མཏ་ཐ་ 5

ཡི་ཤུའི་ རི་རྒ་ ཆོའེ་ སལ་ལེ་ ཛེད་།

མི་ཚོག་ ཆོན་མོ་ ཛོམ་མེན་ ཟི་རྡེ་རྡང་, ཡི་ཤུ་ རི་རྒེ་ཀ་ རྐྱོད་ཏེ་ ཞུ་རྡེ་ ཛེད་། ཏེ་ནི་ ཁོང་ངེ་ ལོབ་ཀྲུག་རྒུན་ ཁོང་ས་ ཡོྃ་། 2 ཡི་ཤུའི་ ཁོང་རྒུན་ལ་ ལབ་ཞ་ སལ་ཅེ་ འགོ་ཟུག་ ཛེད་ཏེ་ མོལ་,

3 “ཀོན་འཇོག་རྒེ་ ཚམ་ལ་ པབ་མོ་ ཅོ་ཀན་རྒུན་ ཅིན་ལབ་ཅེན་ འིན་,

ཅེ་ཟེར་ནི་ ཁོང་རྒུན་ལ་ རྡེ་བ་ཅན་ནེ་ རྒྱལ་སྲིད་ ནོར་ཧལ་ལ་ ཐོབ་རྦེན་།

4 སེམ་མེ་ན་ རྡུག་པོ་ ཡོ་ཀན་རྒུན་ ཅིན་ལབ་ཅེན་ འིན་

ཅེ་ཟེར་ནི་ ཀོན་འཇོག་རྒེ་ ཁོང་རྒུན་ལ་ སེམ་སོ་ སལ་ལེ་ ཛེ་རྡེན་།

5 འཇམ་པོ་ ཡོ་ཀན་རྒུན་ ཅིན་ལབ་ཅེན་ འིན་

ཅེ་ཟེར་ནི་ ཁོང་རྒུན་ལ་ འཇིག་རྟེན་ ནོར་ཧལ་ལ་ ཐོབ་རྦེན་།

6 ཀྲང་པོ་ ཐེའེ་ ཛེད་ཅེ་ལ་ ལྟོག་ཧོམ་ ཡོ་ཀན་རྒུན་ ཅིན་ལབ་ཅེན་ འིན་

ཅེ་ཟེར་ནི་ ཁོང་རྒུན་ ཚིམ་ཅུག་རྒེ་ ཛེད་རྡེན་།

7 ཞེན་མ་ ཉིང་ཞེ་ ལྟན་ཀན་རྒུན་ ཅིན་ལབ་ཅེན་ འིན་

ཅེ་ཟེར་ནི་ ཁོང་རྒུན་ལ་ ཉིང་ཞེ་ ལྟན་ནེ་ ཛེད་རྡེན་།

8 སེམ་ ལག་མོ་ ཡོ་ཀན་རྒུན་ ཅིན་ལབ་ཅེན་ འིན་

ཅེ་ཟེར་ནི་ ཁོང་རྒུ་ནི་ ཀོན་འཇོག་ འཇལ་ལེན་།

9 ཐུན་འབྲེལ་ ཁྱོང་ཀན་རྒུན་ ཅིན་ལབ་ཅེན་ འིན་

ཅེ་ཟེར་ནི་ ཁོང་རྒུན་ལ་ ཀོན་འཇོག་རྒེ་ ཕྲུ་རྒུ་ མོལ་ལེན་།

10 ལམ་ ཀྲང་པེ་ཀ་ འགྲུལ་ཤེ་རྦེ་ རྡུ་ངལ་ ཐོང་ཀན་རྒུན་ ཅིན་ལབ་ཅེན་ འིན་

ཅེ་ཟེར་ནི་ ཁོང་རྒུན་ལ་ རྡེ་བ་ཅན་ནེ་ རྒྱལ་སྲིད་ ནོར་ཧལ་ལ་ ཐོབ་རྦེན་།”

