ཞིང་འབད་པེ་ ས་ངོན་ ཏབ་ཅེ་ སྲུང་ངུ་།
13
ཏེ་རྒ་ ཞག་ལ་ ཡི་ཤུ་ ཁང་པ་ནི་ འབིང་ངེ་ ཛེད་ཏེ་ ཚོའེ་ ཐ་མ་ ཞུའུ་། 2 ཁོང་ས་ མི་ཚོག་ མ་མང་པོ་ ཛོམ་རྡེ་ ཁོང་ ཆུ་འགྲུལ་ལེ་ན་ ཞོན་འདེ་ ཞུའུ་, ཡང་ མི་ ཚང་མ་ ཚོའེ་ ཐ་མ་ འདེད་།3 ཏེ་ནི་ ཁོང་ངེ་ མི་རྒུན་ལ་ སྲུང་ངུ་ རྒྱུད་ཏེ་ ལབ་ཞ་ མང་པོ་ སལ་ལེ་ ཛེད་ཏེ་ མོལ་, “ཉོན་ནྃ་, ཞིང་འབད་པ་ཞིག་ ས་ངོན་ ཏབ་རྦེ་ལ་ སོང་། 4 ཞིང་ལ་ ས་ངོན་ ཏབ་ཟ་ནི་ ཁ་ཅིག་ ལམ་མེ་ཀ་ ཀྲུལ་, ཅ་རྒུན་ ཡོྃ་རྡེ་ ཏོ་རྒུན་ ཟོའེ་། 5 ས་ངོན་ ཁ་ཅིག་ ཐལ་རྦ་ མང་པོ་ མེད་སེ་ ཀྲ་རྒེ་ཀ་ ཀྲུལ་, ཐལ་རྦ་ མང་པོ་ མེད་ཅེ་རྦེ་ ས་ངོན་འབོ་ འགྱོ་སྤ་ རྐྱེ་། 6 འིན་ན་ ཉི་མ་ ཕོག་ཏེ་ ཞིང་ རྐྱེ་ཀན་འབོ་ ཚིག་, ཡང་ པ་ཀྲག་ ཐིལ་ལ་ མེད་ཅེ་ཀ་ནི་, ཏོ་ ཧམ་འདེ་ ཤི་། 7 ས་ངོན་ ཁ་ཅིག་ ཚེར་མེ་ ཕྲོ་ ཀྲུལ་, ཡང་ ཚེར་མ་ རྐྱེ་རྡེ་ ཏོ་ལ་ ནེན་། 8 ཞེན་ ས་ངོན་རྒུན་ ས་ཀྱེཏ་ རྒྱ་ལེ་ ཡོད་སེ་ ཞིང་ངེ་ཀ་ ཀྲུལ་རྦེ་, རྟོན་ཏོག་ མིན་, ཀ་འབོ་ ས་ངོན་ ཏབ་ཀ་ནེ་སང་ སུམ་ཅུ་, ཀྲུག་ཅུ ཡང་ རྒྱ་ ལྡཔ་ཏེ་ མིན་། 9 ནམ་ཅོག་ ཡོ་ཀན་རྒུ་ནི་ ངེ་ ཟེར་ཧན་ལ་ ཉོན་ཧེ་།”
10 ལོབ་ཀྲུག་རྒུན་ ཡོྃ་རྡེ་ ཁོང་ལ་ འདྲི་, “ཉེ་རང་ངེ་ མི་རྒུན་ལ་ སྲུང་ངུ་ རྒྱུད་ཏེ་ ལབ་ཞ་ ཅེ་ སལ་ལེ་ ཛེ་རྡེ་ཡོད་?”
