ཞིམ་བ་ ཏང་ཅེ་།
6
ཡི་ཤུའི་ མོལ་, “མི་རྒུན་ལ་ ལྟན་ཅེ་ཕི་ ལེ་ཧ་ ཟང་པོ་ མ་ཅོ་། ཏུ་ཟུག་ ཅོ་ནི་ རྡེ་བ་ཅན་ནེ་ན་ ཞུ་ཧན་ ཁྱི་ཞི་ ཡབ་ཀ་ནི་ སོལ་རེ་ ཅང་ མི་ཐོབ་། 2 རྒོའེ་ཤེ་ཅན་རྒུན་ལ་ ཞིན་པ་ ཏང་ཟ་ནི་ འདུ་ཀང་ འདང་ ལམ་རྒུན་ལ་ ཏུང་ མ་ཕུ་ཧེ་, ཀ་ཟུག་ མི་རྒུ་ནི་ རྟོད་པ་ ཐོབ་ཅེ་ལ་ ངའིན་པ་རྒུ་ནི་a ཅོའེན་། ངེ་ རྡེན་འབའ་ ཟེ་འིན་, ཁོང་རྒུན་ལ་ སོལ་རེ་ སོན་ཏེ་ ཐོབ་ཏེ་ འིན་། 3 འིན་ན་ ཞིན་པ་ ཏང་ཟ་ནི་ རང་ངེ་ ལག་པ་ ཡོའེ་མ་ ལག་པ་ ཡོའེ་སྤེ་ ཅི་ ཅོའེན་ རྒྱུའི་ཆ་ མ་ཅུག་ཧེ་། 4 ཞིན་པ་ སྃ་རྡེ་ ཏང་ནི་, ཏེ་ནི་ ཁྱི་ཞི་ རྡེ་བ་ཅན་ནེ་ ཡབ་རྦེ་ སང་སྤེར་ན་ ཁྱི་ཞི་ ལེ་ཧ་ ཅོ་ཀན་འབོ་ ཟི་རྡེ་ སོལ་རེ་ ས་ལེན་།”མོ་ལམ་མེ་ ཧོར་།
5 ཡི་ཤུའི་ མོལ་, “མོ་ལམ་ ཞུ་ཟ་ནི་, ངའིན་པ་རྒུན་ ཙོག་སེ་ ཡོང་ མི་རྒོའེ་ ཅེ་ཟེར་ནི་ ཁོང་རྒུན་ འདུ་ཀང་ འདང་ ཀྲོང་སེབ་རྦེ་ ཀྲུའི་ཀ་ ལྃ་རྡེ་ མི་རྒུན་ལ་ ཐོང་ཅུག་ཏེ་ མོ་ལམ་ ཏབ་རྦེ་ལ་ ཐེད་རྡེ་ནོག་། ངེ་ ཁྱི་ཞ་ རྡེན་འབའ་ ཟེ་འིན་ ཏོ་ ངའིན་པ་རྒུན་ལ་ སོལ་རེ་ སོན་ཏེ་ ཐོབ་ཏེ་ འིན་། 6 མོ་ལམ་ ཏབ་ཟ་ནི་, རང་ངེ་ ནང་ལ་ སོང་འདེ་ རྒོ་ ཅུག་ཏེ་ སང་སྤེར་ ཐོག་ནི་ རང་ངེ་ རྡེ་བ་ཅན་ནེ་ ཡབ་ལ་ མོ་ལམ་ ཞུའི་ཧེ་། ཏེ་ནི་ ཁྱི་ཞི་ སང་སྤེར་ན་ ཅོ་ཀ་ནེ་ ལེ་ཧ་རྒུན་ ཟི་རྡེ་ ཁྱི་ཞི་ རྡེ་བ་ཅན་ནེ་ ཡབ་རྦེ་ ཁྱི་ཞ་ སོལ་རེ་ ས་ལེན་།”
