མཏ་ཐ་ 9

ཟ་ཕོག་ཀན་ཞིག་ ཕན་ཅུག་རྒེ་ ཛེད་།

ཡི་ཤུ་ ཆུ་འགྲུལ་ལེ་ཀ་ ཞོན་འདེ་ ཚོའེ་ ཕར་ཧ་ ཁོ་རང་ངེ་ ཀྲོང་ཁྱེར་ལ་ རྐྱོད་རྡེ་ ཛེད་། 2 ཏུ་རུ་ མི་ ཁ་ཅིག་རྒེ་ ཟ་ཕོག་ཀན་འཇིག་ མལ་སེ་ཀ་ ཁུར་རྡེ་ ཡི་ཤུ་ས་ ཁྱོྃ་། ཁོང་རྒུ་ནི་ མིའུ་ རྒྱལ་ཅུག་ཅེ་ ཏེཏ་པ་ ཅོ་ཀན་འབོ་ ཡི་ཤུའི་ ཟི་རྡེ་ ཁོང་ངེ་ ཟ་ཕོག་ཀན་འབོ་ལ་ མོལ་, “པུ་ཙ་ སེམ་ཤུག་ ཅོའེ་, ངེ་ ཁྱེ་རང་ངེ་ རྡིག་པ་རྒུན་ལ་ ཤག་སྤ་ ཏང་ངེ་ཡོད་།”

3 ཏོ་ ཚོར་རེ་རྡང་ ཆོའེ་ཁྲིམ་ལ་ ཁེ་སྤ་ ཁ་ཅིག་རྒེ་ སེམ་མེ་ན་ སམ་, “འི་ མི་རྦེ་ ཏེཏ་ལོག་ ཅོའེ་།”

4 ཁོང་རྒུ་ནི་ སམ་ཀན་འབོ་ ཡི་ཤུའི་ ཁྱེན་འདེ་ མོལ་, “ཁྱི་ཞི་ ཁྱི་ཞ་རང་ངེ་ སེམ་མེ་ན་ སེམ་ངན་ ཅེ་ སམ་མེ་ཡོད་? 5 ཅི་ སམ་མེ་རག་, ‘ཁྱེ་རང་ངེ་ རྡིག་པ་ ཤག་སྤ་ ཏྃ་རྡེ་ འིན་’ ཟེར་ཤེའོ་ ལ་མོ་ ནོག་རྒེ་ ཡ་ ‘ལྃ་རྡེ་ འགྲུལ་’ ཟེར་ཤེའོ་? 6 འིན་ན་ མི་རིག་རྒེ་པུ་ལ་ འཇིག་རྟེན་ནེ་ཀ་ རྡིག་པ་ ཤག་སྤ་ ཏང་ཅེ་ ཝང་ཆ་ ཡོ་ཀན་འབོ་ ཁྱི་ཞ་ ལྟན་ནེན་” ཏེ་ནི་ ཡི་ཤུའི་ ཟ་ཕོག་ཀན་འབོ་ལ་ མོལ་, “ལོྃ་, རང་ངེ་ མལ་ས་ ཁུར་རྡེ་ ཁང་པ་ སོང་།”

7 ཁོ་ ལྃ་ ཡང་ ཁང་པ་ སོང་། 8 མི་ཚོག་རྡེ་ ཏོ་ ཐོང་ངེ་རྡང་, འཇིའི་རྡེ་ ཡང་ སི་ཝེ་ན་, མི་ལ་ ཡུ་ཙོག་སེ་ ཝང་ཆ་ སལ་ལེ་ ཛེད་ཅེ་ལ་ ཀོན་འཇོག་ལ་ རྟོད་པ་ པུལ་།

མཏ་ཐ་ འབོ་ ཛེད་།

9 ཡི་ཤུ་ ཏེ་ཀ་ནི་ རྐྱོད་རྡེན་ ཡོད་ཟ་ནི་, མཏ་ཐ་ ཁྲལ་ནེན་སེ་ མལ་ལེ་ཀ་ འདེད་ཏེ་ ཡོད་རྡེ་ ཟིའི་ ཡང་ ཁོང་ངེ་ ཁོ་ མོལ་, “ངེ་ ལྟིང་འགྲྃ་ནི་ འགྲོྃ་།” ཁོ་ ལྃ་རྡེ་ ཡི་ཤུའི་ ལྟིང་འགྲྃ་ནི་ འགྲྃ་།