11 ཡི་ཤུའི་ ལེན་སལ་, “རྡེ་བ་ཅན་ནེ་ རྒྱལ་སྲིད་རྡེ་ སང་སྤེར་རྒུན་ ཧ་ཀོ་ཅེ་ ཧབ་ ཁྱི་ཞ་རྒུན་ལ་ སལ་ལེ་ ཛེད་ཏེ་ ནོག་, འིན་ན་ ཁོང་རྒུན་ལ་ མ་སལ་། 12 ངེ་ ལབ་ཞ་ ཉེན་ཀན་རྒུན་ལ་ མང་ངེ་ ཧ་ཀོ་ཅུག་རྒེ་ ཛེ་རྡེན་, མ་ཚེད་ ཁོང་ངེ་ ནང་ནི་ ལུད་ཏེ ཆེན་ འིན་ན་ མ་ཉེན་ཀན་རྒུ་ནི་ ནང་ནི་ ཀ་འབོ་ ཧ་ཀོ་རྡེ་ ཡོ་ཀན་འབོ་ལ་ ཁྱེར་རེ་ ཛེ་རྡེན་། 13 ངེ་ སྲུང་ངུ་ རྒྱུད་ཏེ་ ཤེད་ཅེ་ ཏོན་འབོ་ ཡུ་ འིན་,
ཁོང་རྒུ་ནི་ ལྟ་རུག་ འིན་ན་ ཁོང་རྒུན་ལ་ རྡེན་འབའ་ ཐོང་ངེ་ མི་འདུག་,
ཉེན་འདུག་ འིན་ན་ ཁོང་རྒུན་ལ་ ཚོར་རྡེ་ ཡང་ ཧ་ཀོ་ ཉེན་ནེ་ མི་འདུག་།
14 ཏོ་རྦེ་ ཡེ་ཤ་ཡཱ་ ལུང་རྟོན་པེ་ མ་འོང་པེ་ ལུང་རྟན་འབོ་ ཀྲུཔ་ཏེ་ ནོག་, ཀ་འབོ་
‘ཁོང་རྒུ་ནི་ ངེ་ ཤེད་ཀན་རྒུན་ ཚོར་ནི་ ཧ་ཀོ་ཉེ་ མི་འདུག་,
ཁོང་རྒུ་ནི་ ངེ་ ཅོ་ཀན་རྒུན་ ཐོང་འདེ་ ང་ སུ་ འིན་ཀན་འབོ་ ངོ་ཤེ་རྡེ་ མི་འདུག་།
15 ཅེ་ཟེར་ནི་ ཁོང་རྒུ་ནི་ ཉིང་ ཀྱོང་པོ་ འགྱུར་རྡེ་ འདུག་།
ནམ་ཅོག་རྒུན་ རྒག་རྡེ་ མིག་རྒུན་ ཙུམ་འདེ་ འདུག་
ཏེ་མ་ནི་ ཁོང་རྒུ་ནི་ ནམ་ཅོག་ནི་ ཚོར་རྡེ་ མིག་རྒུ་ནི་ ཐོང་འདེ་,
ཁོང་རྒུ་ནི་ ཉིང་ནི་ ང་ སུ་ འིན་ཀན་འབོ་ ཧ་ཀོ་རྡེ་ ང་ ཆོག་ལ་ སེམ་འགྱུར་རྡེ་,
ངེ་ ཁོང་རྒུན་ ཕན་ཅུག་ཏེ་ ཡོད་ཁྲོ་།’”
16 “འིན་ན་ ཁྱི་ཞི་ མིག་ ཏང་ ནམ་ཅོག་རྒུན་ ཅིན་ལབ་ཅེན་ འིན་ ཅེ་ཟེར་ནི་ ཁྱི་ཞི་ མིག་རྒེ་ ཐོང་ངེ་ནོག་ ཡང་ ནམ་ཅོག་རྒེ་ ཚོར་རེ་ནོག་། 17 ངེ་ ཁྱི་ཞ་ རྡེན་འབའ་ ཟེ་འིན་, ཁྱི་ཞ་རྒུན་ལ་ ཐོང་ཀན་ འདང་ ཚོར་ཧན་རྒུན་, ངུལ་མེ་ ལུང་རྟོན་པ་ རྡང་ མི་ ཀྲང་པོ་ མང་པོ་ཞིག་རྒེ་ ཐོང་ཅེ་ རྡང་ ཚོར་ཤེ་ འདོད་པ་ ཡོད་ནི་ མ་ཐོང་ངེ་ ཡང་ མ་ཚོར་རེ་ འིན་འབེན་།”
