Ra biree Pablu ze Jerusalén
21
Raqué undaa saa né du ca hermanu.
Udxiba du lu barcu biréꞌ du ziuu du.
Dede Cos yeguiaana dxí du,
ne sti dxi que uyuu du Rodas.
Biréꞌ du Rodas uyuu du Pátara.
2 Raqué nuu ti barcu che Fenicia,
para udxiba du lú ni,
biréꞌ du ziuu du.
3 Neza ziuu du Siria biduꞌya du isla Chipre,
biaana ni ladu bigaꞌ.
Yeguiaana dxí du Tiro,
ti guidxi sti Siria,
purti raqué nga rundaate barcu que irá ni né.
Ne raqué biete du.
4 Biyubi du ra nuu ca xpinni Cristu ne biaana né du laaca gadxe gubidxa.
Ne pur ni gudxi Espíritu Santu laacabe,
gudxi cabe Pablu cadi che Jerusalén.
5 Bizaa si gadxe gubidxa que biréꞌ du ziuu du.
Yeuzuhuaa ca hermanu que laadu neza,
laaca ne xheela ca ne ca xiiñi caꞌ,
dede biréꞌ du de ndaani guidxi que.
Ne bizuxibi du lu yuxi uriá nisa,
uní né du Dios.
6 Oraque gudiidxi saa du,
para udxiba du lu barcu.
Laacabe bigueta cabe zibíꞌ cabe.
7 Biréꞌ du Tiro uyuu du Tolemaida,
ne raqué biluxe viaje stidu lu nisa.
Yeganna du ca hermanu de raqué ne biaana né du laaca ti dxi.
8 Sti dxi que biree né Pablu laadu,
uyuu du Cesarea.
Yeguiete du ralidxi Felipe,
tobi de gadxe diácono ni ulí cabe dxi ulí cabe Esteban que.
Riree be rigüí be stiidxa Cristu.
9 Napa be tapa xiñi dxaapa be caꞌru ichaganáꞌ.
Ruiꞌ né ca binni ni rabi Dios laacaꞌ.
10 Biaana du raqué chupa chonna gubidxa ne raqué nuu du beeda ti profeta de Judea lá Agabo.
11 Ora beda ganna be laadu ucuaa be cinturón sti Pablu.
Bindiibi be ná be ne ñee be,
ne na be:
―Ndi nga ni na Espíritu Santu.
Sicarí zundiibi cabe xpixuaana cinturón ri Jerusalén ne zutiidi ca judíu laa lu ná cani cadi judíu.
12 Ora bina diaga du xi na be la?
irá du ucuá du lú Pablu cadi che Jerusalén,
laadu ne ca binni raqué.
13 Peru na rabi laadu:
―Xii ndi raca tu ruuna tu,
cayuniná tu ladxiduáꞌ.
Ma nuaa listu cadi para íliibe siaꞌ,
sínuque ne para gate Jerusalén pur Señor Jesús.
14 Biduꞌya si du qué ñanda nucuudxi du laabe la?
uyúꞌ dxí du ne rabi du laabe:
―Gaca ni na Dios.
15 Udiꞌdi si nga,
gudixhe chaahui du stidu para uyuu du Jerusalén.
16 Yené caadxi hermanu de Cesarea laadu.
Lade cabe zeeda tobi de Chipre lá Mnasón,
tobi ni ma xadxí runi cre Cristu.
Ralidxi be yeguiete du.
Ra yeganna Pablu Jacobo
17 Ora yendá du Jerusalén bichagalú ca hermanu que laadu ne stale enda nayecheꞌ.
18 Sti dxi que yené Pablu laadu yeganna du Jacobo.
Raqué nuu irá ca hermanu gola sti ca xpinni Cristu.
19 Biluxe si bigapa diuxi be laacaꞌ,
byuíꞌ né be laaca irá modo biquiiñe Dios laabe lade cani cadi judíu.
20 Irá ca bisisaca ca Dios ora gunna ca ni,
ne na ca rabi ca laabe:
―Peru ma nannu hermanu,
stale judíu nuu rarí ni ma runi cre,
ne nabé rinanda ca ni na ley sti Moisés.
21 Huayuíꞌ né cabe laaca de lii,
na cabe raꞌbu ca judíu ni nuu lade cani cadi judíu cadi chi nanda ca ley que,
cadi cuꞌ ca seña sti Dios ca xiiñi caꞌ,
ne ma cadi chi nanda ca ca costumbre sti ca judíu.
22 Yanna xi guni nu.
Purti zadxiña irá cabe ora ganna cabe beeduꞌ.
