Guibáꞌ nga nuu Diuxi xtinu
115
Tata Diuxi,bisisaca laaca lii, cadi laadu;
¡bisisaca laaca lii, runi guendaranaxhii ne runi guendahuandíꞌ xtiuꞌ!
2 Xiñee rinaba diidxaꞌ ca ni qué runibiáꞌ Diuxi
paraa nuu Diuxi xtinu yaꞌ.
3 Diuxi xtinu nuu guibáꞌ;
laabe bizaꞌbe guiráꞌ ni gucaláꞌdxibe.
4 Ca bidóꞌ xtiꞌ ca binni ni qué runibiáꞌ Diuxi nácacani de oro ne de plata,
laca binni bizáꞌ cani ne náꞌ:
5 nápacaꞌ ruaacaꞌ, ne qué riniꞌcaꞌ;
nápacaꞌ lucaꞌ, ne qué ruuyacaꞌ;
6 nápacaꞌ diágacaꞌ, ne qué runadiágacaꞌ;
nápacaꞌ xiicaꞌ, ne qué riuuxiicaꞌ;
7 nápacaꞌ nacaꞌ, ne qué randa rigáꞌnacaꞌ;
nápacaꞌ ñeecaꞌ, ne qué rizacaꞌ;
¡nin ti ridxi qué riree ndaaniꞌ yánnicaꞌ!
8 Casi ca bidóꞌ ca nga
naca ca ni ruzáꞌcaꞌ ni
ne ca ni rusisaca ni.
9 Laatu ca xpinni Israel, ¡laguicá lú Tata Diuxi!
Laabe racanebe laanu ne rápabe laanu.
10 Guéꞌdxecaꞌ, ¡laguicá lú Tata Diuxi!
Laabe racanebe laanu ne rápabe laanu.
11 Laatu ca ni rusisaca xtiidxaꞌ Tata Diuxi, ¡laguicá lú laabe!
Laabe racanebe laanu ne rápabe laanu.
12 ¡Tata Diuxi beedasilú laa de laanu,
ne riguu ndaayaꞌ laanu!
Zaguube ndaayaꞌ ca israelita,
zaguube ndaayaꞌ ca gueꞌdxeꞌ,
13 zaguube ndaayaꞌ ca ni rusisaca laabe,
huaniisi ne nahuiiniꞌ.
14 ¡Tata Diuxi gutale laatu,
laatu ne ca xiiñitu!
15 ¡Tata Diuxi, ni bizáꞌ guibáꞌ ne guidxilayú,
cuꞌ ndaayaꞌ laatu!
16 Xtiꞌ Tata Diuxi nga guibáꞌ,
ne laabe bidiibe guidxilayú binni.
17 Ca ni maꞌ biete ra nuu dxidóꞌ,
ca ni maꞌ guti, qué zanda diꞌ gusisácacaꞌ Tata Diuxi,
18 peru laanu susisácanu laabe
yannadxí ne guiráꞌ dxi.
¡Guisaca Diuxi!