ་རྡེ་ པོ་མོ་ལ་ རྒོའེ་ཧན་འབོ་ ཏོང་ ཟེར་རྡེ་ ཀཱ་ ཏྃ་། 10 ཏེ་ནི་ ཙོན་ཁང་ངེ་ན་ ཡོ་ཧཱ་ནན་ནེ་ འགོ་ ཅེད་ཏེ་ 11 ཐ་ལི་ཀ་ ཁྱོྃ་རྡེ་ ཧེ་རོ་འདི་ པོ་མོ་ལ་ ཏྃ་། པོ་མེ་ ཏོ་ ཁོ་རང་ངེ་ ཨ་མ་ས་ ཁྱོྃ་། 12 ཡོ་ཧཱ་ནན་ནེ་ ལོབ་ཀྲུག་རྒུན་ ཡོྃ་རྡེ་ ཁོང་ངེ་ སྤུར་རྦོ་ ཁྱེར་རྡེ་ ཧུྃ་། ཏེ་ནི་ ཁོང་རྒུན་ སོང་འདེ་ ཡི་ཤུ་ ཤེད་།
མི་ ལྟོང་ང་ འགྲྃ་ཤུག་རྒེ་ ཛེད་།
13 ཡི་ཤུའི་ ཏོ་ སོང་ཀན་འབོ་ སེན་ནེ་རྡང་ ཁོ་རང་ངེ་ ལོབ་ཀྲུག་རྒུན་ ཉམ་པོ་ ཆུ་འགྲུལ་ཞིག་རྒེ་ན་ ཞོན་འདེ་ སུ་ལ་ མེད་སེ་ མལ་ཞིག་ལ་ རྐྱོད་། མི་ཚོག་ལ་ ཏོ་ ཚོར་རེ་རྡང་ ཀྲོང་ཁྱེར་རྒུ་ནི་ འབིང་འདེ་ ཡི་ཤུ་ རྐྱོད་སེ་ མལ་ལ་ འགྲུལ་རྡེ་ སོང་། 14 ཆུ་འགྲུལ་ནི་ པབ་ཏེ་ ཡི་ཤུའི་ མི་ཚོག་ མང་པོ་ ཟི་རྡེ་རྡང་, ཁོང་ལ་ ཁོང་རྒུ་ནི་ཀ་ ཉིང་ཞེ་ རྐྱེ་ ཛེད་ཏེ་ ནེད་པ་རྒུན་ རྒྱལ་ཅུག་རྒེ་ ཛེད་།
15 ཉི་མ་ རྐྱོད་རྡེ་རྡང་ ལོབ་ཀྲུག་རྒུན་ ཁོང་ས་ ཡོྃ་རྡེ་ ཟེར་, “འགམ་ཡུལ་རྒུན་ལ་ སོང་འདེ་ ཁོ་རང་རྒུ་ནི་ཕི་ ཁར་ཞི་ ཉོ་ཅེ་ལ་ མི་ཚོག་པོ་ ལམ་ཅུག་རྒེ་ ཛེད་རྡང་ ཅེ་ཟེར་ནི་ ཨ་ཧོ་རྒུན་ ཅང་ མེད་སེ་ རི་ལྟོང་ངེ་ན་ ནོག་ ཡང་ ནམ་ཅུ་ལ་ རུ་ཀྱི་ འདུག་།”
16 ཡི་ཤུའི་ ལེན་སལ་, “ཁོང་རྒུན་ ཆ་རྒོའེ་ མེད་། ཁྱི་ཞི་ ཁོང་རྒུན་ལ་ ཟ་ཅེ་ ཏོང་།”
17 ཁོང་རྒུ་ནི་ ཟེར་, “ང་ཞི་ ལག་ལ་ ཏི་རྒིར་ ང་ རྡང་ ཉ་ ཉི་ མ་ནི་ མེད་།”