23 Nannu xi guꞌnu la?
Nuu tapa hermanu lade du mayaca iluxe quixe ca ti promesa.
24 Yené laacabe ra yuꞌdu roꞌ ne irá tu laguni casi cá lu ley,
ne gudixe irá ni iquiiñe cabe raqué.
Oraque ma zanda igá ique cabe.
Zacá zanna ca hermanu judíu lii laca ruꞌnu ni na ley,
ne cadi dxandí ni caníꞌ binni de lii ca.
25 Ne de cani cadi judíu ni ma bini cre ca la?
ma bicáꞌ du guiꞌchi lú caꞌ,
gudxi du laaca cadi izaalaꞌdxi ca irá nga.
Sínuque ni naquiiñe si guni ca la?
cadi go ca ni ma guꞌta lu bidóꞌ,
nin rini,
nin tutiica mani ixii yanni,
ne cadi chuꞌ né ca ni cadi xheela caꞌ.
26 Para ucuaa Pablu idapa hombre que,
ne sti dxi que yeguni né laacabe casi cá lu ley gacaꞌ.
Ne óraque biuu ndaani yuꞌdu roꞌ yetidxi sacerdote padxí iluxe ni cayuni cabe que para chiné cada tobi ni usigaꞌde Dios.
Ra bigaa Pablu ndaani yuꞌduꞌ
27 Ma para izaa gadxe gubidxa de ni cayuni cabe que biiya caadxi judíu de Asia nuu be ndaani yuꞌdu roꞌ,
para bini yaya ca ca binni que ne unaaze ca laabe.
28 Bicaa ca ridxi,
na caꞌ:
―Binni Israel caꞌ,
latáꞌ acané tu igaa hombre riꞌ.
Laabe nga canausiidi be binni cadi jneza runi ca judíu ne cadi guni ca ni na ley stinu,
ne qué risaca yuꞌdu roꞌ riꞌ.
Ne cadi nga si,
sínuque ma biguu be ni cadi judíu ndaani yuꞌdu riꞌ,
ne zacá bini yuudxu be yuꞌdu sti Dios.
29 Uníꞌ ca zaqué purti biiya ca canazá né be Trófimo,
binni Efeso,
ne zácaxa ca biuu né be laa ndaani yuꞌdu roꞌ.
30 Biasa nda irá binni guidxi que unaaze ca laabe zixubi yu ca laabe dede ulee ca laabe ndaani yuꞌdu que ne biseegu caꞌ ra puertaꞌ.
31 Ucalaꞌdxi ca ñuuti ca laabe peru uyuu tu yetidxi xaíque sti ca soldadu cayaca yaya irá binni Jerusalén.
32 Para ucuaa ca soldadu stiuꞌ,
ne caadxi capitán,
ziuxooñe caꞌ,
yendá ca ra rí ca binni que.
Peru ora biꞌya ca binni que laacabe biaana dxí ca de niguiñe ca Pablu.
33 Oraque bidxiña xaíque que unaaze laabe ne bicaa ca soldadu undiibi ca laabe chupa cadena.
Ne unaba diidxa tu laabe ne xi biꞌni be.
34 Peru adxé adxé ni na ca binni que.
Tobi na ndiꞌ,
stobi na ndicaꞌ.
Ni biꞌni ti xaíque que,
biseenda laabe ra cuartel,
purti qué ñanda ñene xi na ca binni que pur irá ruidu cayuni caꞌ.
35 Ora yendá cabe ñee escalera para niguiꞌba cabe ñuu cabe ndaani cuartel que la?
undani ca soldadu laabe purti ucalaꞌdxi ca binni que nuruuxha laabe.
36 Nanda irá binni que laacabe zeeda ucaa ridxi:
¡Gati be!
Ra uníꞌ né Pablu irá binni
37 Ma chi nduu cabe laabe ndaani cuartel que,
rabi be xaíque que:
―Zanda inié xiixa la?
Oraque na xaíque que:
―Riníuꞌ griegu pue la?
38 Entonce cadi dxa egipciu bicaa lú gobiernu que lii pue la?
dxa ni yené tapa mil bandidu ndaani guiꞌxhi que.
39 Oraque na Pablu:
―Judíu naa.
Gule Tarso.
Naa nga binni de ti guidxi ni risaca lade ca guidxi sti Cilicia.
Ne rinaba lii udiiu lugar naa inié nia ca binni riꞌ.
40 Oraque na xaíque que zaa iníꞌ be.
Para bizuhuaa be lu escalera que,
biꞌni be seña lu ca binni que igani caꞌ.
Dxí doꞌ uyuu ca óraque para bizulú be uníꞌ be hebreu,
na be: