Ra nuu Pablu Corinto
18
Biree Pablu Atenas uyé Corinto.
2 Ne raqué beda idxaaga be ti judíu de Ponto lá Aquila.
Nacubi beda biꞌ ca raqué,
laa ne Priscila xheelaꞌ.
Biree ca Italia purti uladxi Claudio irá judíu ni nabeza Roma.
Para uyé be ralidxi caꞌ.
3 Biaana né be laacaꞌ,
bini né be laaca dxiiñaꞌ,
purti tobi si dxiiña runi cabe,
ruzáꞌ cabe carpa.
4 Ne irá dxi enda riziilaꞌdxi yegüí be diidxa ndaani yuꞌduꞌ,
ne bicuudxi be caadxi judíu ne caadxi ni cadi judíu.
5 Ne ora bedandá Silas ne Timoteu de Macedonia,
jma pe qué ñaana dxí Pablu de ñuiꞌ stiidxa Dios.
Idubi dxi cayabi be ca judíu Jesús nga Cristu ni cabeza ca que.
6 Peru qué niná ca nucaa diaga ca laabe ne uluu dí ca laabe.
Oraque udxibi be xhaba be nezalú caꞌ,
ne rabi be laacaꞌ:
―Laatu napa tu donda pa initilú tu.
Cadi naa diaꞌ napa donda.
Ne dede yanadxí ma chaa ra nuu cani cadi judíu.
7 Biree be raqué uyé be ralidxi tobi hombre rusisaca Dios,
lá Justu.
Naca lidxi cueꞌ yuꞌdu que.
8 Bini cre ti hombre lá Crispu,
naca xaíque sti yuꞌdu que,
laa ne ca binni lidxi.
Uyuu ru stale binni Corinto bini cre ra bina diaga ni cayuíꞌ Pablu que,
ne uyuu nisa caꞌ.
9 Ti gueela uníꞌ né Señor laabe casi ñaca lu bacaandaꞌ,
na rabi laabe:
―Cadi idxibi luꞌ,
ne cadi guiaana dxi lu de güi lu stiidxaꞌ.
10 Purti napa stale binni ndaani guidxi riꞌ,
ne cayapa lii iruti zagaꞌna lii para guniná lii.
11 Para biaana be raqué tubiza aronda byuíꞌ be stiidxa Dios.
12 Peru dxi naca Galión gobernador de Acaya uca ca judíu tobi si ne biasa ca luguiá Pablu yené ca laa ra justicia.
13 Na caꞌ:
―Cusiidi hombre ri binni usisaca Dios,
peru cadi casi na ley stidu.
14 Ma ziníꞌ Pablu peru óraque na Galión rabi ca judíu:
―Pa ñaca bichee be,
biꞌni be xiixa naroꞌba la?
ñapa xidé nucaa diaga laatu,
judíu caꞌ.
15 Peru pa bedané tu laabe purti si qué riulaꞌdxi tu ni cusiidi be ne pur ca xaíque stitu ne pur ley stitu la?
racá laatu laguuya xi guni né tu ni.
Qué ziuaa diaꞌ lú ni.
16 Ne ulee laacabe de raqué.
17 Peru óraque ucuaa cani cadi judíu Sóstenes,
xaíque sti yuꞌdu que,
udiñe ca nezalú justicia.
Peru qué nulabi Galión laacaꞌ.
Ra bigueta Pablu Antioquía
18 Biaana ru Pablu raqué xadxí.
Oraque ru gudxi be ca hermanu ma che be,
para biree né be Priscila ne Aquila uyé cabe Cencrea.
Ne raqué bigá ique be piꞌruꞌ,
ra biluxe udixe be ti promesa.
De raqué ucuaa cabe barcu ze cabe Siria.
19 Ne biuu cabe Efeso.
Raqué biaana Aquila ne Priscila,
peru Pablu na che Jerusalén.
Laga nuu ru be raqué uyé be ra yuꞌdu sti ca judíu,
yegüí né be laaca diidxaꞌ.
20 Ucuá ca lú be ñaana né ru be laaca xcaadxi peru qué niná be.
21 Rabi be laacaꞌ:
―Ma chaa Jerusalén purti ma zeda yuba saa raqué ne naquiiñe chi utiide saa que raqué.
Peru zabigueta ruaꞌ ra nuu tu pa na Dios.
Para ucuaa be ti barcu biree be ze be.
22 Yendá be Cesarea.
Raqué biete be,
uyé be Jerusalén,
yeugapa diuxi be ca xpinni Cristu.
De raqué uyé be Antioquía.
23 Biaana be raqué xadxí huiiniꞌ.
Oraque ru biree be uzá be irá ca guidxi sti Galacia ne Frigia.
Yeuzuhuaa chaahui be ca xpinni Cristu.
Ra nuu Apolo Efeso
24 Ca dxi que yendá ti judíu de Alejandría ndaani guidxi Efeso,
lá Apolo.
Galán riníꞌ be ne nabé riene be ni cá lu Xquiꞌchi Dios.
25 Ma biziidi be stiidxa Señor ne cayuíꞌ be ni ne gana.
Jneza rusiidi be biaꞌ nanna be de Jesús.
Peru ni nanna si be nga ni bisiidi Juan Bautista ra uluu nisa binni.
26 Bizulú byuíꞌ be ni ndaani yuꞌdu sin nidxibi be,
peru ora bina diaga Priscila ne Aquila ximodo cayuíꞌ be ni,
guridxi ca laabe para bisiene chaahui ca laabe stiidxa Dios.
27 Ne ora bizeete be che be Acaya la?
ucané ca hermanu que laabe.
Bicaa ca ti guiꞌchi lú ca hermanu de raqué uchagalú ca laabe.
Ne ora yendá be nabé ucané be cani ma bini cre raqué,
cani ma uca Dios nachaꞌhui ne laa.
28 Ne laca biseegu be ruaa ca judíu nezalú irá binni.
Biluíꞌ be laaca ra cá lu Xquiꞌchi Dios Jesús nga Cristu ni cabeza caꞌ.