7 “ཁྱི་ཞི་ མོ་ལམ་ ཞུ་ཟ་ནི་, ཏོན་མེཏ་རྡེ་ ཚིག་རྒུན་ ཟེ་རེན་ ཞེན་ ཆོའེ་ལུག་རྒེ་ མི་རྒུན་ ཙོག་སེ་ མ་ཅོ་, ཅེ་ཟེར་ནི་ ཁོང་རྒུ་ནི་ ས་མེ་ནོག་ མོ་ལམ་ རིང་མོ་ ཞུ་ཅེ་རྦེ་ ཀོན་འཇོག་རྒེ་ ཁོང་རྒུ་ནི་ མོ་ལམ་འབོ་ སེ་ནེན་། 8 ཁོང་རྒུན་ ཙོག་སེ་ མ་ཅོ་, ཅེ་ཟེར་ནི་ ཞུའི་སང་ ངུལ་ལ་ ཁྱི་ཞི་ རྒོའེ་ཤེ་ཅན་རྒུན་ རྡེ་བ་ཅན་ནེ་ ཡབ་རྦེ་ ཁྱེན་ནེ་ ཛེ་རྡེ་ནོག་། 9 ཁྱི་ཞི་ མོ་ལམ་ འི་ཟུག་ལ་ ཞུའི་,
‘རྡེ་བ་ཅན་ལ་ ཞུ་ཧ་ནེ་ ང་ཞི་ ཡབ་,
ཉེ་རང་ངེ་ ཚན་ ཏམ་པ་ མི་ ཐམ་ཅེད་རྡེ་ སི་ཝ་ ཅོ་ཤིག་།
10 ཉེ་རང་ངེ་ རྒྱལ་སྲིད་ འགྱོ་སྤ་ ལེབ་ཤིག་།
ཉེ་རང་ངེ་ ཐུག་རྒོང་ རྡེ་བ་ཅན་ནེ་ན་ ཀྲུཔ་རྦེ་ ཙོག་སེ་,
འི་ འཇིག་རྟེན་ནི་ཀ་ལ་ ཀྲུཔ་ཤིག་།
11 ཏི་རིང་ ང་ཞ་ རྒོ་ཤེ་ ཁར་ཞི་ སལ་ལེ་ ཛེད་།
12 ང་ཞིའི་ རྡིག་པ་ ཅོའེ་ཧན་རྒུན་ལ་ ཤག་སྤ་ སལ་ལེ་ ཛེད་,
ཀ་ཟུག་རྒེ་ ང་ཞི་ རྒྱཔ་འགལ་ལ་ རྡིག་པ་ ཅོ་ཀན་རྒུན་ལ་
ང་ཞི་ ཤག་སྤ་ ཏང་རྦེན་།
13 ཐི་ཚོད་ལྟོའེ་ ཏུའི་ལ་ རྡིག་པ་ ཅོ་ཅེ་ནི་ ང་ཞ་ རྐྱོབ་རྦེ་ཛེད་,
ཡང་ ངན་པ་ རྡུད་ཀ་ནི་ ང་ཞ་ ཐར་ཤུག་རྒེ་ ཛེད་། ཅེ་ཞུ་ནི་ རྒྱལ་སྲིད་ ཏང་ ཝང་ འདང་ ཟི་ཞིད་པོ་ ཏུའི་རྒྱུན་ ཉེ་རང་ངེ་ ཡིན་, ཨ་མེན་b།’”
14 ཡི་ཤུའི་ མོལ་, “ཀལ་ཏེ་ ཁྱི་ཞི་ རྒྱཔ་འགལ་ལ་ རྡིག་པ་ ཅོ་ཀན་རྒུན་ལ་ ཤག་སྤ་ ཏང་ནི་, ཁྱི་ཞ་རྒུ་ནི་ རྡེ་བ་ཅན་ནེ་ ཡབ་རྦེ་ ཁྱི་ཞ་རྒུན་ལ་ ཤག་སྤ་ སལ་ལེ་ ཛེ་རྡེན་། 15 འིན་ན་ ཀལ་ཏེ་ ཁྱི་ཞི་ རྒྱཔ་འགལ་ལ་ རྡིག་པ་ ཅོ་ཀན་རྒུན་ལ་ ཤག་སྤ་ མ་ཏང་ནི་, ཁྱི་ཞ་རྒུ་ནི་ རྡེ་བ་ཅན་ནེ་ ཡབ་རྦེ་ ཁྱི་ཞི་ རྡིག་པ་རྒུན་ལ་ ཤག་སྤ་ སལ་ལེ་ མི་ཛེད་།”
