Ziné Pablu Timoteu ne Silas
16
Ra canazá cabe que yendá cabe Derbe.
Biree cabe raqué uyé cabe Listra.
Raqué biiya cabe ti xpinni Cristu lá Timoteu.
Jñaa be la?
judíu laa ne ma runi cre Cristu,
peru bixhoze be cadi judíu.
2 Irá ca hermanu de Listra ne de Iconio ruzeete pabiáꞌ nachaꞌhui be.
3 Na Pablu chiné laabe,
para ucuaa laabe guluu seña sti Dios laabe ti qué gapa ca judíu ni nuu neza que xi iníꞌ,
purti nanna ca cadi judíu bixhoze be.
4 Oraque biree cabe ze cabe.
Ne irá guidxi ra udiꞌdi cabe byuíꞌ né cabe ca binni que ni gudixhe ca apóstol ne ca hermanu gola ni nuu Jerusalén guni ca xpinni Cristu.
5 Zacá jma bizuhuaa chaahui ca xpinni Cristu,
ne ze dxi jma zidale caꞌ.
Ra gudxi Dios Pablu che Macedonia
6 Uzá cabe Frigia ne Galacia,
ne udiꞌdi cabe Asia peru qué niná Espíritu Santu ñuiꞌ cabe stiidxa Dios raqué.
7 Ora yendá cabe ra ruzulú Misia,
ucalaꞌdxi cabe ñe cabe Bitinia,
peru laca qué niná Espíritu sti Jesús.
8 Para udiꞌdi cabe uriá Misia,
uyé cabe Troas.
9 Ne huaxhinni que casi ñaca lu bacaanda biiya Pablu zuhuaa tobi hombre de Macedonia canaba laa che raqué chi acané laacaꞌ.
10 (Ne naa nuaa raqué.)
Ne casi biꞌya be ni biluíꞌ Dios laabe que,
gudixhe chaahui du stidu para chuu du Macedonia purti rabi du cabidxi Dios laadu chuu du raqué,
chi güi né du ca binni que stiidxa Cristu.
Ra nuu cabe Filipos
11 Para biréꞌ du de Troas.
Ucuaa du ti barcu uyuu du derechu isla Samotracia.
Sti dxi que yendá du Neápolis.
12 Ne biete du raqué para uyuu du Filipos,
ti guidxi ni jma dxiꞌba ca xcaadxi guidxi sti Macedonia ni nuu neza que.
Ca romanu naaze guidxi que.
Biaana du raqué xadxí huiiniꞌ.
13 Ti dxi enda riziilaꞌdxi biréꞌ du de ndaani guidxi que,
uyuu du ra guiigu ra rie ca judíu riníꞌ né Dios.
Ma nuu caadxi gunaa raqué yendá du,
para byuí né du laaca stiidxa Jesús.
14 Lade cabe nuu ti gunaa de Tiatira lá Lidia rutoo lari chaꞌhui color moradu.
Cadi judíu laabe peru maca rusisaca be Dios,
ne dxi que bicuudxi Dios ladxidóꞌ be para gucuaa be stiidxa Pablu.
15 Ne uyuu nisa be,
laabe ne irá ca binni lidxi be.
Oraque rabi be laadu:
―Pa na tu dxandí ma bine cre Señor la?
latáꞌ guiaana tu ralidxeꞌ.
Ne tantu cá be lu du la?
biaana du.
Ra yeguyoo cabe
16 Ti dxi biréꞌ du ziní né du Dios,
beda nanda ti badu dxaapa laadu,
nuu né binidxabaꞌ.
Nabé runi ganar para xpixuaanaꞌ,
purti runi sertá ni inaba diidxa binni laa.
17 Uzá nanda be laadu,
ziyuni be ridxi,
na be:
―Xhiiña Dios ni nandxóꞌ cayuni ca hombre riꞌ,
ne zeda güi né ca laatu modo ilá tu,
rabi be ca binni que.
18 Zaqué uzá nanda be laadu stale dxi,
peru bixhacalaꞌdxi si Pablu de canananda be laa la?
bidxigueta lú ne na rabi binidxaba que:
―Cayabe lii usaana lu badu dxaapa ca,
casi ñabi Jesucristu ni lii.
