མཏ་ཐ་ 10

ཡི་ཤུའི་ ཧུ་ཚབ་ ཅུག་ཉི་ ཧོ་ ཛེད་།

ཡི་ཤུའི་ ལོབ་ཀྲུག་ ཅུག་ཉི་རྦོ་ལ་ འབོ་ ཛེད་ཏེ་, ཁོང་རྒུན་ལ་ རྡུད་ ཞུ་ཧན་རྒུ་ནི་ ནང་ནི་ རྡུད་ ཕིང་ཅེ་ རྡང་ ནེད་ ཏང་ ཟུར་མོ་ ནཱ་ ཚང་མ་ རྒྱལ་ཅུག་ཅེ་ ཝང་ཆ་ སལ་ལེ་ ཛེད་། 2 ཧུ་ཚབ་ ཅུག་ཉི་རྡེ་ མིང་རྒུན་, ཏང་པོ་ ཤི་མོན་ ཀ་འབོ་ལ་ པི་ཏྲར་ལ་ ཟེ་ནོག་། ཡང་ ཁོའེ་ ནོ་ ཨན་འགྲིརུ་, ཟེ་འབེ་འདེ་ པུ་ཙ་ ཡ་ཀུབ་ ཏང་ ཁོའེ་ ནོ་ ཡོ་ཧཱ་ནན་, 3 ཕི་ལིབ་, འབར་ཐོལ་མཱ་, ཐོ་མཱ་, ཁྲལ་ནེན་ཀན་ མཏ་ཐ་, ཨལ་ཕཱེ་འུ་ པུ་ཙ་ ཡ་ཀུབ་, ཐད་རྡེ་འུ་, 4 ཤི་མོན་ ཀ་འབོ་ལ་ ཡུལ་འདེད་ཅེན་ རྡང་ ཡུ་འདཱ་ ཀར་ཡོད་པ་, ཁོའེ་ ལྟིང་ནི་ ཡི་ཤུ་ འགྲ་ཝོའེ་ ལག་ལ་ ལྟེད་།

ཡི་ཤུའི་ ཧུ་ཚབ་ ཅུག་ཉི་རྦོ་ ལམ་ཅུག་རྒེ་ ཛེད་།

5 ཡི་ཤུའི་ ཧུ་ཚབ་ ཅུག་ཉི་རྦོ་ལ་ འི་ ལབ་ཞ་རྒུན་ སལ་ལེ་ ཛེད་ཏེ་ ལམ་ཅུག་རྒེ་ ཛེད་, “ཡ་ཧུ་འདཱ་པ་ མན་ཀན་རྒུ་ནི་ ཕྲོ་ མ་ཆ་ ཡང་ ས་མར་རི་ཡཱེ་ ཀྲོང་ཁྱེར་རྒུ་ནི་ན་ མ་ཞུ་, 6 ཀོན་འཇོག་རྒེ་ རྐྱལ་ཧ་ནེ་ ལུག་, ཨིས་ར་ཡེལ་པ་རྒུ་ནི་ཀ་ སོང་། 7 ཁྱི་ཞ་ ཆ་ཟ་ནི་ ‘རྡེ་བ་ཅན་ནེ་ རྒྱལ་སྲིད་ ཉེ་མོ་ལ་ འདེད་’ ཟེར་རེན་ ཁྲིན་ ཟང་པོ་རྦོ་ ཤོད་། 8 ཡང་ ནེད་པ་རྒུན་ རྒྱལ་ཅུག་, ཤི་ཀན་རྒུན་ སོན་ཅུག་, ཛེ་ནེད་ ཡོ་ཀན་རྒུན་ རྒྱལ་ཅུག་ཏེ་ སང་མ་ ཅོའེ་, རྡུད་ ཞུ་ཧན་རྒུ་ནི་ ནང་ནི་ རྡུད་རྒུན་ ཕིང་། ཏེ་ ཝང་ཆ་ ཁྱི་ཞ་རྒུན་ལ་ ཆོན་ལ་ ཐོབ་ཏེ་ འིན་ཅེ་ཀ་ནི་ ལེ་ཧ་རྒུན་ ཆོན་ལ་ ཅོའེ་། 9 པེ་ལ་ ཆ་ཟ་ནི་ ཁོ་མག་རྒེ་ན་ སེར་ ཡང་ མུལ་ ཡང་ ར་རྒན་ནེ་ པེ་ནེ་, 10 ཡང་ འཇོ་ལ་ ཡང་ ཀོའེ་ལག་ ཐེ་རྦ་ ཡང་ འཇའ་ཏོ་ ཡང་ པེ་རྡེ་ཕི་ ལག་རྦེར་ མ་ཁུར་ ཅེ་ཟེར་ནི་ ལེ་ཧ་ ཅོ་ཀན་རྒུན་ལ་ རྒོའེ་ཤེ་ཅན་རྒུན་ ཐོབ་ཅེ་ འོའེ་སྤ་ ནོག་།”

