ཤར་ ཆོག་ནི་ རྐྱོད་ཀ་ནེ་ ཤེ་རབ་ཅེན་རྒུན་།
2
ཧེ་རོད་ རྒྱ་སྤོ་ ཡོད་ཟ་ནི་, ཡ་ཧུ་འདཱེ་ ཡུལ་ལེ་ འབེད་ལེ་ཧེམ་མེ་ན་ ཡི་ཤུའི་ ཧུ་ ལྟམ་། ཏེ་ཏུའི་ལ་ ཤར་ ཆོག་ནི་ ཤེ་རབ་ཅེན་ ཧར་མ་ སིལ་ཧན་ནེ་ མི་ ཁ་ཅིག་ ཡེ་རུ་ཤ་ལེམ་མེ་ རྒྱལ་ས་ ཡོྃ་རྡེ་ 2 འདྲི་, “ཡ་ཧུ་འདཱ་པེ་ རྒྱ་སྤོ་ ལྟམ་ཀན་འབོ་ ཀ་ན་ འདུག་? ང་ཞ་ ཁོང་ངེ་ ཧར་མ་ ཤར་ ཆོག་ལ་ ཐོང་འབེ་, ཁོང་ལ་ ཅོལ་ལེ་ ཡོྃ་རྦེན་།”3 ཏེ་ སྤེ་ར་འབོ་ ཚོར་རེ་རྡང་, རྒྱ་སྤོ་ ཧེ་རོད་ འཇིའི་ ཡང་ ཡེ་རུ་ཤ་ལེམ་པ་ ཚང་མ་ལ་ འཇིའི་། 4 རྒྱ་སྤོ་ ཧེ་རོད་འདེ་ ལ་མ་ འུ་རྐྱོང་ འདང་ ཆོའེ་ཁྲིམ་ལ་ ཁེ་སྤ་ ཚང་མ་ འབོའེ་རྡེ་ “ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ ཀ་རུ་ ཁྲུང་ཤེ་ འདུག་” ཟེར་རྡེ་ འདྲི་།
5 ཁོང་རྒུ་ནི་ ལེན་ཏྃ་, “ཡ་ཧུ་འདཱེ་ ཀྲོང་ཁྱེར་ འབེད་ལེ་ཧེམ་ལ་: ཀ་ཟུག་ ལུང་རྟོན་པ་ མི་ཀེ་ ཀོན་འཇོག་རྒེ་ མོལ་ལེ་ ཛེད་ཀན་འབོ་ འབྲི་ཛེད་ཏེ་ ནོག་,
6 ‘ཡུ་འདཱེ་ ཀྲོང་ཁྱེར་ འབེད་ལེ་ཧེམ་,
ཡ་ཧུ་འདཱ་པེ་ ཡུལ་ཞོང་ངེ་ན་ ཁྱི་ཞི་ ཀྲོང་ཁྱེར་ ཆུང་ཙེ་རྦོ་ལ་,
ཀྲོང་ཁྱེར་ མ་ ཁག་ཅེན་ཞིག་ འགྱུ་རེན་,
ཅེ་ཟེར་ནི་ ཁྱི་ཞི་ ཕྲོ་ནི་ ཏུ་ཟུག་ ཝང་སྲུལ་པ་ཞིག་ ཡོང་ངེན་,
ཀ་རྦེ་ ཨིས་ར་ཡེལ་པ་ ངེ་ མི་རྒུན་ལ་ ལུག་ཟི་ ཚུལ་ལ་ ལྟ་ཏོག་ ཅོའེན་།’”
7 ཏེ་ནི་ ཧེ་རོད་འདེ་ ཤར་ ཆོག་རྒེ་ ཤེ་རབ་ཅེན་རྒུན་ སུ་ལ་ རྒྱུའི་ཆ་ མ་ཅུག་ལ་ ཅིག་པོ་ འབོའེ་རྡེ་ ཧར་མ་ འགོ་མ་རང་ ཐོང་ཀ་ནེ་ ཏུའི་རྦོ་ རྒྱུའི་ཅོའེ་། 8 ཁོའེ་ ཁོང་རྒུན་ འབེད་ལེ་ཧེམ་ལ་ ལམ་ཅུག་ཏེ་ ཟེར་, “སོང་, ཞིབ་སལ་ ཅོའེ་རྡེ་ ཕྲུ་རྒུ་རྦོ་ ཙོལ་, ཡང་ ཁོང་ ཐོབ་རྦེ་རྡང་ ལོག་ཏེ་ ཡོྃ་རྡེ་ ང་ ཤོད, ཅེ་ཟེར་ནི་ ང་ ཁོང་ འཇལ་ལེ་ སོང་འདེ་ ཁོང་ལ་ ཅོལ་ལེན་།”
