Ndaayaꞌ xtiꞌ guendarudii diuxquixe
116
Nadxieeꞌ Tata Diuxi purtiꞌ huacaadiágabe xtiidxaꞌ,2 purtiꞌ hualábibe naa.
¡Guidubi xquendanabaneꞌ zucaaruaa laabe!
3 Guendaguti bichenda xtoo naa,
xizaa xtiꞌ baꞌ bitaaguꞌ naa,
ne gunaaze dxiibi ne yuubaꞌ naa.
4 Raqué bicaaꞌ ridxi Tata Diuxi,
ne gunabaꞌ laabe gulabe naa.
5 Tata Diuxi runi jneza ne riáꞌ;
Diuxi ni bizáꞌ laanu nabé nachaꞌhuiꞌ.
6 Tata Diuxi rapa ca ni nayá ladxidóꞌ.
Dxi guyuaaꞌ nayati, Tata Diuxi bilá naa.
7 Yanna huaxa, maꞌ zanda chuꞌ dxí ladxiduáꞌ
purtiꞌ Tata Diuxi huayaca nachaꞌhuiꞌ ne naa,
8 bilabe naa lu náꞌ guendaguti,
bilabe naa lu guendaruunaꞌ tí cadi guiabaꞌ.
9 Ruzuubaꞌ xtiidxaꞌ Tata Diuxi
lade ca binni ni nabani.
10 Naa, gulezaꞌ lu xtiidxabe
neca naroꞌbaꞌ xizaa nuu ladxiduáꞌ.
11 Lu guendaridxé xtinneꞌ guniéꞌ
guiráꞌ binni rusiguii.
12 Xiné zanda quixeniáꞌ Tata Diuxi
guiráꞌ guendanachaꞌhuiꞌ xtiꞌ ne naa.
13 ¡Zandisaꞌ xiga xtiꞌ guendarulá
ne zucaaruaa lábe!
14 Zuneꞌ guiráꞌ ni gudxeꞌ Tata Diuxi chi guneꞌ
neza lú guiráꞌ xpínnibe.
15 Riuubaꞌ ladxidóꞌ Tata Diuxi
ora guꞌyaꞌ gatiꞌ ca ni nadxii laa.
16 ¡Ay Tata Diuxi, naa nga runeꞌ xhiiñaluꞌ!
¡Naa nga xiiñiꞌ gunaa ni runi xhiiñaluꞌ que!
Ne lii bichuuguluꞌ doo ni naaze naa que.
17 Ne guidubi ladxiduáꞌ, zudieeꞌ guna lii,
ne zucaaruaa lii, Tata Diuxi.
18 Zuneꞌ guiráꞌ ni gudxeꞌ Tata Diuxi chi guneꞌ
neza lú guiráꞌ xpínnibe,
19 ndaaniꞌ leꞌ xtiꞌ yuꞌduꞌ xtiꞌ Tata Diuxi,
¡galahuiꞌ guidxi xtiuꞌ, Jerusalén!
¡Guisaca Diuxi!