Lukas 19

Yesus cap, Zakeus cap antapdarei upu

Yesusdi asuru puamu ngebo perekeipudi, Yeriko mutu ati arum doramya neitamai banmau. 2 Yeriko mutu banmau taruda, tenpu ngebo er sida, Zakeus erdi amutu taleami neng Roma mutu neng tep, pajak co bo bulupra derina deiyo ngebo kuramnga cadi, pio isomka weik kuramu. 3 Yesus yakanmau taruda, Zakeus gekepudi, ‘Ne ton epkune,’ tenepudi, tekra dipterepudi, Yesus cap melipra yakanmai nengda, nimi weike dekpepmaiya tep, men epmanto kupu. Ada, Zakeusda, pio bum ngebo tep, aneng deiki men epmanto kupu.

4 Men epmanto kupka tep, Zakeus menmena menepra sepdaro beudi, ‘Yesus eptene’ tenen, co dup welepra tekudi, Yesus yakankou bisi tep dinmau. 5 Dinmaupane, Yesus banmauanen, Zakeus welepmau co deiyo damai beuopda, erepra co dup idipeterepudi, Zakeus itekmaupa epudi, “Zakeus kanda adipapu kwerepo. Kwerepmempa, kan cap, ne cap, kan ati mapkamaneme,” pepu. 6 Upepupa, Zakeus gekepudi, adipapu kwerepra yauopda, Yesus tep kange deipra, er ati berei.

7 Sun butene neng kikiman ati berei pangeda, abisi banmai neng yuma epidi, yupropidi aupu penmai. “Anengo, Yesus cap, apio mali ngebo cap, bere ngeda, warya tep do?” penmai. 8 ‘Angeboda, pio mali ngebo ati benmare’ tenen, penmang dinin, Yesus cap, Zakeus cap, ati berei pangeda, Zakeusdi Yesus tep aupu pepu. “Uo ne naio, ne pio mali kuramsi kecada konum tapne. Ukutaruda, ne talene keca yuma bokra neitamai dopropnedi, tali kankan kunge nesala tep karenkamne.

Tonda, yuk neng co bo upula dororamsada, dororamsa utopu gume, ton cap tapakra karenkamne. Atep, tenpu dopramsi ngeboda, dumbari karenkamne. Dumbari dopramsi ngeboda, 16 karenkamne. Ange utopu, ne upula dopropsi utopu, sun co bo dororamsi neng yuma tep, tapakra co bo kange di ton cap, empat kali lipat di tamupra karenkamne.” Zakeusdi Yesus tep pepu.

9 Upepu pangeda, Yesusdi Zakeus tep pepu. “Kan apu bo Abrahamdi, Allah upu gekeramutopu, atumida ne upu gekepra teka tenepmanerema cadi, atumida kan mali kumem keca yuma, Allahdi gum kupra deipkeredi, konum lyepkere. 10 Neda Nimi Mi Sisa Utopu Ngebodi, ‘Allah teka tenena gum neng tep, epra lyepkamne’ tenen, ne yasi. Ange tep nengeda, atumida Allahdi kan tep konum lyepkere,” Yesusdi pepu.

Ukupmanto upu deiki di, “Tenpu deiyo ngebodi, er pel dorami neng tep, co bo weik karepu,” pepu upu

11 Yesus akunmau tarupu, Yerusalem mutu damai benmaua cadi, er upu gekenmai neng yumadi, Allah akeca-keca yuma bisbisa kapra talepredi, ‘Israel nesala sun ila nimi deiyo ngebo kunkamser’ tenen, ‘Talenkamre taru adipapu kupkusere, konum damai kupre,’ tenenmai. Uka tenenmaiya kael kepka tep, Yesusdi aupu, ukupmanto upu ton dukdongopra pepu.

12 Tenpu taruda, nimi deiyo neng yala ngebo, er amngai tup kuramu taruda, utenepu. ‘Yuk karen mutu benyopda, ormutu nesaladi, ‘Angebo nun Raja kunkamser’ tenen, ne tep nimi deiyo ngebo kuna tep, erepra deipnengepa, tamupra ne pe mutu yanedi, Raja kunkamne,’ tenepu. Utenepudi er pel melimna neng yuma tep kongpepu. 13 Kongpepupa yai pangeda, er pel melimna neng morokyo di dutara neng, 10 neng tep, co bo ila weiknge, er si ‘mina’ 10 nukra, yuk-yuk bokra karepu. Karepupa, sun tenpu-tenpu di aila co bo tenpu dopropi. Aila co bo 10 nukra, bukrapudi sun yuk-yuk tep tenpu karepudi, aupu pepu. “Ne yuk mutu bena kunkamne taruda, aco bo deiki di, pel donkamnerume,” pepu. Upepudi beu.

