མཏ་ཐ་ 11

ཡི་ཤུ་ རྡང་ ཁྲུའི་སལ་ཧན་ ཡོ་ཧཱ་ནན་།

ཡི་ཤུའི་ ལོབ་ཀྲུག་ ཅུག་ཉི་ལ་ ལབ་ཞ་ སལ་ཚར་རྡེ་ ལྟིང་ནི་, ཁོང་ ཏེ་ཀ་ནི་ ལབ་ཞ་ སལ་ཅེ་ རྡང་ ཆོའེ་ཤེད་ཅེ་ལ་ འགཱ་ལིལ་ལེ་ ཡུལ་ཞོང་ངེ་ ཀྲོང་ཁྱེར་རྒུན་ལ་ རྐྱོད་།

2 ཡོ་ཧཱ་ནན་ནེ་ ཙོན་ཁང་ངེ་ན་, མ་ཤི་ཀེ་ ཧ་ལེ་ཤེ་ ཛེད་པེ་, ཛེད་ཀན་རྒུན་ ཚོར་རེ་རྡང་, ཁོ་རང་ངེ་ ལོབ་ཀྲུག་རྒུན་ ཡི་ཤུ་ས་, འི་ ཏྲི་ཝ་རྦོ་ འདྲི་ལ་ ལམ་ཅུག་, 3 “ལུང་རྟོན་པ་རྒུ་ནི་ རྐྱོད་རྡེན་ མོལ་ཧན་ མ་ཤི་ཀ་ ཉེ་རང་ ཞུ་རྡེ་ འིན་ནེ་ ཡང་ ང་ཞ་ ཡང་འཇིག་ལ་ སྲུང་?”

4 ཡི་ཤུའི་ ལེན་སལ་, “ལོག་ཏེ་ སོང་ ཡང་ ཁྱི་ཞི་ ཚོར་ཧན་ འདང་ ཐོང་ཀན་རྒུན་ ཡོ་ཧཱ་ནན་ལ་ ཤོད་། 5 ཞ་ར་རྒུན་ལ་ ཐོང་, ཞ་འོ་རྒུན་ འགྲུལ་, ཛེ་ནེད་ཅེན་རྒུན་ རྒྱལ་རྡེ་ སང་མ་ སོང་, མ་ཚོར་ཧན་རྒུ་ནི་ ཚོར་, ཤི་ཀན་རྒུན་ སོན་པོ་ ལྃ་, ཡང་ ཉལ་རྦ་ཅེན་རྒུན་ལ་ ནེ་ཚུལ་ ཟང་པོ་ ཤེད་། 6 ཁོ་ ཤོད་, ངེ་ ཅོ་ཀན་རྒུ་ནི་ ཅོའེ་རྡེ་ ང་ མ་ཕང་ཀན་རྒུན་ལ་ ཅིན་ལབ་ སལ་ལེ་ ཛེ་རྡེན་།”

7 ཡོ་ཧཱ་ནན་ནེ་ ལོབ་ཀྲུག་རྒུན་ ལོག་ཏེ་ ཆ་རྡང་, ཡི་ཤུའི་ མི་ཚོག་ལ་ ཡོ་ཧཱ་ནན་ནེ་ ཧོར་ལ་ མོལ་ཅེ་ འགོ་ཟུག་, “ཁྱི་ཞ་ རི་ལྟོང་ངེ་ན་ ཀ་ཟུག་ མི་ཞིག་ལ་ ལྟ་ལ་ སོང་འབེན་? ཆུའི་ ཐ་མེ་ ལྗང་པ་ ལུང་སྤེ་ རྒུལ་ལེ་ ཙོག་སེ་, ལབ་ཞེ་ན་ ཏུའི་རྒྱུན་ འགྱུར་ཞ་ ཁྱོང་ཀན་ ཞིག་རྒེ་? 8 ཀལ་ཏེ་ མ་ནི་ ཁྱི་ཞ་རྒུན་ ཅི་ ལྟ་ལ་ སོང་འབེན་? མི་ ཀོའེ་ལག་ འཇམ་པོ་ རྡང་ རིན་ཅེན་ ཀོན་ཀན་ཞིག་ ཁྱི་ཞ་རྒུ་ནི་ ཐོང་ངེ་? མ་ཐོང་། ཀོའེ་ རིན་ཅེན་ ཀོན་ཀན་རྒུན་ རྒྱ་སྤེ་ ཁར་ལ་ འདེད་རྡེ་ནོག་། 9 ཁྱི་ཞ་ ལུང་རྟོན་པ་ཞིག་ལ་ ལྟ་ལ་ སོང་འབེན་ནེ་? འོ་ནེ་, ཁོ་ ལུང་རྟོན་པ་སང་ ཀྲ་རྒེ་ཞིག་ འིན་། 10 ཏམ་པེ་ སུང་རབ་རྦེ་ན་ ཁོའེ་ ཧོར་ལ་ ཀོན་འཇོག་རྒེ་ མོལ་ལེ་ ཛེད་ཏེ་ འདུག་,