Oraqueca bisaana binidxaba que laabe.
19 Peru ora biꞌya ca xpixuaana be ma qué zanda guni ganar né ru ca laabe la?
unaaze ca Pablu ne Silas yené ca ra nuu justicia.
20 Ne ora yendá ca raqué,
na caꞌ:
―Canayuni yaya ca judíu ri ndaani xquidxi nu.
21 Cusiidi cabe costumbre ni cadi jneza icaa nu chi nanda nu purti romanu laanu.
22 Ne óraque biasa irá binni que luguiá Pablu ne Silas.
Ne ucuaa ca justicia que laacabe ulee ca lari ladi cabe ne bini mandar ca chuꞌ cabe palu.
23 Biluxe si guluu ca palu laacabe biseguyoo ca laacabe ne gudxi ca ni rapa ra lidxi guiiba que gapa chaahui laacabe.
24 Para ucuaa ngue laacabe uluu laacabe dede últimu cuartu sti lidxi guiiba que.
Ne uluu ñee cabe lade chupa yaga rabi cabe cepu.
25 Biaꞌ galaa gueela caníꞌ né cabe Dios ne cayuunda né cabe laa.
Cucaa diaga ca xcaadxi presu que laacabe.
26 Mala uca ti xu roꞌ dede biniibi dxacha raqué ne bixele irá ca puerta sti lidxi guiiba que.
Ne bindaa cadena liibi irá cabe.
27 Ora bibani ni rapa ra lidxi guiiba que,
biiya ma zuxele irá puerta stini,
ulee espada ucalaꞌdxi ñuuti laca laa.
Zácaxa ma bixooñe irá presu.
28 Peru óraque bicaa Pablu ti ridxi,
na rabi laabe:
―Cadi guniná lu laca lii,
irá du nuu du raríꞌ.
29 Para unaba be ti biaani ne biuu uxooñe be ndaani lidxi guiiba que.
Dede cayaca diti be gudiche xibi be xa ñee Pablu ne Silas.
30 Ne ulee be laaca de raqué rabi be laacaꞌ:
―Biche caꞌ,
xi gune para ilaꞌyaꞌ.
31 Para na ca rabi ca laabe:
―Bini cre Señor Jesucristu ne zalá luꞌ,
lii ne ca binni liꞌdxuꞌ.
32 Ne byuíꞌ né ca laabe stiidxa Señor,
laabe ne irá ni nabeza ralidxi be.
33 Lu gueela queca ucuaa be laacaꞌ,
udiibi be ra ucaná laacaꞌ,
ne óraque uyuu nisa be,
laabe ne ca binni lidxi be.
34 Oraque yené be laaca ralidxi be bidii be ni gudó xhi caꞌ.
Nabé bieche cabe,
laabe ne idubi xfamilia be,
purti ma bini cre cabe Dios.
35 Ora birá gueela biseenda justicia gendarme,
chi tidxi ni rapa lidxi guiiba que cuee Pablu ne Silas.
36 Oraque na hombre que rabi Pablu:
―Bisenda tidxi ca justicia cuee laatu.
Yanna lairee.
Laché,
chiné Dios laatu.
37 Peru na Pablu:
―Ucuaa cabe laadu,
udiñe cabe laadu nezalú irá binni sin ñuuya chaahui cabe pa dxandí cuchéꞌ du,
ne uluu cabe laadu ndaani lidxi guiibaꞌ,
naca nda du romanu.
Ne yanna ma racalaꞌdxi cabe cuee cabe laadu nagaꞌchi la?
Qué zaréꞌ di du dede qué gueeda cabe,
laa pe cabe,
gueda ndee cabe laadu.
38 Para bigueta ca gendarme que,
yetidxi ca ca justicia xi na cabe.
Nabé bidxibi ca ora gunna ca romanu laacabe.
39 Para uyé ca ra nuu cabe yenaba ca perdón laacabe.
Oraque ulee ca laacabe ne na ca guni cabe favor iree cabe de guidxi que.
40 Ora biree cabe de lidxi guiiba que uyé cabe ralidxi Lidia guridxi cabe ca hermanu ne gudxi cabe laaca cadi cui sa ca atrá.
Oraque ru biree cabe ze cabe.