Pedru ne Corneliu
10
Guyuu ti hombre ndaani guidxi Cesarea lá Corneliu,
naca capitán sti Batallón Italiano.
2 Cadi judíu laabe peru ridxibi be Dios ne rusisaca be laa,
laabe ne irá binni lidxi be.
Nabé racané be ca pobre lade ca judíu ne qué riaana dxí be de iníꞌ né be Dios.
3 Ti dxi biaꞌ las tres casi ñaca lu bacaanda biiya dxichi be biuu ti ángel sti Dios ra nuu be ne rabi laabe:
―¡Corneliu!
4 Cadxibi be dede cayaca diti be,
biiya dxí be ángel que,
ne na be:
―Xi laa,
Señor.
Para na rabi laabe:
―Ma bigaanda stiidxa lu lu Dios ne ruuya pabiáꞌ racanéu ca pobre.
5 Yanna biseenda tuuxa che Jope,
chi caa tobi hombre lá Simón ne laca rabi cabe laa Pedru.
6 Nuu be ralidxi ti curtidor lá Simón,
naca lidxi uriá nisadóꞌ.
Laabe zabi be lii xi guꞌnuꞌ.
7 Biree si ángel que zeꞌ,
guridxi be chupa jmozo be ne ti soldadu ni runi xhiiña be,
ne laa laca ridxibi Dios.
8 Byuíꞌ né be laaca xi guca be.
Oraque ru biseenda be laaca Jope.
9 Sti dxi que ma zidxiña cani biseenda Corneliu que Jope.
Ma biaꞌ galaa dxi ngue,
ne óraque pe udxiꞌba Pedru ique yoo ziníꞌ né Dios.
10 Ma candaana be ne ucalaꞌdxi be ño be peru caꞌru chuꞌ endaró.
Laga cabeza be cayaca ni,
casi ñaca lu bacaanda
11 biiya be zuxele ibáꞌ ne zeda yete casi ti lari gueela liibi idapa punta.
12 Ne nuu irá clase mani ndaani ni,
mani rizá,
mani rixubi ndaaniꞌ ne mani huiini ripapa.
13 Ne bina diaga be na tuuxa:
―Pedru,
biasa,
biiti ne gudó.
14 Oraque na be:
―Qué ziuu dxi,
Señor.
Qué huayuu dxi gahua ni na ley stidu cadi idóꞌ do.
15 Bigueta na ni caníꞌ que rabi laabe:
―Ni cayabi Dios lii go lo la?
cadi nouꞌ qué zanda go loꞌ.
16 Chonna tiru guca ni.
Oraque ru bigueta lari que ibáꞌ.
17 Laga candaa ique né Pedru xi riníꞌ ni biꞌya que la?
zeda naba diidxa ca hombre biseenda Corneliu que paraa lidxi Simón,
dede bedandá ca ra puerta yoo que,
18 ne unaba diidxa ca pa raqué nuu tobi hombre lá Simón,
ni rabi cabe Pedru.
19 Candaa ique né ru Pedru ni biꞌya que,
na Espíritu Santu rabi laa:
―Zeda yubi chonna hombre lii.
20 Yanna biasa biete.
Ne yené laacabe,
sin iníꞌ iꞌcu pa cuchee luꞌ,
purti naa biseenda laacabe.
21 Oraque biete be bidxiña be ra nuu ca hombre biseenda Corneliu que,
ne rabi be laacaꞌ:
―Nanna canayubi tu naa.
Rarí nuaaꞌ,
xi guni tu naa.
22 Para na ca rabi ca laabe:
―Biseenda Capitán Corneliu laadu purti gudxi ti ángel laabe usenda caa be lii para gaꞌbu laabe xi guni be.
Ridxibi be Dios ne runi be jneza,
ne irá judíu nadxii laabe.
23 Oraque gudxi be laaca guiuu ca ndaani yoo,
ne biaana ca raqué huaxhinni que.
Sti dxi que biree né be laacaꞌ,
ze cabe,
ne yené caadxi hermanu de Jope laacabe.
24 De lu sti dxi que yendá cabe Cesarea.
Ma cabeza Corneliu laacabe.
Guridxi ca lisaa ne ca xhamigu cabeza né laacabe.
25 Ora bidxiña Pedru biree Corneliu bichagalú laabe ne bizuxibi xa ñee be.
Ucalaꞌdxi nusisaca laabe.
