ཡོ་ཧཱ་ནན་ ཁྲུའི་སལ་ཧ་ནེ་ མི་རྒུན་ ཀྲལ་འགྲིག་ ཛེད་།
3
ལོ་ མང་པེ་ ལྟིང་ནི་ ཁྲུའི་སལ་ཧན་ ཡོ་ཧཱ་ནན་ནེ་ ཆོའེ་ཤེད་ཅེ་ འགོ་ཟུག་, ཁོང་ངེ་ ཡ་ཧུ་འདཱེ་ རི་ལྟོང་ངེ་ན་ མི་རྒུན་ལ་ ཆོའེ་ཤེད་རྡེན་ 2 མོལ་, “རྡེ་བ་ཅན་ནེ་ རྒྱལ་སྲིད་ ཉེ་མོ་ ལེབ་ཏེ་ ནོག་, རྡིག་པ་ ཕྃ་རྡེ་ ཀོན་འཇོག་ ཆོག་ལ་ སེམ་འགྱུར་ཧེ་།” 3 ལུང་རྟོན་པ་ ཡེ་ཤ་ཡཱེ་ ཁྲུའི་སལ་ཧན་ ཡོ་ཧཱ་ནན་ནེ་ ཧོར་ལ་ མོལ་རྡུག་,“རི་ལྟོང་ངེ་ན་ ཧད་ ཆོན་མོ་ཞིག་རྒེ་ མོལ་ལེན་,
‘ཙོབོ་ ཕེཔ་ཅེ་ལ་ ཀྲལ་འགྲིག་ ཅོའེ་།
ཡང་ ཁོང་ངེ་ ཕེབ་ལམ་འབོ་ ཀྲང་པོ་ ཅོའེ་།’”
4 ཡོ་ཧཱ་ནན་ནེ་ ང་རྦོང་ངེ་ པལ་ལ་ ཐ་ཧ་ནེ་ ཀོའེ་ རྡང་ རྐྱེད་པ་ ཀོ་ཝ་རྡེ་ རྐྱེ་ར་ ཅིང་ངེ་ཡོད་པེན་། ཁོང་ངེ་ ཁར་ཞི་ནི་ ཅ་རྒེ་འབུ་ རྡང་ རི་ལྟོང་ངེ་ རང་སི་ འིན་འབེན་། 5 ཏེ་ཏུའི་ ཡེ་རུ་ཤ་ལེམ་, ཡ་ཧུ་འདཱ་ སོན་ཏེ་ རྡང་ ཡོར་འདཱན་ ལུང་པ་ སོན་ཏེ་ མི་རྒུན་ ཁོང་ལ་ ལྟ་ཅེ་ རྡང་ ཉེན་ནེ་ལ་ སོང་། 6 རང་རང་ངེ་ རྡིག་པ་ ཅོ་ཀན་རྒུ་ནི་ཕི་ ཀོན་འཇོག་ལ་ ཤག་སྤ་ ཞུའི་། ཡང་ ཡོ་ཧཱ་ནན་ནེ་ ཁོང་རྒུན་ལ་ ཡོར་འདཱན་ སྃ་སྤེ་ན་ ཁྲུའི་སལ་ལེ་ ཛེད་།
7 འིན་ན་ པ་རུ་ཤི་པ་ རྡང་ ས་འདུ་ཀི་པ་ མང་པོ་ཞིག་ ཁྲུའི་ནེ་ལ་ ཡོང་ངེན་ ཟི་རྡེ་ ཡོ་ཧཱ་ནན་ནེ་ མོལ་, “ཁྱི་ཞ་ ཏུག་རུལ་ལེ་ ཕར་རྒྱུད་རྒུན་, ཡོང་ཅེ་ཅེན་ནེ་ ཀོན་འཇོག་རྒེ་ ཆེད་པ་ནི་ ཤོར་ ཟེར་རྡེ་ ཁྱི་ཞ་ སྤང་ སུའི་ པུད་? 