ཛེ་ནེད་ཅེན་ཞིག་ ཕན་ཅུག་རྒེ་ ཛེད་།
8
ཡི་ཤུ་ རི་ནི་ ཡོག་ལ་ པབ་ཏེ་ རྐྱོད་ཟ་ནི་, མི་ཚོག་ མང་པོ་ཞིག་ ཁོང་ངེ་ ལྟིང་འགྲྃ་ནི་ ཡོྃ་། 2 ཛེ་ནེད་ཅེན་ནེ་ མི་ཞིག་ ཙོབོ་རྡེ་ འདུན་ལ་ ཡོྃ་ ཡང་ པིག་ཛུམ་ རྒྱབ་ཏེ་ ཟེར་, “ཙོབོ་ལེ་, ཉེ་རང་ ཐུག་ཐེད་ནི་ ང་ རྒྱལ་ཅུག་ཏེ་ སང་མ་ ཛེད་ ཉེན་ནེ་ནོག་།”3 ཡི་ཤུའི་ ཆག་ རྐྱང་འདེ་ ཁོ་ ཐུག་ཅུག་རྒེ་ ཛེད་ཏེ་ མོལ་, “ང་ ཁྱེ་རང་ རྒྱལ་ཅུག་རྒེ་ སང་མ་ ཅོ་ལ་ ཐེད་རྡེ་རག་།” ཏེ་རྒ་མ་རྒ་ ཛེ་ནེད་པོ་ མེ་ཀན་ སོང་། 4 ཏེ་ནི་ ཡི་ཤུའི་ ཏེ་ མིའུ་ལ་ མོལ་, “སུ་ལ་ མ་ཤེད་, འིན་ན་ སོང་འདེ་ རང་ངེ་ ཟུྃ་སྤོ་ ལ་མ་ ལྟོན་ ཡང་ ལུང་རྟོན་པ་ མོ་ཤེ་ ཀཱ་ སལ་ཧན་ ནང་ཞིན་ ཀོན་འཇོག་ལ་ ཆོད་པ་ པུལ་, ཏོ་ མི་རྒུན་ལ་ ཁྱེ་རང་ སང་མ་ ཆ་ཀ་ནེ་ སྤང་པོ་ འིན་།”
མག་མི་རྒྱེ་ སྤོན་འབེ་ ཏེཏ་པ་།
5 ཡི་ཤུ་ ཀ་ཕར་ན་ཧུམ་མེ་ ཀྲོང་ཁྱེར་རེ་ན་ ཅེབ་ ལབ་རྦེ་རྒྱལ་ལ་, རོམ་མེ་ མག་མི་རྒྱེ་ སྤོན་འབོ་ཞིག་ ཁོང་ངེ་ འདུན་ལ་ ཡོྃ་རྡེ་ ཡ་ཏོ་ ཛེད་ཅེ་ལ་ ཞུའི་, 6 “ཙོབོ་ལེ་, ངེ་ ཡོག་པོ་ལ་ ཟ་ཕོག་ཏེ་ ཁང་པ་ ཟུར་མོ་ ཧོཔ་ ཡོྃ་རྡེ་ ཡོད་།”
7 ཡི་ཤུའི་ མོལ་, “ང་ ཡོྃ་རྡེ་ ཁོ་ ཕན་ཅུག་རྒེན་།”
8 མག་མི་རྒྱེ་ སྤོན་འབེ་ ཟེར་, “ཙོབོ་ལེ་, ཉེ་རང་ ངེ་ ཁང་པ་ རྐྱོད་ཅེ་ འོའེ་སྤ་ ང་ མེད་། འིན་ན་ ཉེ་རང་ངེ་ ཀཱ་ སལ་ནི་ ངེ་ ཡོག་པོ་ ཕན་ནེན་། 9 ཝང་ཆེ་ ཡོག་ལ་ ང་ལ་ འདེད་རྡེ་ཡོད་ ཡང་ ངེ་ ཝང་ཆེ་ ཡོག་ལ་ མག་མི་རྒུན་ ཡོད་། ངེ་ ཅིག་ལ་ ‘སོང་’ ཟེར་ནི་ ཆ་ནོག་ ཡང་ ཅིག་ལ་ ‘ཤོག་’ ཟེར་ནི་ ཡོང་ངེ་ནོག་, ཡང་ ངེ་ ཡོག་པོ་ལ་ ‘འི་ ལེ་ཧ་རྦོ་ ཅོའེ་’ ཟེར་ནི་ ཅོ་ནོག་།”