11 “ཀྲོང་ཁྱེར་ རྡང་ འགམ་ཡུལ་ ཀ་རུ་ ལེབ་ནང་, ཐེད་པོ་ ཉམ་པོ་ རྒ་སུའི་ ཞུ་ཀན་ཞིག་ ཙལ་རྡེ་ ཏེ་ ཀྲོང་ཁྱེར་ནི་ ཆ་ཆ་ཚུག་པ་ ཁོའེ་ ཁང་པེ་ན་ འདོད་། 12 ཏེ་ ཁང་པེ་ན་ ཞུ་ཟ་ནི་ ཀོན་འཇོག་རྒེ་ ཁོང་རྒུན་ལ་ ཞིའི་རྡེ་ ཅིན་ལབ་ སལ་ཅེ་ལ་ ཞུའི་། 13 ཀལ་ཏེ་ ཁོང་རྒུན་ ཏོ་རྦེ་ འོའེ་སྤ་ ཡོད་ནི་ ཀོན་འཇོག་རྒེ་ ཞིའི་རྡེ་ སལ་ལེ་ ཛེ་རྡེན་, འིན་ན་ འོའེ་སྤ་ མེད་ནི་ ཏེ་ ཞིའི་རྡེ་རྦོ་ ཁྱི་ཞ་ ལོག་ཏེ་ ལེབ་རྦེན་། 14 ཀལ་ཏེ་ ཁང་པ་ ཡང་ ཀྲོང་ཁྱེར་ཞིག་རྒེ་ན་ སུ་ཞིག་རྒེ་ལ་ ཁྱི་ཞ་ རྒ་སུའི་ མ་ཅོ་ནི་ ཡང་ ཁྱི་ཞི་ ཟེར་ཧན་འབོ་ལ་ མ་ཉེན་ནི་, ཏེ་ ཀྲོང་ཁྱེར་ ཡང་ ཁང་པ་ནི་ འབིང་ཟ་ནི་ རང་ངེ་ འཇའ་ཏོའེ་ ཐལ་རྦ་ སྲུག་། 15 ངེ་ ཁྱི་ཞ་རྒུན་ལ་ རྡེན་འབའ་ ཟེ་འིན་ ཀོན་འཇོག་རྒེ་ ཁྲིམ་ཅེད་རྡེ་ ཞག་ལ་, སོ་འདོམ་ རྡང་ འགའ་མོ་ར་ ཀྲོང་ཁྱེར་རེ་ མི་ ངན་པ་རྒུ་ནི་སང་ ཏེ་ ཀྲོང་ཁྱེར་རེ་ མི་རྒུན་ལ་ ཆེད་པ་ མང་ངེ་ སྲན་ཀྲེ་ ཕོག་རྒེན་།”