11 “ང་ ཏེཏ་པ་ ཅོ་ཅེ་རྦེ་, ཞེན་མ་རྒུ་ནི་ ཁྲེལ་ ཅུག་ཏེ་ ནག་པར་རྡོ་ ཡང་ ཟུན་ནེ་ འབར་ཧན་ ན་ཚོག་ ཕོག་ཀན་རྒུན་ ཅིན་ལབ་ཅེན་ འིན་། 12 རྒ་མོ་ རྡང་ ཐེད་པོ་ ཅོའེ་ཧེ་, ཅེ་ཟེར་ནི་ རྡེ་བ་ཅན་ནེ་ན་ ཁྱི་ཞ་ སོལ་རེ་ ཀྲག་པོ་ ཡོད་, ཁོང་རྒུ་ནི་ ཁྱི་ཞི་སང་ ངུལ་ལ་ ཡོང་ཀན་ ཀོན་འཇོག་རྒེ་ ལུང་རྟོན་པ་རྒུན་ལ་ ཏེ་རྒ་ ཙོག་སེ་ ནག་པར་རྡོ་ ལྟན་འདེ་ འིན་འབེན་།”

ཚ་ རྡང་ འོད་།

13 ཡི་ཤུའི་ མོལ་, “འཇིག་རྟེན་པ་རྒུ་ནི་ཕི་ ཁྱི་ཞ་རྒུན་ ཚ་ འིན་། འིན་ན་ ཀལ་ཏེ་ ཚེ་ ཀྲོཏ་པོ་ ཡོལ་ནི་ ཏོ་ ཀ་ཟུག་རྒེ་ ལོག་ཏེ་ ཁྱོང་ངེན་? ཏོ་ ཕི་ལོག་ལ་ ཕྃ་རྡེ་ མི་རྒུ་ནི་ ཧང་པེ་ ཡོག་ལ་ ཟི་ཅེ་ མ་ནི་ ཡང་ ཅང་ ཕན་ཏོག་ མེ་ཀག་།”

14 “འཇིག་རྟེན་པ་རྒུ་ནི་ཕི་ ཁྱི་ཞ་ འོད་ ནོག་, རི་ཀ་ ཡོ་ཀ་ནེ་ རྒྱལ་ས་ ཀབ་ མི་ཉེན་ཅེ་ ཙོག་སེ་། 15 མི་རྒུ་ནི་ འོད་ ཏུག་ཏེ་ ཟྃ་རྦུའི་ ཡོག་ལ་ མ་པོ་རེ་ ནང་ལ་ ཡོ་ཀན་ ཚང་མ་ ཐོང་ཅེ་ལ་ འོད་རྟག་སེ་ཀ་ པོ་རེན་། 16 ཏེ་རྒ་ ཙོག་སེ་ ཁྱི་ཞི་ ལེ་ཧ་ ཟང་པོ་རྒུན་ ཐོང་འདེ་ མི་རྒུ་ནི་ ཁྱི་ཞི་ རྡེ་བ་ཅན་ལ་ ཞུ་ཧ་ནེ་ ཡབ་ ཀོན་འཇོག་ལ་ རྟོད་པ་ པུལ་ཅེ་ཕི་ ཁྱི་ཞི་ འོད་ འདྃ་རྦོ་ ཁོང་རྒུ་ནི་ཀ་ ཕོག་ཅུག་ཧེ་།”

ཀོན་འཇོག་རྒེ་ ཀཱ་ཁྲིམ་པོ་ ཁག་ཅེན་ འིན་།

17 ཡི་ཤུའི་ མོལ་, “ང་ མོ་ཤེ་ ཀཱ་ཁྲིམ་ ཡང་ ལུང་རྟོན་པ་རྒུ་ནི་ ལབ་ཞ་རྒུན་ མེ་ཀན་ ཅོ་ལ་ ཡོྃ་རྡེ་ ནོག་ མ་སམ་། ཏོ་རྒུན་ མེ་ཀན་ མ་ཅོ་ལ་ ཀྲུཔ་ཅུག་རྒེ་ལ་ ཡོྃ་རྦེན་། 18 ངེ་ རྡེན་འབའ་ ཟེ་འིན་ ས་ རྡང་ ནམ་ཀ་ ཉ་ཧ་ ཏོག་རྐྱ་ལེ་སང་ ངུལ་ལ་ ཀོན་འཇོག་རྒེ་ ཀཱ་ཁྲིམ་མེ་ ཚིག་ ཡང་ ཚིག་ཅིག་ལ་ མ་རྐྱལ་ལེ་ ཏེ་ ཚང་མ་ འདྲན་འདྲ་ ཀྲུབ་རྦེན་། 19 ཀལ་ཏེ་ སུ་ཞིག་རྒེ་ ཀོན་འཇོག་རྒེ་ ཀཱ་རྒྱ་ ཚང་མེ་སང་ ཆུང་ཙེ་ཞིག་རྒང་ ཅག་ནི་ ཡང་ ཏེ་རྒ་ ཙོག་སེ་ ཞེན་མ་རྒུན་ལ་ ལབ་རྦེ་ཡོད་ནི་ ཏེ་ མི་རྦོ་ལ་ རྡེ་བ་ཅན་ནེ་ རྒྱལ་སྲིད་རྡེ་ན་ ཚང་མེ་སང་ རིན་མེད་ སི་རྒེན་། འིན་ན་ ཀལ་ཏེ་ སུ་ཞིག་རྒེ་ ཀཱ་ སྲུྃ་རྡེ་ ཞེན་མ་ ཏོ་ཙོག་སེ་ ཅོ་ཅེ་ ལབ་རྦེ་ཡོད་ནི་ ཏེ་ མིའུ་ལ་ རྡེ་བ་ཅན་ནེ་ རྒྱལ་སྲིད་རྡེ་ན་ རིན་ཅེན་ སི་རྒེན་།”