18 “ཏ་ ཞིང་འབད་པེ་ ས་ངོན་ ཏབ་ཀ་ནེ་ སྲུང་ངུའི་ ཏོན་འབོ་ ཉོན་། 19 ལམ་ལ་ ས་ངོན་ ཀྲུལ་ཧན་རྒུ་ནི་ རྡེ་བ་ཅན་ནེ་ རྒྱལ་སྲིད་རྡེ་ ཀའ་ ཚོར་རྡེ་ ཧ་མི་ཀོ་ཀན་རྒུན་ ནོག་ ཅེ་ཟེར་ནི་ རྡུད་ ཡོྃ་རྡེ་ ཁོང་རྒུ་ནི་ ཉིང་ངེ་ན་ ཏབ་ཀན་འབོ་ ཀོག་ཏེ་ ཁྱེ་རེ་ནོག་། 20 ཀྲ་རྒེ་ཀ་ ས་ངོན་ ཀྲུལ་ཧན་འབོ་ རྡེ་བ་ཅན་ནེ་ རྒྱལ་སྲིད་རྡེ་ ཀའ་ ཚོར་རེ་རྡང་ ཐེད་པོ་ ཉམ་པོ་ ཏེཏ་པ་ ཅོ་ཀན་རྒུན་ ནོག་། 21 འིན་ན་ ཏོ་ལ་ པ་ཀྲག་ ཐིལ་ལ་ མེད་ཅེ་ཀ་ནི་ ཏུའི་ཡུན་རིང་ མི་ལུའི་། ཁོང་རྒུ་ནི་ ཀེའེ་ན་ ཏེཏ་པ་ ཅོ་ཅེ་རྦེ་ རྡུ་ངལ་ རྡང་ པར་རྡོ་ ཐོང་ངེ་རྡང་ ཏེཏ་པ་ ཕང་ངེན་། 22 ཚེར་མ་རྡེ་ ཕྲོ་ ས་ངོན་ ཀྲུལ་ཧན་འབོ་ ཀོན་འཇོག་རྒེ་ ཀའ་ ཚོར་ཧན་རྒུན་ ནོག་, འིན་ན་ མི་ཙེ་ ཚེར་ཧ་ ཡང་ ནོར་རེ་ འདོད་པ་རྒུ་ནི་ ནེན་ཅེ་འབོ་ ཏོ་ལ་ འབྲེ་རྦུ་ མིན་ནེ་ མག་། 23 འིན་ན་ ས་ཀྱེཏ་ ཟང་པེ་ཀ་ ས་ངོན་ ཀྲུལ་ཧན་འབོ་ ཀོན་འཇོག་རྒེ་ ཀའ་ ཉེན་འདེ་ ཧ་ཀོ་ཀན་རྒུན་ ནོག་, ཡང་ ཁོང་རྒུན་ལ་ འབྲེ་རྦུ་, ས་ངོན་ ཏབ་ཀན་འབེ་སང་ སུམ་ཅུ་, ཀྲུག་ཅུ་, ཡང་ རྒྱ་ ལྡཔ་ཏེ་ མིན་ནེ་ནོག་།”
ཞིང་ངེ་ན་ ས་ངན་པེ་ སྲུང་ངུ་།