9 རྒྱ་སྤེ་ སྤེ་ར་ ཟེར་ཧན་རྒུན་ ཉེན་འདེ་ ལྟིང་ནི་, ཁོང་རྒུན་ ཤར་ ཆོག་ལ་ ཐོང་ཀ་ནེ་ ཧར་མེ་ རྒྱབ་ནི་ སོང་, ཀའོ་ ཕྲུ་རྒུ་ ཡོད་སེ་ མལ་ལེ་ཀ་ ལེབ་རྦེ་རྡང་, ནམ་ཀེ་ན་ འགྲུལ་ མ་འགྲུལ་ལེ་ འདེད་། 10 ཧར་མ་འབོ་ འགྲུལ་ མ་འགྲུལ་ལ་ འདེད་ཏེ་ ཐོང་ངེ་རྡང་, ཁོང་རྒུ་ནི་ སེམ་ ཐེད་པེ་ ཀང་། 11 ཁང་པེ་ན་ ཆ་རྡང་, ཁོང་རྒུ་ནི་ ཕྲུ་རྒུ་ ཁོ་རང་ངེ་ ཨ་མ་ མར་ཡམ་ ཉམ་པོ་ ཐོང་, ཡང་ ཁོང་རྒུ་ནི་ འགྱེལ་རྡེ་ ཕྲུ་རྒུ་ལ་ ཆག་པུལ་། ཏེ་ནི་ ཏེར་རྒམ་རྒུན་ པེ་རྡེ་ སེར་, ཏྲི་ཞིམ་ཅེན་ནེ་ སྤོའེ་ རྡང་ མིར་ ཟེར་ཧ་ནེ་ ཏྲི་ཞིམ་ཅེན་ནེ་ མར་ནག་རྒེ་ ཁྱོའེ་མ་རྒུན་ ཁོང་ལ་ པུལ་།
12 ཡང་ ཉི་ལམ་ན་ ཀོན་འཇོག་རྒེ་ ཁོང་རྒུན་ལ་ རྒྱ་སྤོ་ ཧེ་རོད་ས་ ལོག་ཏེ་ མི་ཆ་ཤི་ལ་ སྤང་པུད་རྡེ་རྡང་, ལམ་ སོ་སོ་ཞིག་ནི་ རང་ཡུལ་ལ་ ལོག་ཏེ་ སོང་།
ཨི་འཇིབ་རྦེ་ ཡུལ་ཞོང་ལ་ ཤོར་རེ་ ཛེད་།
13 ཤེ་རབ་ཅེན་རྒུན་ ལོག་ཏེ་ ཆ་རྡང་, ཀོན་འཇོག་རྒེ་ ཕོ་ཉ་ཞིག་ ཡོ་སེབ་རྦེ་ ཉི་ལ་མེ་ན་ མོལ་ལེན་ འཇལ་, “ལོང་, ཕྲུ་རྒུ་ རྡང་ ཁོང་ངེ་ ཨ་མ་ལ་ ཨི་འཇིབ་རྦེ་ ཡུལ་ཞོང་ལ་ ཁྲིད་ཏེ་ ཤོར་། ཡང་ ནམ་ཚུག་པ་ ངེ་ མི་ཟེར་ ཏེ་ཏེ་ཚུག་པ་ ཏུ་རུ་ འདོད་, ཅེ་ཟེར་ནི་ རྒྱ་སྤོ་ ཧེ་རོད་འདེ་ འི་ ཕྲུ་རྒུ་རྦོ་ སེད་ཅེ་ལ་ ཙལ་ལེན་།”
14 ཡོ་སེབ་ ལྃ་རྡེ་ ཕྲུ་རྒུ་ རྡང་ ཕྲུ་རྒུའི་ ཨ་མ་ མར་ཡམ་ ཉ་ཧ་ ཁྲིད་ཏེ་ ཏེ་རྒ་ ཚེན་ལ་ ཨི་འཇིབ་རྦེ་ ཡུལ་ལ་ ཤོར་རྡེ་ སོང་། 15 ཀ་རུ་ ཁོང་རྒུན་ རྒྱ་སྤོ་ ཧེ་རོད་ ཤི་ཤི་ཚུག་པ་ ཞུའུ་། ཀ་ཟུག་རྒེ་ ཙོབོ་ ཀོན་འཇོག་རྒེ་ ལུང་རྟོན་པ་ རྒྱུད་ཏེ་, “ངེ་ ཨི་འཇིབ་ ཡུལ་ནི་ ཕི་ལོག་ལ་ ང་རང་ངེ་ པུ་ཙ་ འབོའེ་རྦེན་” མོལ་རྡེ་ ཡོ་ཀན་འབོ་ འདྲན་འདྲ་ ཀྲུཔ་།