20 “ཏ་ ངེ་ ཟེ་འིན་, ཀལ་ཏེ་ ཆོའེ་ཁྲིམ་ལ་ ཁེ་སྤ་ རྡང་ པ་རུ་ཤི་པ་རྒུ་ནི་ མི་ཙེ་ ཀྲང་པོ་ཞིག་ པུད་ཀན་འབེ་སང་ ཁྱི་ཞི་ མི་ཙེ་ པུད་ཀན་འབོ་ མང་ངེ་ ཀྲང་པོ་ཞིག་ མེད་ནི་ རྡེ་བ་ཅན་ནེ་ རྒྱལ་སྲིད་རྡེ་ན་ ཁྱི་ཞ་རྒུན་ མ་ནི་ ཞུའུ་ མི་ཉེན་།”

སྲོའེ་ ཧོར་ལ་ ཡི་ཤུའི་ ལབ་ཞ་ སལ་།

21 ཡི་ཤུའི་ མོལ་, “ཀོན་འཇོག་རྒེ་ ཨ་ཧོའེ་ ཕ་མེ་པོ་རྒུན་ལ་ མོལ་ཧན་འབོ་ ཁྱི་ཞི་ ཚོར་རྡེ་ ནོག་། ‘མི་ མ་སེད་, མི་ སེད་ཀན་རྒུན་ལ་ ཁྲིམ་ཅེད་ ཕོག་རྒེན་།’ 22 འིན་ན་ ངེ་ ཟེ་འིན་ རང་ངེ་ སྤུན་ལ་ ཅང་ མེད་རྡེ་ སྲོ་ ཅོ་ཀན་འབོ་ལ་ ཁྲིམ་ཅེད་ ཕོག་རྒེན་། ཡང་ རང་ངེ་ སྤུན་ལ་ ལེ་མེད་ ཟེར་ཧན་འབོ་ལ་ ཁྲིམ་ཁུང་ལ་ ཁྱོང་ངེན་། ཀལ་ཏེ་ ‘ཁྱེ་རང་ངེ་ སྤུན་ཞིག་ལ་ ཧ་འགྲང་ ནོག་’ ཟེར་ནི་ ཁྱེ་རང་ལ་ ཉ་ཝེ་ མེ་ ཆེད་པ་ ཕོག་ཅེ་ འཇི་སྤ་ ནོག་།”

23 “ཏོ་རྦེ་ཕི་ ཆོད་ཁྲི་ཀ་ ཆོད་པ་ པུ་ལེ་ ཏུའི་, ཀལ་ཏེ་ རང་ངེ་ སྤུན་ཞིག་རྒེ་ རྒྱཔ་འགལ་ལ་ ངན་པ་ ཅོའེ་ཧན་འབོ་ ཁྱེ་རང་ལ་ འི་ཏུ་ ཡོང་ནི་, 24 ཆོད་ཁྲི་ འདུན་ལ་ ཆོད་པ་ པོར་རྡེ་ འགོ་མ་ རང་ངེ་ སྤུན་ ཉམ་པོ་ ཐུན་འབྲེལ་ ཅོའེ་, ཏེ་ནི་ སོང་འདེ་ ཆོད་པ་ པུལ་།”