18 ཡི་ཤུའི་ མོལ་ “ཏོ་རྒུན་ ངེ་ཀ་ ཁྱོང་།” 19 ཏེ་ནི་ མི་ཚོག་པོ་ལ་ སེ་ཀ་ འདེད་ཅེ་ལ་ མོལ་། ཏི་རྒིར་ ང་ རྡང་ ཉ་ ཉི་རྦོ་ ཆག་ལ་ ནམ་ ཡང་ ནམ་ཀ་ ཟི་རྡེ་ ཀོན་འཇོག་ལ་ ཐུག་ཞེ་ཆེ་ ཞུའི་, ཏི་རྒིར་ ཅག་ཏེ་ མི་ཚོག་ལ་ རྒོ་ཅེ་ཕི་ ལོབ་ཀྲུག་རྒུན་ལ་ སལ་ལེ་ ཛེད་། 20 ཁོང་ ཚང་མ་ འགྲྃ་འགྲྃ་ ཟོའེ་ ཡང་ ལོབ་ཀྲུག་རྒུ་ནི་ ལག་ལུའི་རྒུན་ རྡུའི་རྦེ་ ཙེ་སྤོ་ ཅུག་ཉི་ ཀང་། 21 པོ་མོ་ རྡང་ ཕྲུ་རྒུ་རྒུན་ མ་ཐེ་ལ་ ལྟོང་ང་ ཟམ་ཤིག་ ཏུ་རུ་ ཁར་ཞི་ ཟ་ཀན་ ཡོད་པེན་།
ཡི་ཤུ་ ཚོའེ་ཀ་ ཞཔ་འགྲུལ་ ཛེད་།
22 ཏེ་རྒ་མ་རྒ་ ཡི་ཤུའི་ མི་ཚོག་པོ་ ལོག་ཏེ་ ལམ་ཅུག་རྒེ་ ཛེད་ཟ་ནི་ ཁོང་ངེ་ ལོབ་ཀྲུག་རྒུན་ ཁོ་རང་ངེ་སང་ ངུལ་ལ་ ཆུ་འགྲུལ་ལེ་ན་ ཚོའེ་ འ་ངོ་ ཆོག་ལ་ ལམ་ཅུག་རྒེ་ ཛེད་། 23 མི་ཚོག་ ལོག་ཏེ་ ལམ་ཅུག་ ཚར་རེ་རྡང་ ཡི་ཤུ་ ཅིག་པོ་ རི་ཀ་ མོ་ལམ་ ཞུ་ལ་ རྐྱོད་། ཁོང་ ཏུ་རུ་ ཅིག་པོ་ ཡོད་རྡེ་ ཏུའི་ ནམ་ཅུ་རུག་།
24 ཏེ་རྒ་ ཏུའི་ལ་ ཆུ་འགྲུལ་རྦོ་ ས་ཀྱེཏ་ནི་ ཐག་རིང་ལ་ ལེབ་ཏེ་ ཡོད་ཟ་ནི་, འདུན་ནེ་ ལུང་སྤོ་ ཀྲག་པོ་ ཡོྃ་རྦེ་ ཆུལ་རྦག་ ཆུ་འགྲུལ་ལ་ རྒྱབ་། 25 ཧ་ལམ་ ང་ཏོག་ ཆུ་ཙོད་ སུམ་པ་ཞིག་རྒེ་ཀ་ ཡི་ཤུ་ ཚོའེ་ཀ་ནི་ འགྲུ་ལེན་ ལོབ་ཀྲུག་རྒུན་ས་ རྐྱོད་། 26 ལོབ་ཀྲུག་རྒུ་ནི་ ཡི་ཤུ་ ཚོའེ་ཀ་ནི་ ཞཔ་འགྲུལ་ལ་ རྐྱོད་རྡེ་ ཐོང་ངེ་རྡང་ ཧོཔ་ འཇིའི་རྡེ་, ཀུ་ཅུ་ ཏང་ངེན་ “ལན་འདྲེ་ ནོག་།” ཟེར་།
