Ca dxiiñaꞌ nandxóꞌ ni biꞌniꞌ Diuxi
135
¡Guisaca lá Tata Diuxi!Lagusisaca lábe;
laatu, ca ni runi xhiiñabe, lagusisaca Tata Diuxi;
2 ca ni nuu ndaaniꞌ xhiuꞌduꞌ Tata Diuxi,
ndaaniꞌ leꞌ xtiꞌ yuꞌduꞌ xtiꞌ Diuxi xtinu.
3 Lagusisaca Tata Diuxi, tí laa nachaꞌhuiꞌ;
laguundaꞌ saa ra riete lábe, tí laabe nabé nachaꞌhuibe.
4 Gulibe Jacob, Israel,
para gacaꞌ bidxichi xtípebe.
5 Naa nannadxiꞌcheꞌ piaꞌ Tata Diuxi, Diuxi ni bizáꞌ laanu,
jma nandxoꞌbe que guiráꞌ bidóꞌ.
6 Tata Diuxi runi guiráꞌ ni ná,
casica guibáꞌ casica guidxilayú,
ne zaqueca ndaaniꞌ nisadóꞌ dede ra jma gueteꞌ.
7 Rindísabe za dede ra cá ñee guidxilayú,
ruzaꞌbe xpiaaniꞌ gui guibáꞌ ni ribidxi nisaguié,
ne ribeebe bi dede ra riaapaꞌ.
8 Laabe nga biitibe
ca baꞌduꞌ lugola xtiꞌ ca binni egipcio
ne zaqueca ca yuze huiiniꞌ ni gule nirudóꞌ xticaꞌ.
9 Dede galaa batóꞌ guidxi Egipto,
biseendabe stale guendanandxóꞌ
ni biaba luguiáꞌ faraón ne ca xpinni.
10 Biitibe binni de stale guidxi roꞌ,
ne biitibe stale xaique roꞌ xticaꞌ:
11 biitibe Sihón, xaique xtiꞌ ca amorreu,
ne Og, xaique xtiꞌ Basán,
ne guiráꞌ ca xaique xtiꞌ Canaán;
12 ne layú xtiꞌ ca xaique ca
bisigáꞌdebe ni ca binni Israel.
13 Tata Diuxi láluꞌ qué ziuu dxi gatiꞌ;
ne nabé zuzeetecabe láluꞌ dxi ne gueelaꞌ.
14 Tata Diuxi runi ni jneza luguiáꞌ ca xpinni;
ne riabe laacaꞌ.
15 Ca bidóꞌ xtiꞌ ca ni qué runibiáꞌ Diuxi nácacani de oro ne de plata,
xiixa ni bizáꞌ binni ne náꞌ.
16 Nápacaꞌ ruaacaꞌ, ne qué riniꞌcaꞌ;
nápacaꞌ lucaꞌ, ne qué rinacaꞌ;
17 nápacaꞌ diágacaꞌ, ne qué rúnacaꞌ;
¡ne cadi nabánicaꞌ!
18 Casi ca bidóꞌ diꞌ
zaqueca nga ca ni ruzaꞌ cani
ne ca ni riabaxibi neza lúcani.
19 Binni Israelcaꞌ, lacuu ndaayaꞌ Tata Diuxi;
gueꞌdxeꞌcaꞌ, lacuu ndaayaꞌ Tata Diuxi;
20 levitacaꞌ, lacuu ndaayaꞌ Tata Diuxi;
Laatu ca ni rusisaca Tata Diuxi, lacuu ndaayaꞌ laabe.
21 ¡Nandaayaꞌ gacaꞌ Tata Diuxi ndaaniꞌ Sión
laabe nabézabe ndaaniꞌ Jerusalén!
¡Guisaca Diuxi!