རྡུད་ནེ་ ཡི་ཤུ་ ཚོད་ལྟོའེ་།
4
ཏེ་ནི་ རྡུད་རྦོ་ ཚོད་ལྟ་ཅུག་ཅེ་ལ་ ཀོན་འཇོག་རྒེ་ ཐུག་ཡིད་རྡེ་ ཡི་ཤུ་ རི་ལྟོང་ངེ་ན་ ཁྱེར་རེ་ ཛེད་། 2 ཚེན་ཉིན་ ཞག་ ཞིབ་ཅུ་ འདོན་ཏང་ མ་འདོན་ནེ་ལ་ ཉུང་ནེ་ལ་ ཞུ་རྦེ་ ཡི་ཤུ་ རིམ་འདེ་ ཡོད་པེན་།3 ཚོད་ལྟ་ཀ་ནེ་ རྡུད་ ཁོང་ངེ་ འདུན་ལ་ ཡོྃ་རྡེ་ ཟེར་, “ཀལ་ཏེ་ ཉེ་རང་ ཀོན་འཇོག་རྒེ་ སྲེ་ འིན་ནི་ འི་ རྡོ་རྒུན་ ཏི་རྒིར་ འགྱུར་ཤེ་ལ་ ཀཱ་ སལ་?”
4 ཡི་ཤུའི་ ལེན་སལ་, “ཏམ་པེ་ སུང་རབ་རྦེ་ན་ འབྲི་ཛེད་ཏེ་ འདུག་, ‘མི་ ཏི་རྒིར་ ཅིག་པེ་ སོན་པོ་ མི་ལུའི་ འིན་ན་ ཀོན་འཇོག་རྒེ་ ཞལ་ནི་ འབིང་ངེ་ ཛེད་ཀ་ནེ་ ཞལ་ཏ་ རེ་རེ་ ཁ་ ཉེན་ཅེ་ནི་ སོན་པོ་ ལུའི་རྡེན་།’”
5 ཏེ་ནི་ ཁོའེ་ ཡི་ཤུ་ ཏམ་པེ་ རྒྱལ་ས་ ཡེ་རུ་ཤ་ལེམ་ལ་ ཁྲིད་ཏེ་ ཁྱེར་ ཡང་ ཀོན་འཇོག་རྒེ་ ཁང་པེ་ ཁ་ཏོག་འགོ་ ཁྱེར་རྡེ་ 6 ཁོང་ལ་ ཟེར་, “ཀལ་ཏེ་ ཉེ་རང་ ཀོན་འཇོག་རྒེ་ སྲེ་ འིན་ནི་ འེ་ཀ་ནི་ ཡོག་ལ་ ཆོང་ ཅེ་ཟེར་ནི་ སུང་རབ་རྦེ་ན་ འབྲི་ཛེད་ཏེ་ འདུག་
‘ཁྱེ་རང་ རྐྱོབ་ཅེ་ལ་ ཀོན་འཇོག་རྒེ་ ཕོ་ཉ་རྒུན་ལ་ ཀཱ་ ས་ལེན་།
ཁྱེ་རང་ངེ་ ཧང་པ་འབོ་ རྡོ་རྡེ་ཀ་ ཕོག་ མི་ཅུག་ཅེ་ཕི་,
ཕོ་ཉ་རྒུ་ནི་ ལག་པ་ རྐྱང་འདེ་ ཁྱེ་རང་ ཟུམ་མེ་ ཛེ་རྡེན་།’”
7 ཡི་ཤུའི་ ཁོ་ ལེན་སལ་, “ཏམ་པེ་ སུང་རབ་རྦེ་ན་ ཡུ་ལ་ མོལ་འདུག་། ‘ཙོབོ་ ཁྱི་ཞ་རང་ངེ་ ཀོན་འཇོག་ལ་ ཚོད་ མ་ལྟ་།’”
8 ཡང་ རྡུད་རྡེ་ འགོ་རྦེ་ ཁོང་ རི་ ཐོན་པོ་ཞིག་རྒེ་ཀ་ ཁྱེར་རྡེ་ འཇིག་རྟེན་ནེ་ རྒྱལ་སྲིད་ ཚང་མ་ རྡང་ ཏོ་རྒུ་ནི་ སྤལ་ ལྟན་འདེ་, 9 ཟེར་, “ཀལ་ཏེ་ ཁྱེ་རང་ངེ་ ང་ ཆག་ པུལ་རྡེ་ ཅོལ་ནི་, ངེ་ ཁྱེ་རང་ལ་ ཡུ་ ཚང་མ་ ཏང་ངེན་།”