‘ལྟོའེ་, ཁྱེ་རང་ངེ་སང་ ངུལ་ལ་

ངེ་ ང་རང་ངེ་ ཁྲིན་ཁྱེར་ཧན་འབོ་ ཀ་ལེན་།

ཁོའེ་ ཁྱེ་རང་ངེ་ཕི་ ལམ་ ཀྲལ་འགྲིག་ ཅོའེན་།’”

11 “ངེ་ ཁྱི་ཞ་ རྡེན་འབའ་ ཟེ་འིན་, ཏག་ས་ཚུག་པ་ རྐྱེ་ཧན་ མི་རྒུ་ནི་ ནང་ནི་ ཁྲུའི་སལ་ཧན་ ཡོ་ཧཱ་ནན་ནེ་སང་ ཀྲ་རྒེ་ཞིག་ སུ་ལ་ མེ་ཀག་, འིན་ན་ རྡེ་བ་ཅན་ནེ་ རྒྱལ་སྲིད་རྡེ་ན་ ཆུང་ཤོག་རྦོ་ ཡོ་ཧཱ་ནན་ནེ་སང་ ཀྲ་རྒེ་ འིན་། 12 ཁྲུའི་སལ་ཧན་ ཡོ་ཧཱ་ནན་ནེ་ ཆོའེ་ཤེད་ཅེ་ འགོ་ཟུག་པེ་ནི་ ཏག་ས་ཚུག་པ་ ཀོན་འཇོག་རྒེ་ ཝང་ ཉམ་པོ་ ཁོ་རང་ངེ་ རྒྱལ་སྲིད་པོ་ རྒྱེ་ཤུག་རྒེ་ ཛེ་རྡེན་ ནོག་, འིན་ན་ ནོད་རྐྱལ་ མི་ ངན་པ་རྒུ་ནི་ ཏོ་རྦེ་ རྒྱཔ་འགལ་ལ་ ནོལ་ལེན་ ནོག་། 13 ཡོ་ཧཱ་ནན་ ཡོང་ངེ་སང་ ངུལ་ལ་ རྡེ་བ་ཅན་ནེ་ རྒྱལ་སྲིད་རྡེ་ ཧོར་ལ་ ཀཱ་ཁྲིམ་མེ་ སྤེ་ཆ་ རྡང་ ལུང་རྟོན་པ་ ཚང་མེ་ ལུང་རྟན་ ཤེད་རྡེ་ ཛེད་། 14 ཀལ་ཏེ་ ངེ་ ཟེར་ཤེ་རྦོ་ལ་ རྡེན་ཆེ་ཤེ་ ཅོའོ་ ཐེད་ནི་, ཡོ་ཧཱ་ནན་ནེ་ ཨེ་ལི་ཡཱ་ འིན་ ཀའོ་ ལུང་རྟོན་པ་རྒུ་ནི་ ཡོང་ངེན་ མོལ་རྡེ་ འིན་འབེན་། 15 ནམ་ཅོག་ ཡོ་ཀན་རྒུ་ནི་ ངེ་ ཟེར་ཧན་ལ་ ཉོན་ཧེ་།”

16 “ངེ་ འི་ མི་རབ་པོ་ སུ་ ཉམ་པོ་ རྡུར་? ཁྲོམ་མེ་ན་ འདེད་ཀ་ནེ་ ཕྲུ་རྒུ་རྒུན་ ཙོག་སེ་ ཀའོ་རྒུ་ནི་ ཡ་ཏོ་རྒུན་ལ་ འབོའེན་ ཟེར་རྡུག་,

