Ra uyé Pablu Macedonia ne Grecia
20
Uyuu dxí si guidxi que,
guridxi Pablu ca hermanu,
bilidxe laacabe ne gudxi laacabe ma cheꞌ,
para biree ze Macedonia.
2 Uzá be irá guidxi ni nuu neza que,
ne irá ra zidiꞌdi be ziuzuhuaa chaahui be ca hermanu pur irá diidxa ni byuíꞌ né be laacaꞌ dede yendá be Grecia.
3 Biaana be raqué chonna beeu.
Ma nuu be para icaa be barcu che be Siria gunna be cabeza ca judíu inaaze ca laabe.
Ni biꞌni ti be la?
bigueta be neza Macedonia sti tiru.
4 Yené caadxi hermanu laabe,
ra zeeda Sópater de Berea,
ne Aristarco ne Segundu de Tesalónica,
ne Gayo de Derbe,
ne Tíquico ne Trófimo de Asia,
ne Timoteu.
5 Uzá niru ca lú du,
yendeza ca laadu Troas.
6 Laadu biaana ru du Filipos.
Raqué bitiꞌdi du saa ra ro cabe pan sin levadura,
ne lu gaayu gubidxa yeugaanda du laacabe Troas.
Biaana du raqué gadxe gubidxa.
Ra bisiidi Pablu ca xpinni Cristu Troas
7 Ra gunda domingu que bidxiña irá ca xpinni Cristu para go ca pan casi bisaana Jesús guni caꞌ,
ne bisiidi Pablu laacaꞌ.
Gunda galaa gueela caníꞌ ru Pablu,
purti sti dxi que ma cheꞌ.
8 Cá gui jma biaani ra nuu cabe que,
ndaani ti yoo raguionna pisu.
9 Nuu ti hombre huiini raqué lá Eutico,
zuba ra ventana.
Ucuaa bacaanda laa purti xadxí caníꞌ Pablu,
ne biree yaande de raqué.
Ma guti gundisa cabe laa.
10 Oraque biete Pablu,
guta gudaa gudiidxi laabe ne na rabi ca hermanu:
―Cadi idxibi tu.
Ma bibani be.
11 Bigueta udxiꞌba Pablu para undaa cabe pan gudó cabe.
Biluxe si cabe bizulú uníꞌ Pablu sti tiru dede birá gueelaꞌ.
Oraque ru biree zeꞌ.
12 Para biree cabe ziné cabe hombre huiini que,
ne nabé nayeche biaana cabe purti bibani.
Ra yendá cabe Mileto
13 Ucuaa du barcu uzá niru du lú Pablu,
uyuu du Asón.
Raqué uleza du laabe.
Zacá biaana né du laabe purti laabe qué zie be lu nisa.
14 Ora yendá be Asón udxiꞌba be ndaani barcu ra nuu du para uyuu du Mitilene.
15 Biréꞌ du Mitilene ziuu du.
Sti dxi que udidi du Quío.
De lu sti dxi que yendá du Samos ne biaana du Trogilio.
Biréꞌ du raqué sti dxi que yendá du Mileto.
16 Qué ñuꞌ du Efeso,
purti qué niná Pablu ñaana Asia xadxí.
Cá ique be pa ganda chindá be Jerusalén para laní Pentecostés,
saa sti ca judíu.
Ra bisenda caa Pablu ca xpinni Cristu Efeso
17 Laga nuu du Mileto bisenda caa be ca hermanu gola lade ca xpinni Cristu de Efeso.
18 Ora beeda ca rabi be laacaꞌ:
―Laatu nanna tu ximodo huazaya lade tu dede primé dxi bedandaya Asia.
19 Qué ñuu dxi nudxiiba naa ra cayune xhiiña Señor.
Stale tiru biina ra biiya jmodo ca binni riꞌ,
ne udide stale ni nagana pur ni ucalaꞌdxi ca judíu ñuni naa.
20 Qué nucaache gastiꞌ,
sínuque byue nia laatu irá ni zacané laatu para uzuhuaa chaahui tu.
Bisiide laatu ra nuu tu irá tu tobi si,
ne zaqueca ra yeganna laatu ralidxi tu.
21 Gudxe ca judíu ne zaqueca cani cadi judíu inaba ca perdón Dios ne guni cre ca Señor Jesucristu stinu.
22 Yanna cayabi Espíritu Santu naa chaa Jerusalén,
ne qué ganna xi cabeza naa raqué.
23 Ni nanna siaꞌ la?
irá ra huayaa rabi Espíritu Santu naa zieguayuaa ne zadide ra nagana.
24 Peru nin tobi de ca nga qué rizaaladxeꞌ,
neca pe guuti cabe naa.
Xi si ricá ique la?
unduuxe dxiiña ni bidii Señor Jesús naa guneꞌ.
Ne ndi nga dxiiña bidii be naa:
güe nia binni ma zanda ilá ca pur enda nachaꞌhui sti Dios.
25 Ma nanna nin tobi de laatu,
cani byue nia de enda runi mandar sti Dios,
qué zuuya ru tu luaꞌ ndaani guidxilayú riꞌ.
26 Nga runi cayabe ni laatu nagasi,
ma cadi naa diaꞌ napa donda pa initilú tu.
27 Purti qué nusaana naya de ñue nia laatu irá ni na Dios.
28 Yanna lagapa laca laatu ne lagapa ca xpinni Cristu ni bisaana Espíritu Santu laatu gapa tu,
casi rapa pastor dendxu stiꞌ.
Xpinni be laacaꞌ purti bixhii be rini stibe pur laacaꞌ.
29 Purti nanna dxiꞌche casi pe naa gaxha ñee,
zeeda xcaadxi zacalaꞌdxi uchiá ca xpinni Cristu casi ruxuuxe gueu dendxuꞌ.
30 Ne dede lade ca tu ziuu tu guiasa usiguii ca xcaadxi para chi nanda laacaꞌ.
31 Nga runi cayabe laatu lagataná ne laguietenalaꞌdxiꞌ chonna iza dede biete nisa lua bisiene cada tobi de laatu ridxí ne huaxhinni.
32 Yanna la?
hermanu caꞌ.
Rusaana laatu lu ná Dios.
Ne ma nanna tu napa tu stiidxa be ni rabi laatu pabiáꞌ nachaꞌhui be ne laatu.
Zacané ni laatu para uzuhuaa chaahui tu.
Ne zudii be laatu ni ma naguixhe chaahui be para icaa ca xpinni be.
33 Qué nicá luaꞌ plata nin oro nin xhaba stobi.
34 Sínuque laatu nanna tu bine dxiiña para bibane nia cani cayacané naa.
35 Ma bilué laatu de irá modo naquiiñe guni nu dxiiña para acané nu cani caquiiñe ni.
Laguietenalaꞌdxi xi na Señor Jesús:
“Jma nayeche ni rudii que ni ricaa.”