ཡི་ཤུ་ནི་ ངལ་ཚོའེ་ ཞག་ལ་ ཙོབོ་ འིན་།
12
ཏེ་རྒ་ ཏུའི་ཞིག་ལ་ ཡི་ཤུ་ ངལ་ཚོའེ་ ཞག་ལ་ ཞིང་ རྒྱུད་ཏེ་ རྐྱོད་རྡེ་ ཡོད་ཟ་ནི་, ཁོང་ངེ་ ལོབ་ཀྲུག་རྒུན་ ལྟོག་རྡེ་ ཡོད་པེ་ ཞིང་ངེ་ ཉེ་མ་ ཅེད་ཏེ་ ཟ་ཅེ་ འགོ་ཟུག་། 2 ཏོ་ ཐོང་འདེ་ པ་རུ་ཤི་པ་ ཁ་ཅིག་རྒེ་ ཡི་ཤུ་ ཟེར་, “ཁྱེ་རང་ངེ་ ལོབ་ཀྲུག་རྒུ་ནི་ ངལ་ཚོའེ་ ཞག་ལ་ ལེ་ཧ་ ཅོའེ་རྡེ་ ཆོའེ་ཁྲིམ་ ཅག་ཏེ་ ནོག་།”3 ཡི་ཤུའི་ ལེན་སལ་, “འདཱ་འབིད་ ཏང་ ཁོའེ་ ཁྲོ་པ་རྒུན་ ལྟོག་རྡེ་ ཡོད་ཟ་ནི་ ཅི་ཅོའེ་ ཏམ་པེ་ སུང་རབ་རྦེ་ ནང་ནི་ ཁྱི་ཞི་ མ་སིལ་རྦེ་ནེ་? 4 འདཱ་འབིད་ ཀོན་འཇོག་རྒེ་ ཁང་པེ་ན་ ཆོད་པ་ པུལ་སེ་ཀ་ སོང་, ཡང་ ཁོ་ རྡང་ ཁོའེ་ ཁྲོ་པ་རྒུ་ནི་ ཏམ་པེ་ འདོན་ཀིར་ ཟོའེ་རྡེ་ ཆོའེ་ཁྲིམ་ ཅག་, ཏོ་རྦོ་ ཡ་ཧུ་འདཱ་པེ་ ལ་མ་ མ་ནི་ ཟ་ཆོག་རྒེ་ མེད་པེན་། 5 ཡང་ ཆོའེ་ཁྲིམ་མེ་ན་ མ་སིལ་རྦེ་ནེ་, ཀོན་འཇོག་རྒེ་ ཁང་པེ་ན་ ལ་མེ་ ཆོད་པ་ པུལ་ཅེ་ ལེ་ཧ་ ཅོའེ་རྡེ་ ངལ་ཚོའེ་ ཞག་རྒེ་ ཁྲིམ་ ཅག་ནི་ ཀོན་འཇོག་རྒེ་ འདུན་ལ་ ཁོང་རྒུན་ རྐྱོན་མེད་ ནོག་། 6 ངེ་ ཁྱི་ཞ་ ཟེ་འིན་, ཀོན་འཇོག་རྒེ་ ཁང་པེ་སང་ ཀྲ་རྒེ་ཞིག་ འེ་ཀ་ ཡོད་། 7 ཏམ་པེ་ སུང་རབ་རྦེ་ན་ ཀོན་འཇོག་རྒེ་ མོལ་, ‘ངེ་ འདོད་པ་རྦོ་ ང་ སྲོག་ཆོད་ པུལ་ཅེ་ མག་པེ་ ཞེན་མ་ ཉིང་ཞེ་ ལྟན་ཅེ་རྦོ་ འིན་།’ ཀལ་ཏེ་ ཏོ་ ཁྱི་ཞ་རྒུན་ལ་ ཧ་ཀོ་རྡེ་ འིན་འབེན་ནི་ ཏེ་ནི་ ཁྱི་ཞི་ རྐྱོན་མེད་རྒུན་ལ་ ཉེད་ཀལ་རྡེ་ མེད་ཁྲོ་། 8 ཅེ་ཟེར་ནི་ མི་རིག་རྒེ་པུ་ལ་ ངལ་ཚོའེ་ ཞག་ལ་ ཅི་ ཅོ་ ཆོག་ ཡང་ མི་ཆོག་ ཟེར་ཤེ་ ཝང་ཆ་ ཡོད་།”