24 ཡི་ཤུའི་ ཡང་ སྲུང་ངུ་ཞིག་ ཤེད་རྡེ་ ཛེད་, “རྡེ་བ་ཅན་ནེ་ རྒྱལ་སྲིད་པོ་ ཞིང་འབད་པེ་ ཁོ་རང་ངེ་ ཞིང་ལ་ ས་ངོན་ ཟང་པོ་ ཏབ་ཀན་ ཙོག་སེ་ འིན་། 25 ཚེན་ལ་ ཚང་མ་ ཉིད་ལོག་ཏེ་ ཡོད་ཏུའི་, ཁོའེ་ འགྲ་ཝོ་ ཡོྃ་རྡེ་ ཀྲོ་ ཏབ་ཀ་ནེ་ ཕྲོ་ལ་ ས་ངན་པེ་ ས་ངོན་ ཏབ་ ཡང་ སོང་། 26 ཞིང་ ལྡན་འདེ་ ཉེ་མ་ འབིང་ངེ་རྡང་ ས་ངན་པ་ ཏེ་ཕྲོ་ རྐྱེ་ཀན་འབོ་ ཐོང་།”
27 “ལེ་མི་རྒུན་ ཡོྃ་རྡེ་ སྤོན་འབོ་ལ་ ཟེར་, ‘ཉེ་རང་ངེ་ ཞིང་ལ་ ས་ངོན་ ཟང་པོ་ ཏབ་རྦེ་ མ་ཛེད་པེ་ནེ་? ཏེ་ནི་ ས་ངན་པ་ ཀ་ཟུག་རྒེ་ རྐྱེ་རྡེ་ ནོག་?’”
28 “སྤོན་འབེ་ ཟེར་, ‘འགྲ་ཝེ་ ཏབ་ཏེ་ ནོག་།’ ལེ་མི་རྒུ་ནི་ ཁོ་ ཟེར་, ‘ང་ཞ་ སོང་འདེ་ ས་ངན་པ་རྒུན་ པུད་ཏེ་ ཕང་ངེ་?’”
29 “ཁོའེ་ ལེན་ཏྃ་, ‘མ་ཆ་, ས་ངན་པ་ ཉམ་པོ་ ཀྲོ་ལ་ པུད་ཏེ་ ཡོང་སྲིད་ཅེ་ ནོག་། 30 ངཔ་ས་ ཏང་ཏང་ཚུག་པ་ ཉ་ཧ་ ཉམ་པོ་ རྐྱེ་ཅུག་, ཏེ་ཏུའི་ལ་ ངེ་ ངེ་ཀན་རྒུན་ལ་ ཟེ་རེན་, ངུལ་ལ་ ས་ངན་པ་ ཏུའི་རྡེ་ མེ་ སྲག་རྒེ་ལ་ རྡོམ་, ཏེ་ནི་ ཀྲོ་རྒུན་ པང་ངེ་ན་ ཁྱོང་།’”
ཉུང་ཧར་རེ་ ས་ངོན་ནེ་ སྲུང་ངུ་།
31 ཡི་ཤུའི་ ཡང་ སྲུང་ངུ་ཞིག་ ཤེད་རྡེ་ ཛེད་, “རྡེ་བ་ཅན་ནེ་ རྒྱལ་སྲིད་པོ་ ཉུང་ཧར་རེ་ ས་ངོན་ ཙོག་སེ་ ནོག་ ཀ་འབོ་ མི་ཞིག་རྒེ་ ཁོ་རང་ངེ་ ཞིང་ལ་ ཏབ་རྦེ་ལ་ ཁྱེར་། 32 ས་ངོན་རྒུ་ནི་ ཕྲོ་ནི་ ཏོ་ ཚང་མེ་སང་ ཆུང་ཙེ་ འིན་ན་, ལྡན་ ཚར་རེ་རྡང་ ཚེའེ་ན་ ཚང་མེ་སང་ ཆོན་མོ་ ལྕང་མ་ འགྱུར་, ཡང་ ནམ་ཀེ་ ཅ་རྒུན་ ཡོྃ་རྡེ་ ཏོ་རྦེ་ ཡ་ལག་རྒེ་ཀ་ ཚ་ང་ ཅོའེ་།”
33 ཁོང་ངེ་ ཡང་ སྲུང་ངུ་ཞིག་ ཤེད་རྡེ་ ཛེད་, “རྡེ་བ་ཅན་ནེ་ རྒྱལ་སྲིད་པོ་ རྐྱུར་ ཙོག་སེ་ འིན་, ཀ་འབོ་ པོ་མེ་, ཕེ་ མང་པེ་ན་ སྲེ་རྡེ་ རུའི་རྡེ་ རྐྱུར་རྦོ་ པག་པེ་ སོན་ཏེ་ན་ འདྲེའེ་།”