27 འིན་ན་ ཏེ་རྒ་མ་རྒ་ ཡི་ཤུའི་ ཁོང་རྒུན་ལ་ མོལ་, “འཇིའི་ མ་འཇིའི་ ང་ འིན་། ཧམ་བ་ ཅོའེ་།”
28 པི་ཏྲ་རེ་ ལེན་ཏྃ་, “ཙོབོ་ ཉེ་རང་ འིན་ནེ་ ང་ ཆུའི་ཀ་ འགྲུལ་རྡེ་ ཉེ་རང་ས་ ཤོག་ མོལ་ལ་།”
29 ཡི་ཤུའི་, “ཤོག་” མོལ་།
པི་ཏྲར་ ཆུ་འགྲུལ་ནི་ པབ་ཏེ་ ཆུའི་ཀ་ འགྲུ་ལེན་ ཡི་ཤུ་ས་ སོང་། 30 འིན་ན་ ལུང་སྤོ་ སྲན་ཀྲེ་ རྡང་ ཆུལ་རྦག་ ཐོང་ངེ་རྡང་ ཁོ་ འཇིའི་ ཡང་ ནུབ་ཅེ་ འགོ་ཟུག་པེ་ ཀུ་ཅུ་ ཏྃ་རྡེ་ ཟེར་, “ཙོབོ་ལེ་, ང་ རྐྱོབ་རྦེ་ཛེད་།”
31 ཏེ་རྒ་མ་རྒ་ ཡི་ཤུའི་ ཆག་ རྐྱང་ངེ་ ཛེད་ཏེ་ ཁོ་ ཟུམ་, “ཏེཏ་པ་ ཉུང་ཙེ་ ཡོ་ཀན་ ཁྱེ་རང་ངེ་ ཐེ་ཚོམ་ ཅེ་ ཅོའེན་?” མོལ་།
32 ཁོང་ ཉ་ཧ་ ཆུ་འགྲུལ་ལེ་ན་ ཞོན་ནེ་རྡང་ ལུང་སྤོ་ ཆེད་། 33 ཆུ་འགྲུལ་ལེ་ན་ ཡོ་ཀན་རྒུ་ནི་ ཁོང་ལ་ ཅོལ་ལེན་ ཟེར་, “རྡེན་འབའ་, ཉེ་རང་ ཀོན་འཇོག་རྒེ་ སྲེ་ ནོག་།”
34 ཁོང་རྒུན་ ཚོའེ་ འ་ངོ་ ཆོག་ལ་ རྐྱོད་ ཡང་ ཆུའི་ ཐ་མ་ འགེ་ནེ་ས་རེད་རྡེ་ ཀྲོང་ཁྱེར་ལ་ ལེཔ་། 35 ཏེ་ ཀྲོང་ཁྱེར་པ་རྒུ་ནི་ ཡི་ཤུ་ འིན་ཀན་འབོ་ ངོ་ཤེ་རྦེ་ ཉེ་ཁོར་རེ་ མལ་ ཚང་མ་ལ་ ཡི་ཤུ་ རྐྱོད་ཏེ་ འདུག་ ཟེར་རྡེ་ ཁྲིན་ ཀལ་། མི་རྒུ་ནི་ ཟུར་མོ་ ཡོ་ཀན་ ཚང་མ་ ཁོང་ས་ ཁྱོྃ་། 36 ཁོང་རྒུ་ནི་ ཟུར་མོ་ ཡོ་ཀན་རྒུན་ལ་ ཡི་ཤུའི་ ནམ་ཟེ་ ཀྲུ་ཞིག་ལ་ ལག་པ་ སེ་ཅུག་རྒེ་ ཛེད་ཅེ་ལ་ འཇུ་འཇུ་ ཟེ་རེན་ ཞུ་ཝ་ པུལ་, ཡང་ ཁོང་ངེ་ ནམ་ཟ་ ལག་པ་ སེ་ཀན་ ཚང་མ་ ཕན་།