26 Peru óraque undisa be laa,
rabi be laa:
―Biasa,
purti naa laca hombre casi lii naa.
―Laatu nanna tu judíu naa ne cá lu ley stidu cadi idxaaga du cani cadi judíu ne cadi chuꞌ du ralidxi caꞌ.
Peru ma biluíꞌ Dios naa zanda idxaaga tutiisi,
neca cadi judíu laa.
29 Nga runi casi bisenda caa tu naa,
benda caꞌ.
Yanna racaladxe gabi tu naa xi para bisenda caa tu naa.
30 Para na Corneliu:
―Raca tapa gubidxa biaꞌ hora rica canié nia Dios rarí casi runi du irá huadxí.
Mala biiya zuhuaa ti hombre nezaluáꞌ ruzaani xhaba,
31 na rabi naa:
“Corneliu,
ma bigaanda stiidxa lu lu Dios ne ma bietenalaꞌdxi rudii lu guna.
32 Yanna biseenda tuuxa che Jope,
chi caa Simón,
ni rabi cabe Pedru.
Nuu be ralidxi ti curtidor lá Simón naca lidxi uriá nisadóꞌ.
Ora gueeda be zabi be lii xi guꞌnuꞌ.”
33 Ngue runi oraqueca bisenda caa lii,
ne diuxquixe pe lii saca beeduꞌ.
Yanna rarí nuu du irá du nezalú Dios para ucáꞌ diaga du irá ni gudxi lii gaꞌbu laadu.
Ni uníꞌ Pedru ralidxi Corneliu
34 Oraque bizulú Pedru na rabi laacabe:
―Yanna ma nanna biaꞌca risaca irá binni nezalú Dios.
35 Tutiica idxibi laabe ne guni jneza,
runi xiiñi be laa,
gasti naca xi raza laa.
36 Bisenda tidxi Dios cani za de Israel ma zanda chuꞌ né ca laa tobi si pur Jesucristu,
xaíque sti irá xixé.
37 Laatu nanna tu despué de byuíꞌ né Juan binni naquiiñe chuꞌ nisa,
bizulú bireeche stiidxa Jesucristu Galilea,
ne uzá ni idubi naca Judea.
38 Ne laca nanna tu uluu Dios enda nandxóꞌ sti Espíritu Santu ndaani ladxidóꞌ be,
para uzá be ucané be binni ne bisianda be cani caguite binidxaba ique,
purti nuu né Dios laabe.
39 Laadu biduꞌya dxichi du irá ni biꞌni be Judea ne ndaani guidxi Jerusalén.
Ne laabe nga biiti cabe bicaa cabe lu cruz.
40 Peru lu chonna gubidxa undisa Dios laabe de lade gueꞌtuꞌ,
ne biluíꞌ laabe laadu.
41 Cadi irá di binni biiya laabe sínuque cani maca ulí Dios,
ne nga laadu,
purti laadu bidóꞌ né du laabe ne bidéꞌ né du laabe ora ma bibani be de lade gueꞌtuꞌ.
42 Ne biseenda be laadu chi güi né du binni stiidxa be ne gabi du laaca laabe nga ni gudixhe Dios cuidxi cuenta irá binni,
cani nabani ru dxi gaca ni ne cani ma guti.
43 Laca de laabe bizeete ca profeta dede ma xadxí.
Na ca ni guni cre laabe zaca perdonar ni huachee,
pur ni biꞌni be.
Ucuaa cani cadi judíu Espíritu Santu
44 Caníꞌ ru Pedru biete Espíritu Santu biuu ndaani ladxidóꞌ irá ni cucaa diaga laa que.
45 Nabé bidxagayaa ca hermanu judíu ni yené Pedru que ora biꞌya ca laca cacaa cani cadi judíu Espíritu Santu.
46 Gunna ca ma ucuaa cabe Espíritu Santu ora bina diaga ca caníꞌ cabe idioma ni qué niziidi cabe,
ne cusisaca cabe Dios.
47 Oraque na Pedru:
―Xi cucueeza para chuꞌ nisa ca binni riꞌ,
purti ma ucuaa ca Espíritu Santu casi ucuaa nu.
48 Ne gudxi laacabe chuꞌ nisa cabe ti ihuinni ma xpinni Cristu laacabe.
Ne gunaba cabe guiaana né Pedru laacabe xhupa xhonna gubidxa.