Ndaayaꞌ ni ruundaꞌ ti binni ni ládxicabe laa
Ni gudixhe xaique xtiꞌ ca binni ruundaꞌ, ra xhidxi ca yagalé. Ni gudixhe David gacaꞌ.
55
Diuxi ni bizáꞌ naa, bicaadiaga ca ndaayaꞌ xtinneꞌ;ne qué gusaanuꞌ de gucaadiaꞌguꞌ ca xtiidxaꞌ.
2-3 Bizaalaꞌdxiꞌ naa, bicabi naa;
lu xizaa xtinneꞌ ribidxeꞌ lii.
Xtidxi ca ni nanalaꞌdxiꞌ naa
ne xtidxi ca ni nadxabaꞌ runidíticaꞌ naa.
Maꞌ biguáꞌcabe jma xizaa luguiaꞌyaꞌ;
ne cucaalúcabe naa naduxhuꞌ.
4 Nabé capapa ladxiduáꞌ;
maꞌ bitaaguꞌ dxiibi xtiꞌ guendaguti naa.
5 Maꞌ biaaziꞌ ti dxiibi roꞌ ndaaniꞌ ladxiduáꞌ;
¡Cadxibeꞌ ne cayacadiꞌteꞌ!
6 Ne rabeꞌ:
«Pa ñanda si ñapaꞌ xhiaa gugustiá;
ti ñanda nipapaꞌ ne niziiladxeꞌ.
7 Nipapaꞌ ne ñaa zitu;
ne nindezaꞌ lu ti layú dachi.
8 Nuxooñeꞌ nagueenda ti nuyubeꞌ nilaꞌyaꞌ
xabí yooxhoꞌ ne xabí nisaguié xoo.»
9 Binidé laacabe, Tata Diuxi, bichenda xtiidxacabe,
purtiꞌ nisi guendaridinde ruuyaꞌ,
10 canazá renda dxi ne gueelaꞌ ndaaniꞌ guidxi.
Ndaaniꞌ guidxi diꞌ nuu guendanadxabaꞌ ne guendarutinde binni;
nuu guendarugadxe náꞌ;
11 ndaaniꞌ ca neza xtini nuu guendanaxoo ne guendariguite binni.
12 Cadi binni nanalaꞌdxiꞌ naa, bininá naa,
pacaa la? ñanda nuquidxeꞌ naa;
cadi binni ni nanalaꞌdxiꞌ naa, bicaalú naa,
pacaa la? ñanda nucacheluáꞌ.
13 ¡Lii, lii xhamiguáꞌ ni nabé nadxieelaꞌdxeꞌ,
lii bicaa luluꞌ naa,
14 lii ni bidaaguꞌ naa ndaaniꞌ yuꞌduꞌ xtiꞌ Diuxi
ni biueniáꞌ diidxaꞌ nayecheꞌ,
laga zizanu lade binni!
15 ¡Gusaba guendaguti ca ca ni nanalaꞌdxiꞌ naa!
¡Nabani nabánicabe guiábacabe ndaaniꞌ baꞌ,
tí guendanadxabaꞌ ca nuu ndaaniꞌ ladxidóꞌcabe!
16 Huaxa naa zucaaꞌ ridxi Diuxi;
tí Tata Diuxi nga gulá naa.
17 Naa zuguaaliibeꞌ ne zuunaꞌ
siadóꞌ, huadxí ne huaxhinni,
ne laabe zucaadiagabe xtiidxaꞌ.
18 Lu guendaridinde zulabe naa;
zulabe guendanabani xtinneꞌ,
neca peꞌ ñaca stale ca ni cucaalú naa.
19 Diuxi, ni naca xaique dxi ne gueelaꞌ,
zucaadiaga naa ne zaguiñeyú laacabe,
tí laacabe qué nácabe guchaacabe xpiáꞌcabe
ne nin qué ridxíbicabe Diuxi.
20 Laacabe rucaalúcabe ca xhamigucabe;
cadi huandíꞌ diꞌ xtiidxacabe.
21 Naguudxi xtiidxacabe casi mantequiá,
peru nayuudxuꞌ xpiaanicabe, nisi guendaridinde cá íquecabe.
Naguudxi xtiidxacabe jma que zá,
huaxa zedagacani casi guiibaꞌ naduxhuꞌ.
22 Bisaana ca xizaa xtiuꞌ lu náꞌ Tata Diuxi,
ne laabe zúnibe lii naguidxi;
qué ziuu diꞌ dxi gusaanabe guiaba
binni ruzuubaꞌ xtiidxabe.
23 Diuxi ni bizáꞌ naa,
ca ni rusiguii ne ca ni maꞌ biiti binni la?
qué zabanidicaꞌ nin galaa guendanabani xticaꞌ;
lii zusaꞌbuꞌ laacabe ndaaniꞌ baꞌ,
huaxa naa la? cá luáꞌ lu xtiidxaluꞌ.