10 ལྟིང་ནི་ ཡི་ཤུ་ མཏ་ཐེ་ ཁང་པ་ ཕི་རོའེ་ ཚལ་མ་ འདོན་ནེ་ལ་ རྐྱོད་ཏེ་ ཡོད་ཏུའི་, ཁྲལ་ནེན་ཀན་ འདང་ ཞེན་ རྡིག་ཅེན་ མི་ མང་པོ་ ཡི་ཤུ་ རྡང་ ལོབ་ཀྲུག་རྒུན་ ཉམ་པོ་ ཁར་ཞི་ ཟ་ལ་ ཡོྃ་རྡེ་ ཡོད་པེན་། 11 པ་རུ་ཤི་པ་རྒུ་ནི་ ཏོ་ ཐོང་ངེ་རྡང་, ཁོང་རྒུ་ནི་ ཡི་ཤུའི་ ལོབ་ཀྲུག་རྒུན་ལ་ འདྲི་, “ཁྱི་ཞི་ ལོབ་རྦོན་, ཁྲལ་ནེན་ཀན་ འདང་ རྡིག་ཅེན་ མི་རྒུན་ ཉམ་པོ་ ཅེ་ འདོན་ཏང་ འདོན་ནེ་ནོག་?”

12 ཡི་ཤུའི་ ཏོ་ སན་ནེ་རྡང་, ཁོང་ངེ་ མོལ་, “ཟུར་མོ་ ཡོ་ཀན་ཞིག་ལ་ མ་ནི་ ཁམ་ཟང་ མི་ཞིག་ལ་ ཨམ་ཅི་ རྒོའེ་རྡེ་ མག་། 13 སོང་ ཡང་ ཀོན་འཇོག་རྒེ་, ‘སྲོག་ཆོད་ པུལ་ཅེ་ མག་པེ་, ཅིག་ ཏང་ ཅིག་ལ་ ཉིང་ཞེ་ ལྟན་ཅེ་རྦོ་ ངེ་ འདོད་པ་ འིན་’ མོལ་ཧ་ནེ་ ཏོན་འབོ་ ཅི་ འིན་ ཧ་ཀོ་ཅེ་ ཙོན་འགྲུའི་ ཅོའེ་། ཁྱི་ཞ་ ཀྲང་པོ་ འིན་ སམ་ཀན་རྒུན་ལ་ མན་, ང་ རྡིག་ཅེན་རྒུན་ལ་ འབོ་ལ་ ཡོྃ་རྦེན་།”

ཉིང་པ་ ལུག་སྲོལ་རྒུན་ ཡི་ཤུའི་ སོ་མ་ ལབ་ཞ་རྒུན་ ཉམ་པོ་ མ་སྲེ་།

14 ཏེ་ནི་ ཡོ་ཧཱ་ནན་ནེ་ ལོབ་ཀྲུག་རྒུན་ ཡི་ཤུ་ས་ ཡོྃ་རྡེ་ ཁོང་ལ་ འདྲི་, “ང་ཞ་ རྡང་ པ་རུ་ཤི་པ་རྒུན་ ཉུང་ནེ་ལ་ ལེན་ མང་པོ་ འདེད་རྡེ་ཡོད་, འིན་ན་ ཉེ་རང་ངེ་ ལོབ་ཀྲུག་རྒུན་ ཅེ་ ཉུང་ནེ་ལ་ འདེད་རྡེ་ མག་?”