34 ཡི་ཤུའི་ མི་ཚོག་ལ་ ལབ་ཞ་ སལ་ཟ་ནི་ ཏུའི་རྒྱུན་ སྲུང་ངུ་ ཀོལ་ལེ་ ཛེ་རྡེ་ཡོད་པེན་། ཁོང་ངེ་ སྲུང་ངུ་ རྒྱུད་ཏེ་ མ་ཐེ་ལ་ ཅི་ ལབ་ཞ་ཞིག་ སལ་ལེ་ མེད་པེན་། 35 ཏོ་རྦེ་ ལུང་རྟོན་པ་ རྒྱུད་ཏེ་ ངུལ་ལ་ མོལ་ཧན་རྒུན་ འདྲན་འདྲ་ ཀྲུཔ་ཏེ་ འིན་,
“ངེ་ མི་རྒུན་ལ་ སྲུང་ངུ་ རྒྱུད་ཏེ་ སྤེ་ར་ ཏང་ངེན་།
ཡང་ འཇིག་རྟེན་ ཚུག་རྦེ་ནི་ཕ་ལ་
སྃ་རྡེ་ ཡོ་ཀན་རྒུན་ ཤེད་རྡེན་།”
ས་ངན་པེ་ སྲུང་ངུའི་ ཏོན་།
36 ཏེ་ནི་ ཡི་ཤུ་ མི་ཚོག་པོ་ ཕི་ལོག་ལ་ པོར་རྡེ་ ཁང་པེ་ན་ རྐྱོད་། ཁོང་ངེ་ ལོབ་ཀྲུག་རྒུན་ ཡོྃ་རྡེ་ ཁོང་ལ་ ཟེར་, “ས་ངན་པེ་ སྲུང་ངུའི་ ཏོན་འབོ་ ང་ཞ་ ཧ་ཀོ་ཅུག་རྒེ་ ཛེད་རྡང་།”
37 ཁོང་ངེ་ མོལ་, “ས་ངོན་ ཟང་པོ་ ཏབ་ཀན་འབོ་, མི་རིག་རྒེ་པུ་ འིན་། 38 ཞིང་འབོ་ འཇིག་རྟེན་, ས་ངོན་ ཟང་པོ་ རྡེ་བ་ཅན་ནེ་ རྒྱལ་སྲིད་རྡེ་ མི་རྒུན་, ཡང་ ས་ངན་པ་རྦོ་ ངན་པ་ རྡུད་རྡེ་ མི་རྒུན་ ནོག་། 39 ས་ངན་པ་ ཏབ་ཀ་ནེ་ འགྲ་ཝོ་རྦོ་ རྡུད་, ངཔ་ས་རྦོ་ ཐ་མེ་ ཏུའི་ ཡང་ ངེ་ཀན་རྒུ་ནི་ ཕོ་ཉ་རྒུན་ ནོག་།”
40 “ཐ་མེ་ ཏུའི་ལ་ ས་ངན་ ཏུའི་རྡེ་ མེ་ སྲག་ཀེན་ ཙོག་སེ་ ཆེན་། 41 མི་རིག་རྒེ་པུའི་ ཁོ་རང་ངེ་ ཕོ་ཉ་རྒུན་ ཀ་ལེན་, ཡང་ ཁོང་རྒུ་ནི་ ཁོའེ་ རྒྱལ་སྲིད་རྡེ་ ནང་ནི་ རྡིག་པེ་ རྒྱུ་ ཚང་མ་ རྡང་ ངན་པ་ ཅོ་ཀན་ ཚང་མ་ ཕིང་ངེན་། 42 ཡང་ ཕོ་ཉ་རྒུ་ནི་ ཁོང་ ཚང་མ་ ཉ་ཝེ་ མེ་ན་ ཕང་ངེན་, ཏུ་རུ་ ནག་ སྲན་ཀྲེ་ ཐོང་རྡེ་ ངུ་ཅེ་ རྡང་ སོ་ སིག་ཅེ་ ཡོང་ངེན་། 43 ཏེ་ནི་ མི་ ཀྲང་པོ་རྒུན་ ཁོང་རྒུ་ནི་ རྡེ་བ་ཅན་ནེ་ ཡབ་རྦེ་ རྒྱལ་སྲིད་རྡེ་ན་ ཉི་མ་ ཙོག་སེ་ འདང་ཤེན་ འབར་རེན་། ནམ་ཅོག་ ཡོ་ཀན་རྒུ་ནི་ ངེ་ ཟེར་ཧན་ལ་ ཉོན་ཧེ་།”
