Ra nuu Pablu Efeso
19
Laga canazá Apolo Corinto udiꞌdi Pablu lade dani dede yendá Efeso.
Raqué bidxela be caadxi xpinni Cristu.
2 Ne rabi be laacaꞌ:
―Ñee ucuaa tu Espíritu Santu ra bini cre tu la?
Para na caꞌ:
―Nin qué lica huayuna diaga du pa nuu Espíritu Santu.
3 Oraque rabi be laacaꞌ:
―Xi biziidi tu para uyuu nisa tu yaꞌ.
Para na caꞌ:
―Ni bisiidi Juan ra uluu nisa binni.
4 Oraque rabi be laacaꞌ:
―Uluu nisa Juan binni para ihuinni ma unaba ca perdón Dios,
ne gudxi laacabe guni cre cabe stobi ni nanda laa.
Ne nga nga Jesucristu.
5 Ora bina diaga ca xi na be,
uyuu nisa ca para ihuinni ma xpinni Cristu laacaꞌ.
6 Ne ora udixhe ná be luguiá caꞌ,
bidxá ladxidóꞌ ca de Espíritu Santu.
Ne uníꞌ ca idioma ni qué niziidi caꞌ,
ne bizulú ca byuíꞌ né ca binni stiidxa Dios.
7 Biaꞌ doce ca nuu ca raqué.
8 Biaꞌ chonna beeu biaana Pablu raqué,
bisiidi ndaani yuꞌdu sin nidxibi.
Byuíꞌ né be laaca de enda runi mandar sti Dios.
Biyubi be nucuudxi be laaca para ñuni cre caꞌ.
9 Peru uyuu tu qué niná ñuni cre.
Biguidxi ladxidóꞌ caꞌ,
ne uluu dí ca stiidxa Cristu nezalú irá binni que,
para bixele be de laacaꞌ.
Yené be cani ma runi cre ra yoo scuela sti tobi hombre lá Tiranno.
10 Raqué biaana be bisiidi be chupa iza.
Ne zacá bina diaga irá binni Asia stiidxa Señor,
cásica judíu zaqueca cani cadi judíu.
11 Ne biquiiñe Dios laabe para biꞌni stale milagru.
12 Purti neca bayu si stibe o tindaa lari ni ma biquiiñe be chiné ca binni que ra nuu cani huará,
maca ziyanda.
Ne zaqueca ca binidxaba ni caguite ique binni,
laca ne ngue si rixele caꞌ.
13 Uyuu caadxi judíu raqué canabee binidxaba ni caguite ique binni.
Zácaxa ca tisi uzeete ca lá Señor Jesús zacané laaca iree ca binidxaba que.
Na ca rabi ca ca binidxaba que:
―Cayabe laatu iree tu,
casi ñaca ñabi Jesús ni ruiꞌ Pablu stiidxa que ni laatu.
14 Canayuni gadxe xiiñi Esceva ni,
Esceva ti sacerdote gola sti ca judíu.
15 Peru ora gudxi cabe ni ti binidxaba la?
na rabi laacabe:
―Runebiaꞌya Jesús ne nanna tuu nga Pablu,
peru laatu yaꞌ,
tu laatu.
16 Oraque biaaxha dxa hombre caguite binidxaba ique que luguiá cabe,
gudiñe laacabe ne gudixhe dxí irá cabe.
Biiya si cabe ma gasti ganda guni cabe biree cabe ndaani yoo,
ziuxooñe cabe xie ladi cabe,
naze cabe rini.
17 Irá binni guidxi que gunna ni,
cásica judíu zaqueca cani cadi judíu.
Irá ca bidxibi caꞌ ne bisisaca ca Señor Jesús.
18 Ne beeda stale de cani ma bini cre,
beda ndee ruaa ca diidxa irá ni huayuni ca ni cadi jneza.
19 Zaqueca stale de cani runi brujería.
Bedané ca libru stica para icá gui nezalú irá binni que.
Ne ulee cabe cuenta pabiáꞌ risaca cani.
Biaꞌsi bidii ni cincuenta mil moneda de plata.