10 ཡི་ཤུའི་ ཏོ་ སན་ནེ་རྡང་ ཧ་ལེ་རྡེ་ ཁོང་ལ་ འགྲྃ་རྡེ་ ཡོང་ཀ་ནེ་ མི་རྒུན་ལ་ མོལ་, “ངེ་ ཁྱི་ཞ་ རྡེན་འབའ་ ཟེ་འིན་, ཨིས་ར་ཡེལ་ལེ་ན་ ང་ ཡུ་ཙོག་སེ་ ཏེཏ་པ་ཅེན་འཇིག་ མ་ནི་ མ་ཐོབ་། 11 ངེ་ ཁྱི་ཞ་ ཟེ་འིན་, ཡ་ཧུ་འདཱ་པ་ མན་ཀན་ མང་པོ་ ཤར་ རྡང་ ནུབ་ནི་ ཡོྃ་རྡེ་, རྡེ་བ་ཅན་ནེ་ རྒྱལ་སྲིད་རྡེ་ན་ འདོན་ཏང་ངེ་ཕི་ ཨ་ཧོའེ་ ཕ་མེ་པོ་ ཨབ་ར་ཧམ་, ཨི་སཱག་ ཏང་ ཡ་ཀུབ་ ཉམ་པོ་ རང་ངེ་ མལ་ལེ་ཀ་ འདེད་རྡེན་། 12 འིན་ན་ ཨིས་ར་ཡེལ་པ་ ཀའོ་རྒུ་ནི་ཕི་ རྡེ་བ་ཅན་ནེ་ རྒྱལ་སྲིད་པོ་ ཀྲལ་འགྲིག་ ཅོའོ་ ཛེད་ཏེ་ འིན་འབེན་ ཁོང་རྒུན་ ཕི་ལོག་ལ་ མུན་ཀྲག་རྒེ་ན་ ཕང་ངེ་ ཛེ་རྡེན་, ཏུ་རུ་ ནག་ སྲན་ཀྲེ་ ཐོང་རྡེ་ ངུ་ཅེ་ རྡང་ སོ་ སིག་ཅེ་ ཡོང་ངེན་།”
13 ཏེ་ནི་ ཡི་ཤུའི་ མག་མི་རྒྱེ་ སྤོན་འབོ་ལ་ མོལ་ལེ་ ཛེད་, “སོང་, ཁྱེ་རང་ངེ་ ཏེཏ་པ་ ཅོ་ཀན་ ནང་ཞིན་ ཁྱེ་རང་ངེ་ ཡོག་པོ་ རྒྱལ་ལེན་།” ཡི་ཤུའི་ མོལ་ཧན་ནེ་ ཏེ་རྒ་ ཏུའི་ཚོད་པེ་ཀ་ ཡོག་པེ་ ཟུར་མོ་ རྒྱལ་།
ཡི་ཤུའི་ མི་ མང་པོ་ ཕན་ཅུག་རྒེ་ ཛེད་།
14 ཡི་ཤུ་ པི་ཏྲ་རེ་ ཁང་པ་ རྐྱོད་རྡེ་རྡང་, ཁོང་ངེ་ པི་ཏྲ་རེ་ ན་མེ་ ཨ་མ་ ཚེད་ ཡོྃ་རྡེ་ མལ་སེ་ན་ འདེད་ཏེ་ ཟིའི་། 15 ཡི་ཤུའི་ ཁོའེ་ ལག་པ་ ཆག་ཐུག་རྒེ་ ཛེད་ཅེ་ཀ་ནི་ ཚེད་པོ་ མེ་ཀན་ སོང་, ཁོ་ ལྃ་རྡེ་ ཁོང་ལ་ ཞབ་རྟོག་ ཞུའི་།
16 ཏེ་རྒ་ ཕི་ཏོག་ མི་རྒུ་ནི་ རྡུད་ ཞུ་ཧན་ མང་པོ་ ཁོང་ས་ ཁྲིད་ཏེ་ ཁྱོྃ་, ཁོང་ངེ་ “འབིང་” མོལ་རྡེ་ ཀཱ་ སལ་ཅེ་ཀ་ནི་ རྡུད་རྒུན་ འབིང་ ཡང་ ཟུར་མོ་ ཡོ་ཀན་ ཚང་མ་ ཕན་ཅུག་རྒེ་ ཛེད་། 17 མ་ཤི་ཀེ་ ཧོར་ལ་ ལུང་རྟོན་པ་ ཡེ་ཤ་ཡཱ་ འབྲི་ཛེད་ཀན་འབོ་ འདྲན་འདྲ་ ཀྲུཔ་ཅེ་ལ་ ཡི་ཤུའི་ ཏོ་རྒུན་ ཛེད་། ཡེ་ཤ་ཡཱེ་ འབྲི་ཛེད་ཀན་འབོ་,