10 ཡི་ཤུའི་ ཁོ་ མོལ་, “རྡུད་ ཁྱེ་རང་ འེ་ཀ་ནི་ སོང་, ཅེ་ཟེར་ནི་ ཏམ་པེ་ སུང་རབ་རྦེ་ན་ འབྲི་ཛེད་ཏེ་ འདུག་, ‘ཁྱི་ཞི་, ཁྱི་ཞ་རང་ངེ་ ཙོབོ་ ཀོན་འཇོག་ལ་ ཅོལ་རྒོའེ་ ཡང་ ཁོང་ ཅིག་པོ་ལ་ ཞབ་རྟོག་ ཞུ་རྒོའེ་།’”
11 ཏེ་ནི་ རྡུད་རྦོ་ ཁོང་ ཕྃ་རྡེ་ སོང་ ཡང་ ཀོན་འཇོག་རྒེ་ ཕོ་ཉ་རྒུན་ རྐྱོད་ཏེ་ ཁོང་ལ་ ཞབ་རྟོག་ ཞུའི་།
ཡི་ཤུའི་ འགཱ་ལིལ་ལེ་ན་ ཞབ་རྟོག་ འགོ་ཟུག་ ཛེད་།
12 ཡོ་ཧཱ་ནན་ ཟུམ་འདེ་ ཙོན་ཁང་ལ་ ཧར་ཧན་འབོ་ ཡི་ཤུའི་ སན་ནེ་རྡང་, ཁོང་ འགཱ་ལིལ་ལེ་ ཡུལ་ཞོང་ལ་ ལོག་ཏེ་ རྐྱོད་རྡེ་ ཛེད་། 13 ན་ཙ་རེད་རྡེ་ ཀྲོང་ཁྱེར་ལ་ མ་ཞུ་རྡེ་, ཚོའེ་ འདུན་ལ་ ཡོ་ཀན་ ཟེ་པུ་ལོན་ འདང་ ནབ་ཐ་ལི་ ཡུལ་ཞོང་ངེ་ ཀ་ཕར་ན་ཧུམ་ ཀྲོང་ཁྱེར་ལ་ རྐྱོད་ཏེ་ ཞུ་རྡེ་ ཛེད་། 14 ངུལ་མེ་ ལུང་རྟོན་པ་ ཡེ་ཤ་ཡཱ་ རྒྱུད་ཏེ་ ཀོན་འཇོག་རྒེ་ མོལ་ཧན་འབོ་ འདྲན་འདྲ་ ཀྲུཔ་ཐུཔ་ཅེ་ཕི་ ཡི་ཤུའི་ ཏོ་ ཚང་མ་ ཅོའོ་ ཛེད་། ཡེ་ཤ་ཡཱེ་ འབྲི་ཛེད་ཏེ་ འདུག་,
15 “ཟེ་པུ་ལོན་ འདང་ ནབ་ཐལ་ལེ་ ཡུལ་རྒུན་,
ཚོའེ་ ལམ་མེ་ཀ་ ཡོར་འདཱན་ སྃ་སྤེ་ ཕར་ཧ་,
འགཱ་ལིལ་ལེ་ ཡུལ་ཞོང་ངེ་ན་ འདེད་ཀན་ ཡ་ཧུ་འདཱ་པ་ མན་ཀན་,
16 མུན་ཏག་ན་ འདེད་ཀན་རྒུན་ལ་
འོད་ འདང་ཤེན་ཞིག་ ཐོང་ངེན་།
ཤི་ཅེ་ མུན་ཏག་ ཡུལ་ལ་ འདེད་ཀན་རྒུན་
ཉི་མ་ ཤར་རྡེ་ འོད་ ཕོག་རྒེན་།”
17 ཏེ་རྒ་ ཏུའི་ནི་ཕ་ལ་ ཡི་ཤུའི་ ཆོའེ་ཤེད་ཅེ་ འགོ་ཟུག་ ཛེད་, “རྡེ་བ་ཅན་ནེ་ རྒྱལ་སྲིད་ ཉེ་མོ་ ནོག་, རྡིག་པ་ ཕྃ་རྡེ་ ཀོན་འཇོག་ ཆོག་ལ་ སེམ་འགྱུར་ཧེ་།”
ཡི་ཤུའི་ འགོ་མེ་ ལོབ་ཀྲུག་རྒུན་ འདམ་མེ་ ཛེད་།