8 རྡིག་པ་ ཅོ་ཅེ་ ཕྃ་རྡེ་ ཀོན་འཇོག་རྒེ་ ལམ་མེ་ཀ་ འགྲུལ་ཧན་ནེ་ འབྲེ་རྦུ་ མིན་ཅུག་། 9 ཡང་ ཁྱི་ཞི་ མ་སམ་ཧེ་ ‘ང་ཞ་ ཨབ་ར་ཧམ་མེ་ ཕར་རྒྱུད་ འིན་ཅེ་ཀ་ནི་ ཐ་རེན་།’ ངེ་ ཁྱི་ཞ་རྒུན་ལ་ ཟེ་འིན་, ཀོན་འཇོག་རྒེ་ འི་ རྡོ་རྒུ་ནི་ ནང་ནི་ ཨབ་ར་ཧམ་མེ་ཕི་ ཕར་རྒྱུད་ ཛེད་ཉེན་ནེན་། 10 ཤང་ ཅོའེ་ཧེ་། ལྟ་རི་ ལྕང་མ་རྒུ་ནི་ པ་ཀྲག་རྒེ་ ཚམ་ལ་ རྒྱབ་ཆོག་ཆོག་ འདུག་, འབྲེ་རྦུ་ ཟང་པོ་ མ་མིན་ཀ་ནེ་ ལྕང་མ་ ཚང་མ་ ཅེད་ཏེ་ མེ་ན་ ཕང་ངེན་།”
11 “ངེ་ ཁྱི་ཞ་ རྡིག་པ་ ཕྃ་རྡེ་ ཀོན་འཇོག་རྒེ་ ཆོག་ལ་ སེམ་འགྱུར་ཤེ་ལ་ ཆུའི་ཁྲུའི་ ཏང་ངེ་ཡོད་། འིན་ན་ ངེ་ ལྟིང་ནི་ རྐྱོད་ཅེ་ཅེན་, ཁོང་ ངེ་སང་ མང་ངེ་ ཝང་ཅེན་, ཡང་ ང་ནི་ ཞབ་ཤི་ ཙོག་སེ་ ཁོང་ངེ་ ཞཔ་ལམ་ ཁུར་ཤེ་ འོའེ་སྤ་ མེད་། ཁོང་ངེ་ ཏམ་པེ་ ཐུག་ཡིད་ ཏང་ མེ་ ཁྲུའི་ས་ལེན་། 12 ཞིང་འབད་པེ་ འུལ་ཏག་ལ་ ཟར་ ཉམ་པོ་, ཀྲོ་ རྡང་ ཕུག་མ་ པེ་རྡེ་ ཀྲོ་ ཁོ་རང་ངེ་ པང་ངེ་ན་ ཡང་ ཕུག་མ་ མེ་ན་ སྲག་རྒེ་ ཙོག་སེ་ ཁོང་ངེ་ལ་ ཁོ་རང་ངེ་ མི་རྒུན་ འདང་ མི་ ངན་པ་རྒུན་ སོ་སོ་ པེ་ ཛེ་རྡེན་།”
ཡི་ཤུའི་ ཁྲུའི་ནེན་ནེ་ ཛེད་།
13 ཏེ་ནི་ ཡི་ཤུ་ འགཱ་ལིལ་ལེ་ ཡུལ་ཞོང་ནི་ ཡོར་འདཱན་ སྃ་སྤོ་ ཡོ་ཧཱ་ནན་ནེ་ ཁྲུའི་ནེན་ནེ་ལ་ རྐྱོད་། 14 འིན་ན་ ཡོ་ཧཱ་ནན་ནེ་ ཡི་ཤུ་ ཁྲུའི་ ནེན་ཅེ་ནི་ རྒག་ཅེ་ ཙོན་འགྲུའི་ ཅོའེན་ མོལ་, “ང་ ཉེ་རང་ངེ་ ཁྲུའི་སལ་ རྒོ་ཤེ་ ནོག་། ཏེ་ནི་ ཉེ་རང་ ངེ་ཀ་ ཁྲུའི་ནེ་ལ་ ཅེ་ རྐྱོད་ཏེ་ འིན་?”
15 ཡི་ཤུའི་ ཡོ་ཧཱ་ནན་ལ་ མོལ་, “ཏག་ས་ ང་ ཁྲུའི་ནེན་ཅུག་ ཅེ་ཟེར་ནི་ འི་ཟུག་ ཅོ་ཅེ་ནི་ ཨ་ཧོའེ་ ཀོན་འཇོག་རྒེ་ ཐུག་འདོད་ ཀྲུཔ་ཅུག་རྒེ་ནོག་།” ཏེ་ནི་ ཡོ་ཧཱ་ནན་ནེ་ ཁོང་ལ་ ཁྲུའི་སལ་ཅེ་ལ་ ཐེད་།