14 Bisi banmau taruda, er amngai kurami neng, yuk tali nengdi, nimi wepra deipipa, araja kunkamu ngebo tep kai perbei. “Kan Raja kuna tep ereipkukeng dinin, kanda nun ila nimi deiyo ngebo, Raja kupkamseremada, ‘Nun song,’ peryanmakepe,” pepi. 15 Upepi dinin, bisi yakanmau ngebodi, akaren mutu konum yau pangeda, amutu nesaladi, angebo dopra, ila nimi deiyo ngebo Raja kuna tep, erepra deipipa, Raja kupu. Raja kuna tep erepra deipipa, angebo er pe mutu tamupra beu. Beu dingeda, er ila co bo kareabenamupa, pel dorami neng tep kongpepu. Ada, ne karerbenamsisidi, ‘Pel dopmumya deiki di, co bo ton tapakra deipkamnerume,’ pemsitopu, ‘Kupmanenge do?’ tenen, asipterepu.

16 Asipterepu taruda, menmena yau ngebodi aupu pepu. “Naio, kandi ila co bo tenpu kareamnemumpa, pel doramsa deiki di, morokyo ton cap (10) tapakra deipmakene,” pepu. 17 Upepupa, aila nimi deiyo ngebodi, er pel don ngebo tep, tamupra pepu. “Kanda, pel pio telep kupra dopmanerume. Metekanunpu kareamkesipa, pel moupra doramnumuma tep, ukutaruda, kan peda ila ati arum 10 dongai talepra ila deiyo ngebo kunkamrume,” pepu.

18 Butene ngebo yaupa, aila deiyo ngebodi, utopu asipterepu. Asipterepupa, butene yau ngebodi aupu pepu. “Naio, kandi ila co bo tenpu kareamnemumpa, pel doramsa deiki di, ila co bo 5 ton cap tapakra deipmakene,” pepu. 19 Upepupa, aila nimi deiyo ngebodi, apel don ngebo tep, tamupra pepu. “Atep nengeda, ukutaruda, ila ati arum 5 dongai talepra, kan peda ila deiyo ngebo kunkamrume,” pepu. 20 Amendada, yuk pel don ngebo yaudi aupu pepu. “Gume, naio, kan ila co bo tenpu kareamnemumtopu, angepu tamupra yana deipkene. Karepnemumpa, adipapu opkal di getepra moupra deiamsitopu, tenpu karepnemumtopu, tamupra tenpungepu dekene. 21 Ukuamsada lap pepkukene.

Ada, Kanda, yu weik ngebo tep, ne kware kupneupa, tali moupra deiamsi. Kanda moupra men deipmum keca dinin, tali lupra doronapu kurume. Tonda, kandi men kouamum keca dinin, tali lupra kipra jeruma tep, ‘Ne deiyo ngebodi wenepnerur’ tenen, kware kupneua tep, kan co bo tenpu getepra mawa deipsi,” pepu. 22 Apel don ngebodi upepupa, aila deiyo ngebodi apenmau ngebo tep, tamupra pepu. “Upepmanerema tep, kan pepmanerem upu deiki di upu lepsikra bokeipkukene. Kandi ne tep, ‘Erda yu ngebo kuredi, moupra men deipu kecada, tali lupra dororure. Tonda er men koupu kecada, tali lupra kipra jerure,’ upenmanereme. 23 Angeda, konum kael kepnemuma tep, ne ila co bo kareamkesipa, pel telep kupra dona gum di, ton tapakra men deipmaneremada, ware keca deiyo tep do?” pepu.

24 Upepu dingeda, er damai tengmai neng tep, aupu pepu. “Angebo karepsi co bo, tenpu ila co boda, dopropmumdi, arup ila co bo 10 karepmaner ngebopu karerbenkurume,” pepu. 25 Upepupa, aupu gekenmai nengdi tamupra pepi. “Ukupkup dinino, apepmaserem ngeboda, ila co bo 10 konum kwapmara tep, ware keca deiyo tep, 10 ton cap tapakra angebo tep karepkamep do?” pepra asipetepi. 26 Asipetepipa, aila nimi deiyo ngebodi tamupra pepu.

“Ne tek sisi pepsene. Ware neng do yuma, akeca weikanun konum kwamre ngeboda, Allahdi weika di ton cap tapakra kareprepa, pio weik kupkamre. Dinino, akeca men kwamre ngeboda, Allahdi er kwamrenge peda, doproprepa, gum kuprepa tali nongpu kunkamre. 27 Dinino, ‘Angeboda, nun ila nimi deiyo ngebo Raja men kunkamsere,’ tenepneidi, ‘Angeboda, nun songe,’ teneramnei nengda, ne damai denerumudi, poptaprumupa epkune. Animi deiyo ngebodi er pel don neng tep pepu.” Yesusdi pepu. Yesusdi ukupmanto upu upepupa, er cap kunmai nengdi gekepi.

Yesusdi Yerusalem ati doramyai weku upu

28 Yesusdi aupu pepu dingeda, Yeriko mutu tapra, ‘Yerusalem mutu benkamep’ tenen, Yesus cap, er nyapu cap, bisi mapbarami. 29 Bisi mapbaramyanen, ati arum doramyai sida, Betania mutu cap, Betfage mutu cap, damai banmaiya Zaitun mutu dup welepkoi taruda, er nyapu butene neng tep pepu.

30 “Ortara mutu bererumdi, ati arum doramengai ukupu wekrorerum taruda, keledai bisam meteknge gerekra deipmanga eprerumdi, tapu gerekdongomenga lopra, er kum gerekra denererume. Ametek keledai bisamda, nimi bukra men embaramengedi, ukupu peirameng keledai bisam dopra denererume. 31 Ukuprerumpa, yuk neng epsengedi, ‘Warya tep kuprerum do?’ pepra asipetepsengopda, ka di tamupra upepkurerume. ‘Nun nai Yesus putapmara tep, dubeneme,’ pepkamarerume,” Yesusdi abutene neng tep pepu.

32 Upepupa, ati arum doramya neitam bereidi, Yesusdi, “Ukupkamare, ange epkamrerume,” peiputopu ayuma kupu. 33 Metek keledai bisam gerekeipmaiya epreidi, bena lodoreipa, akeledai bisam deiyo nengdi upepi. “Ametek keledai bisam lodonmarerumada, ware keca deiyo tep do?” pepra asipetepi. 34 Asipetepipa, sundi, “Nun nai bo Yesus putapmara tepa,” peprei. Upepreiya tep, atekmai nengdi mankaukeproipa, sundi lopra berei.

35 Lopra dubanmareiyanen, Yesus damai bereipa, sun deiki opkal kwiripra keledai bisam bali deiki yakra deipipa, Yesus adeiki bukudi dopra beu. 36 Yesusda, Yerusalem mutu bisi keledai deiki bukra banmaupane, amutu bulupmai neng kan-kan dinin, ton nengdi, ‘Yesus gispal dopkup’ tenen, sun deiki opkal kwiripra, Yesus yanipra yankamauai yakra deipi. 37 Yesus bisi banmauanen, Zaitun mutu kwererbana tep, bisi kwangdanai beu taruda, Yesus tep teka tenepidi, melipra embanmai neng yumada, Yesusdi nimi men kupmanto pel weik doramupa diramya tep, kange deipra Allah si eremaidi, ‘Yesusda nun ila nimi deiyo ngebo Raja kunkamser’ tenen, Allah upu lap perami neng, menop di sekami upu dopra ila di penmai. Ada, Allah upu lap perami neng, nabi neng menop di sekami upu dopra, pepbanmaidi, ila upu penmai. Pepbanmai upuda ake.

38 “Allah er puto cap, er si cap deiki di yanmar ngebo, ila nimi deiyo ngebo ayanmaser Rajada, Allah ila di makurepa, teleppu kunkamre. Angeboda ila mambul ngebo cadi, ‘Im deikida, Allah tep gispal dona cap, pio telep kuna cap, dirine weik kudina cap, kunkamre’ tenen, Allah moropmepe,” pepra ila di pepbanmai.

