Ra bizulú Saulo ne Bernabé chi güi stiidxa Cristu sti guidxi
13
Lade ca xpinni Cristu ni nuu Antioquía uyuu caadxi profeta ne maistru.
Nuu Bernabé ne Simón ni rabi cabe Yaꞌseꞌ,
ne Luciu de Cirene ne Manaén ni biniisi né gobernador Herodes tobi si,
ne Saulo.
2 Ti dxi cayaana cabe sin go cabe,
ne cayuni cabe cultu,
uníꞌ né Espíritu Santu laacabe na:
―Lacuee chu Bernabé ne Saulo para guni ca dxiiña ni gudixhe guni caꞌ.
3 Ne qué ño gá cabe,
uníꞌ né cabe Dios ne gudixhe ná cabe luguiá caꞌ para biseenda cabe laacaꞌ.
Ra nuu cabe Chipre
4 Zacá nga biseenda Espíritu Santu laacabe chi guni cabe dxiiñaꞌ.
Uyé cabe Seleucia.
De raqué uyé cabe ti nisa dede yendá cabe isla Chipre.
5 Ne biuu cabe ndaani ti guidxi lá Salamina.
Raqué bizulú cabe byuíꞌ cabe stiidxa Dios ndaani ca yuꞌdu sti ca judíu.
Laca yené cabe Juan para gacané laacabe.
6 Uzá cabe idubi naca isla que dede yendá cabe Pafos.
Raqué biiya cabe ti magu lá Barjesús.
Ma na profeta sti Dios laa peru cadi dxandí ni.
7 Tobi si laa ne gobernador Sergiu Paulo.
Nabé nuu xpiaani gobernador que,
ne bisenda caa Bernabé ne Saulo purti racalaꞌdxi guna diaga stiidxa Dios.
8 Peru qué niná gá Elimas.
(Nga rabi cabe magu que stiidxa cabe.)
Qué niná purti qué racalaꞌdxi guni cre gobernador que.
9 Oraque biiya dxí Saulo laabe.
Saulo ca ca nga Pablu.
Ne dxá ladxidóꞌ de Espíritu Santu,
10 na rabi laabe:
―Xpinni binidxabaꞌ,
nisi rusiguii lu ne ruyubu uchee luꞌ.
Qué riulaꞌdxi lu gasti ni jneza.
Padxí guiaana dxiu de uchaa lu stiidxa Señor.
11 Yanna ma chi usaba ná Dios lii.
Zacheepa lú luꞌ,
xadxí ziaanu sin guꞌya lu gubidxa.
Ne oraqueca bicheepa lú be ne canazá be idubi raqué canayubi be tu inaaze ná be.
12 Ora biꞌya gobernador ni guca que la?
bini cre ne bidxagayaa de stiidxa Señor ni cusiidi cabe que.
Ra nuu cabe Antioquía de Pisidia
13 Biree Pablu de Pafos,
laa ne cani canazá ne laa que,
uyé ca Perge ti guidxi de Panfilia.
Raqué biree chu Juan de laacabe bigueta Jerusalén.
14 Peru laacabe biree cabe de Perge,
uyé cabe Antioquía de Pisidia,
ne ti dxi enda riziilaꞌdxi biuu cabe ne gurí cabe ndaani yuꞌdu sti ca judíu.
15 Biluxe biuunda si ni bicaa Moisés ne ni bicaa ca profeta,
bisenda tidxi ca xaíque sti yuꞌdu que laacabe pa napa cabe xiixa diidxa gabi cabe ca binni que la?
zanda iníꞌ cabe.
16 Para biasa Pablu,
biꞌni seña lú cabe igani cabe,
ne na:
―Binni xquidxe caꞌ ne irá tu,
cani ridxibi Dios,
laucaa diaga.
17 Dios stinu,
binni Israel caꞌ,
ulí ca bixhoze gola nu ne bitale laacabe dxi canazá cabe xquidxi binni dxi nuu cabe Egipto.
Ulee laacabe de raqué ne enda nandxóꞌ stiꞌ.
18 Ne uzá né laacabe ndaani guiꞌxhi biaꞌ cuarenta añu sin nixhacalaꞌdxi laacabe.
19 Oraque binitilú gadxe guidxi ni nuu Canaán para bidii ni laacabe.
20 Ne gudixhe juez lade cabe.
Bindaa ni biaꞌ tapa gayuaa cincuenta añu dede xhi profeta Samuel.
21 De raqué unaba cabe gapa cabe rey.
Para ulí Dios Saúl xiiñi Cis ni za de Benjamín.
Laa guca rey sti cabe cuarenta añu.
22 Ra undisa Dios Saúl bicuí David.
De laabe nga bizeete Dios ra na:
“Ma biiya runi David,
xiiñi Isaí,
ni riuladxeꞌ ne zuni irá ni gabe laa.”
23 Ne de lade ca xiiñi David beeda Jesús.
Biseenda Dios laabe beda ulá be ca binni Israel casi bidii stiidxa guni.
24 Dxi caꞌru gueeda Jesús,
byuíꞌ né Juan ca binni Israel naquiiñe inaba ca perdón Dios ne chuꞌ nisa caꞌ.
25 Ne dxi mayaca gati Juan na:
“Cadi zácaxa tu naa nga ni cabeza tu que.
Nanda stobi naa,
ne qué risaca diaꞌ nin para cuee xquela guidi ñee.”