16 རྒྱ་སྤོ་ ཧེ་རོད་འདེ་ ཤེ་རབ་ཅེན་རྒུ་ནི་ འགོམ་ཧོར་ ཏང་ཀན་འབོ་ ཧ་ཀོ་རྡེ་ སྲོ་ མང་པོ་ ཡོྃ་། ཁོའེ་ འབེད་ལེ་ཧེམ་ འདང་ ཏེ་ ཉེ་ཁོར་རེ་ ཡུལ་ལེ་ན་ ཡོ་ཀ་ནེ་ པུ་ཙ་ ལོ་ ཉི་ ཡང་ ཏེ་སང་ ཆུང་ངེ་ ཚང་མ་ སོད་ ཟེར་རྡེ་ ཀཱ་ ཏྃ་, ཀའོ་ ཏེ་ ཤེ་རབ་ཅེན་རྒུ་ནི་ ཏང་པོ་རང་ ཧར་མ་འབོ་ ཐོང་ ཟེར་ཧ་ནེ་ ཏུའི་ ནང་ཞིན་ འིན་འབེན་། 17 ཏེ་ནི་ ལུང་རྟོན་པ་ ཡེ་རེམ་ཡཱ་ རྒྱུད་ཏེ་ ཀོན་འཇོག་རྒེ་ མོལ་ཧན་རྒུན་ ཀྲུཔ་། ཏོ་རྦོ་,
18 “ར་མེ་ ཡུལ་ནི་ ཧད་ ཚོར་རེན་།
ངུ་མ་ལབ་ ཅོའེན་།
ར་ཧེལ་ལེ་ ཕར་རྒྱུད་ རང་ངེ་ ཕྲུ་རྒུ་རྒུ་ནི་ཕི་ ངུའིན་,
འིན་ན་ སེམ་སོ་ མི་རྒོའེ་,
ཅེ་ཟེར་ནི་ ཕྲུ་རྒུ་རྒུན་ ཤི་རྡེ་ མེད་།”
ཨི་འཇིབ་ནི་ ལོག་ཏེ་ རྐྱོད་།
19 རྒྱ་སྤོ་ ཧེ་རོད་ ཤི་རྡེ་ ལྟིང་ནི་, ཡོ་སེབ་ ཨི་འཇིབ་རྦེ་ ཡུལ་ལ་ ཡོད་རྡེ་ ཏུའི་ལ་ ཁོ་ ཉི་ལ་མེ་ན་ ཀོན་འཇོག་རྒེ་ ཕོ་ཉ་ཞིག་རྒེ་ མོལ་, 20 “ལོྃ་, ཕྲུ་རྒུ་ རྡང་ ཁོང་ངེ་ ཨ་མ་ ཁྲིད་ཏེ་ ཨིས་ར་ཡེལ་ལེ་ ཡུལ་ལ་ སོང་ ཅེ་ཟེར་ནི་ ཕྲུ་རྒུ་ སེད་རྡེ་ལ་ ཙལ་ཧན་རྒུན་ ཏ་ ཤི་རྡེ་ མེད་།”
21 ཏོ་རྦེ་ཕི་ ཡོ་སེབ་ ལྃ་རྡེ་ ཕྲུ་རྒུ་ རྡང་ ཨ་མ་ ཁྲིད་ཏེ་ ཨིས་ར་ཡེལ་ལེ་ ཡུལ་ལ་ ལོག་ཏེ་ སོང་། 22 འིན་ན་ ཡོ་སེབ་ལ་ ཧེ་རོད་འདེ་ ཚབ་ལ་ ཁོའེ་ པུ་ཙ་ ཨར་ཁེ་ལི་ ཡ་ཧུ་འདཱེ་ རྒྱ་སྤོ་ ཅོ་ཀན་འབོ་ ཚོར་རེ་རྡང་, ཁོ་ ཡ་ཧུ་འདཱེ་ ཡུལ་ཞོང་ལ་ ལོག་ཏེ་ ཆ་ཅེ་ལ་ འཇིའི་། ཁོ་ ཉི་ལམ་ན་ སྤང་པུད་རྡེ་ ཛེད་ཅེ་ཀ་ནེ་ འགཱ་ལིལ་ལེ་ ཡུལ་ཞོང་ལ་ སོང་། 23 ཁོང་རྒུན་ སོང་འདེ་ ན་ཙ་རེད་ ཟེར་ཧ་ནེ་ ཀྲོང་ཁྱེར་རེ་ན་ འདེད་། ཏེ་རྒ་རྦེ་ཕི་ལ་ ངུལ་མེ་ ལུང་རྟོན་པ་རྒུ་ནི་ ཁོང་ངེ་ ཧོར་ལ་ “ཁོང་ལ་ ན་ཙ་རེད་པ་ ཞུ་ཡོད་” མོལ་ཧན་འབོ་ འདྲན་འདྲ་ ཀྲུཔ་།