ཉུང་ནེ་ལ་ འདེད་ཅེ་ ཧོར་།
16 “ཁྱི་ཞ་རྒུ་ནི་ ཉུང་ནེ་ལ་ འདེད་ཟ་ནི་, རྡུག་པོ་ མ་ཅོ་, ཀ་ཟུག་ ངའིན་པ་རྒུ་ནི་ ཁོ་རང་རྒུ་ནི་ རྡོང་ ཞིག་ཏེ་ ཉུང་ནེ་ལ་ འདེད་ཀན་འབོ་ མི་རྒུན་ལ་ ངོན་ཅུག་རྒེ་ནོག་། ངེ་ ཁྱི་ཞ་རྒུན་ལ་ རྡེན་འབའ་ ཟེ་འིན་ ཏེ་ ང་ཡིན་པ་རྒུན་ལ་ སོལ་རེ་ སོན་ཏེ་ ཐོབ་ ཚར་རྡེ་ འིན་། 17 འིན་ན་ ཁྱི་ཞ་རྒུན་ ཉུང་ནེ་ལ་ འདེད་ཟ་ནི་ སྲ་ མར་ ཧུའི་རྡེ་ རྡོང་ ཁྲུའི་རྡེ་ འདོད་ཧེ་། 18 ཁྱི་ཞ་ ཉུང་ནེ་ལ་ འདེད་ཀན་འབོ་ སུ་ལ་ མ་འཇལ་ཀ་ནེ་ ཁྱི་ཞི་ ཡབ་ མ་ཐེ་ལ་ ཡང་ སུ་ཞི་ལ་ མི་ཤེ་ཤེ་ལ་ ཏོ་ཙོག་སེ་ ཅོའེ་ཧེ་། ཡབ་ ཀོན་འཇོག་རྒེ་ ཁྱི་ཞི་ སང་སྤེར་ན་ ཅོ་ཀན་འབོ་ ཟི་རྡེ་ སོལ་རེ་ སལ་ལེ་ ཛེ་རྡེན་།”
རྡེ་བ་ཅན་ནེ་ན་ ནོར་།
19 “ཁྱི་ཞ་རང་ངེ་ཕི་ འཇིག་རྟེན་ནེ་ཀ་ ནོར་རྒུན་ མ་སག་ཧེ་། ཏོ་རྒུན་ མུག་སྤེ་ ཟ་ཅེ་ རྡང་ ཡ་ ཡོང་ཅེ་ མ་ཚེད་ ཧུན་མ་ ཡོྃ་རྡེ་ ཧུའིན་། 20 འིན་ན་ ཁྱི་ཞ་རང་ངེ་ཕི་ རྡེ་བ་ཅན་ནེ་ན་ ནོར་ སོག་ཧེ་, ཏུ་རུ་ མུག་སྤེ་ མི་ཟ་ ཡང་ ཡ་ མི་ཡོང་ མ་ཚེད་ ཧུན་མི་ལ་ མི་ཧུ་། 21 ཁྱི་ཞི་ ནོར་སག་ས་ ཁྱི་ཞི་ ཉིང་ལ་ ཆག་རྡེན་།”
ཟུྃ་སྤེ་ འོད་།