26 Bicheꞌ,
xiiñi Abraham caꞌ,
ne irá ni ridxibi Dios lade tu,
para laatu nga ca diidxa ni rabi laanu ximodo ilá nu ca.
27 Ca binni Jerusalén ne ca xaíque stica qué ñunibiáꞌ ca Jesús ne qué ñene ca ni bicaa ca profeta ni ruunda ca irá dxi enda riziilaꞌdxiꞌ.
Peru biꞌni ca ni na ni ra gudixhe ca gati be.
28 Neca qué nidxela ca gasti donda luguiá be peru unaba ca Pilatu useenda guuti laabe.
29 Ne biluxe si biꞌni ca irá ni maca cá gaca be la?
undete ca laabe lu cruz,
bicaachi ca laabe.
30 Peru undisa Dios laabe de lade gueꞌtuꞌ.
31 Ne óraque bidxiña be ra nuu cani yené laabe dxi biree be Galilea uyé be Jerusalén,
bindaa be ra nuu caꞌ.
Yanna laaca nga canayuíꞌ ca ni biiya caꞌ.
32-33 Ne laadu ma zeda tidxi du laatu ma biꞌni Dios ni gudxi ca bixhoze gola nu chiqué chi guni,
ne biꞌni ni para laanu.
Uca ni ra undisa be Jesús casi cá ni lu rairopa Salmo ra na Dios:
“Lii nga Xiiñeꞌ.
Dede yanadxí naa nga Bixhoꞌzoꞌ.”
34 Ne chiqué na Dios zadxiña dxi usibani Jesús ti qué guiuꞌdxu xcuerpu.
Ndi nga ni uníꞌ be que:
“Zaguaa ndaaya lii casi bidiee stiidxa David guneꞌ.”
35 Ne laca cá lu sti Salmo ra na David:
“Qué zudiiu lugar guiuꞌdxu cuerpu sti ni nadxii lu que.”
36 Ne lu Salmo ca cadi cuzeete David de laca laa,
sínuque cuzeete de Jesús.
Purti biꞌni David xhiiña Dios dxi bibani,
peru bidxiña dxi guti,
ne bigaachi ra bigaachi irá ca bixhoze gola,
ne biaana xcuerpu biuꞌdxuꞌ.
37 Peru ni undisa Dios de lade gueꞌtu que la?
qué ñuꞌdxu di cuerpu stiꞌ.
38 Biche caꞌ,
laganna pur Jesús ni cuzeete ri ma zanda aca perdonar binni ne para nga runi cayuí né du ni laatu.
39 Qué ñanda nulá ley sti Moisés laatu,
peru yanna irá tu guni cre Jesús zalá.
40 Laguuya gá cadi izaaca tu ni bicaa ca profeta ni uníꞌ Dios ra na:
41 Laucaa diaga,
laatu,
cani runi burla,
ne laidxagayaa.
Zanitilú tu purti zune ti milagru naroꞌba lade tu ni qué zuni cre tu neca güi né cabe ni laatu.
42 Ora biree Pablu ne Bernabé de ndaani yuꞌdu que,
na ca binni que rabi laacaꞌ:
―Latáꞌ sti sábadu ca para güi né tu laadu ni byuíꞌ né tu laadu yanadxí riꞌ.
43 Ora biluxe cultu sti ca judíu que,
yenanda stale binni Pablu ne Bernabé,
cásica judíu zaqueca cani cadi judíu ni ma zinanda religión sti ca judíu.
Ne gudxi cabe laaca cadi usaana ca ni ma bidii Dios laacaꞌ.
44 Sti sábadu que casi idubi guidxi que bidxiña para ucaa diaga stiidxa Dios.
45 Peru ora biꞌya ca judíu irá binni que,
bidii envidia laacaꞌ,
ne bizulú ca na ca cadi dxandí ni caníꞌ Pablu que,
ne udindené ca laabe.
46 Peru qué nidxibi Pablu ne Bernabé,
na ca rabi ca laacabe:
―Nirudóꞌ laatu nexhe güi né du stiidxa Dios,
peru ma bidxii tu ni.
Laca laatu cusihuinni tu qué iquiiñe tu para icaa tu enda nabani ni qué zaluxe.
Yanna ma chiné du ni ra nuu cani cadi judíu.
47 Purti nga nga ni gudxi Señor laadu,
na:
Ma gudixhe lii para chinéu stiidxa ra nuu cani cadi judíu.
Casi ñaca lii nga ti biaani ni chi guzaani irá binni guidxilayú
para ganna ca modo ilá caꞌ.
48 Ora bina diaga cani cadi judíu ni na cabe que la?
bieche ca ne na ca nabé sicarú stiidxa Dios,
ne bini cre cani ma nexhe icaa enda nabani ni qué zaluxe.
49 Ne bireeche stiidxa Señor idubi naca neza que.
50 Peru gudxite ca judíu ique caadxi gunaa nabé rie yuꞌduꞌ,
gunaa ni risaca,
ne caadxi hombre ni runi mandar ndaani guidxi que,
para undisa ca ca binni de raqué uzabi nanda ca Pablu ne Bernabé dede uladxi ca laacabe.
Nin idubi raqué qué nusaana ca laacabe.
51 Ne ora biree cabe raqué udxibi ñee cabe casi ti seña bichee ca binni que ra qué nuchagalú ca laacabe.
De raqué uyé cabe Iconio.
52 Peru ca xpinni Cristu ni biaana ra biree cabe que la?
dxá ladxidóꞌ ca de Espíritu Santu ne nayeche nuu caꞌ.