15 ཡི་ཤུའི་ ལེན་སལ་, “པག་རྟོན་ནེ་ན་ མག་པ་ ཉམ་པོ་ ཡོད་ཟ་ནི་ ཁོའེ་ འགྲོན་པོ་རྒུ་ནི་ རྡུག་པོ་ ཅོའེ་ནེ་? མི་ཅོ་། ཏུའི་རྦོ་ ལེབ་རྦེན་ ནམ་ མག་པེ་ འགྲོན་པོ་རྒུན་ས་ནི་ པེ་རྡེ་ ཁྱེར་རེན་, ཏེ་ནི་ ཁོང་རྒུ་ནི་ རྡུག་པོ་ ཅོའེ་རྡེ་ ཉུང་ནེ་ལ་ འདེ་རྡེན་།”

16 “སུ་ཞིག་རྒེ་ ཀོའེ་ལག་ ཉིང་པ་ཞིག་ལ་ ལེན་བ་ སོ་མ་ ཏབ་རྦེ་ མག་, ཀལ་ཏེ་ ཏབ་ནི་ ཀོའེ་ ཁྲུ་རྡང་ ལེན་བ་ སོ་མ་རྦོ་ ཁོྃ་རྡེ་ ཀོའེ་ ཆེད་ཀན་འབོ་ མང་ངེ་ ཐུ་ ཅོ་ནོག་།”

17 “ཏེ་རྒ་ ཙོག་སེ་ རྒུན་འགྲུམ་མེ་ ཁོའེ་ སོ་མ་ པག་སྤེ་ རྐྱ་སྤ་ ཉིང་པེ་ན་ མི་ལུག་། ཀལ་ཏེ་ ལུག་ནི་ རྒུན་འགྲུམ་མེ་ ཁོའེ་རྦོ་ལ་ རྐྱུར་ ལྃ་རྡེ་ པག་སྤེ་ རྐྱ་སྤ་ རྦོའེ་རྡེ་ ཆེད་རྡེན་, ཁོའེ་ རྦོའེ་རྡེ་ རྐྱ་སྤ་ འདོད་མེད་ ཆེན་། འིན་ན་ རྒུན་འགྲུམ་མེ་ ཁོའེ་ སོ་མ་ པག་སྤེ་ རྐྱ་སྤ་ སོ་མེ་ན་ ལུག་ནི་ རྒུན་འགྲུམ་མེ་ ཁོའེ་ རྡང་ པག་སྤ་ ཉ་ཧ་ རྐྱོབ་རྦེན་།”

ཟུར་མོ་ ཡོ་ཀ་ནེ་ པོ་མོ་ རྡང་ པོ་མོ་ ཆུང་ཙེ་ ཤི་ཀན་།

18 ཡི་ཤུའི་ ཏོ་རྒུན་ མོལ་ལེན་ ཡོད་ཏུའི་, ཡ་ཧུ་འདཱ་པེ་ འདུ་ཀང་ངེ་ འུ་རྐྱོང་ཞིག་ ཡོྃ་རྡེ་ པིག་ཛུམ་ རྒྱབ་ཏེ་ ཁོང་ལ་ ཟེར་, “ངེ་ པོ་མོ་ ཏག་ས་རང་ ཤི་, འིན་ན་ ཉེ་རང་ རྐྱོད་ཏེ་ ཉེ་རང་ངེ་ ཆག་ ཁོའེ་ཀ་ པོ་རེ་ ཛེད་ནི་, ཁོ་ སོན་ནེན་།”

19 ཡི་ཤུ་ རྡང་ ཁོང་ངེ་ ལོབ་ཀྲུག་རྒུན་ ཞྃ་རྡེ་ འུ་རྐྱོང་ ཉམ་པོ་ རྐྱོད་རྡེ་ ཛེད་། 20 ཏེ་རྒ་ ཏུའི་ལ་ པུད་ཀ་ནེ་ ལོ་ ཅུག་ཉི་ནི་ཕ་ལ་ ཏུའི་རྒྱུན་ ཟུྃ་སྤོ་ ཞིག་ཅེ་ ཟུར་མོ་ ཡོང་ཀ་ནེ་ པོ་མོ་ཞིག་ ཡི་ཤུའི་ རྒྱབ་ནི་ ཡོྃ་རྡེ་ ཁོང་ངེ་ ནམ་ཟེ་ ཀྲུ་ཞིག་ལ་ ལག་པ་ ཐུག་། 21 ཁོའེ་ ཁོ་རང་ངེ་ སེམ་མེ་ན་ སམ་, “ཀལ་ཏེ་ ཁོང་ངེ་ ནམ་ཟ་ ལག་པ་ ཐུག་ནི་ ངེ་ ཟུར་མོ་ རྒྱལ་ལེ་ནོག་།”