ངལ་ཚོའེ་ ཞག་ལ་ ནེད་པ་ རྒྱལ་ཅུག་རྒེ་ ཛེད་།
9 ཡི་ཤུ་ ཏེ་ཀ་ནི་ འདུ་ཀང་ལ་ རྐྱོད་, 10 ཏུ་རུ་ ལག་པ་ ཧམ་འདེ་ ཀོལ་ མ་ཉེན་ཀ་ནེ་ མི་ཞིག་ ཡོད་པེན་། པ་རུ་ཤི་པ་རྒུ་ནི་ ཡི་ཤུ་ ཉེད་ཀལ་ཅེ་ལ་ ཁོང་རྒུ་ནི་ འི་ ཏྲི་ཝ་འབོ་ འདྲི་, “ཆོའེ་ཁྲིམ་ ནང་ཞིན་ ངལ་ཚོའེ་ ཞག་ལ་ མི་ཞིག་ རྒྱལ་ཅུག་ནི་ འགྲིག་ཏེ་ ནོག་རྒེ་?”
11 ཡི་ཤུའི་ ཁོང་རྒུན་ལ་ མོལ་, “ཀལ་ཏེ་ ཁྱི་ཞ་ ཅིག་རྒེ་ ལུག་ཞིག་ ངལ་ཚོའེ་ ཞག་ལ་ རྒོ་རོང་ངེ་ན་ ཀྲུལ་ནི་, ཁྱི་ཞི་ ལུག་པོ་ ཟུམ་འདེ་ ཕིང་ མི་ ཕིང་ངེ་? 12 ལུག་རྒེ་སང་ མིའུ་ མང་ངེ་ རིན་ཆེ་ མ་ནོག་རྒེ་། ཏོ་རྦེ་ཕི་ ཆོའེ་ཁྲིམ་ ནང་ཞིན་ ངལ་ཚོའེ་ ཞག་ལ་ ལེ་ཧ་ ཟང་པོ་ ཅོ་ ཆོག་རྒེ་ནོག་།”
13 ཏེ་ནི་ ཡི་ཤུའི་ ལག་པ་ ཧམ་ཀན་འབོ་ལ་ མོལ་, “ལག་པ་ རྐྱོང་” ཡང་ ཁོའེ་ ལག་པ་ རྐྱང་འབེ་ ཏོ་ སིང་ རྒྱལ་རྡེ་ ཞེན་ ལག་པ་ ཙོག་སེ་ ཤེད་ཅེན་ འགྱུར་། 14 འིན་ན་ པ་རུ་ཤི་པ་རྒུན་ ཕི་ལོག་ལ་ སོང་འདེ་, ཡི་ཤུ་ སེད་ཅེ་ ཐབ་ ངན་པ་ ལྡིང་།
ཀོན་འཇོག་རྒེ་ འདམ་མེ་ ཛེད་ཀ་ནེ་ ཞབ་རྟོག་པ་།
15 ཡི་ཤུའི་ ཁོང་རྒུ་ནི་ ཐབ་ལྡིང་ཀན་འབོ་ ཁྱེན་ཅེ་ཀ་ནི་, ཏེ་ཀ་ནི་ རྐྱོད་། མི་ཚོག་ མང་པོ་ཞིག་ ཁོང་ལ་ འགྲྃ་རྡེ་ ཡོྃ་, ཡང་ ཏེ་ ཕྲོ་ ཡོ་ཀ་ནེ་ ནེད་པ་ ཚང་མ་ ཁོང་ངེ་ རྒྱལ་ཅུག་རྒེ་ ཛེད་། 16 ཁོང་ངེ་ རྒྱལ་ཅུག་ཀན་རྒུན་ལ་ ཁོང་ངེ་ ཛེད་ཀན་འབོ་ སུ་ལ་ མ་ཤེད་ མོལ་རྡེ་ ཀཱ་ སལ་། 17 ལུང་རྟོན་པ་ ཡེ་ཤ་ཡཱ་ རྒྱུད་ཏེ་ མོལ་ཧན་ ཚང་མ་ ཀྲུཔ་ཅུག་རྒེ་ ཛེད་ཅེ་ལ་ ཁོང་ངེ་ ཏུ་ཟུག་ ཅོའོ་ ཛེད་། 18 ཀོན་འཇོག་རྒེ་ མོལ་,
“ངེ་ འདམ་ཀ་ནེ་ ཞབ་རྟོག་པ་ ལྟོའེ་
ཚང་མེ་སང་ མང་ངེ་ ཁོ་ ངེ་ ཤེ་སྤ་ ཅོའེན་།
ཡང་ ཁོའེ་ ང་ ཐེད་པོ་ ཆ་ཅུག་ཏུག་།
ཁོ་ ངེ་ ང་རང་ངེ་ ཐུག་ཡིད་ ཏང་ངེན་།
ཁོང་ངེ་ རྡིག་ཅེན་རྒུན་ལ་ ཆེད་པ་ ཕོག་རྒེན་ ཟེར་འདེ་ རྒྱལ་ཁབ་རྒུན་ལ་ མོལ་ལེ་ ཛེ་རྡེན་།
19 ཁོའེ་ ཁྲུག་པ་ ཡང་ ཀུ་ཅུ་ མི་ཏང་,
ཁྲོམ་མེ་ན་ སུ་ཞིག་ལ་ ཁོའེ་ ཀུ་ཅུའི་ ཧད་ མི་ཚོར་།
20 ཁོའེ་ ནེད་ཀ་ནེ་ ལྗང་པ་ མི་ཅག་ ཡང་ ཤི་ཀྱི་ ཡོ་ཀ་ནེ་ འོད་ མི་སེད་
ཏེ་རྒ་ ཙོག་སེ་ ཁོའེ་ ཏེཏ་པེ་ན་ ཉམ་ཤུང་རྒུན་ལ་
ཀྲང་པོ་ ཁྲིམ་ཅེད་རྡེ་ རྒྱལ་ཁ་ ཁྱོང་ཁྱོང་ཚུག་པ་ རྐྱོབ་ཏེ་ པོ་རེ་ ཛེ་རྡེན་།
21 རྒྱལ་ཁབ་རྒུ་ནི་ ཁོའེ་ཀ་ ལོ་ཁྱེལ་ ཅོའེ་རྡེ་
ཁོང་རྒུན་ རྐྱོབ་ཅེ་ རེ་ཝ་ པོ་རེན་།”
ཡི་ཤུའི་ རྒྱཔ་འགལ་ལ་ སྤེ་ར་ ངན་པ་ ཟེར་ཧན་།
22 ཏེ་ནི་ མི་ ཁ་ཅིག་རྒེ་ རྡུད་ ཞུ་ཧན་, ཧ་འགྲང་ འདང་ ཞ་ར་ ཡོ་ཀ་ནེ་ མི་ཞིག་ ཡི་ཤུ་ས་ ཁྱོྃ་། ཁོ་ སྤེ་ར་ ཏང་ཅུག་ཅེ་ རྡང་ ཐོང་ཅུག་ཅེ་ ཐུག་འདོད་ ཡི་ཤུ་ ཡོད་ཅེ་ཀ་ནི་ ཁོང་ངེ་ ཁོ་ ཕན་ཅུག་རྒེ་ ཛེད་། 23 མི་ཚང་མ་ ཧ་ལེ་རྡེ་ ཟེར་, “འི་ མིའུ་ རྒྱ་སྤོ་ འདཱ་འབིད་རྡེ་ ཕར་རྒྱུད་ མག་པེ་ ཀ་འབོ་ལ་ ཨ་ཧོ་རྒུན་ སྲུྃ་རྡེ་ ཡོད་?”