རྒྱུ་ནོར་ རིན་ཅེན་ རྦེ་རྡེ་ ཡོ་ཀ་ནེ་ སྲུང་ངུ་།
44 “རྡེ་བ་ཅན་ནེ་ རྒྱལ་སྲིད་པོ་ ཞིང་ངེ་ན་ རྦེ་རྡེ་ ཡོ་ཀ་ནེ་ རྒྱུ་ནོར་ རིན་ཅེན་ ཙོག་སེ་ འིན་། མི་ཞི་ལ་ ཏོ་ ཐོབ་རྦེ་རྡང་ ཐེད་ཏེ་ ཏེ་རྒ་ ཞིང་ངེ་ན་ ཡང་ རྦེ་, ཏེ་ནི་ ཁོ་ སོང་འདེ་ ཡོ་ཀ་ནེ་ ནོར་ ཚང་མ་ ཙོྃ་ ཡང་ ཏེ་ ཞིང་འབོ་ ཉོའེ་།”
45 “རྡེ་བ་ཅན་ནེ་ རྒྱལ་སྲིད་པོ་ ཚོང་པེ་ ཙལ་ཧན་ནེ་ མུ་ཏིག་ ལག་མོ་ རིན་ཅེན་རྒུན་ ཙོག་སེ་ འིན་། 46 མུ་ཏིག་ རིན་ཅེན་ ཐོབ་རྦེ་རྡང་ ཁོ་ སོང་འདེ་ ཁོ་རང་ངེ་ རྒྱུ་ནོར་ ཚང་མ་ ཙོྃ་རྡེ་, ཏོ་རྦོ་ ཉོའེ་།”
ཉ་འདོལ་ལེ་ སྲུང་ངུ་།
47 ཡི་ཤུའི་ མོལ་, “རྡེ་བ་ཅན་ནེ་ རྒྱལ་སྲིད་པོ་ རྒྱམ་ཚོའེ་ན་ ཉ་རི་ ན་ཚོག་ ཟུམ་མེ་ལ་ ཕང་ཀ་ནེ་ ཉ་འདོལ་ ཙོག་སེ་ འིན་། 48 ཉ་འདོལ་རྦོ་ ཀང་ངེ་རྡང་ ཚོའེ་ ཐ་མ་ལ་ ཐེན་འདེ་ ཁྱེར་རེན་, ཐང་ཀེ་ཀ་ འདེད་ཏེ་ ཉ་ རྒྱལ་ལེ་རྒུན་ པག་ཙེ་ན་ རྒྱྃ་ ཡང་ རྒྱ་ལེ་ མེ་ཀན་རྒུན་ ཕྃ་། 49 ཏེ་རྒ་ ཙོག་སེ་ ཐ་མེ་ ཏུའི་ལ་ ཆེན་, ཕོ་ཉ་རྒུན་ རྐྱོད་ཏེ་ མི་ ཀྲང་པོ་རྒུ་ནི་ ཕྲོ་ནི་ ངན་པ་རྒུན་ པེ་ ཛེད་ཏེ་, 50 ཁོང་རྒུན་ ཉ་ཝེ་ མེ་ན་ ཕང་ངེན་, ཏུ་རུ་ ནག་ སྲན་ཀྲེ་ ཐོང་རྡེ་ ངུ་ཅེ་ རྡང་ སོ་ སིག་ཅེ་ ཡོང་ངེན་།” 51 ཡི་ཤུའི་ ཁོང་ངེ་ ལོབ་ཀྲུག་རྒུན་ལ་ འདྲི་ ཛེད་, “འི་ ཚང་མ་ ཁྱི་ཞི་ ཧ་ཀོ་རྡེ་?”