22 “མིག་ནི་ ཟུྃ་སྤེ་ འོད་ འིན་། མིག་པོ་ ཁམ་ཟང་ ཡོད་ནི་ ཁྱི་ཞི་ ལུའི་ སོན་ཏེ་ འོད་རྡེ་ ཀང་ངེན་། 23 འིན་ན་ ཀལ་ཏེ་ མིག་པོ་ ཁམ་ཟང་ མེད་ནི་, ཁྱི་ཞི་ ལུའི་ སོན་ཏེ་ མུན་ཀྲག་རྒེ་ ཀང་ངེན་། ཀལ་ཏེ་ ཁྱི་ཞི་ ཁྱི་ཞ་རང་ངེ་ སེམ་མེ་ན་ ཀོན་འཇོག་རྒེ་ འོད་ ཡོད་ སམ་ཀན་འབོ་ ངོའེ་སྤོ་ལ་ མུན་ཀྲག་ འིན་ནི་, ཏེ་ནི་ ཏེ་ མུན་ཀྲག་པོ་ ཙམ་ཤིག་ འཇི་ནང་ཅེན་ མི་ཡོང་།”
ཀོན་འཇོག་ ཏང་ རྒྱུ་ནོར་།
24 “སུ་ཞིག་ལ་ སྤོན་འབོ་ ཉི་ལ་ ཞབ་རྟོག་ ཅོའོ་ མི་ཉེན་, ཅིག་པོ་ལ་ སོག་པོ་ ཅོ་ནོག་ ཡང་ ཅིག་པོ་ལ་ ཤེ་སྤ་ ཅོ་ནོག་, ཡང་ ཅིག་པོ་ལ་ ཉིང་ནི་ ཞབ་རྟོག་ ཞུའིན་ ཡང་ ཅིག་པོ་ལ་ མ་ཐེད་རྡེ་ ཞབ་རྟོག་ ཞུ་ནོག་། ཏེ་རྒ་ ཙོག་སེ་ ཀོན་འཇོག་ ཏང་ ནོར་ ཉ་ཧ་ལ་ ཞབ་རྟོག་ ཞུ་ མི་ཉེན་།”
ཚེར་ མ་ཚེར་།
25 “ཏོ་རྦེ་ཕི་ ངེ་ ཁྱི་ཞ་ ཟེ་འིན་, ཅི་ ཟོའེན་, ཅི་ ཐུང་ངེན་ ཡང་ ཟུག་ལ་ ཅི་ ཀོན་ནེན་ སམ་འདེ་ རང་ངེ་ མི་ཙེ་ཕི་ ཚེར་ མ་ཚེར་། ཁར་ཞི་སང་ སྲོག་པོ་ ཡང་ ཀོའེ་སང་ ལུའི་རྦོ་ ཁག་ཆེ་ མ་ནོག་རྒེ་? 26 ནམ་མེ་ ཅ་རྒུན་ལ་ ལྟོའེ་རྡང་, ཏོ་རྒུ་ནི་ ཞིང་ ཏབ་རྦེ་ མག་ ཡང་ ཞིང་ ངེ་ལ་ མག་ ཡང་ པང་ངེ་ན་ ཀྲོ་ སག་རྒེ་ མི་འདུག་, འིན་ན་ ཁྱི་ཞི་ རྡེ་བ་ཅན་ནེ་ ཡབ་རྦེ་ ཏོ་རྒུན་ལ་ ཁར་ཞི་ སལ་ལེ་ ཛེད་ཏུག་། ཏོ་རྒུ་ནི་སང་ ཁྱི་ཞ་ མང་ངེ་ རིན་ མི་ཆེ་? 27 ཁྱི་ཞ་ སུ་ཞིག་རྒེ་ ཚེར་ཧ་ ཅོའེ་རྡེ་ ཁྱི་ཞི་ མི་ཙེ་ན་ ཆུ་ཙོད་ ཅིག་ རྐྱེད་ ཉེན་ནེན་ནེ་?”