22 ཡི་ཤུ་ རྒྱབ་ལོག་ལ་ ཟི་རྡེ་ པོ་མོ་ལ་ མོལ་, “པོ་མོ་, སེམ་ཤུག་ ཅོའེ་། ཁྱེ་རང་ངེ་ ཏེཏ་པེ་ ཁྱེ་རང་ ཕན་ཅུག་ཏེ་ འིན་” ཏེ་རྒ་མ་རྒ་ ཁོའེ་ ཟུར་མོ་ རྒྱལ་།

23 ཡི་ཤུ་ འུ་རྐྱོང་ངེ་ ཁང་པེ་ན་ རྐྱོད་རྡེ་རྡང་ ལིང་ངུ་ ཕུ་ཀན་རྒུ་ནི་ ཉ་ངན་ནེ་ ཉག་ ཕུའིན་ ཡང་ མི་རྒུན་ ཀུ་ཅུ་ ཏང་ངེན་ ངུའིན་ ཟིའི་། 24 ཡི་ཤུའི་ ཁོང་རྒུན་ལ་ མོལ་, “འབིང་འདེ་ སོང་, པོ་མོ་ མ་ཤི་ ཉིད་ལོག་ཏེ་ འིན་”, འིན་ན་ ཁོང་རྒུ་ནི་ ཁྲེལ་རྒོད་ ཏྃ་། 25 ཁོང་རྒུན་ ཕི་ལོག་ལ་ འབིང་འདེ་ ལྟིང་ནི་ ཡི་ཤུ་ པོ་མོ་ ཡོད་སེ་ ནང་ལ་ རྐྱོད་ཏེ་, ཁོའེ་ ལག་པ་ ཐམ་མེ་རྡང་, པོ་མོ་ལ་ སྲོག་ ལོག་ཏེ་ ཐོབ་ ཡང་ ཀོའག་ ལྃ་། 26 ཡང་ ཏེ་ ནེ་ཚུལ་རྦོ་ ཡུལ་ སོན་ཏེ་ན་ ཕེལ་།

ཞ་ར་ རྡང་ ཧ་འགྲང་རྒུན་ ཕན་ཅུག་རྒེ་ ཛེད་།

27 པོ་མེ་ ཁང་པ་ནི་ ཡི་ཤུ་ འབིང་འདེ་ རྐྱོད་ཟ་ནི་, ཞ་ར་ ཉི་ ཁོང་ངེ་ ལྟིང་འགྲྃ་ནི་ ཡོྃ་རྡེ་ ཀུ་ཅུ་ ཏང་ངེན་ ཟེར་, “རྒྱ་སྤོ་ འདཱ་འབིད་རྡེ་ ཕར་རྒྱུད་ ང་ཞི་ཀ་ ཉིང་ཞེ་ ཛེད་།”

28 ཡི་ཤུ་ ཁང་པེ་ན་ རྐྱོད་རྡེ་རྡང་, ཞ་ར་ ཉ་ཧ་ ཁོང་ས་ ཡོྃ་། ཁོང་ངེ་ མོལ་, “ངེ་ ཁྱི་ཞ་ ཕན་ཅུག་ ཉེན་ནེན་ སམ་འདེ་ རྡེན་ཆེ་རྡེ་ རག་རྒེ་?” ཁོང་ ཉ་ཧེ་ ཟེར་, “ང་ཞི་ རྡེན་ཆེ་རྡེ་ རག་།”