ཡི་ཤུའི་ ལོབ་ཀྲུག་རྒུན་ལ་ རྡུ་ངལ་ ཐོང་ཅེ་།

16 ཡི་ཤུའི་ མོལ་, “ངེ་ ཁྱི་ཞ་ ཤང་ཀུའི་ ཕྲོ་ ལུ་རྒུ་ ཙོག་སེ་ ལམ་ཅུག་རྒེ་ཡོད་། ཏེ་ཕི་ རུལ་ ཙོག་སེ་ ཁེ་སྤ་ རྡང་ ནོད་པ་ མ་ཏང་ཀན་ ཕུར་རྒོན་ ཙོག་སེ་ རྒྱུར་། 17 མི་རྒུ་ནི་ཀ་ནི་ ཤང་ ཅོའེ་རྡེ་ འདོད་, ཅེ་ཟེར་ནི་ ཁྱི་ཞ་ ཏེ་རྒ་ ཡུལ་ལེ་ ཝང་སྲུལ་པ་རྒུ་ནི་ ལག་ལ་ ལྟེད་ཏེ་ འདུ་ཀང་རྒུ་ནི་ན་ ཁྱི་ཞ་ རྟལ་ལྕག་ རྒྱབ་ཅུག་རྒེན་། 18 ངེ་ཀ་ ཏེཏ་པ་ ཡོད་ཅེ་རྦེ་ ཁྲིམ་ཅེད་རྡེ་ལ་ ཀ་ལོན་ འདང་ རྒྱ་སྤོ་རྒུ་ནི་ཀ་ ཁྱི་ཞ་ ཁྱེར་རེན་། ཏེ་ཏུའི་ ཁྱི་ཞ་ ང་ སུ་ འིན་ཀན་འབེ་ སྤང་པོ་ ཝང་སྲུལ་པ་ རྡང་ ཡ་ཧུ་འདཱ་པ་ མན་ཀན་རྒུན་ལ་ ཏང་ཅེ་ ཧབ་ ཐོབ་རྦེན་། 19 ཁོང་རྒུ་ནི་ ཁྱི་ཞ་ ཝང་སྲུལ་པེ་ ལག་ལ་ ལྟེད་རྡེ་རྡང་, ཅི་ ཟེ་རེན་ ཡང་ ཀ་ཟུག་རྒེ་ ཟེ་རེན་ སམ་འདེ་ ཚེར་ མ་ཚེར་, ཅེ་ཟེར་ནི་ ཏེ་རྒ་ ཏུའི་ལ་ ཁྱི་ཞ་ རེ་རེ་ལ་ ཟེར་ཤེ་ ཚིག་རྒུན་ སལ་ལེ་ ཛེ་རྡེན་། 20 ཏེ་ཏུའི་ སྤེ་ར་ ཟེར་ཧན་འབོ་ ཁྱི་ཞ་ མག་ ཁྱི་ཞི་ན་ ཡོ་ཀ་ནེ་ ཡབ་ ཀོན་འཇོག་རྒེ་ ཐུག་ཡིད་རྡེ་ ཁྱི་ཞ་ རྒྱུད་ཏེ་ མོལ་ལེ་ནོག་།”

21 “ཨ་ཅོ་རྒུ་ནི་ ནོ་རྒུན་ལ་ ཡང་ ཨ་རྦེ་ པུ་ཙ་ ཡང་ ཕྲུ་རྒུའི་ ཕ་མ་རྒུན་ལ་ ངོ་ལོག་ ཅོའེ་རྡེ་ སེད་ཅུག་རྒེན་། 22 ཁྱི་ཞ་ ངེ་ཀ་ ཏེཏ་པ་ ཡོད་ཅེ་རྦེ་ མི་ཚང་མེ་ ཁྱི་ཞ་རྒུན་ལ་ སོག་པོ་ ཅོ་ནོག་། འིན་ན་ ཐ་མ་ཚུག་པ་ ཏེཏ་པེ་ན་ རྟེམ་པོ་ ལུའི་ཧན་རྒུན་ལ་ ཀོན་འཇོག་རྒེ་ ཐ་མེད་པེ་ མི་ཙེ་ ས་ལེན་། 23 ཡུལ་ཞིག་རྒེ་ན་ ཁྱི་ཞ་ ནག་པར་རྡོ་ ལྟན་ནི་ ཡང་ ཡུལ་ཞིག་ལ་ ཤོར་རྡེ་ སོང་། ངེ་ ཁྱི་ཞ་ རྡེན་འབའ་ ཟེ་འིན་, ཨིས་ར་ཡེལ་ལེ་ ཀྲོང་ཁྱེར་ ཚང་མེ་ན་ ཁྱི་ཞ་ ལེ་ཧ་ ཅོ་ཚར་རེ་སང་ ངུལ་ལ་ མི་རིག་རྒེ་པུ་ ལོག་ཏེ་ ཡོང་ངེན་།”

24 ཡི་ཤུའི་ མོལ་, “ལོབ་ཀྲུག་ ལོབ་རྦོན་ནེ་སང་ ཆེ་, ཡང་ ཡོག་པོ་ སྤོན་འབེ་སང་ ཆེ་ མག་། 25 འིན་ན་ ལོབ་ཀྲུག་ ལོབ་རྦོན་ ཙོག་སེ་ ཡང་ ཡོག་པོ་ སྤོན་འབོ་ ཙོག་སེ་ འགྱུར་ ཉེན་ནེ་ནོག་། ཀལ་ཏེ་ ང་ སྤོན་འབོ་ འིན་ འིན་ན་ ང་ འབེལ་ཟེ་འབུལ་ ཡང་ནི་ རྡུད་རྡེ་ འགོ་རྦ་ ཟེར་རེ་ཡོད་ནི་, ཏེ་ནི་ ཁྱི་ཞ་ ངེ་ ལོབ་ཀྲུག་ འིན་ཅེ་རྦེ་ མང་ངེ་ ངན་པ་ མི་ཟེར་རེ་?”

