Ra nuu cabe Tesalónica
17
Biree cabe raqué udiꞌdi cabe Anfípolis ne Apolonia dede yendá cabe Tesalónica.
Raqué nuu ti yuꞌdu sti ca judíu.
2 Biuu Pablu ndaani yuꞌdu que casi runi irá ra cheꞌ.
Ne chonna sábadu bisiidi be ca binni que ne bisiene be laaca xi na Xquiꞌchi Dios.
3 Biluíꞌ be laaca ra cá ni,
napa Cristu xidé gatiꞌ ne ibani,
ne rabi be laacaꞌ:
―Jesús ni cayué stiidxa ca la?
nga nga Cristu ca.
4 Bini cre caadxi de ca binni que ne yenanda ca Pablu ne Silas.
Ne laca bini cre stale de cani cadi judíu ni ma zinanda religión sti ca judíu,
ne stale gunaa ni risaca ndaani guidxi que.
5 Peru bidxiichi ca judíu ni qué ñuni cre,
ne bitopa ca caadxi hombre qué iquiiñe canazá si,
ne biꞌni ca binni.
Bini yaya ca ndaani guidxi que,
ne yechuu ca ralidxi Jasón.
Zindee ca Pablu ne Silas para nudii ca ca binni que.
6 Peru biiya si ca qué nidxela ca laacabe raqué la?
ucuaa ca Jasón ne xcaadxi hermanu,
yené ca ra nuu justicia ne bicaa ca ridxi na caꞌ:
―Canazá chupa hombre canautiixhi irá binni guidxilayú ne ma bedandá ca raríꞌ.
7 Ne uluu Jasón laacabe ralidxi.
Cuchee né cabe ca ley ni gudixhe César ni runi mandar ca guidxi romanu,
purti na cabe nuu sti rey lá Jesús.
8 Ora gunna ca binni que ne ca justicia xi na cabe que la?
bizulú nda ca biꞌni ca ridxi.
9 Ne unaba ca usaana Jasón ne ca xcaadxi hermanu que vueltu casi ti seña zaree,
Pablu ne Silas de ndaani guidxi que.
Bisaana cabe ni,
ne óraque ru bindaa ca laacabe.
Ra nuu cabe Berea
10 Huaxhinni queca ulee ca hermanu que Pablu ne Silas,
biseenda ca laacabe Berea.
Casi yendá cabe Berea biuu cabe ndaani yuꞌdu sti ca judíu.
11 Jma nachaꞌhui ca judíu que,
que cani nuu Tesalónica,
purti bicaa diaga ca stiidxa Dios ne stale gana ne irá dxi ma cuyubi ca lu Xquiꞌchi Dios pa jneza ni caziidi ca que.
12 Nga runi stale de laaca bini cre,
ne laca bini cre stale ni cadi judíu cásica gunaa ni risaca ndaani guidxi que zaqueca hombre.
13 Peru ora gunna ca judíu de Tesalónica laca ma cayuíꞌ Pablu stiidxa Dios Berea la?
yechite ca ique ca binni raqué para uyé ca luguiá Pablu.
14 Peru oraqueca biseenda ca hermanu que tu chi saana laabe uriá nisadóꞌ.
Silas ne Timoteu biaana ru ca raqué.
15 Cani ziné laabe que,
dede Atenas yesaana ca laabe,
ne gudxi be laaca gabi ca Silas ne Timoteu guiuba che ra nuu be.
Oraque ru bigueta caꞌ.
Ra nuu Pablu Atenas
16 Laga nuu be Atenas cabeza be laaca cadi nuu dxí ladxidóꞌ be purti cayuuya be dxá bidóꞌ ndaani guidxi que.
17 Ngue runi uyé be ndaani yuꞌdu yegüí né be ca judíu ne ca xcaadxi binni ni rusisaca Dios diidxaꞌ.
Ne irá dxi uyé be luguiaa,
yegüí né be tutiica idxaaga be diidxaꞌ.
18 Raqué bidxaaga be caadxi xpinni Epicuro ne caadxi ni rinanda ni rusiidi ca estoico.
Caadxi de laaca na:
―Xi na ni caníꞌ huaahua ca pue.
Ne xcaadxi na:
―Ruluíꞌ canaucheeche be stiidxa tuuxa dios ni qué runibiáꞌ nu.
Caníꞌ ca zaqué purti canayuíꞌ be stiidxa Jesús ne enda ribani de lade gueꞌtuꞌ.
19 Ucuaa ca laabe yené ca laabe ti lugar lá Areópago ra rapa ca junta sticaꞌ.
Ne na ca rabi ca laabe:
―Zanda gaꞌbu laadu xi nacubi ri cusiidi lu la?
20 Purti qué huayuu dxi guna diaga du ni cayuíꞌ lu riꞌ.
Yanna racalaꞌdxi du ganna du xi na ni.
21 Irá binni ni nuu guidxi que,
cásica cani gule raqué zaqueca ni nabeza si,
nisi ruyubi ca güi ca xiixa nacubi o ucaa diaga caꞌ.
22 Oraque bizuhuaa Pablu galahui de laacabe,
na:
―Binni Atenas caꞌ,
ruuya nabé runi cre tu ca bidóꞌ stitu.
23 Purti ora canazaya canayuuya ra nuu cani la?
laca biiya ti altar cá caadxi diidxa lú:
“Para dios ni qué runibiáꞌ du.”
Ne dios ni rusisaca tu sin gunibiáꞌ tu ca,
nga pe nga canayué stiidxaꞌ.
24 Laabe bizáꞌ be guidxilayú ne irá ni nuu ndaani ni,
ne qué ribeza be ndaani yoo rucuí binni purti laabe nga xpixuaana ibáꞌ ne guidxilayú.
25 Cadi naquiiñe udíꞌ nu laabe xiixa,
purti gasti cayaadxa laabe.
Laga laabe rudii be laanu enda nabani ne irá ni caquiꞌñe nu.
26 De ti binni si ulee be binni de irá raza ni nuu ndaani guidxilayú,
ne gudixhe be pabiáꞌ indaa cada raza ne paraa cueza caꞌ.
27 Gudixhe be irá binni ndaani guidxilayú para uyubi laabe casi ñaca zixubi ná ca dede idxela ca laabe,
purti cadi zitu nuu be,
sínuque gaxha doꞌ nuu be de cada tobi de laanu.
28 Laabe bizáꞌ be laanu ne pur laabe nabani nu ne rizá nu.
Casi na tobi de ca poeta stitu:
“Za nu de Dios.”
29 Ne pa za nu de laabe la?
cadi zácaxa nu de oro laabe o de plata o de guie o intiica ni ruzáꞌ binni modo na xquenda biaaniꞌ.
30 Chiqué bichee binni purti qué ñene,
ne biꞌni Dios sica qué ñuuyaꞌ.
Peru ma cayabi be irá binni de irá ladu inaba perdon laabe,
31 purti ma gudixhe be ti dxi cuidxi be cuenta laacaꞌ.
Ma ulí be tobi hombre guni ni,
ne zuni ni jneza.
Bisihuinni be ulí be laa ra undisa be laa de lade gueꞌtuꞌ.
32 Ora bina diaga cabe bizeete Pablu enda ribani de lade gueꞌtu la?
caadxi de laacabe bini burla,
peru xcaadxi na:
―Sti tiru nda ucáꞌ diaga du lii de ni cayuíꞌ lu riꞌ.