3
Paŋwa Tu Baŋa-Wɛ ni dɩm mʋ tɩntʋ:«Nii mʋ! Amʋ lagɩ a tʋŋɩ a tɩntʋŋnʋ mʋ sɩ o da amʋ yigə o vu o kwɛ cwǝŋǝ kalʋ amʋ na wʋ́ tɔgɩ da tɩn. Kʋntʋ na kɩa, á Yuutu wʋm á na beeri o je tɩn mʋ wʋ́ da o ba o zʋ o digə kam wʋnɩ. Amʋ tɩntʋŋnʋ wʋlʋ á na je á cəgi tɩn wʋ́ ba o ta ni dɩlʋ a na goni dɩ abam tɩn taanɩ o brɩ abam.»a
2 Dɛ dɩlʋ dɩm Baŋa-Wɛ nan na wʋ́ ba tɩn, DƖ lagɩ DƖ taa nyɩ nɩnɛɛnɩ mim na kwɛ səbu pa digiru daa tǝrǝ tɩn, dɩ canfɩm na wʋ war-zʋŋa wʋnɩ dɩ zarɩ gwaarʋ tɩn mʋ. DƖ na tuǝ sɩ DƖ lwarɩ nɔɔna lwara kʋntʋ, ba bá wanɩ ba zɩgɩ DƖ yigə nɩ.b 3 Baŋa-Wɛ tɩtɩ mʋ lagɩ DƖ kwɛ Levi dwi dɩm sɩ dɩ taa yɩ lanyɩranɩ. DƖ wʋ́ jǝni tɩga nɩ mʋ, nɩnɛɛnɩ luru na je o kwɛ səbu-sɩŋa dɩdaanɩ lu-nyɩnnʋ pa tɩ pɩɩrɩ te tɩn. DƖ na kwɛ-ba kʋntʋ tɩn, nɔɔna laan wʋ́ taa jaanɩ pɛɛra yalʋ na yɩ lanyɩranɩ tɩn ba tui DƖ tee nɩ. 4 Kantʋ maŋa kam nɩ mʋ Baŋa-Wɛ daa wʋ́ joori DƖ joŋi pɛɛra yalʋ Zuda tiinə dɩdaanɩ Zeruzalɛm tiinə na wʋ́ ja ba ba ba pa‑DƖ tɩn. Kʋ daa wʋ́ taa nyɩ nɩnɛɛnɩ faŋa kam nɩ DƖ yi na su ba kənə te tɩn mʋ.
5 Paŋwa Tu Baŋa-Wɛ ni dɩm mʋ tɩntʋ:
«Amʋ lagɩ a yi abam yɩra mʋ sɩ a bʋrɩ cɩga bʋra. A maŋɩ a zɩgɩ sɩ a bʋrɩ taanɩ a vanɩ balʋ na tʋŋɩ yi-nɛɛrɩ tɩtʋŋa dwi maama tɩn mʋ, dɩdaanɩ balʋ na nuŋi ba kaana naa ba banna kwaga nɩ ba kɩ tʋlʋ tɩn. A nan ta bá ma a cɛ vwa-fɔra naa balʋ na pini ba tɩntʋŋna tɩn. Balʋ dɩ na jɩgɩ cam ba kɩ kadənə dɩ bɩtara dɩdaanɩ nɔn-zʋra yɩranɩ tɩn dɩ maa wʋ́ ga bʋra amʋ tee nɩ. Bɛŋwaanɩ, nɔɔna bantʋ maama ba kwarɩ-nɩ.»
Nɔɔna na vrɩ Wɛ te tɩn
6 Paŋwa Tu Baŋa-Wɛ ni dɩm mʋ tɩntʋ:
«Zakɔbɩ biə bam, cəgi-na! Amʋ nan bá fɔgɩ a ləni a ji wo-gaa. Kʋntʋ nan mʋ pɛ abam dwi dɩm ta wʋ je tɩga baŋa nɩ tɩn.c 7 Kʋ na maŋɩ kʋ nuŋi á nabaarɩ wʋnɩ tɩn, abam yɩ dwi dɩlʋ na vɩn sɩ á taá sɛ amʋ niə yam mʋ. Abam nan na sɛ sɩ á pipiri á joori amʋ tee nɩ, amʋ dɩ wʋ́ pipiri a jeeri abam mʋ. Abam ma‑á yəni á ta á wɩ: ‹Dɩbam wʋ́ kɩ ta mʋ dɩ́ joori dɩ́ ba?›