མི་རྒུན་ལ་ མ་འཇིའི་ ཀོན་འཇོག་ལ་ འཇིའི་།

26 “ཁྱི་ཞ་ འཇི་ནང་ ལྟན་ཀན་རྒུན་ལ་ མ་འཇིའི་, ཅེ་ཟེར་ནི་ ཏུའི་རྦོ་ ལེབ་རྦེན་ ནམ་ ཀོན་འཇོག་རྒེ་ ཀབ་ཏེ་ པོར་ཧན་ ཚང་མ་ ཕིང་ངེ་ ཛེ་རྡེན་ ཡང་ རྦེ་རྡེ་ པོར་ཧན་ ཚང་མ་ མི་རྒུན་ལ་ ངོན་ཅུག་རྒེ་ ཛེ་རྡེན་། 27 ངེ་ ཁྱི་ཞ་རྒུན་ལ་ མུན་ཀྲག་རྒེ་ན་ ཤེད་ཀན་རྒུན་ ཉི་མེ་ འོད་རྡེ་ན་ ཤོད་, ཁྱི་ཞི་ ནམ་ཅོག་རྒེ་ན་ ཤུབ་ཏེ་ ངེ་ ཤེད་ཀན་རྒུན་ ཁང་པེ་ ཁ་ཏོཏ་ནི་ ཀུ་ཅུ་ ཏྃ་རྡེ་ ཤོད་།”

28 “སེམ་ཡིད་ མན་ནེ་ ལུའི་ ཅིག་པོ་ སེད་ ཉེན་ཀན་རྒུན་ལ་ མ་འཇིའི་, འིན་ན་ ཉ་ཝེ་ན་ ཕྃ་རྡེ་ ལུའི་ རྡང་ སེམ་ཡིད་ ཉ་ཧ་ མེ་ཀན་ ཛེད་ཉེན་ཀ་ནེ་ ཀོན་འཇོག་ལ་ འཇིའི་། 29 ཅི་སྤ་ ཉི་ པེ་ནེ་ ཅུང་ཙེ་ ཞིག་ལ་ ཙོང་ངེ་ མི་འདུག་རྒེ་? འིན་ན་ ནམ་ཚུག་པ་ རྡེ་བ་ཅན་ནེ་ ཡབ་རྦེ་ རྒོང་སྤ་ མི་སལ་ ཅི་སྤ་ ཅིག་ལ་ ཐང་ཀེ་ཀ་ མི་ཀྲུལ་། 30 ཁྱི་ཞི་ འགོའེ་ཀ་ ཡོ་ཀ་ནེ་ སྲེ་ ཀྲང་ཧ་ལ་ ཁོང་ངེ་ ཁྱེན་ནེ་ ཛེད་རྡེ་ནོག་། 31 ཏེ་རྒ་རྦེ་ཕི་ འཇིའི་ མ་འཇིའི་, ཀོན་འཇོག་རྒེ་ ཧུ་འདུན་ལ་ ཅི་སྤ་ མང་པེ་སང་ ཁྱི་ཞ་ ཅིག་ མང་ངེ་ རིན་ཆེ་ ནོག་།”

32 “མི་རྒུ་ནི་ འདུན་ལ་, ཡི་ཤུ་ ངེ་ ཙོབོ་ འིན་ ཟེར་ཧན་ ཚང་མ་ ངེ་ལ་ ངེ་ ཡབ་ རྡེ་བ་ཅན་ནེ་ན་ ཞུ་ཧ་ནེ་ ཧུན་འདུན་ལ་ ཁོང་རྒུན་ ངེ་ རྡེན་འབེ་ ལོབ་ཀྲུག་ འིན་ ཟེ་འིན་། 33 འིན་ན་ མི་རྒུ་ནི་ འདུན་ལ་ ང་ མི་ཤེ་ཟུན་ ཏང་ཀན་ ཚང་མ་ ངེ་ལ་ ངེ་ ཡབ་ རྡེ་བ་ཅན་ནེ་ན་ ཞུ་ཧ་ནེ་ ཧུན་འདུན་ལ་ ཁོང་རྒུན་ མི་ཤེ་ ཟེ་རེན་།”