17 ‘ང་ཞི་ ལིང་ངུ་ ཕུའི་རྡེ་ལ་ ཁྱི་ཞ་ མ་སེ་།

ང་ཞི་ ཤེད་པ་ ཏང་ཟ་ནི་ ཁྱི་ཞི་ ངུ་མ་ལབ་ མ་ཏྃ་།’”

18 “ཏེ་རྒ་ ཙོག་སེ་ ཡོ་ཧཱ་ནན་ ཡོྃ་རྡེ་ ཁར་ཞི་ མ་ཟོའེ་ ཡང་ རྒུན་འགྲུམ་མེ་ ཁོའེ་ མ་ཐུྃ་རྦེ་ མི་རྒུ་ནི་ ‘ཁོའེ་ན་ རྡུད་ ཞུ་རྡེ་ནོག་’ ཟེར་། 19 མི་རིག་རྒེ་པུ་ ཟ་ཀན་ ཐུང་ཀན་ ཡོང་རྡེ་, ཁྱི་ཞི་ ཁོ་ མ་ ཟ་ཀན་ ཐུང་ཀན་ ཡང་ ཁྲལ་ནེན་ཀན་ འདང་ རྡིག་ཅེན་རྒུ་ནི་ ཡ་ཏོ་ ནོག་ ཟེར་། འིན་ན་ ང་ཞ་ ཀོན་འཇོག་རྒེ་ ཤེ་རབ་རྦེ་ ལམ་མེ་ཀ་ འགྲུལ་ཧན་འབོ་ ང་ཞི་ ལེ་ཧེ་ འབྲེ་རྦུ་རྒུ་ནི་ ལྟ་ནེན་།”

ཏེཏ་པ་ མེ་ཀན་རྒུན་ལ་ ཁྲིམ་ཅེད་ ཛེ་རྡེན་།

20 ཏེ་ནི་ ཡི་ཤུའི་ ཁོང་ངེ་ ཧ་ལེ་ཤེ་ ཛེད་པེ་ མང་པོ་ ལྟན་ནེ་ ཛེད་ཀ་ནེ་ རྒྱལ་ས་རྒུ་ནི་ རྒྱཔ་འགལ་ལ་ མོལ་, ཅེ་ཟེར་ནི་ ཏེ་ན་ ཡོ་ཀན་རྒུ་ནི་ རྡིག་པ་ ཕྃ་རྡེ་ སེམ་ མ་འགྱུར་། 21 “ཀོ་ར་ཟིན་པ་ རྡང་ འབེད་སེ་འདཱ་པ་རྒུན་ ཁྱི་ཞ་རྒུན་ལ་ ཙམ་ཤིག་རྒེ་ འཇི་ནང་ མག་། ཀལ་ཏེ་ ཁྱི་ཞི་ན་ ལྟན་ཀ་ནེ་ ཛེད་པ་རྒུན་, ཏཱ་ཡིར་ རྡང་ སི་འདཱོན་ ཀྲོང་ཁྱེར་ ངན་པ་རྒུ་ནི་ན་ ལྟན་འབེན་ནི་, ཁོང་རྒུ་ནི་ རྡིག་པ་ ཕྃ་རྡེ་ སེམ་འགྱུར་རྡེ་ ཕ་ཙ་ ཀོན་འདེ་, ཀོག་ཏལ་ ཡོག་རྒེན་ རྡུག་པོ་ ཅོའེ་རྡེ་ ཡོད་ཁྲོ་། 22 འིན་ན་ ངེ་ ཁྱི་ཞ་རྒུན་ལ་ ཟེ་འིན་ ཀོན་འཇོག་རྒེ་ ཁྲིམ་ཅེད་རྡེ་ ཞག་ལ་, ཏཱ་ཡིར་ རྡང་ སི་འདཱོན་པ་ ཀྲོང་ཁྱེར་རེ་ མི་རྒུ་ནི་སང་ ཁྱི་ཞ་ ཆེད་པ་ ཧོཔ་ མང་ངེ་ ཕོག་རྒེན་།”