20 Zaqué jma rusi bireeche stiidxa Señor ne biꞌni ni dxiiña ndaani ladxidóꞌ stale binni.
21 Udiꞌdi si irá nga gudixhe ique Pablu tidi Macedonia ne Acaya ne óraque ibigueta Jerusalén.
Ne na be napa be xidé che be Roma ora ma uyé be Jerusalén.
22 Bisá niru gá be chupa de cani racané laabe che Macedonia,
Timoteu ne Erastu.
Laabe biaana ru be neza Asia.
Ni uca ra nuu Pablu Efeso
23 Ca dxi que uca yaya binni guidxi que pur stiidxa Señor.
24 Purti nuu ti plateru lá Demetriu ruzáꞌ yuꞌdu huiini sti diosa Diana,
napa stale tu runi né laa dxiiñaꞌ,
ne nabé runi ganar cabe lú ni.
25 Uridxi be cani runi né laabe dxiiña que,
ne ca xcaadxi plateru,
rabi be laacaꞌ:
―Biche caꞌ,
laatu nanna tu galán rusaana dxiiña ri para laanu.
26 Ne ma huayuna diaga tu na Pablu cadi dxandí dios ni ruzáꞌ binni.
Ne zacá cabee chu be stale binni,
cadi rarí si sínuque casi idubi Asia.
27 Cadi xhiiña si nu nuu naxoo,
sínuque ne xhiuꞌdu Diana,
purti ma iruti zazaalaꞌdxi laa,
ne ma iruti zusisaca Diana.
Laa nda nga nadxii irá binni Asia ne dede irá binni guidxilayú.
28 Ora bina diaga cabe xi na Demetriu,
bidxiichi cabe ne uluu cabe Viva sti Diana,
bidóꞌ sti ca binni Efeso.
29 Ne biasa irá binni guidxi que biꞌni ca bulla,
unaaze ca hermanu Gayo ne Aristarco,
binni Macedonia ni canazá né Pablu.
Uxubi yu cabe laaca yené cabe laaca ra raca junta stícabe.
30 Ucalaꞌdxi Pablu nichuu lade cabe,
peru qué niná ca hermanu.
31 Ne laca bisenda tidxi caadxi de cani runi mandar Asia laabe cadi chi chuu be.
Bisenda tidxi ca laabe purti xhamigu ca laabe.
32 Zaqué nuu ca binni que,
adxé ni na caadxi,
adxé ni na xcaadxi.
Raqué nuu ca dede ma birenda caꞌ,
purti casi irá ca qué ganna ca xi pur bidxiña ca raqué.
33 Oraque ulee ca judíu Alejandru de lade ca binni que ziulaa ná ca laabe dede yeuzuhuaa ca laabe nezalú ca binni que para iníꞌ be pur laacaꞌ,
para cadi na ca binni que tobi si laaca ne Pablu.
Biꞌni be seña lu ca binni que nigani caꞌ.
34 Peru ora biꞌya ca laca judíu laabe la?
bicaa ca ridxi na caꞌ:
―¡Viva Diana patrona sti ca binni Efeso!
Zacá uyuu ca biaꞌ chupa hora.
35 Oraque biree secretariu de guidxi que bicueeza laacabe,
ne na:
―Binni Efeso caꞌ,
irá xixé binni nanna dxichi binni rarí nga rapa bidóꞌ Diana ni biaba de ibáꞌ,
ne xhiuꞌduꞌ.
36 Iruti qué zanda iníꞌ cadi dxandí ni.
Nga runi laguuya chaahui xii nga cayuni tu.
37 Ca hombre bedané tu ri la?
qué huayuni ca gasti xhiuꞌdu diosa Diana ne qué huaguu dí ca Diana.
38 Pa racalaꞌdxi Demetriu ne cani runi né laa dxiiñaꞌ,
cuꞌ xqueja tuuxa la?
para nga runi nuu justicia,
nuu juez.
Raqué chi nduu saa ca xqueja caꞌ.
39 Peru pa nuu ru ni racalaꞌdxi tu la?
lausaana ni para ora aca junta sti idubi guidxi.
40 Purti naxoo huiini nuu ni uca yanadxí riꞌ.
Ma na cabe cayasa nu,
cucáꞌ lú nu gobiernu.
Ne xi gabi nu óraque yaꞌ.
41 Ngue si uníꞌ be,
bicheeche be ca binni que.