Guendanadxabaꞌ xtiꞌ binni
Ni gudixhe xaique xtiꞌ ca binni ruundaꞌ, ra nuu guendahuará. Ni gudixhe David gacaꞌ.
53
Binni huati riníꞌ, ná cadi nuu diꞌ Diuxi,guirácabe maꞌ binitilúcabe,
maꞌ bíꞌnicabe stale guendanadxabaꞌ;
¡maꞌ guirutiꞌ tu guni ni jneza!
2 Dede guibáꞌ, Diuxi ruuyaꞌ binni
cuyubi lube pa nuu tuuxa napa guendabiaaniꞌ,
tuuxa ni ruyubi Diuxi.
3 Huaxa guiráꞌ xixécabe maꞌ bireechucabe lu neza,
guiráꞌ xixécabe maꞌ binitilúcabe.
¡Maꞌ guirutiꞌ guni ni nachaꞌhuiꞌ!
¡Nin lica tobi!
4 Ca binni que guiquiiñeꞌ qué gápacaꞌ guendabiaaniꞌ,
ca ni ro ca binni xquidxeꞌ, casi ñocaꞌ ti ndaa guetastiá,
ca ni qué rucaa ruaa Diuxi.
5 Neca peꞌ gastiꞌ ni guchibi laacabe,
laacabe zacadíticabe,
purtiꞌ Diuxi rucheeche dxitaladi ca ni nanalaꞌdxiꞌ laa.
Zatuí lúcabe, purtiꞌ Diuxi zudxiguetaꞌ laacabe.
6 ¡Tila de lu dani Sión
gueeda ni gulá Israel!
Dxi gacalaꞌdxiꞌ Diuxi guchaa nuna xtiꞌ xquidxi,
ziecheꞌ ca xiiñiꞌ Jacob,
ziecheꞌ guidubi Israel.