Udinde né ca xpinni Cristu Pedru
11
Gunna ca apóstol ne ca hermanu ni nuu Judea laca ma bini cre cani cadi judíu stiidxa Dios.
2 Ne ora bigueta Pedru Jerusalén bidxiña ca judíu ni ma runi cre Cristu ra nuu be ne udinde né ca laabe,
3 na caꞌ:
―Xiñee yechuu lu ralidxi cani cadi judíu ne gudó neu laacaꞌ.
4 Oraque bizulú be gudxi be laaca xi irá guca dede ra bizulú ni,
na be:
5 ―Nuaa ndaani guidxi Jope,
canié nia Dios.
Mala casi ñaca lu bacaanda biiya zeda yete xiixa de ibáꞌ casi ti lari gueela roꞌ liibi idapa punta.
Biaana dxí ni ra nuaaꞌ.
6 Ora biiya dxie ni,
biiya dxá mani ndaani ni,
mani rizá layú,
mani duxhuꞌ,
beendaꞌ,
ne mani ripapa.
7 Ne bina diaꞌga na tuuxa rabi naa:
“Biasa Pedru.
Biiti,
gudó.”
8 Oraque rabeꞌ:
“Coꞌ,
Señor,
purti qué huayuu dxi gahua ni na ley cadi idóꞌ do.”
9 Bigueta na ni caníꞌ de ibáꞌ que rabi naa:
“Ni cayabi Dios lii go lo la?
cadi nouꞌ qué zanda go loꞌ.”
10 Chonna tiru uca ni zacá para bigueta ni ibáꞌ.
11 Ne óraque pe biuu chonna hombre,
zeda yubi naa.
Biseenda tuuxa de Cesarea laacaꞌ.
12 Ne gudxi Espíritu Santu naa chiniá laacabe sin iníꞌ ique pa cucheeꞌ.
Ne yené xhi xhoopa hermanu ri naa.
Uyuu du ralidxi hombre bisenda caa naa que.
13 Ne ora biuꞌ du raqué byuíꞌ né be laadu xi bizaaca be.
Nuu be ndaani yoo,
mala biiya be zuhuaa ti ángel lú be,
na rabi laabe:
“Biseenda tu che Jope chi caa Simón ni rabi cabe Pedru.
14 Laa zabi lii ximodo ilá luꞌ,
lii ne ca binni liꞌdxuꞌ.”
15 Ne ora bizuluáꞌ byue nia laacabe diidxa biete Espíritu Santu biuu ndaani ladxidóꞌ cabe casi biuu ndaani ladxidóꞌ no chiqué.
16 Ne óraque bietenaladxe ni uníꞌ Señor ra na:
“Uluu nisa Juan binni peru ne nisa si.
Peru laatu zacaa tu Espíritu Santu casi ñaca ñuu nisa tu pur Espíritu que.”
17 Ne pa ma bidii Dios laacabe ni bidii laanu ra bini cre nu Señor Jesucristu la?
tuu ndi naa para ucueeza ni cayuni Dios.
18 Ora bina diaga ca xi na Pedru la?
nin ru sti diidxa qué niníꞌ caꞌ.
Ne bisisaca ca Dios,
na caꞌ:
―Yanna ma nanna du laca ma biluíꞌ Dios cani cadi judíu ximodo inaba ca perdón ti gapa ca enda nabani ni qué zaluxe.
Ra yendá stiidxa Cristu Antioquía
19 Dxi biiti cabe Esteban,
laca bizulú cabe uzá nanda cabe ca xcaadxi xpinni Cristu,
ne ca dxi que bireeche caꞌ.
Nuu ni yendá dede Fenicia,
ne Chipre ne Antioquía.
Ne byuíꞌ ca stiidxa Jesús raqué,
byuíꞌ né ca ni ca judíu si.
20 Peru uyuu caadxi binni Chipre ne de Cirene lade cabe.
Ne laaca ora yendá ca Antioquía byuíꞌ né ca cani cadi judíu stiidxa Señor Jesús.
21 Ucané Señor laacabe ne stale tu bini cre ne yenanda Señor.
22 Ne ora gunna ca xpinni Cristu ni nuu Jerusalén ni la?
biseenda ca Bernabé Antioquía.
23 Nabé bieche Bernabé ora yendá ne biiya pabiáꞌ uluu Dios ndaaya laacabe.
Ne bilidxe laacabe sa nanda cabe Señor de idubi ladixdóꞌ cabe sin iree chu cabe.
24 Nachaꞌhui Bernabé ne dxá ladxidóꞌ de Espíritu Santu.
Nabé napa be fe,
ne pur laabe bini cre stale binni Señor.
25 De raqué biree be uyé be Tarso yeyubi be Saulo.
26 Ne ora bidxela be laa yené be laa Antioquía.
Biaana né cabe ca xpinni Cristu raqué tubiza ne bisiidi cabe stale binni.
Ne raqué nga guta lá ca xpinni Cristu cristianu.
27 Ca dxi que biree caadxi profeta Jerusalén,
guyé Antioquía.
28 Tobi de laacabe lá Agabo,
bizuhuaa lade ca hermanu de raqué ne uníꞌ ni gudxi Espíritu Santu laa,
na chi aca ti gubiña idubi naca guidxilayú.
Ne uca ni uníꞌ be que dxi naca Claudio gobernador.
29 Oraque uníꞌ stiidxa ca xpinni Cristu de raqué uchaaga ca biaꞌ ganda udii cada tobi para acané ca ca hermanu ni nuu Judea.
30 Para bitopa cabe ni biseenda né cabe ni Bernabé ne Saulo ra nuu ca xaíque sti ca xpinni Cristu de Judea para quiꞌzi ca lu ca xcaadxi hermanu.