ཁོང་རྒུ་ནི་ ལེན་ཏྃ་, “ཧ་ཀོ་ལེ་།”
52 ཡི་ཤུའི་ ཁོང་རྒུན་ལ་ མོལ་, “ཆོའེ་ཁྲིམ་ ལབ་ཀན་, རྡེ་བ་ཅན་ནེ་ རྒྱལ་སྲིད་རྡེ་ ལོབ་ཀྲུག་ འགྱུར་ཧན་ ཚང་མ་ ཁང་པེ་ རྡག་པོ་ ཙོག་སེ་ འིན་, ཀ་རྦེ་ པང་ཛོད་རྡེ་ ནང་ནི་ རིན་ཅེན་ ནོར་ སོ་མ་ རྡང་ ཉིང་པ་ ཉ་ཧ་ ཕིང་འདེ་ ཁྱོང་ངེ་ནོག་།”
ལུང་རྟོན་པ་ སི་ཝ་ མི་ཐོབ་།
53 ཡི་ཤུའི་ སྲུང་ངུ་ ཤེད་ ཚར་རེ་རྡང་ ཁོང་ ཏེ་ཀ་ནི་ རྐྱོད་། 54 ཁོ་རང་ངེ་ ཀྲོང་ཁྱེར་ལ་ རྐྱོད་ཏེ་ འདུ་ཀང་ངེ་ན་ མི་རྒུན་ལ་ ལབ་ཞ་ སལ་ཅེ་ འགོ་ཟུག་། མི་རྒུན་ ཧ་ལེ་རྡེ་ འདྲི་, “འི་ མིའུ་ལ་ ཤེ་རབ་ ཏང་ ཛེད་པ་རྒུན་ ལྟན་ཅེ་ ཁྱུད་ ཀ་ནི་ ཐོབ་ཀག་? 55 ཁོ་ ཤིང་ཀན་འབེ་ པུ་ཙ་ མ་ནོག་རྒེ་? ཁོའེ་ ཨ་མ་ མར་ཡམ་ ཡང་ ཡ་ཀུབ་, ཡོ་སེབ་, ཤི་མོན་ འདང་ ཡུ་འདཱ་རྒུན་ ཁོའེ་ ནོ་ མ་ནོག་རྒེ་? 56 ཁོའེ་ སྲིང་མོ་ ཚང་མ་ ཨ་ཧོ་རྒུན་ ཉམ་པོ་ མེད་རྡེ་? ཏེ་ནི་ འི་ མིའུ་ལ་ ཏེ་ ཁྱུད་རྒུན་ ཀ་ནི་ ཐོབ་ཀག་?” 57 ཁོང་རྒུ་ནི་ ཁོང་ངེ་ཀ་ ཏེཏ་པ་ མ་ཅོའེ་།