4
Chi tixhe ti ejemplu de ni canié riꞌ.
Ora nahuiini ti baꞌdu ni chi guiaana né irá sti bixhoze la?
qué zanda di iníꞌ xi gaca ni,
purti laga nahuiini ru be,
nuu be casi ñuu ti mozo,
neca stibe irá ni.
2 Napa ru be tu cayuuya laabe ne cayuni mandar laabe,
laabe ne stibe,
dede dxi idxiña dxi ma gudixhe bixhoze be icaa be ni.
3 Zacaca uca binni dxi caꞌru gueeda Cristu.
Uyuu ca casi baꞌdu purti ucuá ru ca yaga lu irá ni na binni guidxilayú.
4 Peru gunda dxi gudixhe Dios useenda Xiiñiꞌ.
Gule be de ti gunaa ne biniisi be xaꞌna ley sti ca judíu.
5 Biseenda Dios laabe beda ulá be laanu de lu ná ley que ti icaa laanu casi xiiñiꞌ.
6 Ne para ihuinni ma xiiñi laanu la?
uluu Espíritu sti Xiiñi ndaani ladxidóꞌ no.
Ne Espíritu que rabi laanu gabi nu laabe Bixhoze nu.
7 Nga runi ma cadi mozo stibe laanu,
sínuque ma biꞌni be laanu xiiñi be,
ne pa xiiñi be laanu la?
zacaa nu ni udii be ca xiiñi be.
Nuu Pablu xizaa pur ca xpinni Cristu ni nuu Galacia
8 Dxi caꞌru gunibiáꞌ tu Dios la?
ucuá tu yaga lu ná ni cadi dxandí Dios.
9 Peru yanna ma beda gunibiáꞌ tu Dios,
o gabi nu ma beda gunibiáꞌ be laatu la?
ximodo zanda ibigueta chi nanda tu ni na binni guidxilayú guni tu yaꞌ.
Ruluíꞌ racalaꞌdxi tu icá tu yaga lu ná ni sti tiru.
Qué iquiiñe ni ne qué zanda acané ni laatu.
10 De yanna rapa tu laní ne ca beeu ni na tu jma nandxóꞌ,
ne zaqueca ca dxi ne ca iza.
11 Cadxibe nia laatu,
quenquita pur gana si bine dxiiña lade tu.
12 Hermanu caꞌ,
rinaba laatu guni tu casi bineꞌ,
purti naa beda gaca casi binni laatu,
ma cadi casi judíu.
Cadi cayabe laatu huachee né tu naa.
13 Laaca tu nanna tu huaraꞌya dxi bizuluáꞌ byue nia laatu stiidxa Cristu.
Nga runi biaana lade tu.
14 Neca huaraꞌya chiqué,
qué nudxii deche tu naa,
ne qué nibixhilaꞌdxi tu enda huará stinne que,
sínuque bichagalú tu naa casi nuchagalú tu ti ángel biseenda Dios,
ne casi ñuni tu Cristu Jesús.
15 Uná irá enda nayeche ni gupa né tu naa que pue.
Purti nanna dxiꞌche pa ñanda si dede guielú tu ñaxha tu nudii tu naa chiqué.
16 Ñee bisaana tu de ganaxhii tu naa purti si gudxe laatu ni dxandí la?
17 Nuu tu ruyubi laatu,
peru cadi para acané laatu,
sínuque para uxhale si laatu de laadu ne de ni bisiꞌdi du laatu,
ti chi nanda tu laacaꞌ.
18 Galán pa uyubi cabe stobi peru pa para acané cabe laa.
Nga ca riuladxeꞌ,
ne cadi ora si nuaa nia laatu.
19 Xiiñe caꞌ,
pur laatu cayacanaꞌya sti tiru.
Nuaa nia ti yuuba casi ti gunaa ora chi gapa baꞌduꞌ,
ne ziaana yuuba ri ndaani ladxiduáꞌ dede ora ma usihuinni tu cayuni mandar Cristu ndaani ladxidóꞌ to.
20 Ñacaladxe ñuaa nia laatu yanna ca,
ti ñue nia laatu diidxaꞌ,
ne ma qué nucaa irá ni cucaa riꞌ,
purti qué idxela xi gune nia laatu.
Ejemplu sti Agar ne Sara
21 Lagabi naa,
cani racalaꞌdxi ibani xaꞌna ley.
Ñee qué huayuna diaga tu xi na Xquiꞌchi Dios la?
22 Riete ra gupa Abraham chupa xiiñiꞌ.
Tobi la?
xiiñi xcriada ne stobi que,
xiiñi xheelaꞌ.
23 Ni gupa criada que gule casi rale tutiisi badu huiiniꞌ,
peru stobi que gule purti bidii stiidxa Dios gale.
24 Nuu nga casi ti ejemplu.
Iropa gunaa que zeda gaca casi iropa modo gudixhe Dios chuꞌ né binni laa tobi si.
Tobi que nga casi ra bidii be ley lu dani Sinaí,
ne nga nga gabi nu Agar.
Cani za de Agar que la?
puru binni runi mandar laacaꞌ.
25 Zanda usaca nu laaca cani nabani xaꞌna ley ni bidii Dios Moisés lu dani Sinaí ni nuu Arabia que,
ne nga nga ca binni Jerusalén purti de yanna cá ca yaga lu ná ley que.
26 Peru nuu sti Jerusalén ibáꞌ,
sti ca xpinni Cristu,
cani ma cadi cá yaga lu ná ley,
ne lade binni Jerusalén cubi que ziupa nu.
27 Sicarí cá lu Xquiꞌchi Dios:
Lii,
gunaa ni qué ñanda ñapa baꞌduꞌ,
biecheꞌ.
Bicaa ridxi de enda nayecheꞌ,
lii ni qué huayuu dxi ganna xii nga xhiuba baꞌduꞌ,
purti jma stale xiiñi gunaa ni bisaana xheela laa,
que xiiñi gunaa ni nabeza né xheelaꞌ.
28 Hermanu caꞌ,
laanu naca nu casi Isaac ni gule purti bidii stiidxa Dios gale que.
29 Ne casi uzabi nanda xiiñi criada que xiiñi xheela pe Abraham la?
zaqueca cayaca yanna.
Rizabi nanda cani nabani xaꞌna ley ca xpinni Cristu.
30 Peru xi na Xquiꞌchi Dios yaꞌ.
Cá ra gudxi Dios Abraham iladxi criada que,
purti qué zanda icaa xiiñi criada ni chi caa xiiñi xpixuaanaꞌ.
31 Ne laanu la?
hermanu caꞌ,
zeda gaca nu casi xiiñi xheela pe Abraham ne cadi casi xiiñi criada que.