24 འིན་ན་ པ་རུ་ཤི་པ་རྒུ་ནི་ ཏོ་ ཚོར་རེ་རྡང་ ཟེར་, “འབེལ་ཟེ་འབུལ་ རྡུད་རྒུ་ནི་ འགོ་རྦེ་ ཁོ་ རྡུད་རྒུན་ ཕིང་ཅེ་ ཁྱུད་ ཏྃ་རྡེ་ ནོག་།”
25 ཁོང་རྒུ་ནི་ སམ་བ་ ངན་པ་འབོ་ ཡི་ཤུའི་ ཁྱེན་འདེ་ མོལ་, “རྒྱལ་སྲིད་རྡེ་ན་ ཡོ་ཀན་རྒུན་ ཐུན་འདེ་ མ་འདེད་ནི་ ཏོ་ མེ་ཀན་ ཆེན་, ཡང་ རྒྱལ་ས་ ཡང་ ནང་ཚང་ཞིག་རྒེ་ མི་རྒུན་ ནོལ་ལེན་ འདེད་ནི་ ཏོ་རྒུན་ མེ་ཀན་ ཆེན་། 26 ཀལ་ཏེ་ རྡུད་རྡེ་ རྡུད་ ཕིང་ནི་, ཁོའེ་ ཁོ་རང་ངེ་ རྒྱཔ་འགལ་ལ་ ནོལ་རྡེ་ ནོག་, ཏེ་ནི་ ཁོའེ་ རྒྱལ་སྲིད་པོ་ ཀ་ཟུག་རྒེ་ ལུའི་རྡེན་? 27 ཡང་ ཀལ་ཏེ་ ངེ་ རྡུད་རྡེ་ འགོ་རྦ་ འབེལ་ཟེ་འབུལ་ རྒྱུད་ཏེ་ རྡུད་རྒུན་ ཕིང་ངེ་ཡོད་ནི་ ཏེ་ནི་ ཁྱི་ཞི་ ལོབ་ཀྲུག་རྒུ་ནི་ སུ་ རྒྱུད་ཏེ་ རྡུད་རྒུན་ ཕིང་ངེ་ནོག་? ཏོ་རྦེ་ཕི་ ཁོང་རྒུ་ནི་ ཁྱི་ཞི་ ཟེར་ཧན་འབོ་ལ་ ཉེད་ཀལ་ ཅོའེན་། 28 འིན་ན་ ཀལ་ཏེ་ ངེ་ ཀོན་འཇོག་རྒེ་ ཐུག་ཡིད་ རྒྱུད་ཏེ་ རྡུད་རྒུན་ ཕིང་ངེ་ཡོད་ནི་ ཏེ་ནི་ ཁྱི་ཞི་ཀ་ རྡེ་བ་ཅན་ནེ་ རྒྱལ་སྲིད་ ལེཔ་ ཚར་རྡེ་ འིན་། 29 སུ་ མི་ ཤེད་ཅེན་ཞིག་རྒེ་ ཁང་པེ་ན་ ཞུ་རྡེ་ ཁོའེ་ ནོར་ ཧུ་ མི་ཉེན་ ནམ་ཚུག་པ་ ཁོའེ་ ངུལ་ལ་ མི་ ཤེད་ཅེན་འབོ་ རྡམ་ མི་རྡམ་, ཏེ་ནི་ ཁོའེ་ ཁང་པེ་ན་ ཡོ་ཀ་ནེ་ ནོར་རྒུན་ ཧུ་ཉེན་ནེན་།”