“ཁོང་ངེ་ ཨ་ཧོ་ ནེད་ནི་ རྐྱོབ་རྦེ་ཛེད་།
ཡང་ ཟུར་མོ་ནི་ ཕན་ཅུག་རྒེ་ ཛེད་།”
ཡི་ཤུའི་ རྒྱབ་ནི་ འགྲང་ཤེ་ ལ་མོ་ མན་།
18 ཡི་ཤུའི་, ཁོང་ལ་ ཁར་ཁོར་རེ་ མི་ཚོག་པོ་ ཟི་རྡེ་རྡང་, ཁོ་རང་ངེ་ ལོབ་ཀྲུག་རྒུན་ལ་ ཚོའེ་ ཕར་ཧ་ ཆ་ཅེ་ལ་ ཀཱ་ སལ་ལེ་ ཛེད་། 19 ཆོའེ་ཁྲིམ་ལ་ ཁེ་སྤ་ཞིག་ ཡོྃ་རྡེ་ ཟེར་, “ལོབ་རྦོན་ལེ་, ཉེ་རང་ ཀ་རུ་ རྐྱོད་ན་ ང་ ཉེ་རང་ ཉམ་པོ་ འགྲྃ་རྡེ་ ཡོང་ངེན་།”
20 ཡི་ཤུའི་ ལེན་སལ་, “ཝ་ཙེ་ལ་ ཝ་ཚང་ འདང་, ནམ་ཀེ་ ཅ་ ཅ་ཚང་ ཡོད་ཏེ་ ནོག་, འིན་ན་ ང་ མི་རིག་རྒེ་པུ་ལ་ འགོ་ པོར་རྡེ་ ངལ་ཚོ་ཅེ་ མལ་རྦོ་ མེད་།”
21 ཞེན་ ལོབ་ཀྲུག་ཞིག་རྒེ་ ཟེར་, “ཙོབོ་ལེ་, ངུལ་ལ་ ང་ ཁང་པ་ སོང་འདེ་ ང་རང་ངེ་ ཨ་རྦ་ ཤི་རྡེ་ ཧུང་ཅེ་ཕི་ ཀྲལ་འགྲིག་ ཅོ་ཅེ་ལ་ རྒོང་སྤ་ སལ་།”
22 ཡི་ཤུའི་ མོལ་, “ངེ་ ལྟིང་འགྲྃ་ནི་ འགྲོྃ་, ཡང་ སེམ་ཡིད་རྡེ་ ཐོག་ནི་ ཤི་ཀན་རྒུན་ལ་ ཁོ་རང་རྒུ་ནི་ ཤི་ཀན་རྒུན་ ཧུང་ཅུག་།”
ཡི་ཤུའི་ ལུང་ཀྲག་ མེ་ཀན་ ཛེད་།
23 ཏེ་ནི་ ཡི་ཤུ་ ཆུ་འགྲུལ་ལེ་ན་ ཞོན་ནེ་ ཛེད་ ཡང་ ལོབ་ཀྲུག་རྒུན་ ཁོང་ ཉམ་པོ་ སོང་། 24 ཧུན་མེད་ལ་ ནམ་ཚུབ་ཏེ་ ཚོའེ་ན་ ལུང་ཀྲག་ ཀྲག་པོ་ ཡོང་ཅེ་རྦེ་ ཆུལ་རྦག་ ཆུ་འགྲུལ་ལེ་ན་ ལེབ་ནང་, ཡི་ཤུ་ ཟིམ་ཞུ་རྡེ་ ཡོད་པེན་། 25 ལོབ་ཀྲུག་རྒུན་ སོང་འདེ་ ཡི་ཤུ་ ཉིད་ཚེད་རྡེ་ ཛེད་ཏེ་ ཟེར་, “ཙོབོ་ལེ་, ཙོབོ་ལེ་, ང་ཞ་རྒུན་ ཆུའི་ན་ ནུབ་ཏེ་ ཤི་ཅེ་ འདུག་། རྐྱོབ་རྦེ་ ཛེད་རྡང་།”