28 “ཀོའེ་ལག་རྒེ་ཕི་ ཅི་ ཚེར་རེན་? སྤང་ཏང་ངེ་ མེན་ཏོག་རྒུན་ ཀ་ཟུག་ལ་ ལྡན་འདུག་ ལྟོའེ་རྡང་, ཏོ་རྒུ་ནི་ ལེ་ཧ་ ཅོའོ་ མག་ ཡང་ པལ་ ཁལ་རྡེ་ ཀོའེ་ ཐག་རྒེ་ མག་། 29 འིན་ན་ ངེ་ ཁྱི་ཞ་ ཟེ་འིན་, རྒྱ་སྤོ་ སོ་ལོ་མོན་, ཁོ་རང་ངེ་ སྤལ་ལེ་ན་ མ་ ཀྲག་པོ་ ཀོའེ་ལག་ ཀོན་ནང་ ཏོ་ མེན་ཏོག་རྒུན་ ཙོག་སེ་ རྡེ་མོ་ རྡང་ ཛེ་སྤོ་ ཐོང་ངེ་ མེད་པེན་། 30 ཀལ་ཏེ་ ཀོན་འཇོག་རྒེ་ ཏི་རིང་ ཡོ་ཀན་ ཐོ་རེ་ མེ་ སྲག་རྒེ་ལ་ ཕང་ཅེ་ཅེན་ནེ་ སྤང་ཏང་ངེ་ མེན་ཏོག་རྒུན་ལ་ ཏོ་ཙོག་སེ་ ཀོའེ་ལག་ ཧོན་ ཉེན་ནེ་ཡོད་ནི་, ཏེཏ་ཆུང་ཅེན་རྒུན་ ཀོན་འཇོག་རྒེ་ ཁྱི་ཞ་རྒུན་ལ་ ཏོ་རྒུ་ནི་སང་ ཀོའེ་ལག་ ཀྲག་པོ་ ཧོན་ནེ་ མི་ཛེད་རྡེ་?”
31 “ཏོ་རྦེ་ཕི་ ‘ཨ་ཧོ་ ཅི་ ཟོའེན་ ཡང་ ཨ་ཧོ་ ཅི་ ཐུང་ངེན་ ཡང་ ཨ་ཧོ་ ཅི་ ཀོན་ནེན་’ ཟེར་རྡེ་ ཚེར་ཧ་ མ་ཅོ་། 32 ཞེན་ ཆོའེ་ལུག་རྒེ་ མི་རྒུན་ ཏོ་ ཚང་མེ་ ལྟིང་འགྲྃ་ནི་ རྒྱུག་རྒེ་ནོག་, ཡང་ ཁྱི་ཞི་ རྡེ་བ་ཅན་ནེ་ ཡབ་རྦེ་ ཁྱི་ཞི་ ཏོ་ཙོག་སེ་ རྒོའེ་ཤེ་ཅན་རྒུན་ ཁྱེན་ནེ་ ཛེ་རྡེ་ནོག་། 33 འིན་ན་ འགོ་མ་ ཁྱི་ཞ་རྒུན་ ཀོན་འཇོག་རྒེ་ རྒྱལ་སྲིད་ ཏང་ མི་ཙེ་ ཀྲང་པོ་ པུད་ཅེ་ཕི་ ལྟིང་འགྲྃ་ནི་ རྒྱུག་ཧེ་, ཏེ་ནི་ ཁོང་ངེ་ ཏེ་ཀ་ ནེན་འདེ་ ཁྱི་ཞི་ ཞེན་ རྒོའེ་ཤེ་ཅན་རྒུན་ལ་ སལ་ལེ་ ཛེ་རྡེན་།”
34 “ཐོ་རེ་ཕི་ ཏི་རིང་ ཚེར་ཧ་ མ་ཅོ་ཧེ་ ཅེ་ཟེར་ནི་ ཐོ་རེ་ ཆ་ཅེ་ ཚེར་ཧ་རྒུ་ནི་ ཧོར་ལ་ སམ་བ་ ཐོ་རེ་ ཏང་ཉེན་ནེ་ནོག་། ཏི་རིང་ངེ་ ཚེར་ཧ་ ཏི་རིང་ངེ་ཕི་ ཙམ་ ཐེད་ཐེད་ ནོག་།”