ཞིའི་རྡེ་ མེད་རྡེ་ལ་ ནོལ་ཤེ་།

34 “ཁྱི་ཞི་ ང་ འཇིག་རྟེན་ནེ་ཀ་ ཞིའི་རྡེ་ ཁྱོ་ངེ་ལ་ ཡོྃ་རྡེ་ ནོག་ མ་སམ་། ང་ ཞིའི་རྡེ་ མེད་རྡེ་ ནོལ་ཅུག་རྒེ་ལ་ ཡོྃ་རྡེ་ འིན་། 35 ཅེ་ཟེར་ནི་, ང་ ཏེཏ་པ་ ཅོ་ཅེ་རྦེ་

‘པུ་ཙ་ རང་ངེ་ ཨ་རྦ་ལ་ ངོ་ལོག་ ཅོའེན་,

ཡང་ པོ་མོ་ རང་ངེ་ ཨ་མ་ལ་ ངོ་ལོག་ ཅོའེན་,

ཡང་ པུ་ཙེ་ ན་མེ་ རང་ངེ་ མག་པེ་ ཨ་མ་ལ་ ངོ་ལོག་ ཅོའེན་།

36 མི་ཞིག་རྒེ་ འགྲ་ཝོ་, ཁོ་རང་ངེ་ ནང་མི་རྒུན་ འགྱུར་རེན་།’”

37 “རང་ངེ་ ཨ་རྦ་ ཡང་ ཨ་མ་ལ་ ངེ་སང་ མང་ངེ་ ཡ་ཤ་ ཅོ་ཀན་འབོ་ ངེ་ ལོབ་ཀྲུག་ འགྱུར་ཤེ་ འོའེ་སྤ་ མན་, ཡང་ རང་ངེ་ པུ་ཙ་ ཡང་ པོ་མོ་ལ་ ངེ་སང་ མང་ངེ་ ཡ་ཤ་ ཅོ་ཀན་འབོ་ ངེ་ ལོབ་ཀྲུག་ འགྱུར་ཤེ་ འོའེ་སྤ་ མན་། 38 རང་ངེ་ རྡུ་ངལ་ལེ་ རྐྱང་ཤིང་ ཁུར་རྡེ་ ངེ་ ལྟིང་ནི་ མ་འགྲྃ་ཀན་འབོ་ ངེ་ ལོབ་ཀྲུག་ འགྱུར་ཤེ་ འོའེ་སྤ་ མན་། 39 རང་སྲོག་ ཐམ་འདེ་ འདེད་ཀན་རྒུ་ནི་ རྡེན་འབེ་ མི་ཙེ་ རྐྱལ་ལེན་, འིན་ན་ ངེ་ཕི་ ཁོ་རང་ངེ་ སྲོག་ རྐྱལ་ཧན་རྒུན་ལ་ རྡེན་འབེ་ མི་ཙེ་རྦོ་ ཐོབ་རྦེན་།”

སོལ་རེ་།

40 “ཁྱི་ཞ་ རྒ་སུའི་ ཅོ་ཀན་རྒུ་ནི་ ང་ རྒ་སུའི་ ཅོའེ་རྡེ་ ནོག་, ཡང་ ང་ རྒ་སུའི་ ཅོ་ཀན་རྒུ་ནི་, ང་ ཀ་ལེ་ ཛེད་ཀན་འབོ་ལ་ རྒ་སུའི་ ཞུའི་རྡེ་ ནོག་། 41 ཀོན་འཇོག་རྒེ་ ཀའ་ ཤེད་ཀན་ འིན་ཅེ་རྦེ་ ལུང་རྟོན་པ་ རྒ་སུའི་ ཞུ་ཀན་རྒུན་ལ་ ལུང་རྟོན་པ་ ཐོབ་ཀན་ ཙོག་སེ་ སོལ་རེ་ ཐོབ་རྦེན་། ཡང་ ཀྲང་པོ་ འིན་ཅེ་རྦེ་ མི་ཞིག་ལ་ རྒ་སུའི་ ཞུ་ཀན་རྒུན་ལ་ མི་ ཀྲང་པོ་ཞིག་ལ་ ཐོབ་ཀན་ ཙོག་སེ་ སོལ་རེ་ ཐོབ་རྦེན་། 42 ངེ་ ཁྱི་ཞ་ རྡེན་འབའ་ ཟེ་འིན་ ངེ་ ལོབ་ཀྲུག་ ཉམ་ཤུང་ཞིག་ལ་ ཆུ་ ཀྲང་མོ་ ཀོ་རེ་ ཀང་ ཏང་ཀན་རྒུན་ལ་ ནེན་ཏེན་ལ་ སོལ་རེ་ སལ་ལེ་ ཛེ་རྡེན་།”