29 ཏེ་ནི་ ཡི་ཤུའི་ ཁོང་རྒུ་ནི་ མིག་རྒེ་ཀ་ ཆག་སེ་ ཛེད་ཏེ་ མོལ་, “ཁྱི་ཞི་ ཏེཏ་པ་ ཡོ་ཀན་ ནང་ཞིན་ ཀྲུཔ་ཤིག་།” 30 ཁོང་རྒུ་ནི་ མིག་ རྒྱལ་རྡེ་ ཐོང་ཉེན་ ཡང་ ཡི་ཤུའི་ ཁོང་རྒུན་ལ་, “ཡུ་རྦེ་ ཧོར་ལ་ སུ་ལ་ མ་ཤེད་” མོལ་རྡེ་ སྤང་པུད་རྡེ་ ཛེད་། 31 འིན་ན་ ཁོང་རྒུན་ ཕི་ལོག་ལ་ སོང་འདེ་ ཡུལ་ཞོང་ སོན་ཏེ་ན་ ཡི་ཤུའི་ ཁོང་རྒུན་ལ་ ཛེད་ཀ་ནེ་ ནེ་ཚུལ་རྦོ་ ཕེལ་ཅུག་།

32 ཁོང་ ཉ་ཧ་ སོང་ ཚར་རེ་རྡང་, རྡུད་ ཞུ་ཧན་ ཧ་འགྲང་ཞིག་ ཡི་ཤུ་ས་ ཁྱོྃ་, 33 ཡང་ རྡུད་པོ་ ཕིང་ངེ་རྡང་, ཧ་འགྲང་འབེ་ སྤེ་ར་ ཏྃ་། མི་ཚོག་ ཧ་ལེ་རྡེ་ ཟེར་, “ཨིས་ར་ཡེལ་ལེ་ན་ ཡུ་ཙོག་སེ་ མ་ནི་ མ་ཐོང་།”

34 འིན་ན་ པ་རུ་ཤི་པ་རྒུ་ནི་ ཟེར་, “རྡུད་རྒུ་ནི་ འགོ་རྦེ་ ཁོ་ རྡུད་རྒུན་ ཕིང་ཅེ་ ཁྱུད་ ཏྃ་རྡེ་ ནོག་།”

ལེ་མི་ རྒོའེ་ཤེ་།

35 ཡི་ཤུ་ ཀྲོང་ཁྱེར་ རྡང་ འགམ་ཡུལ་ ཚང་མ་ལ་ རྐྱོད་ཏེ་, འདུ་ཀང་རྒུ་ནི་ན་ ལབ་ཞ་ ས་ལེན་ རྡེ་བ་ཅན་ནེ་ རྒྱལ་སྲིད་རྡེ་ ནེ་ཚུལ་ ཟང་པོ་ ཤེད་རྡེ་ ཛེད་, ཡང་ ཟུར་མོ་ རྡང་ ནེད་ ཚང་མ་ ཕན་ཅུག་རྒེ་ ཛེད་། 36 ཁོང་ངེ་ མི་ཚོག་པོ་ ཟི་རྡེ་རྡང་, ཁོང་རྒུ་ནི་ཀ་ ཉིང་ཞེ་ རྐྱེ་ ཅེ་ཟེར་ནི་ ཁོང་རྒུན་ ནག་ ཐོང་ཀན་ ཡང་ ཡ་ཏོ་ མ་ཐོབ་ཀན་, ལུག་ཟི་ མེ་ཀ་ནེ་ ལུག་ ཙོག་སེ་ ཡོད་པེན་། 37 ཏེ་ནི་ ཡི་ཤུའི་ ལོབ་ཀྲུག་རྒུན་ལ་ མོལ་, “ལྟོན་ཏོག་ མང་པོ་ཞིག་ ངེ་ ཆོག་ཆོག་ འདུག་, འིན་ན་ ལྟོན་ཏོག་ ངེ་ཀ་ནེ་ ལེ་མི་ མ་ ཉུང་ཙེ་ཞིག་ མ་ནི་ མི་འདུག་། 38 ཏོ་རྦེ་ཕི་ ལྟོན་ཏོག་རྒེ་ རྡག་པོ་ ཙོབོ་ ཀོན་འཇོག་ལ་ ལྟོན་ཏོག་ ངེ་ཀ་ནེ་ ལེ་མི་ མང་ངེ་ ཀ་ལེ་ ཛེད་ཅེ་ལ་ ཞུ་ཝ་ པུལ་།”