26 ཡི་ཤུའི་ ལེན་སལ་, “ཏེཏ་པ་ ཉུང་ཙེ་ཅེན་, ཅེ་ འཇིའི་རྡེ་ཡོད་?” ཁོང་ ཞྃ་རྡེ་, ལུང་ཀྲག་ ཏང་ ཆུལ་རྦག་རྒུན་ལ་ ཀབ་རྐྱོན་ ཛེད་པེ་ ཏེ་རྒ་མ་རྒ་ ཏོ་རྒུན་ མེ་ཀན་ སོང་འདེ་ ཚོའེ་ན་ ལྡུམ་ ཞིའི་རྡེ་ སོང་།
27 ཁོང་རྒུན་ ཧ་ལེ་རྡེ་ ཟེར་, “ཁོང་ ཀ་ཟུག་ མི་ཞིག་ འིན་ཧེ་? ལུང་སྤོ་ རྡང་ ཆུལ་རྦག་རྒུ་ནི་ ཁོང་ངེ་ ཁ་ ཉེན་འདུག་།”
རྡུད་ ཞུ་ཧ་ནེ་ མི་ ཉི་ ཕན་ཅུག་རྒེ་ ཛེད་།
28 ཡི་ཤུ་ རྡང་ ཁོང་ངེ་ ལོབ་ཀྲུག་རྒུན་ ཚོའེ་ ཕར་ཧ་, འགཱ་འདཱ་རཱེ་ ཡུལ་ཞོང་ལ་ ལེབ་རྦེ་རྡང་, རོམ་ཀང་ངེ་ མལ་ནི་ འབིང་འདེ་ ཡོང་ངེན་ ཡོ་ཀན་ རྡུད་ ཞུ་ཧན་ ཉི་ ཡི་ཤུ་ ཐུག་། ཁོང་རྒུན་ མ་ ནོད་རྐྱལ་ འཇི་ནང་ཅེན་ ཡོད་ཅེ་རྦེ་ སུ་ཞི་ལ་ ཏེ་ ལམ་ནི་ ཆ་ཉེན་ནེ་ མེད་པེན་།
29 ཁོང་རྒུ་ནི་ ཀུ་ཅུ་ སྲན་ཀྲེ་ ཏང་ངེན་ ཟེར་, “ཀོན་འཇོག་རྒེ་ སྲེ་ ཉེ་རང་ ང་ཞི་ ལེ་ཧེ་ན་ ཅེ་ འདྲེའེ་ཡོད་? ཀོན་འཇོག་རྒེ་ འདམ་མེ་ ཛེད་ཀ་ནེ་ ཁྲིམ་ཅེད་རྡེ་ ཏུའི་རྦེ་སང་ ངུལ་ལ་ ང་ཞ་ ནག་ ལྟན་ནེ་ལ་ རྐྱོད་པེ་ནེ་?”
30 ཁོང་རྒུ་ནི་སང་ ཙི་རྦིག་ ཐག་རིང་ལ་ ཕག་རྒེ་ ཏུམ་འབུ་ མང་པོ་ཞིག་ ས་ ཟོའེན་ ཡོད་པེན་། 31 རྡུད་རྒུ་ནི་ ཡི་ཤུ་ འཇུ་འཇུ་ ཞུའིན་ ཟེར་, “ཀལ་ཏེ་ ཉེ་རང་ངེ་ ང་ཞ་ ཁོང་རྒུ་ནི་ ནང་ནི་ ཕིང་ནི་, ང་ཞ་, འ་ ཕག་རྒུ་ནི་ན་ ཆ་ཅུག་རྒེ་ ཛེད་།”
32 ཡི་ཤུའི་ ཁོང་རྒུན་ལ་ “སོང་ཧེ་” མོལ་རྦེ་, ཏོ་རྒུན་ འབིང་འདེ་ ཕག་རྒུ་ནི་ན་ ཞུ་རྡེ་རྡང་, ཕག་རྒེ་ ཏུམ་འབུ་ སོན་ཏེ་ རི་ནི་ ཡོག་ལ་ ཚོའེ་ ཆོག་ལ་ རྒྱུག་ཏེ་ ཆུའི་ན་ ནུབ་ཏེ་ ཤི་།