18 ཡི་ཤུ་ འགཱ་ལིལ་ལེ་ ཚོའེ་ ཐ་མ་ནི་ ཞཔ་འགྲུལ་ ཛེ་རྡེན་ ཡོད་ཏུའི་, ཁོང་ངེ་ ཨ་ཅོ་ནོ་ ཉི་, ཤི་མོན་ ཀ་འབོ་ལ་ པི་ཏྲར་ལ་ ཟེ་ཡོད་ ཡང་ ཁོའེ་ ནོ་ ཨན་འགྲིརུ་ ཟིའི་། ཁོང་རྒུ་ནི་ ཚོའེ་ན་ ཉ་འདོལ་ ཕང་ངེ་ཡོད་པེན་ ཅེ་ཟེར་ནི་ ཁོང་རྒུན་ ཉ་ ཟུམ་ཀན་ འིན་འབེན་། 19 ཡི་ཤུའི་ ཁོང་རྒུན་ལ་ མོལ་, “ངེ་ རྒྱབ་ནི་ ཡོྃ་རྡེ་ ངེ་ ལོབ་ཀྲུག་ འགྱུར་, ཏེ་ནི་ཕ་ལ་ ངེ་ ཁྱི་ཞ་རྒུན་ལ་ ཉེ་ ཚབ་ལ་ མི་རྒུན་ ཟུམ་ཅེ་ ལབ་རྦེན་།” 20 ཏེ་རྒ་མ་རྒ་ ཉ་འདོལ་ ཕྃ་རྡེ་ ཁོང་རྒུན་ ཡི་ཤུའི་ རྒྱབ་ནི་ འགྲྃ་།
21 ཡི་ཤུ་ ཏེ་ཀ་ནི་ རྐྱོད་ཟ་ནི་ ཨ་ཅོ་ནོ་ ཉི་, ཟེ་འབེ་འདེ་ པུ་ཙ་ ཡ་ཀུབ་ ཏང་ ཡོ་ཧཱ་ནན་ ཟིའི་, ཁོང་རྒུ་ནི་ ཨ་རྦ་ ཉམ་པོ་, ཆུ་འགྲུལ་ལེ་ན་ ཁོ་རང་རྒུ་ནི་ ཉ་འདོལ་ ཞིག་སོའེ་ ཅོ་ཡོད་པེན་, ཡི་ཤུའི་ ཁོང་རྒུན་ལ་ འབོ་ ཛེད་། 22 ཏེ་རྒ་མ་རྒ་ ཡ་ཀུབ་ ཏང་ ཡོ་ཧཱ་ནན་ནེ་ ཆུ་འགྲུལ་ རྡང་ ཨ་རྦ་ ཕྃ་རྡེ་ ཡི་ཤུའི་ རྒྱབ་ནི་ འགྲྃ་།
ཡི་ཤུའི་ ནེད་པ་རྒུན་ ཕན་ཅུག་རྒེ་ ཛེད་།
23 ཡི་ཤུ་ འགཱ་ལིལ་ལེ་ ཡུལ་ཞོང་ སོན་ཏེ་ན་ རྐྱོད་, ཁོང་ངེ་ འདུ་ཀང་རྒུ་ནི་ན་ ལབ་ཞ་ ས་ལེན་, རྡེ་བ་ཅན་ནེ་ རྒྱལ་སྲིད་རྡེ་ ནེ་ཚུལ་ ཟང་པོ་ ཤེད་རྡེ་ ཛེད་, ཡང་ ཟུར་མོ་ རྡང་ ནེད་ ཚང་མ་ནི་ མི་རྒུན་ ཕན་ཅུག་རྒེ་ ཛེད་། 24 ཁོང་ མིང་ཅེན་ནེ་ ནེ་ཚུལ་རྦོ་ ཐག་རིང་ སི་རི་ཡཱ་ ཡུལ་ཞོང་ཚུག་པ་ ཕེལ་ཤེ་ཀ་ནི་ མི་རྒུ་ནི་ ཟུར་མོ་ མིན་འདྲ་ མིན་འདྲ་ ཡོ་ཀན་རྒུ་ནི་ ནེད་པ་རྒུན་ ཁྱོྃ་: སྤེར་ན་ ན་ཚ་ མ་མང་པོ་, རྡུད་ ཞུ་ཧན་, མིར་འགི་ ཡོྃ་ཧན་ འདང་ ཟ་ཕོག་ཀན་རྒུན་, ཏེ་ ནེད་པ་ ཚང་མ་ ཡི་ཤུའི་ རྒྱལ་ཅུག་རྒེ་ ཛེད་། 25 འགཱ་ལིལ་ལེ་, འདྲེ་ཀ་པོ་ལི་, ཡེ་རུ་ཤ་ལེམ་, ཡ་ཧུ་འདཱ་ རྡང་ ཡོར་འདཱན་ སྃ་སྤེ་ ཉེ་ཁོར་རེ་ མི་ མང་པོ་ ཡི་ཤུའི་ ལྟིང་འགྲྃ་ནི་ ཡོྃ་།