30 “ང་ ཉམ་པོ་ མི་འདེད་ཀན་རྒུན་ ངེ་ རྒྱཔ་འགལ་ ཅོ་ནོག་ ཡང་ སུ་ཞིག་ ང་ ཉམ་པོ་ ལེ་ཧ་ ཅོ་ཀན་རྒུན་ ངེ་ རྒྱཔ་འགལ་ལ་ ལེ་ཧ་ ཅོ་མག་། 31 ཏོ་རྦེ་ཕི་ ངེ་ ཁྱི་ཞ་ ཟེ་འིན་, མི་རྒུ་ནི་ རྡིག་པ་ ཅོ་ཀན་ འདང་ ཀོན་འཇོག་ལ་ ཏེཏ་ལོག་ ཞུ་ཀན་ ཚང་མ་ ཤག་སྤ་ སལ་ལེ་ ཛེ་རྡེན་, འིན་ན་ ཏམ་པེ་ ཐུག་ཡིད་རྡེ་ ཏེཏ་ལོག་ ཞུ་ཀན་རྒུན་ལ་ ཤག་སྤ་ མ་ནི་ སལ་ལེ་ མི་ཛེད་། 32 ཡང་ མི་རིག་རྒེ་པུའི་ རྒྱཔ་འགལ་ལ་ ཟེར་ཧན་རྒུན་ལ་ ཤག་སྤ་ སལ་ལེ་ ཛེ་རྡེན་, འིན་ན་ ཏམ་པེ་ ཐུག་ཡིད་རྡེ་ རྒྱཔ་འགལ་ལ་ ཟེར་ཧན་རྒུན་ལ་ འི་ མི་ཙེ་ མ་ཚེད་ ཡོང་ཅེ་ཅེན་ནེ་ མི་ཙེ་ ནང་ལ་ ཤག་སྤ་ མ་ནི་ མི་སལ་།”
33 “ལྕང་མ་ ཟང་པོ་ འིན་ནི་ ཏོ་ལ་ ཁ་ཟོའེ་ ཟང་པོ་ མིན་ནེན་, ཡང་ ལྕང་མ་ ངན་པ་ འིན་ནི་ ཏོ་ལ་ ཁ་ཟོའེ་ ངན་པ་ མིན་ནེན་། ལྕང་མ་ ཏོ་རྦེ་ འབྲེ་རྦུ་ཀ་ནི་ ཤེ་རྡེ་ནོག་། 34 ཁྱེ་རང་ པ་རུ་ཤི་པ་, ཏུ་རུལ་ལེ་ ཕྲུ་རྒུ་རྒུན་, ཁྱི་ཞ་ ངན་པ་ འིན་ནེན་ཞིག་ ཀ་ཟུག་རྒེ་ སྤེ་ར་ ཟང་པོ་ ཏང་ངེན་? ཉིང་ ཀང་འདེ་ ལུད་ཀན་འབོ་ ཁ་ནི་ འབིང་ངེ་ནོག་། 35 མི་ ཟང་པེ་ སེམ་ ཟང་པེ་ པང་ཛོད་ནི་ འབྲེ་རྦུ་ ཟང་པོ་ མིན་ནེ་ནོག་, ཡང་ མི་ ངན་པེ་ སེམ་ ངན་པེ་ པང་ཛོད་ནི་ འབྲེ་རྦུ་ ངན་པ་ མིན་ནེ་ནོག་། 36 འིན་ན་ ངེ་ ཁྱི་ཞ་རྒུན་ལ་ ཟེ་འིན་, ཀོན་འཇོག་རྒེ་ ཁྲིམ་ཅེད་རྡེ་ ཞག་ལ་ ཁྱི་ཞི་ ནང་མེད་ ཅོའེ་རྡེ་ སྤེ་ར་ ཟེར་ཧན་ རེ་རེ་ ཏོན་ ཀོན་འཇོག་རྒེ་ ཧུ་འདུན་ལ་ ཤེད་རྒོའེ་རྡེན་། 37 ཅེ་ཟེར་ནི་ ཁྱི་ཞི་ སྤེ་ར་ ཟེར་ཧན་རྒུ་ནི་ ཁྱི་ཞ་ རྐྱོན་མེད་ ཡང་ རྐྱོན་ཅེན་ ཡོ་ཀན་འབོ་ ལྟ་ནེན་།”
