Qué rulá ley binni
3
Aque nahuati tu xa,
hermanu de Galacia caꞌ.
Tu udxite laatu para iree chu tu de ni dxandíꞌ.
Modo bisiá du stiidxa du ra byuí du stiidxa Cristu lade tu la?
casi ñaca biiya dxichi tu ra cá be lu cruz.
2 Lagabi naa,
ñee ucuaa tu Espíritu Santu purti biꞌni tu ni na ley la?
o purti bini cre tu ni bina diaga tu.
3 Ñee dede racá ridxiña tu de nahuati tu la?
Bizulú tu enda nabani cubi ni napa tu ca ra ucuaa tu Espíritu Santu.
Yanna xiñee cuyubi tu unduuxe tu stubi si tu.
4 Ñee pur gana si udiꞌdi tu irá ni ma udiꞌdi tu ca la?
Tila ucané ni laatu biene tu xcaadxi.
5 Dios ruchá ladxidóꞌ to de Espíritu Santu ne rusihuinni enda nandxóꞌ sti lade tu.
Ñee na tu runi be ni purti zinanda tu ley la?
Cadi pur nga diꞌ,
sínuque runi be ni purti runi cre tu stiidxa be ni bina diaga tu.
6 Abraham laca bini cre ni gudxi Dios laa,
ne zacá bixhá Dios stonda.
7 Nga runi,
laganna dxichi irá cani runi cre la?
ca ngue nga xiiñi Abraham.
8 Lu Xquiꞌchi Dios rihuinni maca uníꞌ Dios dede chiqué zaxá stonda cani cadi judíu ra guni cre.
Ne uníꞌ be ni ra gudxi be Abraham ca diidxa sicarú riꞌ,
na be rabi be laa:
“Pur lii zaguaa ndaaya idubi naca guidxilayú.”
9 Racá riduꞌya nu,
uluu Dios ndaaya Abraham purti bini cre,
ne pa guni cre nu casi bini cre be que la?
ne laanu ziuꞌ nu ndaaya ni uyuu be que.
10 Maca cá lu Xquiꞌchi Dios:
“Dí nuu irá cani qué guni irá xixé ni na ley.”
Nga runi,
dí nuu cani cuyubi ilá ra guni ni na ley,
purti iruti zanda guni irá ni na ni sin uchee.
11 Rihuinni dxichi qué zaxá stonda binni nezalú Dios tisi guni ni na ley.
Purti sicarí cá lu Xquiꞌchi Dios:
“Ni ma bixá stonda ra bini cre la?
zabani.”
12 Qué riete gasti de enda runi cre lu ley,
sínuque na ni:
“Ni acalaꞌdxi ibani xaꞌna ley la?
napa xidé guni irá xixé ni na ni.”
13 Chiqué uyuu dí sti Dios luguiá irá nu purti qué ñanda ñuni nu irá ni na ley,
peru yanna ma bilá Cristu laanu de laani.
Laa ucuaa ni jlugar nu ra guti lu cruz.
Purti cá ni lu Xquiꞌchi Dios:
“Dí nuu irá ni icá lu cruz.”
14 Ne pur ni biꞌni Cristu que,
ma zanda icaa cani cadi judíu irá ni bidii stiidxa Dios Abraham zudii laa,
ne laca ma irá nu zanda icaa nu Espíritu Santu ni bidii stiidxa Dios useenda ra nuu cani guni cre.
Qué zanda uchiá ley ni uníꞌ Dios
15 Hermanu caꞌ,
chi tixhe ti ejemplu de binni guidxilayú.
Ora udii stiidxa tuuxa stobi,
ne icá ni lú guiꞌchi ne iropa ca guni firmar ca la?
iruti zanda uchiá ni,
nin cuꞌ ru xcaadxi diidxa lú ni.
16 Yanna,
bidii stiidxa Dios Abraham zaguu ndaaya laa ne xiiñiꞌ ne ni za de familia stiꞌ.
Qué ñabi di be laa,
“ca xiiñiꞌ”,
sínuque bizeete be tobi si,
ne ngue nga Cristu.
17 Ndi nga ni cayabe laatu:
Bidii stiidxa Dios ulá Abraham ra guni cre,
ne casi ñaca bini firmar ni.
Nga runi qué zanda uchiá ley ni ma uníꞌ be que,
purti maca uníꞌ be ni dxi caꞌru gata ley,
ne udiꞌdi ru tapa gayuaa treinta iza para beda gata ley.
18 Ne pa ñanda nilá nu ra ñuni nu ni na ley que la?
ma qué nilá nu modo bilá Abraham ra bini cre ni gudxi Dios laa.
19 Yanna xi para nuu ley yaꞌ.
Nirudóꞌ bidii stiidxa Dios Abraham.
Oraque ru gudixhe ley para ihuinni ruchee binni.
Gudixhe gá be ni laga si gueeda dxa ni za de Abraham,
ni bizeete be dxi bidii stiidxa be laa que.
Ne dxi bidii be ley la?
bidii be ni ca ángel para udii ca ni Moisés.
De laa ma udii ni ca xcaadxi.
20 Peru dxi bidii stiidxa be ulá be binni la?
sin Moisés ne ca ángel,
sínuque laasi be biꞌni be ni.
Xiñee guꞌta ley
21 Xi na tu,
ñee nuu dinde né ley sti Moisés ni bidii stiidxa Dios guni que la?
Qué ziuu dxi.
Nuu xi pur gudixhe Dios ley,
peru qué zanda ilá binni pur laani.
Purti pa ñuu xiixa ley ni ñanda nudii enda nabani ni qué zaluxe la?
ne nga si nixá stonda cani ñuni ni na ni.
22 Peru lu Xquiꞌchi Dios na:
“Irá xixé binni bichee ne qué zanda iree de lu ná enda ruchee que.”
Nga runi gudixhe Dios icaa nu enda nabani que ra guni cre nu Cristu.
23 Dxi caꞌru gueeda Cristu la?
casi ñaca nuseguyoo ley que laanu,
laga idxiña dxi uluíꞌ Dios laanu ximodo ilá nu ra guni cre nu laabe.
24 Ne irá ca dxi que gupa ley que laanu,
ne biluíꞌ laanu xi guni nu,
casi rapa cabe baꞌdu ora zeda niisi.
Peru dxi ma beeda Cristu la?
bini cre nu laa,
para bixhá Dios stonda nu.
25 Ne ma cadi cayapa ley que laanu,
purti ma runi cre nu Cristu.
Ma cadi naquiiñe chuꞌ tu gapa laanu.
26 Yanna ma xiiñi Dios laatu purti ma runi cre tu Cristu Jesús ne nuu né tu laa tobi si.
27 Irá ni ma uyuu nisa purti ma Xpinni Cristu laa la?
nuu né Cristu tobi si.
28 Ne zacá ma tobi si laanu.
Ma cadi adxé judíu ne ni cadi judíu,
ne ma cadi adxé mozo ne xpixuaanaꞌ,
ne cadi jma risaca hombre que gunaa,
sínuque ma tobi si irá nu purti ma nuu né nu Cristu Jesús tobi si.
29 Ne pa ma naca nu xpinni Cristu la?
dxandí za nu de Abraham,
ne zacaa né nu laa ni bidii stiidxa Dios udii laa que.