39 Aupu pepbanmaipa, sun Farisi neng gekepidi, Yesus tep aupu pepi. “Kandi kan cap melipra yakanmang nengda, aupu penmanga cadi, aneng tep, wenepo,” pepi. 40 Upepi dinin, Yesusdi aFarisi neng tep tamupra pepu. “Ayakanmang nengdi dimpeptengopda, tali akwamre gel di upu ila di pepkamenge,” pepu. 41 Yesusdi aupu pepudi, bisi banmauanen, Yerusalem mutu ati arum doramya damai beu dingeda, amutu dipterepudi, bicau kupupa, engenmaua deiki di aupu pepu.

42 “Uo, sun Yerusalem mutu neitam kurum nengo, Allah cap, nimi cap kikiman kuna tep, nimi lyepra telep kweipmanto keca teka tenepra kael kepmatum teptoda, Allahdi konum lyepmasetu dinin, sunda, men kael kepmanto neng kurume. Sundi Allah tep, tapmumpa, Allahdi, ‘Aneng kael kepnung’ tenen, adeiyo keca konum inipmasera tep, nimi lyemna keca men kael kepmarume. 43 Sunda bicaue, amenda taruda, sun poryankamseng nengdi, sun ati neitamai dopmumdi, dana-dana wipmum beilyada, abeilya bura tara di, co cap, gel cap, tu cap, deipyakanmangepane, beilya deiki dam kupyopda, beilya kaplepra ati pumbon wekmengedi popkamsenge. Dana-dana tara kalekra kunkamenga cadi, sundi yukai men benmanto kupkamruma tep, sun podana nengdi poptapkamsenge.

44 Sun popkamseng taruda, sun wisi nesala cap, sun nyapu yuma cap, yan bulbul talepra tu deiki sitamasengepa, giso colopra, giso yung lupra benkamre. Tonda, sun ati doramrum gel yumada, uruptapmengepa, yuk-yuk dorbenkamre. Tenpu pe ton yuma tupa men kupkamre. Ada, ‘Allahdi anesala lyepkamne’ tenen, go kareamseu taruda, men kael keamrumdi mali kuruma tep, pepsene,” Yesusdi Yerusalem mutu nesala tep pepu.

Yahudi yala neng, Allah tep karerbaramidi, er si eremami ati pumbon Yesus wekudi kupu keca tep, pepu upu

45 Amendada, Yesusdi Yahudi yala neng Allah tep karerbaramidi, er si eremami ati damai beu. Tengbeudi, Yahudi yala neng, ‘Nun mali kunup keca Allah gum kupra deipredi lyepkamser’ tenen, gam keca popra Allah kareraminge, yapi keca kunumai neng tep, Yesus derepudi enepra bura dokotepu. 46 Ukunmau taruda, akunmai neng tep, aupu yuma peteremau. Allahdi peipupa, nabi Yesayadi sekeiamu upuda men tenerum do? Aupuda adano.

‘Allahdi, ne ati tep, “Nesala ban-ban yuma Allah tep moronung ati adano,” penkamenge, pepu.’ (Yesaya 56:7)

Tonda, Yesusdi aupu pepu. “Allahdi pepra deipupa, Yesayadi, apepmasen upu sekeipseu dinino, aupu ton akapmare.

‘Allahdi, ne ati dinin, sunda, upula nengdi upula dopra inipra kurameng ati utopu, ne ati konum mali kupra deipmarume.’ (Yeremia 7:3)

Nabi Yeremiadi sekeiamu upu dopra konum pepsene,” Yesusdi aneng tep pepu.

47 Yesus atumi di gonga kepudi, dortumi yumada, Allah tep karerbaramidi er si eremami ati dam kuramudi, Allah upu peteremamu. Peteremamu dinin, Allahdi, ‘Ukunkamrume, ange men kunkamrume,’ peiamupa, Musadi sekeiamu upu peteremna deiyo neng cap, Allah karena tep, ila deiyo neng cap, yuk tali ila deiyo neng capdi, Yesus kuramunge tep, diramidi, tulum weik kupupa, ‘Dan taru di Yesus tep poptereptepe do?’ tenen, upu sisingamidi pirirtereami. 48 Pirirterami dinin, ataru Yesus gekenmai nesala yumadi, er upu moupra gekenmaidi, Yesus tep, pio kange deipmaiya cadi, amali nengdi, Yesus popmanto men kurami.