ལུང་རྟོན་པ་ ཡོ་ནཱེ་ ལྟའ་།
38 ཏེ་ནི་ ཆོའེ་ཁྲིམ་ལ་ ཁེ་སྤ་ རྡང་ པ་རུ་ཤི་པ་ ཁ་ཅིག་རྒེ་ ཡི་ཤུ་ ཟེར་, “ལོབ་རྦོན་ལེ་, ང་ཞ་ ཉེ་རང་ངེ་ཀ་ནི་ ནམ་ཀ་ནི་ ལྟའ་ཞིག་ ལྟ་ཉིན་རག་, ཀའོ་ ཉེ་རང་ལ་ ཀོན་འཇོག་རྒེ་ ཝང་ཆ་ སལ་ཧན་འབོ་ ནེན་ཏེན་ ཅོའེན་།”
39 ཁོང་ངེ་ ཁོང་རྒུན་ལ་ ལེན་སལ་, “ངན་པ་ མི་རབ་ ལོག་ཡེམ་ འདང་ ཀོན་འཇོག་ལ་ རྡེན་ཆེ་ཤེ་ མེ་ཀན་རྒུ་ནི་ ནམ་ཀ་ནི་ ལྟའ་ ལྟོན་ ཟེར་རེ་ནོག་། འིན་ན་ ལུང་རྟོན་པ་ ཡོ་ནཱེ་ ལྟའ་རྦོ་ མ་ནི་ ཁོང་རྒུན་ལ་ ཡང་ ལྟའ་ཞིག་ མི་ལྟན་། 40 ཀ་ཟུག་རྒེ་ ལུང་རྟོན་པ་ ཡོ་ནཱ་ ཚེན་ སུམ་ འདང་ ཉི་མ་ སུམ་ ཉ་ ཆོན་མོ་ཞིག་རྒེ་ ཀྲོཏ་པེ་ན་ ལུའི་ཧན་ ཙོག་སེ་ མི་རིག་རྒེ་པུ་ལ་ ཚེན་ སུམ་ འདང་ ཉི་མ་ སུམ་ ས་ཀྱེཏ་ན་ ལུའི་རྡེན་།”
41 “ཀོན་འཇོག་རྒེ་ ཁྲིམ་ཅེད་རྡེ་ ཞག་ལ་ ལྃ་ཟ་ནི་ ནི་ནེ་ཝ་པ་རྒུ་ནི་ འི་ མི་རབ་པོ་ལ་ ཆེད་པ་ ཕོག་ཅེ་ འོའེ་སྤ་ ནོག་ ཟེ་རེན་ ཅེ་ཟེར་ནི་ ཁོང་རྒུ་ནི་ ཡོ་ནཱེ་ ཆོའེ་ཤེད་ཀན་འབོ་ ཉེན་འདེ་, རྡིག་པ་ ཕྃ་རྡེ་ སེམ་འགྱུར་, ལྟོའེ་རྡང་ ཡོ་ནཱ་སང་ ཀྲ་རྒེ་ཞིག་ ཏག་ས་ འེ་ཀ་ ཡོད་། 42 ཁྲིམ་ཅེད་རྡེ་ ཞག་ལ་ ལྃ་ཟ་ནི་ ལོ་ ཆོག་རྒེ་ རྒྱ་མེ་ འི་ མི་རབ་པོ་ལ་ ཆེད་པ་ ཕོག་ཅེ་ འོའེ་སྤ་ ནོག་ ཟེ་རེན་ ཅེ་ཟེར་ནི་ ཁོ་ རྒྱ་སྤོ་ སོ་ལོ་མོན་ནེ་ ཤེ་རབ་རྦེ་ སྤེ་ར་རྒུན་ ཉེན་ནེ་ལ་ ས་ཅ་ མ་ ཐག་རིང་ནི་ ཡོྃ་, ལྟོའེ་རྡང་ སོ་ལོ་མོན་ནེ་སང་ ཀྲ་རྒེ་ཞིག་ ཏག་ས་ འེ་ཀ་ ཡོད་།”
43 “མི་ཞིག་རྒེ་ ནང་ནི་ འགོང་པོ་ ཕིང་འདེ་ ལྟིང་ནི་, འགོང་འབེ་ ཆུ་ མེད་ས་ རི་ལྟོང་ངེ་ན་ ཁོར་རེན་ ངལ་ཚོ་ས་ ཙལ་རྡེ་ལ་ མི་ཐོབ་ཅེ་ཀ་ནི་ 44 ཁོའེ་ ཁོ་རང་ལ་ ཟེ་རེ་ནོག་, ‘ང་ འབིང་འདེ་ ཡོང་ཀ་ནེ་ ཏེ་རྒ་ མི་ན་ ལོག་ཏེ་ ཆེན་།’ ཏུ་རུ་ ལེབ་རྦེ་རྡང་, ཏེ་ མལ་རྦོ་ ལྟོང་པ་ རྡང་ ལག་མོ་ རྡུའི་རྡེ་ ཅི་ཚང་མ་ རང་རང་ངེ་ མལ་ལེ་ཀ་ པོར་རྡེ་ ཐོང་། 45 ཏེ་ནི་ ཁོ་ སོང་འདེ་ ཁོ་རང་ངེ་སང་ མང་ངེ་ ངན་པ་ ཞེན་ འགོང་པོ་ རྡུན་ ཁོ་རང་ ཉམ་པོ་ ཁྲིད་ཏེ་ ཁྱོྃ་ ཡང་ ཏེ་རྒ་ མལ་ལེ་ན་ འདེད་, ཏེ་ནི་ ཏེ་ མི་རྦེ་ ནེ་ལུག་པོ་ ངུ་ལེ་སང་ ཐུ་ སོང་།
འི་ མི་རབ་ ངན་པ་རྒུན་ལ་ ཏེ་རྒ་ ཙོག་སེ་ འཇི་ནང་ཅེན་ནེ་ ནེ་ལུག་ ཤར་རེན་།”
ཡི་ཤུའི་ ཨ་མ་ རྡང་ ནོ་རྒུན་།
46 ཡི་ཤུའི་ མི་ཚོག་ལ་ ཞལ་ཏ་ ས་ལེན་ ཡོད་ཟ་ནི་ ཁོང་ངེ་ ཨ་མ་ རྡང་ ནོ་རྒུན་ ཡོྃ་རྡེ་, ཁོང་ལ་ སྤེ་ར་ ཏང་ཅེ་ལ་ ཁོང་རྒུན་ ཁང་པེ་ ཕི་ལོག་ལ་ སྲུྃ་རྡེ་ འདེད་། 47 མི་ཞིག་རྒེ་ ཁོང་ལ་ ཟེར་, “ཉེ་རང་ངེ་ ཨ་མ་ རྡང་ ནོ་རྒུན་ ཉེ་རང་ལ་ སྤེ་ར་ ཏང་ཅེ་ལ་ ཕི་ལོག་ལ་ སྲུྃ་རྡེ་ འདུག་།”