Ni-kaana Wɛ kaanɩm tiinə bam ŋwaanɩ
2
Paŋwa Tu Baŋa-Wɛ nan ta na jɩgɩ kʋlʋ sɩ DƖ ta ta dɩdaanɩ abam kaanɩm tiinə bam tɩn mʋ tɩntʋ:2 «Abam nan maŋɩ sɩ á taá zuli amʋ yɩrɩ dɩm mʋ. Abam nan na vɩn sɩ á kɩ kʋntʋ, amʋ wʋ́ sɔɔlɩ lwarɩm a yagɩ abam yuu nɩ. Kʋ na yɩ wo-laarʋ tɩlʋ á na yǝni á joŋi amʋ jɩŋa nɩ tɩn, amʋ wʋ́ joori a pipiri-tɩ sɩ tɩ ji Kampwəl-balwara á baŋa nɩ. Cɩga ŋwaanɩ tɩn, amʋ maŋɩ a sɔɔlɩ mʋ a yagɩ á yum nɩ, bɛŋwaanɩ abam ba jɩgɩ yi-sɩɩna dɩ á kaanɩm tɩtʋŋɩ dɩm. 3 A ta lagɩ a waarɩ abam dwi dɩm mʋ. Á na jaanɩ vara mʋ sɩ á ba á ma á kɩ kaanɩm á pa-nɩ, amʋ wʋ́ kwe ba vara bəənu tɩm a ma fǝri á yibiyə nɩ, sɩ a laan daarɩ a dʋlɩ abam a yagɩ weeru-puuri yuu nɩ. 4 Amʋ pɛ abam ni-kaana yantʋ sɩ á wanɩ á lwarɩ nɩ ni-mɔrɔ dɩlʋ amʋ dɩdaanɩ á nabaarʋ Levi na kɩ daanɩ tɩn wʋ́ taa ve yigə mʋ.a
5 Ni-gonim dɩlʋ amʋ dɩdaanɩ Levi dwi dɩm dɛɛn na zʋ daanɩ tɩn maŋɩ sɩ dɩ ja ŋwɩa dɩdaanɩ yazurə mʋ dɩ ba ba tee nɩ. Bantʋ tɩtʋŋɩ mʋ maŋɩ sɩ ba taa zuli amʋ yɩrɩ dɩm. Ba ma sɩɩnɩ ba kɩ kʋntʋ doŋ. 6 Levi dwi dɩm brɩ cɩga mʋ yɩ ba vɩn vwan fɔm. Ba ŋwɩa kam tɔgɩ cwǝŋǝ, yɩ ba sɛ amʋ ni, pa nɔɔna zanzan mʋ pipiri ba yagɩ lwarɩm tɩtʋŋa. 7 Kaanɩm tu mʋ jɩgɩ yǝno Wɛ wǝǝnu seeni yɩ o nii tɩ baŋa nɩ. Nɔɔna maa wʋ́ taa ve o tee nɩ sɩ o brɩ-ba, wʋntʋ na yɩ Paŋwa Tu Baŋa-Wɛ tɩntʋŋnʋ tɩn ŋwaanɩ.
8 Kʋ nan na yɩ abam, kʋ daɩ kʋntʋ mʋ á jɩgɩ á kɩ. Abam kwe cwǝŋǝ kalʋ Wɛ na pɛ abam sɩ á taá tɔgɩ tɩn mʋ á yagɩ. Á zaasɩm dɩm maa paɩ nɔɔna zanzan cɔgɩ amʋ yigə nɩ. Kʋ dɛ laŋa kam kʋntʋ nɩ mʋ yɩ abam cɔgɩ ni-mɔrɔ dɩlʋ amʋ dɩdaanɩ Levi na zʋ daanɩ tɩn. 9 Kʋntʋ ŋwaanɩ mʋ pɛ a pa nɔɔna maama culi abam yɩ ba ta gooni abam. Bɛŋwaanɩ abam vɩn amʋ ni dɩm mʋ yɩ á kuri nɔɔna daanɩ dɩ á na brɩ-ba te tɩn.»
Paŋwa Tu Baŋa-Wɛ na tagɩ te tɩn mʋ kʋntʋ.