25 “ཁྱེ་རང་ལ་ ཉེད་ཀལ་རྡེ་ ཁྲིམ་ཁུང་ལ་ ཁྱེར་ཧན་འབོ་ ཉམ་པོ་ ཏུ་རུ་ ལེབ་རྦེ་སང་ ངུལ་ལ་ ལམ་ལ་ འགྱོ་སྤ་ ནང་འགྲིག་ ཅོའེ་། ཏེ་མ་ནི་ ཁོའེ་ ཁྱེ་རང་ ཁྲིམ་སྤོན་ལ་ ལྟེ་རྡེ་སྲིད་ཅེ་ ནོག་, ཡང་ ཁྲིམ་སྤོན་ནེ་ ཁྲིམ་ཁུང་ངེ་ མག་སྤོན་ལ་ ལྟེད་ཏེ་ ཁྱེ་རང་ ཙོན་ཁང་ལ་ ཧ་རེན་། 26 ངེ་ ཁྱི་ཞ་ རྡེན་འབའ་ ཟེ་འིན་, ཁྱེ་རང་ ཙོན་ཁང་ནི་ ཏེ་ཏེ་ཚུག་པ་ མི་པུད་ ནམ་ཚུག་པ་ ཁྱེ་རང་ངེ་ ཆེད་པེ་ མུལ་ ཚང་མ་ མི་ཤལ་།”

ལོག་ཡེམ་མེ་ ཧོར་།

27 ཡི་ཤུའི་ མོལ་, “ཀོན་འཇོག་རྒེ་ མོལ་ཧན་འབོ་ ཁྱི་ཞི་ ཚོར་རྡེ་ ནོག་, ‘རང་ངེ་ ཞི་མེད་ མན་ཀན་ ཞེན་མ་ ཉམ་པོ་ ལུའི་འབྲེལ་ མ་ཅོ་།’ 28 འིན་ན་ ངེ་ ཁྱི་ཞ་ ཟེ་འིན་ པོ་མོ་ལ་ ལུའི་འབྲེལ་ལེ་ འདོད་པ་ ཉམ་པོ་ ལྟ་ཀན་འབེ་, ཁོ་རང་ངེ་ ཉིང་ངེ་ན་ ཁོ་རང་ངེ་ ཞི་མེད་ མན་ཀ་ནེ་ ཏེ་ པོ་མོ་ ཉམ་པོ་ ལུའི་འབྲེལ་ ཅོའེ་རྡེ་ ནོག་། 29 ཀལ་ཏེ་ ཁྱེ་རང་ངེ་ མིག་ ཡོའེ་སྤེ་ ཁྱེ་རང་ལ་ རྡིག་པ་ ཅོ་ཅུག་རྒེ་ཡོད་ནི་, ཏེ་ མིག་པོ་ ཏྲུའི་རྡེ་ ཕྃ་ཏོང་, ལུའི་ སོན་ཏེ་ ཉ་ཝེ་ན་ ཕང་ངེ་སང་ ལུའི་ ཁག་ཅིག་ མེ་ཀན་ ཆ་ན་ རྒྱལ་། 30 ཡང་ ཀལ་ཏེ་ ཁྱེ་རང་ངེ་ ལག་པ་ ཡོའེ་སྤེ་ ཁྱེ་རང་ལ་ རྡིག་པ་ ཅོ་ཅུག་རྒེ་ཡོད་ནི་, ཏེ་ ལག་པ་ ཅེད་ཏེ་ ཕྃ་ཏོང་, ལུའི་ སོན་ཏེ་ ཉ་ཝེ་ན་ ཕང་ངེ་སང་ ལུའི་ ཁག་ཅིག་ མེ་ཀན་ ཆ་ན་ རྒྱལ་།”

ཞི་མེད་ ཅེད་ཅེ་ ཧོར་།

31 ཡི་ཤུའི་ མོལ་, “ཁྱི་ཞི་ ཡུ་རྦོ་ ཚོར་རྡེ་ ནོག་, ‘ན་མ་ ཅེད་ཀ་ནེ་ པུ་ཙེ་ ཁོ་རང་ངེ་ ན་མ་ ཅེད་ཀན་འབོ་ལ་ ཅེད་ཀ་ནེ་ ལག་ཁྱེར་ ཏང་རྒོའེ་།’ 32 འིན་ན་ ངེ་ ཁྱི་ཞ་རྒུན་ལ་ ཟེ་འིན་, རང་ངེ་ ཞི་མེད་ མན་ཀན་ ཉམ་པོ་ ལུའི་འབྲེལ་ ཅོ་ཅེ་ ནེ་ལུག་ མ་ཐེ་ལ་, སུ་ཞིག་རྒེ་ ཁོ་རང་ངེ་ ན་མ་ ཅེད་ནི་, ཁོའེ་ ཏེ་ པོ་མོ་ལ་ ལོག་ཡེམ་ ཅོ་ཅུག་ཏེ་ ནོག་། ཡང་ ཏེ་ པོ་མོ་ ཉམ་པོ་ ན་མ་ ཅོ་ཀན་འབོ་ལ་ ལོག་ཡེམ་ ཅོའེ་རྡེ་ ནོག་།”