8 Amʋ nan lagɩ sɩ a bwe abam a nii, nabiinu wʋ́ wanɩ o vrɩ Wɛ na? Abam nan vrɩ amʋ mʋ ga! Abam ta yəni á bwe mʋ á wɩ: ‹Dɩ́ brɩ dɩ́ vrɩ‑m tɩta seeni mʋ?› Woŋo maama fugə wʋnɩ pɔɔrɩm dɩdʋa kalʋ na yɩ amʋ nyɩm tɩn, kʋ wǝli dɩ pɛɛra yalʋ á na maŋɩ sɩ á yǝni á pa-nɩ tɩn, tɩntʋ baŋa nɩ mʋ á jɩgɩ-nɩ á vɩa. 9 Abam nan na yǝri tɩn, kʋntʋ ŋwaanɩ mʋ amʋ sɔɔlɩ a yagɩ á tɩʋ kʋm maama baŋa nɩ. 10 Abam na laga, maŋɩ-na amʋ á nii. Ja-na woŋo maama fugə wʋnɩ pɔɔrɩm dɩdʋa kam na yɩ amʋ nyɩm tɩn á ja á ba á tiŋi amʋ sɔŋɔ kʋm nɩ. Wʋdiu na su amʋ sɔŋɔ kʋm wʋnɩ, amʋ laan wʋ́ puri wɛyuu kʋm a jeeri abam sɩ á nɩɩnɩ dɩdaanɩ Wɛ yu-yoŋo amʋ na wʋ́ kɩ a yagɩ á yuu nɩ tɩn. Amʋ yu-yoŋo dɩm wʋ́ taa tiini dɩ daga dɩ dwe abam jam. Amʋ Paŋwa Tu Baŋa-Wɛ na tagɩ te tɩn mʋ kʋntʋ.d 11 Kʋntʋ kwaga nɩ dɩ, amʋ wʋ́ cɩ sɩ kayɩra dɩdaanɩ wo-kʋrrʋ dwi maama yɩ daanɩ á wʋdiiru tɩm na wʋ á karɩ sɩm nɩ tɩn. Á tweeru tɩm maa wʋ́ taa ləri biə lanyɩranɩ. 12 Kʋntʋ laan maa wʋ́ pa lʋgʋ baŋa tɩɩnɩ dɩm nɔɔna bam maama ta nɩ: abam jɩgɩ yu-yoŋo zanzan. Bɛŋwaanɩ abam tɩga kam wʋ́ taa lamma ka paɩ nɔɔna sɩ ba taa zʋʋrɩ da.»
Paŋwa Tu Baŋa-Wɛ na tagɩ te tɩn mʋ tɩntʋ:
13 «Abam yɩ balʋ na ŋɔɔnɩ wo-balwaarʋ mʋ a pa amʋ tɩn. Á nan ta bwe-nɩ mʋ á wɩ: ‹Dɩbam wʋ ni bɛŋwaanɩ, dɩ́ tagɩ bɛ dɩ bɛ mʋ yɩ kʋ ba lamma tɩn?› 14 Abam ŋɔɔnɩ wo-balwaarʋ mʋ yɩ á wɩ: ‹Bɛ nyɔɔrɩ mʋ brɩ kʋ wʋ Wɛ tɩtʋŋa yam wʋnɩ? Dɩ́ na sɛ Paŋwa Tu Wɛ niə yam, bɛ nyɔɔrɩ mʋ dɩ́ wʋ́ na? Dɩbam na maŋɩ dɩ́ brɩ nɩ dɩ́ wʋʋ mʋ cɔgɩ dɩdaanɩ dɩ́ tɩtʋŋ-lwaannʋ tɩm dɩ, kʋntʋ ta yɩ kafɛ mʋ. 15 Dɩbam tee nɩ, balʋ na brɩ ba tɩtɩ kamunni tɩn mʋ joori ba jɩgɩ yu-yoŋo. Nɔn-balwaarʋ jɩgɩ yigə-vəŋə mʋ. Bantʋ tiini ba gigili Wɛ yigə, yɩ dɩ kʋ dɩ, kʋlʋkʋlʋ ba yaarɩ-ba.› Mʋ abam na yǝni á taɩ te tɩn.»
16 Kʋ daarɩ kʋ na yɩ balʋ na kwarɩ Baŋa-Wɛ tɩn, bantʋ ŋɔɔnɩ ba taanɩ mʋ ba brɩ daanɩ. Baŋa-Wɛ dɩ ma ni kʋlʋ ba na ŋɔɔnɩ tɩn. Wɛ ma pa ba pʋpʋnɩ balʋ na kwarɩ-DƖ tɩn yɩra ba tiŋi tɔnɔ wʋnɩ, sɩ kʋ taa yɩ gulim.
17 Paŋwa Tu Baŋa-Wɛ laan maa wɩ:
«Dɛ dɩm a na lagɩ a zaŋɩ sɩ a tʋŋɩ tɩn, bantʋ wʋ́ taa yɩ amʋ tɩtɩ nyɩm amʋ yi na su-ba tɩn mʋ. Amʋ wʋ́ duri ba yibwənə nɩnɛɛnɩ ko na duri o bu wʋlʋ na tʋŋɩ o pa‑o tɩn yibwənə te tɩn.e 18 Kʋntʋ baŋa nɩ mʋ abam wʋ́ lwarɩ amʋ na kɩ te dɩ nɔn-ŋʋna dɩdaanɩ nɔn-balwaarʋ tɩn. Kʋntʋ mʋ wʋ́ brɩ nɩ balʋ na tʋŋɩ ba pa amʋ dɩ balʋ na ba tʋŋɩ ba pa amʋ tɩn daɩ bɩdwɩ.»