23 “ཝ་ ཀ་ཕར་ན་ཧུམ་པ་རྒུན་ ཅི་ ཁྱི་ཞ་ སི་ཝ་ ཏྃ་རྡེ་ ནམ་ཀ་ ཁྱེར་རེ་ ཛེད་རྡེན་ ས་མེ་ རག་རྒེ་? མ་ནི་ མི་ཐེན་། ཁྱི་ཞ་རྒུན་ ཉ་ཝེ་ན་ ཕང་ངེ་ ཛེ་རྡེན་། ཀལ་ཏེ་ ཁྱི་ཞ་རྒུན་ལ་ ལྟན་ནེ་ ཛེད་ཀ་ནེ་ ཛེད་པ་རྒུན་ སོ་འདོམ་པ་ མི་ངན་རྒུན་ལ་ ལྟན་འབེན་ནི་ རྡིག་པ་ ཕྃ་རྡེ་ སེམ་འགྱུར་རྡེ་ ཁོང་རྒུན་ ཏག་ས་ཚུག་པ་ འི་ འཇིག་རྟེན་ནེ་ཀ་ ལུའི་རྡེ་ ཡོད་ཁྲོ་། 24 འིན་ན་ ངེ་ ཁྱི་ཞ་རྒུན་ལ་ ཟེ་འིན་ ཀོན་འཇོག་རྒེ་ ཁྲིམ་ཅེད་རྡེ་ ཞག་ལ་, སོ་འདོམ་ ཀྲོང་ཁྱེར་རེ་ མི་རྒུ་ནི་སང་ ཁྱི་ཞ་ ཆེད་པ་ ཧོཔ་ མང་ངེ་ ཕོག་རྒེན་།”

ངལ་ཧན་རྒུན་ལ་ ངལ་ཚོའེ་ ས་ལེན་།

25 ཏེ་རྒ་ ཏུའི་ལ་ ཡི་ཤུའི་ མོ་ལམ་ ཞུའིན་ མོལ་, “ངེ་ ཡབ་ རྡེ་བ་ཅན་ འདང་ འཇིག་རྟེན་ནེ་ ཙོབོ་ལེ་, ངེ་ ཉེ་རང་ལ་ རྟོད་པ་ པུ་ལེ་ཡོད་ ཅེ་ཟེར་ནི་ ཉེ་རང་ངེ་ ཀྲང་པེ་ ལམ་འབོ་ ཁེ་སྤ་ རྡང་ ཡོན་ཏེན་ཅེན་རྒུ་ནི་ རྦེ་རྡེ་, ཕྲུ་རྒུ་ ཙོག་སེ་ ཡོ་ཀན་རྒུན་ལ་ ངོན་ཅུག་རྒེ་ ཛེད་། 26 འོ་ནེ་ ཡབ་ལེ་ ཏུ་ཟུག་ ཛེད་ཅེའོ་ལ་ ཉེ་རང་ ཐུག་ཐེད་།”

27 “ངེ་ ཡབ་ ཀོན་འཇོག་རྒེ་ ཝང་ཆ་ ཚང་མ་ ང་ ལྟེད་རྡེ་ ཛེད་ཏེ་ འིན་། ཡབ་རྦེ་ མ་ནི་ ཞེན་སུ་ལ་ པུ་ཙ་ མི་ཤེ་, ཡང་ པུ་ཙེ་ མ་ནི་ ཞེན་སུ་ལ་ ཡབ་ ངོ་ མི་ཤེ་, འིན་ན་ ངེ་ འདམ་ཀན་རྒུན་ལ་ ཡབ་ ངོན་ཅུག་རྒེན་།”

28 “སེམ་མེ་ན་ ངལ་ཧན་ འདང་ ཁུ་རུ་ ལྕིན་ཀྲེ་ ཁུར་ཧན་ ཚང་མ་ ང་ས་ ཤོག་, ཡང་ ངེ་ ཁྱི་ཞ་ ངལ་ཚོའེ་ ཏང་ངེན་། 29 ངེ་ ཉེ་ཤིང་འབོ་ ཁུར་ ཡང་ ངེ་ཀ་ནི་ ལོབ་ ཅེ་ཟེར་ནི་ ང་ནི་ སེམ་མེ་ན་ པཔ་མོ་ རྡང་ ཉམ་ཤུང་ འིན་, ཡང་ ཁྱི་ཞ་རྒུ་ནི་ སེམ་ལ་ ངལ་ཚོའེ་ ཐོབ་རྦེན་། 30 ངེ་ ཉེ་ཤིང་འབོ་ ཁུར་རེ་ལ་ ལ་མོ་ ཡང་ ངེ་ ཁུ་རུ་རྦོ་ ཡང་མོ་ ཡོད་།”