Ra uladxi rey Herodes ca xpinni Cristu
12
Ca dxi que bizulú rey Herodes bininá caadxi de ca xpinni Cristu.
2 Gucuaa be Jacobo biꞌchi Juan,
biiti be laa ne espada.
3 Ne ora biꞌya be uyuulaꞌdxi ca judíu ni biꞌni be que la?
laca unaaze be Pedru.
Ne uca ni dxi ro cabe pan sin levadura que.
4 Gunaaze si be laa biseguyoo be laa ne gudixhe be tapa tanda soldadu gapa laa,
de tapa tapa.
Cá ique be cuee be laa nezalú irá binni guidxi que,
tidi si pascua.
5 Zacá nga cayapa cabe Pedru ndaani lidxi guiibaꞌ.
Peru ca xpinni Cristu cadi cayaana dxí ca de iníꞌ né ca Dios pur laabe.
Ra bilá Dios Pedru ndaani lidxi guiibaꞌ
6 Huaxhinni ma para irá gueela cuee Herodes laabe que,
nexhe be nisiaasi be lade chupa soldadu,
liibi be cadena.
Ne laca zuhuaa soldadu cayapa ra puerta lidxi guiiba que.
7 Mala bizuhuaa ti ángel sti Señor ndaani lidxi guiiba que,
ne bizaani ti biaani raqué.
Ne gudaꞌna ángel que cueꞌ tiꞌxhi be bicuaani laabe,
na:
―Biasa guiuba.
―Bixhii dxiichi ndaanu ne bicaa xquela guidi lu ñee luꞌ.
Biluxe si be,
na rabi laabe:
―Birenda xhamarra luꞌ,
dananda naa.
9 Biree be zinanda be ángel que,
peru qué ganna be pa dxandí ni o pa caníꞌ xcaanda si be ngue.
10 Udiꞌdi cabe chupa lugar ra cayapa soldadu ne ora yendá cabe ra puerta de guiibaꞌ ma para iree cabe lu calle,
bixele stubi puerta que para biree cabe.
Udiꞌdi cabe ti calle.
Raqué bixele ángel que de laabe.
11 Oraque ru sica ni bibani uca be,
na be:
―Yanna ma nanna dxandí biseenda Señor ángel stiꞌ beda ulá naa lu ná Herodes ne de irá ni ucalaꞌdxi ca judíu ñuni naa.
12 Ne ora biꞌya be ngue ni la?
uyé be ralidxi María,
jñaa Juan ni rabi cabe Marcu.
Raqué nuu stale binni caníꞌ né Dios.
13 Ora yendá be bixhidxi ná be ra zaguán.
Bina diaga ti badu dxaapa lá Rode para biree ziguuya tu cuxhidxi náꞌ.
14 Ne ora binibiáꞌ stidxi be,
de tantu cayeche qué nuxheleꞌ,
laga bigueta uxooñeꞌ.
Yetidxi ca binni que zuhuaa be ra puertaꞌ.
15 Peru na ca binni que rabi laa:
―Cayaca ique lu nga.
―Coꞌ,
na,
―dxandí ni.
Oraque na caꞌ:
―Seguru xpisi be nga.
16 Peru laabe cadi cayaana dxí be de cuxhidxi ná be.
Ne ora bixhele ca biiya ca laabe ni,
bidxibi caꞌ.
17 Peru biꞌni be seña lu ca igani caꞌ.
Ne byuíꞌ né be laaca modo ulee Señor laabe de ndaani lidxi guiibaꞌ,
ne rabi be laacaꞌ:
―Lagüíꞌ né ni Jacobo ne ca xcaadxi hermanu.
Ne óraque biree be ze be sti ladu.
18 Ora birá gueela hueru hueru uyuu ca soldadu,
qué ganna ca xi uca Pedru.
19 Biyubi Herodes laabe irá ladu.
Biiya si qué nidxela laabe unaba diidxa ca soldadu que,
ne ora na ca qué ganna ca la?
biseenda guuti be laacaꞌ.
Ne biree be Judea,
yendeza be Cesarea.
Ra guti Herodes
20 Nuu dxiichi né Herodes ca binni Tiro ne Sidón.
Peru laaca uyuu ca tobi si para idxiña ca ra nuu be.
Ne uníꞌ né ca Blasto,
ti xpinni be,
cuee xiana laabe ti chuꞌ né be laaca tobi si,
purti de xquidxi be reeda endaró sticaꞌ.
21 Para gudixhe be ti dxi guꞌya be laacaꞌ.
Ne dxi gunda dxi que bizuchaahui be,
gurí be ra ribí be para guni mandar be ne uluu be ti discursu.
22 Oraque bicaa ca binni que ridxi bidxiiba ca laabe,
na caꞌ:
―Dios nga ni caníꞌ ca,
cadi binni.
23 Nin caꞌru iluxe iníꞌ be,
bini huará ti ángel laabe purti qué nusisaca be Dios.
Biguidxi be bicutiꞌ dede ra guti be.
24 Peru stiidxa Dios jma rusi careeche,
ne cayuíꞌ cabe ni irá ladu.
25 Biluxe si xhiiña Bernabé ne Saulo Jerusalén bigueta caꞌ ne yené ca Juan ni rabi cabe Marcu que.