ནའ་ རྐྱལ་ཅེ་ ཧོར་།

33 ཡི་ཤུའི་ མོལ་, “ཨ་ཧོའེ་ ཕ་མེ་པོ་རྒུན་ལ་ འི་ ཟེར་ཧན་འབོ་ལ་ ཁྱི་ཞ་རྒུ་ནི་ ཚོར་རྡེ་ ནོག་། ནའ་ ཁུར་ཧན་འབོ་ མ་ཅག་, འིན་ན་ ཁྱེ་ཞི་ ཙོབོ་ ཀོན་འཇོག་ ཉམ་པོ་ ནའ་ ཁུར་ཧན་འབོ་ ཀྲུབ་ཅུག་། 34 འིན་ན་ ངེ་ ཁྱི་ཞ་ ཟེ་འིན་, ནའ་ མ་ནི་ མ་ཁུར་ཧེ་, རྡེ་བ་ཅན་ནེ་ ནའ་ མ་ཁུར་ ཅེ་ཟེར་ནི་ རྡེ་བ་ཅན་འབོ་ ཀོན་འཇོག་རྒེ་ ཞུ་ཁྲིའི་ འིན་, 35 ཡང་ འཇིག་རྟེན་ནེ་ ནའ་ མ་ཁུར་ ཅེ་ཟེར་ནི་ འཇིག་རྟེན་ནེ་ཀ་ ཀོན་འཇོག་རྒེ་ ཞབ་ པོ་རེ་ ཛེ་རྡེ་ནོག་, ཡང་ ཡེ་རུ་ཤ་ལེམ་འབོ་ ནའ་ མ་ཁུར་ ཅེ་ཟེར་ནི་ ཡེ་རུ་ཤ་ལེམ་འབོ་ ཀྲག་པོ་ རྒྱ་སྤེ་ རྒྱལ་ས་ འིན་། 36 རང་ངེ་ འགོའེ་ ནའ་ མ་ཁུར་ ཅེ་ཟེར་ནི་ ཁྱི་ཞི་ སྲ་ ཅིག་རྒང་ ཀར་སྤོ་ ཡང་ ནག་པོ་ ཅོ་ཉེན་ནེ་ མག་། 37 ཁྱི་ཞི་ ལེན་འབོ་ འིན་ནི་ འིན་ ཡ་ མན་ནི་ མན་ ཟེར་། ཅེ་ཟེར་ནི་ ཡུ་རྒུ་ནི་སང་ ཐལ་རྡེ་ ཅི་ཞིག་ ཟེར་ན་ རྡུད་ ངན་པ་ནི་ ཆ་ནོག་།”