Baŋa-Wɛ lagɩ sɩ cɩga kam mʋ taa tʋŋa
10 Dɩbam maama daɩ ko dɩdʋa biə mʋ na? Kʋ daɩ Wɛ dɩdʋa mʋ naanɩ dɩbam maama na? Kʋntʋ tɩn, kʋʋ́ kɩ ta mʋ sɩ dɩbam taa baarɩ da-kwaga nɩ yɩ dɩ́ daarɩ dɩ́ cɔgɩ ni-mɔrɔ dɩlʋ dɩ́ nabaara bam na tiŋi dɩ Wɛ tɩn? 11 Abam Zuda tiinə bam ywəri Wɛ kwaga nɩ mʋ dɩ á na jɩgɩ wo-zɔɔna á kɩ Zeruzalɛm wʋnɩ dɩdaanɩ Yisɩrayɛlɩ tɩʋ kʋm maama nɩ tɩn. Á ta cɔgɩ cullu á ma‑á biini Wɛ diga kam o na soe tɩn dɩdaanɩ á na kwe kaana balʋ na yǝni ba kaanɩ dwi-gɛ tiinə jwǝnǝ tɩn sɩ ba taa yɩ abam kaana tɩn. 12 Amʋ loori Wɛ mʋ nɩnɛɛnɩ nɔn-dwiə bam kʋntʋ donnǝ maama wʋ́ ti Yisɩrayɛlɩ tɩga baŋa nɩ, dɩ ba na maŋɩ ba jaanɩ pɛɛra ba tui ba paɩ Paŋwa Tu Baŋa-Wɛ tɩn dɩ.
13 Abam ta jɩgɩ woŋo dɩdʋ mʋ á kɩ. Abam yǝni á jeeri Wɛ bimbim dɩm baŋa nɩ mʋ, yɩ á keerǝ á ta daarɩ á lo yi-na barɩ-barɩ. Á laan maa ta á wɩ: Baŋa-Wɛ vɩn sɩ DƖ joŋi á pɛɛra yam. 14 Abam nan ta á wɩ: bɛŋwaanɩ mʋ á pɛɛra yam wʋ su Wɛ yi? Kʋ yɩ Baŋa-Wɛ na maanɩ baarʋ maama na kɩ te o pa kaanɩ wʋlʋ o na di o nɔn-dʋnnɩ maŋa kam nɩ tɩn ŋwaanɩ mʋ. Baarʋ maama joori o lɔ o kaanɩ wʋm kwaga nɩ mʋ, yɩ wʋntʋ yɩ kaanɩ wʋlʋ o na pooli kampwələ Wɛ yigə nɩ o pa‑o tɩn. 15 Wɛ nan kɩ nmʋ dɩdaanɩ n kaanɩ wʋm sɩ á taá yɩ yɩra dɩdʋa mʋ. Kʋ daɩ cɩga na? Bɛ nan mʋ pa DƖ lagɩ sɩ abam taá yɩ woŋo dɩdʋa? Kʋ maama mʋ maŋɩ sɩ abam wanɩ á lʋ biə sɩ ba taa yɩ Wɛ nɔɔna. Nii n yuu nɩ sɩ n yɩ yagɩ kaanɩ wʋlʋ n na di n ma n kɩ kaanɩ n nɔn-dʋnnɩ maŋa kam nɩ tɩn laŋa tɩtarɩ nɩ. 16 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn maa wɩ: «Amʋ culǝ sɩ balʋ a na pɛ ba yɩ dɩdʋa tɩn yagɩ daanɩ. Baarʋ na jɩgɩ pu-sɩŋa kʋntʋ doŋ dɩ o kaanɩ, a vaɩ o ni-taanɩ mʋ.» Kʋntʋ, taá yɩrɩ-na á tɩtɩ. Barʋ yɩ lɔ o kaanɩ wʋm kwaga nɩ.b
Sarɩya dɛ dɩm
17 Abam laan maŋɩ á pa Baŋa-Wɛ yɩra mʋ cɛ dɩ á na karɩ á ŋɔɔnɩ wǝǝnu tɩlʋ tɩn. Á nan ta ta mʋ wɩ á yǝri á na kɩ te á pa DƖ yɩra cɛ tɩn. Kʋ na yɩ te tɩn, abam yəni á ŋɔɔnɩ á wɩ: Baŋa-Wɛ bʋŋɩ lanyɩranɩ mʋ DƖ paɩ lwarɩm-kərə yɩ DƖ ba waarɩ-ba. Abam ta maa bwe á wɩ: «Wɛ dɩlʋ na zɩgɩ dɩ cɩga tɩn wʋ yən mʋ?»