ངན་པེ་ ལེན་ལ་ ངན་པ་།

38 ཡི་ཤུའི་ མོལ་, “ཁྱི་ཞི་ ཡུ་ལ་ ཚོར་རྡེ་ ནོག་, ཆེད་པ་ རྐྱོན་འབོ་རྡང་ ཟོབ་རྒོའེ་, ‘མིག་རྒེ་ ལེན་ལ་ མིག་, སོའེ་ ལེན་ལ་ སོ་’, 39 འིན་ན་ ངེ་ ཁྱི་ཞ་ ཟེ་འིན་, ཁྱི་ཞ་ ངན་པ་ ཅོ་ཀན་འབོ་ལ་ ཏེ་རྒ་ ཙོག་སེ་ ལེན་ མ་ཏང་ཧེ་། ཀལ་ཏེ་ སུ་ཞིག་རྒེ་ འགྲམ་པ་ ཡོའེ་སྤེ་ཀ་ འགྲམ་ལྕག་ ཏང་ནི་, འགྲམ་པ་ ཡོའེ་མ་ལ་ འགྲམ་ལྕག་ ནེན་ནེ་ལ་ ལྟོན་། 40 ཀལ་ཏེ་ སུ་ཞིག་རྒེ་ ཁྱེ་རང་ངེ་ ཉེད་ཀལ་རྡེ་ ཁྲིམ་ཁུང་ལ་ ཁྱེར་རྡེ་ ཆེད་པེ་ ཚུལ་ལ་ ཁྱེ་རང་ངེ་ ཀུར་རྟ་འབོ་ ཏོང་ ཟེར་ནི་ རང་ངེ་ ཀུར་རྟ་རྦོ་ ཏྃ་ཏོང་། 41 ཀལ་ཏེ་ སུ་ཞིག་རྒེ་ ཁྱི་ཞ་ ཀྱེ་ལོ་མི་ཀྲར་ ཅིག་ ཝང་ ཏྃ་རྡེ་ འགྲུལ་ཤུ་ནི་, ཁོ་ ཉམ་པོ་ ཀྱེ་ལོ་མི་ཀྲར་ ཉི་ འགྲུལ་ཏོང་། 42 ཏོང་ ཟེར་ཧན་འབོ་ལ་ ཏྃ་ཏོང་, ཁྱི་ཞི་ཀ་ རྐྱི་ལ་ ཡོང་ཀན་འབོ་ལ་ ལག་ལྟོང་ལ་ ལམ་ མ་ཅུག་།”

འགྲ་ཝོ་ལ་ ཤེ་སྤ་ ཅོའེ་།

43 ཡི་ཤུའི་ མོལ་, “ཁྱི་ཞ་རྒུ་ནི་ ཡུ་རྦོ་ ཚོར་རྡེ་ ནོག་, ‘ཁྱིམ་ཙེ་པ་ ཤེ་སྤ་ ཡང་ འགྲ་ཝོ་རྒུན་ལ་ སོག་པོ་ ཅོའེ་།’ 44 འིན་ན་ ངེ་ ཁྱི་ཞ་ ཟེ་འིན་, འགྲ་ཝོ་རྒུན་ལ་ ཤེ་སྤ་ ཅོའེ་ ཡང་ ཁྱི་ཞ་ ནག་པར་རྡོ་ ལྟན་ཀན་རྒུ་ནི་ཕི་ མོ་ལམ་ ཏོབ་, 45 ཏུ་ཟུག་ ཅོ་ནི་, ཁྱི་ཞ་ རྡེ་བ་ཅན་ལ་ ཞུ་ཧ་ནེ་ ཡབ་རྦེ་ ཕྲུ་རྒུ་རྒུན་ ནོག་། ཁོང་ནི་ མི་ ཟང་པོ་ རྡང་ ངན་པ་རྒུན་ལ་ ཉི་མ་ ཤར་ཤུག་ཏེ་ མི་ ཀྲང་པོ་ རྡང་ ཀྲང་པོ་ མེ་ཀན་རྒུན་ལ་ ཆར་སྤ་ པབ་ཅུག་རྒེ་ནོག་། 46 ཀལ་ཏེ་ ཁྱི་ཞ་ ཤེ་སྤ་ ཅོ་ཀན་རྒུན་ལ་ ཁྱི་ཞི་ ཤེ་སྤ་ ཅོ་ནི་, ཁྱི་ཞ་ སོལ་རེ་ ཅི་ ཐོབ་རྦེན་? འགོམ་ཧོར་ ཏང་ཀ་ནེ་ ཁྲལ་ནེན་ཀན་རྒུ་ནི་ལ་ ཏུ་ཟུག་ ཅོ་ནོག་། 47 ཀལ་ཏེ་ ཁྱི་ཞི་ སྤུན་རྒུན་ལ་ ཅིག་པོ་ ལོན་སྲུལ་ནི་, ཞེན་མ་རྒུ་ནི་སང་ ཁྱི་ཞི་ མང་ངེ་ཞིག་ ཅི་ ཅོའེ་རྡེ་ འིན་? ཞེན་ ཆོའེ་ལུག་རྒེ་ མི་རྒུ་ནི་ལ་ ཏུ་ཟུག་ ཅོའོ་ མ་ནོག་རྒེ་? 48 ཏོ་རྦེ་ཕི་ ཁྱི་ཞི་ རྡེ་བ་ཅན་ནེ་ ཡབ་, ཕུན་སུམ་ཚོག་པ་ ཞུ་ཧན་ ཙོག་སེ་ ཁྱི་ཞ་ལ་ ཕུན་སུམ་ཚོག་པ་ ཡོང་རྒོའེ་།”